MAADOCO 11 - Wanaadi A'deddu

Jeduusadén ña Jesuuquidiito wä’dö’jödö

¹ Yaawä Wetaajé ña, Wetaaniya ña mmaja ä’döjai töwä’döa’comjäcä, amoinche’da cönä’ja’to Jeduusadén ñano jäcä, Odiiwo ’jödö je’taca. Yaawä Jesuuquidiito cönaanontoicho aacä tönoowanoomadö.

² Töwö cönä’döaacä chäwwäiñe: —Ojoncomo jataaca, mädä cöje’tacaiñe nääneaadö aca. Iiña äwä’döa’comjäcä cawaayu nnedö’cä i’wadö’taajä medantaato’de, ta’cu’täjöönö. I’wadööcatääcä’de, sadäädä mene’täiye.

³ Anejja wwä adheecamma’ja’comjäcä, “ ¿Ane’cotoojo mi’wadööcaato;” ca’jäcä, edääje caichäcä’de chäwwä: “Ñaa edhaajä nijumma; eduuwa mma nene’ja dea;” quee caichäcä’de; quee cönä’döaacä Jesuuquidiito ñanno aaco’como wwäiñe.

⁴ Ñanno cöntonto yaawä. Jödo’na cawaayu nnedö’cä i’wadö’taajä cöneedantoicho yaawä mönaatajo, ääma dö’tä. Tönwanno cöni’wadööcaicho.

⁵ Yaawä anejjacoomo yäätoncomo cönä’döa’to chäwwäiñe: —¿Ane’cäämö mödööato? ¿Ane’cotoojo mi’wadööcaato dea mä’dä cawaayu nnedö’cä? quee.

⁶ Ñanno cöneccujä’a’to yaawä Jesuuquidiito necamma’jödö nönge dea. Yaawä ñanno soto cönaadojoicho chäwwäiñe.

⁷ Ñoowanoomadö cönaadoicho yaawä Jesuuquidiito döiña. Töwoomöcoomo cönnöicho ye’wä. Yaawä Jesuuquidiito cönäncui ye’wä.

⁸ Jooje soto töwoomöcoomo cönaajujiiñajäätöicho ääma tai, yäätajaatojooje. Anejjacoomo chuu adö cönaacä’jätöicho; yää mmaja ääma tai cönnöicho dea.

⁹ Awa’de’como wötäädö, möcääcä’ja’como mmaja cöncä’tömjä’a’to; cönä’döa’to: —Aashichaato nä’döi. Aashichaato määdhä, Cädhaajotoncomo eetö joiño we’ajä.

¹⁰ Aashicha na’de cadai’choncomo Dawí cajiichaanaje yeichojo ne’a’dedö. Aashichaato ñäädä Wanaadi; quee cöncä’tomjä’a’to.

¹¹ Jesuuquidiito cönä’döi yaawä Jeduusadén ña. Wanaadi weichojo taca cönoomomöi. Tameedäädä töwwä emmenca’jäcä Wetaaniya ña cöntämä yaawä ñanno amoojadooto de’wä aaco’como tönoowanoomadö jadäiñe, co’mannäje yeijäcä.

Waju’nä täjössemjönö euwö’jödö

¹² Yää jenamma naadöje, Wetaaniya ñanno töweejödaawäiñe, Jesuuquidiito ämiije cönä’jaacä.

¹³ Amoinchenno waju’nä ñaatö’taajä cöneedantäi; taque cönä’jaacä. Töwö cöntämä chäwwadäädä täjösse yeichö ene. Yöiña töwä’döa’jäcä täjösse’da cöneedantäi, dhadö’jödö mma jooje, yeejössataatojo cu’nädööjönö yeijäcä.

¹⁴ Yaawä Jesuuquidiito cönä’döaacä waju’nä wwä: —Adheejedöödö anaame’da soto naato’de yeichöje; quee cönä’döaacä. Ñoowanoomadö cöneetaicho yääje yä’dödö.

Wanaadi weichojo tacanno töwäätätöijaamo ija’canö’jo’jödö

¹⁵ Yääje mma yaawä Jeduusadén ña cönä’döicho. Wanaadi weichojo taca töwoomonga’jäcä Jesuuquidiito cönaajäntäi yaawä töwäätätöijaamo ija’canö’jodööcomo. Jödaata chamjiyaacannamo meesaichomo cönaawotönnacaajätöi, jaduuma ejeemajonnamo a’täichomo mmaja.

¹⁶ Mösooma anaadojo’da töwö cönä’jaacä yaawä Wanaadi weichojo tai.

¹⁷ Edääje töwö cönoowanooma’to: —Wanaadi a’deddu imennaajä jäcä yääje nä’döa: “Ömmai nätä’täja’de tameedä soto Wanaadi wwä ya’deuto’comooje;” quee nä’döa imennaajä. Änwanno ’quene mödööato tämeena’como weicho’comooje; quee cönä’döaacä Jesuuquidiito.

¹⁸ Yääje yä’dödö cöneetaicho ñanno Wanaadi wwä töwa’deuwaamo edhaajotoncomo, judhío owaanomannamo mmaja. Tönwanno Jesuuquidiito emaatojo töntö’tamme’que cönä’ja’to tönnontä töweijäcäiñe, tameedä soto ñeecammajäätödö jooje eta’se yeichomjäcä mmaja.

¹⁹ Yaawä cho’monga’jäcä Jesuuquidiito cöntämä Jeduusadén ñanno.

Waju’nä yu’ta’jödö

²⁰ Yää jenamma jenaadäne ääma tai töötädaawäiñe, yää waju’nä, Jesuuquidiito neuwö’jödö cöneedantoicho tuyu’ta yeichö, imiichö jadäädä.

²¹ Peedhodo cöntö’tai yaawä waju’nä wwä Jesuuquidiito wa’deuwö’jödö jäcä. Töwö cönä’döaacä Jesuuquidiito wwä: —Eneecä’ma, Owaanomaanei, mädä waju’nä aneuwö’jödö tuyu’ta naadö.

²² Jesuuquidiito cöneccujä’acä; cönä’döaacä chäwwä: —Wanaadi ecaanö’täcä.

²³ Chäänönge yääje wä’döa äwwäiñe, edääje anejja wä’döa’jäcä naadö naane’ edä jöö wwä: “Ääsecaacä dama ’cwaca;” ca’jäcä, chäwwä ecaanö’a’jäcä ya’deuwö’jödö nönge nä’döa’de yaawä, yääje töwä’dö’jödö nönge ä’döjai yeichö aneecamjö’da’da yeiya’jäcä mmaja.

²⁴ Yääje yeijäcä yääje wä’döä äwwäiñe, tameedä Wanaadi wwä ane’catäädöcoomo ecaanö’täcä utuudu; yaawä äwwäiñe nä’tua’de.

²⁵ Wanaadi wwä awa’deuwödaawäiñe encwanno’jotääcä anejja jäcä cone’da aweichöcoomo. Yaawä Oomotoncomo caju ñano encwanno’jojai ña änwanno ocoone’nadiiyöcoomo.

²⁶ Änwanno anencwanno’jo’da aweiya’comjäcä, Oomotoncomo caju ñano anencwanno’jo’da mmaja na’dede ocoone’nadiiyöcoomo; quee cönä’döaacä Jesuuquidiito.

¿Anääcö woije mädä tönnöe määnene?

²⁷ Yääje mma yaawä Jeduusadén ña cönennacaicho dea. Wanaadi weichojo taca Jesuuquidiito wäämannäjöödawä yöiña cöneejoto Wanaadi wwä töwa’deuwaamo edhaajotoncomo, judhío owaanomannamo mmaja, inchoncomo mmaja.

²⁸ Tönwanno cöneecamma’joicho: —¿Änääcö woije tönnöe määnene? ¿Änääcö cuntui mädä tödöötojo äwwä? quee cönä’döa’to.

²⁹ Jesuuquidiito cöneccujä’a’to; cönä’döaacä chäwwäiñe: —Öwö maneecamma’joto’ñojo awa’de. Äwwäiñe yeccujä’a’jäcä öwö wecamma’de yaawä mädä dödö jäcä yaanontänei’jödö.

³⁰ ¿Änääcö woije Juan wautisaaje soto tönnöeiñe cönä’jaacä? ¿Wanaadi woije ’ja, soto woijeene? Ecammatääcä; quee cönä’döaacä Jesuuquidiito.

³¹ Yaawä ñanno judhío tönwannoje dea cönäätäccujä’a’to; cönä’döa’to: —¿Aaquene queccujä’ato? “Wanaadi woijato cönä’jaacä;” ca’jäcä cöwwäiñe, töwö yääje ä’döjai ña yaawä: “ ¿Ane’que’nei dha’deddu aneecamjö’da meiya’quene, yääje yeiya’jäcä:” quee.

³² Yaawääne’ soto woijatooje e’täjai’cha mmaja caato dea; quee cönä’döa’to. Tönwanno soto woijatooje e’tä’se’da cönä’ja’to soto tönnontä töweichomjäcä, Wanaadi wa’deuwödö ecammaneije Juan Wautiita töneecanö’e soto weichomjäcä.

³³ Yaawä Tönwanno cönä’döa’to Jesuuquidiito wwä: —Ñaa owaanäcä’da na; quee. Jesuuquidiito cönä’döaacä chäwwäiñe: —Öwö mmaja aneecamma’da wa dea edä tödöödö jäcä yaanontänei’jödö; quee cönä’döaacä.