MAADOCO 1 - Wanaadi A'deddu

Juan Wautiita necammajäätö’jödö

¹ Edä yää Jesuuquidiito wätunnäi aashichaato waajäntädö, ñäädä Wanaadi nnedö.

² Edääje cömmennäi Isaía, ñäädä Wanaadi wa’deuwödö ecammanei: Öwö, Wanaadi, yaanonö wanonta’de odhoowajo, adheemadö choonecaaneije.

³ Töcä’de dha’deddu nääta’de jata ’jemjönö aca: “Choonecaatäcä Cajiichaana eemadö; chäämadö sha’duminchatääcä;” quee dha’deddu nääta’de; quee cömmennäi Isaía.

⁴ Mädääje Juan Wautiita cönä’jaacä jata ’jemjönö aca, wautisaaje soto tödöödöcoomoje. Töwö töwä’döe cönä’jaacä: —Wautisaaje ä’döjootäcä; ätö’tajäätödööcomo sha’duminchatääcä, ocoone’nadiiyöcoomo ätäncwanno’joiye; quee töwä’döe cönä’jaacä.

⁵ Tameedä Judheea ñancomo, Jeduusadén ñancomo mmaja, töötä cönä’ja’to Juan döiña, ñeecammajäätödö eta. Tönwanno wautisaaje töwä’döjo cönä’ja’to chäwwä Joodadán ’cwawä, töcoone’nadiiyöcoomo ecammadö’jo.

⁶ Juan womö cönä’jaacä cameeyu ’jotö töca’ajä. I’ya’mötö cönä’jaacä odoocojaato ji’jämjödö. Dhotö cönä’jaacä cödaatai. Yoocödööje cönä’jaacä wanä weccudui.

⁷ Edääje töneecammajä’e cönä’jaacä soto wwäiñe: —Öncäcä ne’a jäduujato, öwö ye’jodhaato. Shaajatui shaacaneije jadä’jödöödä eijai’cha wa, ye’jodhe töwö yeijäcä.

⁸ Öwö wautisaaje männöaato tuna que; töwö mmaane Epíiditu Santo que wautisaaje ayöödöaato’de; quee töneecammajä’e cönä’jaacä Juan Wautiita.

Wautisaaje Jesuuquidiito wä’döjo’jödö

⁹ Yääje mma yaawä Jesuuquidiito cönääma’täi Naasade ñanno, yää Caadideea nono de’wono jata. Töwö wautisaaje cönä’döjoi Juan wwä, Joodadán ’cwawä.

¹⁰ Na’cwacanno töwäncudaawä Jesuuquidiito cöneeneaacä yaawä caju wata’ducaadö. Epíiditu Santo wä’tädö cöneedantäi yaawä jaduuma nönge, töde’wä yä’tädö.

¹¹ A’deu cönäätaacä yaawä caju ña: —Önnedö umjummadö amäädä; ta’cwaiñe wa äjääcä; quee cönäätaacä.

Jesuuquidiito wä’yunaacajo’jödö

¹² Yääje mma yaawä Jesuuquidiito cöntämä jata ’jemjönö aca, Epíiditu Santo nanontädö woije.

¹³ Yäätä töwö cönä’jaacä aacä soto anooto, odoocoja’como jadäiñe. Yaawä Caajuushawa cuiñunaacaacä. Yää ’jeje Wanaadi amoodedö cöni’wa’ta’to.

Jesuuquidiito waajäntä’jödö tötaadawaajui tödöödö

¹⁴ Yääje mma yaawä jedeesoje Juan wä’döja’jäcä, Jesuuquidiito cöntämä Caadideea ña, aashichaato wätunnä ecammajä’ancädä Wanaadi töcaajichaanaije tödöödö jäcä.

¹⁵ Töwö töwä’döe cönä’jaacä: —Chu’nädö aca nä’döi eduuwa. Amoinche’da nä’döi eduuwa Wanaadi acaajichaanaichomooje yä’dötoojo. Ätö’tajäätödööcomo sha’duminchatääcä; ecaanö’täcä aashichaato wätunnä; quee töwä’döe cönä’jaacä.

Jesuuquidiito wwä na’cwacancomo i’yännamo a’dejja’jödö

¹⁶ Caadideea cu’jäi jacääcä töötädaawä Jesuuquidiito cöneejodöi Simón, tacoono Antedé acä. Jaji emaajätöödöje cönä’ja’to na’cwaca, na’cwacancomo i’yännamooje töweijäcäiñe.

¹⁷ Yaawä Jesuuquidiito cönä’döaacä chäwwäiñe: —Ma’chomo jaadä, soto owaanomannamooje männötäiye.

¹⁸ Yaawä dea mma töjaajiyööcomo cöneetömaicho; Jesuuquidiito jadä cöntonto yaawä.

¹⁹ Mänseedä’cä Jesuuquidiito wöta’jäcä Jacoowo daja cöneejodöi yaawä, Seewedheeo nnedö, dhacoono Juan mmaja. Cudiiyada awä cönä’ja’to töjaajiyööcomo coneecadööje.

²⁰ Ñanno daja Jesuuquidiito cöna’dejjaicho dea. Yaawä tumöötoncomo cönnämäicho cudiiyada aca, shootoi jadä; Jesuuquidiito jadä cöntonto yaawä.

Odo’sha ’jano wei’jödö

²¹ Yääje mma yaawä Cajeedamu ña cönä’döicho. Wäädeetatoojo anooto awä Jesuuquidiito soto cönoowanooma’to we’jummatoojo taca.

²² Ñanno soto cöneeta’jöjäätöicho yaawä jäduuje owaanomaadö weijäcä chäwwä, cajiichaana nowaanomaadö nönge, judhío owaanomannamo nowaanomaadö nönge’da.

²³ Yäätä we’jummatoojo taca cönä’jaacä dhanwa odo’sha ’jano. Töwö töcä’de cöncä’tömöi:

²⁴ —¿Ane’cotoojo ñaa aquiima’se mannea, Jesuuquidiito, Naasade ñano? ¿Ñaa acoichajo ca meejä? Yoowanääcä dajaane ma, Wanaadi anoonö aashichaatoje aweichö; quee cönä’döaacä ñäädä odo’sha ’jano.

²⁵ Jesuuquidiito odo’sha cöneeta’jöichajoi yaawä; cönä’döaacä chäwwä: —Äucwätä’da eichä; adheeja’cacä dhacanno; quee cönä’döaacä.

²⁶ Yaawä odo’sha ñäädä dhanwa tumjunne’da cöneenönnäi’chäi. Dhacanno cöneeja’cai yaawä töcä’tömjä’ancädä.

²⁷ Tameedä soto cönääcatoncaicho yaawä. Tönwannoje dea cönä’döa’to: —¿Aaqueneeto mädä? ¿Ane’cäämö nöngato wätunnä mädä? Töwö odo’shancomo jadä’jödöödä nanontaato; tönwanno töneeta dha’deddu; quee cönä’döa’to.

²⁸ Yaawä Jesuuquidiito ecaadö cöneecatai tameedä Caadideea weichö wadaadäädä.

Peedhodo wo’jödö adonca’jödö

²⁹ Yääje mma yaawä we’jummatoojo tacanno töweeja’ca’comjäcä Jesuuquidiito cöntonto yaawä Simón, Antedé mmai chacaiñe. Jacoowo mmaja, Juan mmaja, cöntonto chääjadä.

³⁰ Simón wo’jödö cönä’jaacä tä’wötö jo, wedö’näje. Tönwanno cöneecammaicho Jesuuquidiito wwä.

³¹ Yaawä Jesuuquidiito cöntämä chäwwadäädä; dhamäädö jäcä cönannäjöi. Yaawä dea mma eccö’da cönä’döi ñäädä wodi. Chääwanshiñööcomo cöneejodöi yaawä.

Jooje soto adonca’jocoomo

³² Yaawä cho’momöödawä, tööje yä’döa’jäcä, Jesuuquidiito döiña soto cönne’a’to tameedä cädäija’como, odo’sha ’ja’como mmaja.

³³ Tameedä yää jataawoncomo cöne’jummaicho mönaatajo.

³⁴ Töwö Jesuuquidiito cönaadoncaicho jooje cädäija’como, anejjeja’como chäädäichöcoomo. Jooje odo’shancomo mmaja cömja’canö’joicho dea. Töwö odo’shancomo ana’deujotäiñe’da cönä’jaacä, dhowaanäcäiñe töweijäcä.

Caadideea ña ecammajäätö’jödö

³⁵ Yaawä jenaadäädä, tööje yeichö dea Jesuuquidiito cönä’jäi; cöntämä jata tö’cäi. Yäätä Wanaadi wwä cöna’deuwacä.

³⁶ Yaawä Simón töjimmä jadäiñe Jesuuquidiito ujiiye cöntonto.

³⁷ Töwwäiñe ejoodöa’jäcä cönä’döa’to chäwwä: —Tameedä soto adhuujiyaato; quee.

³⁸ Jesuuquidiito cönä’döaacä chäwwäiñe: —Ma’chomo aneiñaja, jata amoinchemjönö aca; iiña daja wecammajäätöiyede, mädääjatooje we’eetö’da; quee cönä’döaacä Jesuuquidiito.

³⁹ Yaawä Jesuuquidiito cönäämannä’acä tameedä Caadideea weichö wadaadäädä, we’jummatoojo taca ecammajä’ancädä, odo’shancomo ija’canö’jancädä mmaja.

Woi ’jano ejiichö’tä’jödö

⁴⁰ Yääje mma yaawä dhanwa woi ’jano cöneejä Jesuuquidiito wwadäädä. Tä’mudhe cönä’döi; cönä’döaacä: —Yeejichö’tä’se aweiya’jäcä yeejichö’täjai ma; quee cönä’döaacä.

⁴¹ Jesuuquidiito wentumje cöneene’macä; tamäädö que cönaajojoi; cönä’döaacä chäwwä: —Adheejichö’tä’se wa; nännamjö’ñojo mädä owoichö; quee.

⁴² Yaawä dea mma yoichö cöne’jöi; aashicha cönä’jaacä yaawä.

⁴³ Yaawä Jesuuquidiito cönenno’jai; cönä’döaacä chäwwä:

⁴⁴ —Soto wwäiñe maneecammajäätöi’che mädä äjääcä wödöichö. Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, töwääjichö’tä aweichö ene’ju’to’me, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.

⁴⁵ Yääje Jesuuquidiito wä’dö’jödö weichaame ñäädä dhanwa cöneecammajäätöi tameedä soto wwäiñe. Yääje yeijäcä soto neneedöcoomoje Jesuuquidiito täjai’cha cönä’jaacä jataaca. Jata tö’cäcä mmaane töwäämannä’e cönä’jaacä, soto ’jemjönö ai. Yääje yeichaame tameedä jata waadoinchomo töötä dea cönä’ja’to yöiña.