MAADOCO 10 - Wanaadi A'deddu

Töjiiñamo e’nomjadö jäcä Jesuuquidiito nowaanoma’jödö

¹ Yääje mma yaawä Jesuuquidiito cönääma’täi Cajeedamu ñanno; cöntämä Judheea chäcä. Joodadán mänsemjona cönä’döi yaawä. Iiña soto cöne’jummaicho dea yöiña. Töwö cönoowanooma’to yaawä, töweichö nöngeedä.

² Yaawä anejjacoomo jaadiseeo cöneejoto chäwwadäädä. Tönwanno oneejadööje mmädä cöneecamma’joicho dhanwa töjiiñamo e’nomjajai yeichö jäcä.

³ Yaawä Jesuuquidiito cönä’döaacä chäwwäiñe: —¿Aaquene Moisé adhaanontätääne? quee.

⁴ Tönwanno cönä’döa’to: —Moisé jajeeda tömmennäjo cönä’jaacä e’nomjaaje, töwääto’nomja töweichöcoomo ene’ju’tojo; quee cönä’döa’to.

⁵ Jesuuquidiito cönä’döaacä chäwwäiñe: —Töwäätuujacoone’da aweijäcäiñe Moisé yää waanontänä cömmennäi.

⁶ Awa’deene mmaane, tameedä tödööajä naadö amoode’nädaawä, Wanaadi cönnöi dhanwa wodi acä.

⁷ Yääje yeijäcä dhanwa tumö shancwajai ña, senö mmaja, töjiiñamo jadä töwä’dödö wetä.

⁸ Yaawä aacä töweichaameiñe tooniño nönge naato’de.

⁹ Yääje yeijäcä Wanaadi nejoodöjo’jödö soto änsancwajoi’che; quee cönä’döaacä Jesuuquidiito.

¹⁰ Yää ’jeje ä’saca töwoomonga’comjäcä ñoowanoomadö cöneecamma’joicho yää jäcä dea.

¹¹ Töwö cönä’döaacä chäwwäiñe: —Ñäädä töjiiñamo e’nomjanei, anejja wodi yö’tä yä’döa’jäcä yaawä, conemjönö nödööa töjiiñamo jäcä.

¹² Wodi mmaja töiño e’nomja’jäcä, anejja dhanwa dö’tä yä’döa’jäcä yaawä, töwö mmaja conemjönö nödööa dea töiño jäcä; quee cönä’döaacä Jesuuquidiito.

Mudeeshi’chä jäcäiñe Wanaadi wwä Jesuuquidiito wa’deuwö’jödö

¹³ Yääje mma yaawä soto cönne’a’to mudeeshi’chä Jesuuquidiito wwadäädä, ye’cäcäiñe tamäädö tödöödö wetä chäwwä. Yaawä ñoowanoomadö cömjiiyeme’ja’to ñanno mudeeshi’chä edhaamo.

¹⁴ Yää eneea’jäcä Jesuuquidiito cone’da cönä’jaacä; cönä’döaacä chäwwäiñe: —Neejö’ña’to mudeeshi’chä öwwadäädä; monoowatäätäi. Canno nönga’como ñanno Wanaadi sotoi.

¹⁵ Chäänönge yääje wä’döa äwwäiñe, mude’cä’cä tönnöe töweiye naichöje Wanaadi acaajichaanaichomooje ännö’da aweiya’comjäcä, Wanaadi sotoije eijai’cha maato; quee cönä’döaacä Jesuuquidiito.

¹⁶ Yaawä töwö mudeeshi’chä tänaawä cönnöicho. Wanaadi wwä aashichaato cönnöjoi chääjäcäiñe, tamäädö ye’cäcäiñe tödööancädä.

Aäjömaanö tönsomaacato wei’jödö

¹⁷ Yäätonno yääma’tädaawä dhanwa cöneeca’tömöi Jesuuquidiito wwadäädä. Tä’mudhe cönä’döi ije’taca; cöneecamma’joi: —Owaanomaanei aashichaato, ¿ane’cäämö tödööjai wanä weichö töwaatamemjönö chaana’catoojoje? quee cönä’döaacä.

¹⁸ Jesuuquidiito cönä’döaacä chäwwä: —¿Ane’cotoojo aashichaatoje cä’taanä? Aashichaato ’je’da na soto. Wanaadi mma ñäädä aashichaato.

¹⁹ Waanontänä odhoowanääcä na, yää: “Mä’masuuduijai; soto maneemai; adheememöi; jönaawä soto maneementäi; mätäncu’täi; oomo aashicha tödööcä, aanö mmaja;” quee naadö; quee cönä’döaacä Jesuuquidiito.

²⁰ Yaawä ñäädä cöneccujä’acä; cönä’döaacä: —Owaanomaanei, tameedäädä mädä waanontä’jä woije wäänene, mude’cä’cäje weichö jonnoto’jödöödä; quee cönä’döaacä.

²¹ Jesuuquidiito tujunne cöneene’maacä ñäädä dhanwa. Töwö cönä’döaacä chäwwä: —Töweiye dea na äwwä tödööemö. Tameedä äwwono ejeemajoota, änsomaadö, anaudädö mmaja. Chääje’jödö u’jä’cä yaawä a’ca’como wwäiñe, caju ñaane tönsomaaque meiye. Ä’cäde’de yaawä; öwö umjummadö woije eichä’de yaawä. Cone’da männöi’che jääcäinchädä äwäntunamjödö, cuduusa jäcä adhaajoijodö jadä’jödöödä; quee cönä’döaacä Jesuuquidiito.

²² Yää etaadö’jo ñäädä dhanwa jooje cone’da cönä’döjoi. Wentumje cöntämä yaawä jooje tönsomaaque töweijäcä, jooje tönaudäque töweijäcä mmaja.

²³ Yaawä Jesuuquidiito cönä’jedennacai soto wwadäädäiñe; cönä’döaacä tönoowanoomadö wwäiñe: —Tadaawaajuje na tönsomaaca’como wwäiñe Wanaadi töcaajichaanaichomooje tödöödö, tönaudäca’como wwäiñe chäänönge mmaja; quee cönä’döaacä.

²⁴ Ñoowanoomadö cönääcatoncaicho yaawä dha’deddu eta’jäcä. Yaawä Jesuuquidiito cönä’döaacä chäwwäiñe: —Önnacoomo’cä, tadaawaajuje na tönsomaadö ijummanei wwä Wanaadi töcaajichaanaije tödöödö.

²⁵ Macuusa dha’tadö ai wa’shadi omonque’jönö töweiye naichö naane’; töwaacö’je mma tönsomaacato wwä Wanaadi töcaajichaanaije tödööque’jönö na; quee cönä’döaacä Jesuuquidiito tönoowanoomadö wwäiñe.

²⁶ Tönwanno jooje’cä mma cönääcatoncaicho yaawä. Tönwannoje dea cönä’döa’to: —¿Änääcööne ääwanaacajai ñai, yääje yeiya’jäcä?

²⁷ Yaawä tönoowanoomadö ene’mancädäiñe Jesuuquidiito cönä’döaacä chäwwäiñe: —Soto woije mma ääwanaacajai’cha weiñä nai, Wanaadi woije mmaane; tameedä tödööjaiñe töwö yeiyajä; quee cönä’döaacä.

²⁸ Yaawä Peedhodo cönä’döaacä chäwwä: —Ñaa mmaane tameedä ñaa cöne’nomjai ajaadä töweichö wetä.

²⁹ Jesuuquidiito cönä’döaacä chäwwäiñe: —Chäänönge yääje wä’döa äwwäiñe, ñäädä, öwö jääcäinchädä tömmai ñannei, tacontomo, tuduichomo jeiñe mma, töjaadui’chomo jeiñe mma, ñäädä tumö, senö ñännei jeiñe mma, töjiiñamo, tönnacoomo jeiñe mma, tönaudädö jeiñe mma, öwö jääcäinchädä yää ñänga’jäcä, aashichaato wätunnä ecammajäätödö jäcäinchädä mmaja,

³⁰ ñäädä immai ’je’da’da na’de, dhacontomo ’je’da’da mmaja, yuichomo ’je’da’da mmaja, ijaadui’chomo ’je’da’da mmaja na’dede; senque’da’da mmaja na’dede, iiñacoomo ’je’da’da mmaja, ñaudädö ’je’da’da mmaja; töwäntunaanö’taame mma’ne. Yaawä äcuude weiñawä yeichö töwaatamemjönö nä’tua’de chäwwä.

³¹ Eduuwa täneejuque naatoodö dhantai ema’jödööje naato’de. Ñanno eduuwa wentumje naatoodö mmaane dhantai täneejuque naato’de; quee cönä’döaacä Jesuuquidiito.

Töwäämatoojo jäcä Jesuuquidiito necammajäätö’jödö mmaja

³² Yaawä tönwanno ääma tai cönta’to, Jeduusadén ña iichädööcomo. Jesuuquidiito dhowaajoiñe cöntaacä. Ñoowanoomadö töwääcatonca cönä’ja’to; inchäconcomo wötäädö tösaadeiñe cönä’ja’to dea. Yaawä Jesuuquidiito töudäje cönaadoicho tönoowanoomadö, ñanno amoojadooto de’wä aaco’como. Töwö cönaajäntäi yaawä töjääcä yeeja’do’tojo ecammajäätödö;

³³ cönä’döaacä: —Jeduusadén ña cöötaato eduuwa. Iiña Soto nnedö nä’tuja’de Wanaadi wwä töwa’deuwaamo edhaajotoncomo wwäiñe, judhío owaanomannamo wwäiñe mmaja. Tönwanno emaadö na’de’taato’de. Judhíojöncomo wwäiñe nu’aato’de yaawä.

³⁴ Ñanno nenno’jä’aato’de, neta’däjä’aato’dede. Tönwanno naiju’jä’aato’de yaawä; yää ’jeje nemaato’dede. Yaawä aaduwaawä anoototo ai töwö naadonca’de; quee cönä’döaacä Jesuuquidiito.

Jacoowo, Juan ne’cato’jocoomo

³⁵ Yääje mma yaawä Jacoowo, Juan mmaja cöneejoto Jesuuquidiito wwadäädä; ñanno cönä’ja’to Seewedheeo nnacoomo. Tönwanno cönä’döa’to: —Owaanomaanei, ñaa necammadö woije tödööjo’se ñaa na äwwä; quee cönä’döa’to.

³⁶ Jesuuquidiito cönä’döaacä chäwwäiñe: —¿Ane’cäämö tödööjo’se maato öwwä? quee.

³⁷ Yaawä tönwanno cönä’döa’to: —Cajiichaanaje äwä’döa’jäcä ännäcä ñaa nataajima’ñojo’de, ääjato; quee cönä’döa’to.

³⁸ Jesuuquidiito cönä’döaacä chäwwäiñe: —Odhoowanoojöncomo me’ca’ato. ¿Öwö neenedööje töweiyemööje naadö emjai maato dea änwanno, yää wäntunaanö’tojo? ¿Öwö wautisaaje wä’döjootojo que mmaja ca wautisaaje ä’döjoojai maato dea?

³⁹ Tönwanno cönä’döa’to: —Ee, ä’döjai mmaja. Yaawä Jesuuquidiito cönä’döaacä chäwwäiñe: —Yääje dämma na. Öwö neenödö mmaja mengato’de, öwö wautisaaje wä’döjootojo que mmaja wautisaaje mä’döjaato’dede.

⁴⁰ Yääje yeichaame önnäcä awaatajiimato’como ecammajai’cha wa äwwäiñe. Ñanno wwäiñe mmaane yää nä’tua’de, chääjäcäinchädäiñe tösooma naadö wwäiñe; quee cönä’döaacä Jesuuquidiito chäwwäiñe.

⁴¹ Yää eta’jäcä ñanno amoojado’como Jesuuquidiito nowaanomaadö wwäiñe, tönwanno cone’da cönä’ja’to yaawä Jacoowo, Juan jäcäiñe.

⁴² Jesuuquidiito tönoowanoomadö cöna’dejjaicho yaawä; cönä’döaacä chäwwäiñe: —Änwanno odhoowanääcäiñe Wanaadi dhowoonojöncomo edhaajotoncomo o’jodhe töwei’she yeichöcoomo. Ñanno cajiichaanacoomo tösootoichomo jäduuje tönaanontäjä’e weneeneto.

⁴³ Änwanno mmaane yääje eijai’cha maato. Ñäädä adhantawäiñe o’jodhe töwei’shato töjimmä anoonöcoomoje eijai ña.

⁴⁴ Ñäädä adhantawäiñe cajiichaanaje töwei’shato töjimmä wwäiñe tödööjä’neije nei’ñojo.

⁴⁵ Soto nnedöödä cöneejäne’, soto anontäneichomooje’da, chäwwäiñe tödööneije mmaane, töwä’tudu wetä mmaja jooje soto ewaanacaato’comooje; quee cönä’döaacä Jesuuquidiito.

Waatimeeo enu’tä’jödö

⁴⁶ Yääje mma yaawä Jeedicó ña Jesuuquidiito cönä’döi tönoowanoomadö jadäiñe; jooje anejjacoomo soto mmaja chääjadäiñe cönä’ja’to dea. Yää ’jeje yäätonno töötädaawäiñe tänuuquemjönö cöneedantoicho, ääma taawä yaatajiimaajä, waateme’näje; Waatimeeoje töwö chäätö cönä’jaacä, Timeeo nnedö.

⁴⁷ Jesuuquidiito Naasade ñano yää ai yeeja’dätäädö eta’jäcä ñäädä wwä, töwö cönaajäntäi yaawä töcä’tömjätöödö; cönä’döaacä: —Wentumje cäneecä Jesuuquidiito, amäädä Dawí weichö: quee cönä’döaacä.

⁴⁸ Dhantai yäätoncomo cöneuwa’to; cöneeta’jöichaja’to. Yääje yeichaame jooje’cä mma töwö cöncä’töngacä: —Wentumje cäneecä, amäädä Dawí weichö; quee.

⁴⁹ Yaawä Jesuuquidiito cöneedennai; cönä’döaacä soto wwäiñe: —A’dejjatääcä ñäädä tänuuquemjönö; quee. Ñanno soto cöna’dejjaicho yaawä; cönä’döa’to: —Ta’cwaiñe eichä eduuwa; aanöncä, adha’dejja; quee.

⁵⁰ Yaawä ñäädä tänuuquemjönö taiñamöi cunummichai; cönammöi yaawä Jesuuquidiito wwadäädä töwaajammödö wetä.

⁵¹ Yaawä Jesuuquidiito cönä’döaacä chäwwä: —¿Aaquene äwä’döjo’se manä öwwä? Ñäädä cönä’döaacä yaawä: —Äwwä wäänu’täjo’se wa; quee cönä’döaacä.

⁵² Jesuuquidiito cönä’döaacä chäwwä: —Äjääne eduuwa; äwwä ecamjödö weijäcä määjichö’täi; quee. Yaawä dea mma ñäädä töneene cönä’döi. Jesuuquidiito jadä cöntaacä yaawä ääma tai.