MAADOCO 16 - Wanaadi A'deddu

Töwäämaajo jonno Jesuuquidiito waadonca’jödö

¹ Wäädeetatoojo anooto ’jeje Madía Maacadeena, yeichacoono Madía mmaja, ñäädä Jacoowo dhenö, Saadomé mmaja, cöneejemaicho juu shimi’jotoojo, Jesuuquidiito equeejödö töjöötojo.

² Yaawä tööjanaacadä, semaana waajäntädö anooto wawaanadaawä, tönwanno cönta’to äwa döiña, shii weja’cataame.

³ Tönwannoje dea cönä’döa’to: —¿Änääcö cöwwäiñe täju i’wodiiñacaatai äwa nata’tadö de’wonno? quee cönä’döa’to.

⁴ Yaawä äwa döiña töwä’döa’comjäcä yää täju adai’joto täseeca cöneedantoicho.

⁵ Äwa aca töwoomonga’comjäcä yäätä ääjömaanö cöneedantoicho shuucu, ämu’demjönö dö’se. Nuwaato awä cönä’jaacä, tajääde’de. Jooje cönääcatoncaicho yaawä.

⁶ Ñäädä ääjömaanö cönä’döaacä chäwwäiñe: —Määcatoncatäi. Änwanno mujiiyato Jesuuquidiito, Naasade ñano, ñäädä cuduusa jäcä yaatajoijojo’jödö. Töwö töwaadonca na; a’que na sadä. Eneetäcä’ma chääquejöödö iiñö’jocoomo naadö.

⁷ Ojoncomo; ecammajä’tantäcä’de ñoowanoomadö wwäiñe, Peedhodo wwä mmaja. Chäwwäiñe ecammatääcä’de Caadideea ña odhoowajoiñe iichädö. Iiña meneeato’de, äwwäiñe cönääcamma’döje dea; quee cönä’döaaca ñäädä ääjömaanö ñanno wodiiñamo wwäiñe.

⁸ Yääje mma yaawä tönwanno cöneeja’caicho äwa tacanno. Tamjä’ne cöntonto, tösaadöcoomoje tötäätä’nöngancädäiñe. Tönwanno aneecammajäätö’da cöneiya’to anejjacoomo wwäiñe, tösaade töweijäcäiñe.

Madía Maacadeena wwä Jesuuquidiito wäänejo’jödö

⁹ Töwäämaajo jonno Jesuuquidiito waadonca’jäcä, semaana waajäntädö anooto wawaanadaawä, töwö cönäänejoi awa’deene Madía Maacadeena wwä. Ñäädä cönä’jaacä aacä amoojato odo’sha dhacanno Jesuuquidiito nija’canö’jo’jödö.

¹⁰ Madía Maacadeena cöntämä yaawä, cöneecammajäätöi Jesuuquidiito jadoncomo’jödö wwäiñe. Ñanno wentumje cönä’ja’to, waamonääje.

¹¹ Jesuuquidiito nudä yeichö eta’jäcä töwwäiñe, Madía wwä ene’jödö eta’jäcä mmaja, tönwanno aneecamjö’da cöneiya’to.

Aacä tönoowanoomadö wwäiñe Jesuuquidiito wäänejo’jödö

¹² Yää ’jeje Jesuuquidiito anejjeja mmaja cönäänejoi chea aacä tonoowanoomadö wwäiñe, jata tö’cäi ääma tai iichädaawäiñe.

¹³ Ñanno cöntonto yaawä; töjimmä wwäiñe cöneecammajäätöicho. Ijimma aneecamjö’da dea cönä’ja’to.

Jesuuquidiito wwä tönoowanoomadö anonto’jocoomo

¹⁴ Yää ’jeje mmaja jeene Jesuuquidiito cönäänejoi chea ñanno amoojadooto de’wä tooni’chomo wwäiñe, yääwashinchädaawäiñe. Töwö cömjiiyemeecöicho aneecamjö’da yei’jocoomo jo’tädööje, chäänönge’da chö’tajäätödööcomo weichö jo’tädööje mmaja, töwäämaajo jonno töwaadoncaajä tänennamo’jödö aneecamjö’da yei’jocoomo weijäcä.

¹⁵ Töwö cönä’döaacä chäwwäiñe: —Ojoncomo’de tameedä nono weichö wa’cä. Aashichaato wätunnä ecammajä’täcä’de tameedä soto wwäiñe.

¹⁶ Ñäädä ecaanö’nei, wautisaaje yä’dödö, nääwanaaca’de. Aneecanö’jönö mmaane nännanö’a’de.

¹⁷ Edääje na’de täneemö ecaanö’nnamo ene’ju’to’como: Tönwanno odo’sha nija’canö’jaato’de öwö yeetö joi. Anejja a’deucwe na’deuwaato’de.

¹⁸ Äcääyu annä’a’jäcä, jönaatamoi enga’jäcä jeiñe mma, ääma’da naato’de. Tönwanno tamäädöcoomo nödööaato’de cädäija’como de’cäcäiñe; ñanno naadoncaato’de yaawä; quee cönä’döaacä Jesuuquidiito tönoowanoomadö wwäiñe.

Caju ña Jesuuquidiito wäncu’jödö

¹⁹ Chäwwäiñe yääje töwa’deuwödö’jo Cädhaajotoncomo Jesuuquidiito cönaatadoojoi yaawä caju ña. Wanaadi nnäcä cönaatajiimai yaawä, ämu’demjönö dö’se.

²⁰ Ñanno ñoowanoomadö cöntonto yaawä, tameedä yeichö wa’cä aashichaato wätunnä cöneecammajäätöicho. Cädhaajotoncomo Jesuuquidiito dea töni’wa’täiñe cönä’jaacä. Ta’deddu töneene’ju’jo töweiye cönä’jaacä täneemö aashichaato que. Amén.