JUUDHA 1 - Wanaadi A'deddu

Yaajäntä’jödö

¹ Öwö Juudha, Jesuuquidiito anoonö, Jacoowo acoono, edä jajeeda wimenna äwwadäädäiñe, änwanno Cumöötoncomo Wanaadi na’dejjadö, shootoije shooma’como. Änwanno Jesuuquidiito jadoonoje aweijäcäiñe tädai’chä maato chäwwä.

² Wentumje Wanaadi wwä adheene’seiñe wa; wä’caaje’da mmaja äwwäiñe yeejamö’se wa dea täncanoode’da aweicho’como, wä’jummanä mmaja.

Chäänöngemjönö jäcä owaanomannamo

³ Jimmä umjummadö, cöwääwanaacadööcomo jäcä äwwadäädäiñe imennä’se wä’jaaquennö’je, yaawääne’ tujunne’cä jeene öwwä cöntö’taacä äwäätuujadööcomooje imennädö. Edääje äwäätuuja’seiñe wa: Töweewänä’tääne adheewänä’tätääcä aashichaato wätunnä jäcäinchädä, yää Wanaadi sotoi wwäiñe tooniye yeichöödäje cönä’tuichö.

⁴ Anejjacoomo Wanaadi woijemjöncomo tacaade’da cantawäiñe yääwaaca’como töweiye naato. Jenaadä dea ñanno wännanö’to’como cönäätäcammai Wanaadi a’deddu imennaajä jäcä. Tönwanno aashicha Wanaadi weichö tönnöe weneeneto conemjönö tönnöto’comooje. Ñäädä Wanaadi, tooniyaano Cädhaajotoncomo, tömjo’ma weneeneto, Cädhaajotoncomo Jesuuquidiito mmaja.

⁵ Odhoowanääcäiñe yeichaame eduuwa mäntö’tamme’jaato dea. Ñäädä Wanaadi Ejiito ñanno Iisadaaediita ewaanaca’jocoomo weichaame äcuude cömjajoicho ñanno aneecanö’jöncomo’jödö.

⁶ Ñanno Wanaadi amoodedö töweicho’como cho’nanoojöncomo’jödö töjaatadööcomo caju ñano cöne’nomjaicho. Eduuwa tönwanno Wanaadi woije dea tööjano’taca jedeesoje naato, yeichöje, cadheena que tömööjä’eiñe, wätä’maminchajootojo anootoi’chädö aca tödööene.

⁷ Sodhooma ñancomo cönä’ja’todö naane’, Comooda ñancomo mmaja, anejja amoinchemjönö jataawoncomo mmaja; tönwanno Wanaadi amoodedö wei’yejeiñe mmaja tömaasuduicha töweiye cönä’ja’to, anejja chäänöngemjönö mmaja tönnöe cönä’ja’to dea. Yää cöneejemaicho wa’to töwaatamemjönö que töwäätä’maminchajoodöcoomo que. Yääje yei’jocoomo na cöwä’se’jadoojoto’comooje.

⁸ Yääje yeichaame ñanno chäänöngemjöncomo, cantawäiñe tacaade’da yääwaaca’como wecammaatoodö, yääje mmaja naato dea. Töwäänetööa’como tönwanno. Täjööcomo töncone’ma weneeneto; Cajiichaana Jesuuquidiito tönquimmajä’e mmaja. Cone’da töwa’deuwe weneeneto dea tameedä tönoiña’como jäcä.

⁹ Yaawä Moisé equeejödö jäcä odo’sha acä töwäätäccujäätödaawäiñe ñäädä Miqueede, Wanaadi amoodedö edhaajotoncomoodä, odo’sha äncu’nä’täjäätö’da cöneiyacä. Edääje mma töwö cönä’döaacä chäwwä, odo’sha wwä: “Cajiichaana adheuwa’de;” quee mma cönä’döaacä chäwwä, odo’sha wwä: “Cajiichaana adheuwa’de;”quee mma cönä’döaacä.

¹⁰ Ñanno chäänöngemjöncomo mmaane cone’da töwa’deuwe weneeneto towaanojöncomo jäcä. Edä nono de’wono towaanocoomo tödöödö que mmaane töwoijeiñe nännanö’aato, odoocoja’como chö’tajä’jöncomo töweiye naichodööje.

¹¹ Tönwanno tömaaminchaamoje naato, Caín wei’jödö nönge mmaja yeichomjäcä. Jödaata jummadö que cönsadiijamöicho, Wadan cone’nadiiyö nönge mmaja. Tönwanno töwännanö’e naato Wanaadi jäcä jäduuje töweichomjäcä, Codé cönä’ja’döje mmaja.

¹² Jöije weneeneto, tujuumä äwääwashinchädaawäiñe töweewodoicha yeichomjäcä, wo’nontänä ’je’da. Oweeja edai’chännamo töwwäädo’como wä’jummadö töweiye naichodö nönge tönwanno. Ca’dutu conoojo ’jemjönö töweiye naichöje mmaja naato dea, jejeichä nemannäjöödöje. Dee töweejössetaatojo cu’nädö awä ejössetaajönö nönge mmaja tönwanno. Aacäde töwääma naato, dee imo’dichaajä töweiye naichöje.

¹³ Tuna madaatacai joojato töweiye naichöje naato; dha’donö nönge yää conemjönö iiñödööcomo. Shidiichä sadiijanga’como töweiye naichöje mmaja naato dea. Yeichöödäje yeicho’comooje tödööajä na tööjato.

¹⁴ Ñanno jäcäiñe Enooco cöneecammajäätöi, ñäädä Adhán jonno aacä amoojatooto soto adaichö. Edääje Wanaadi woije ñäädä Enooco cönä’döaacä: “Cajiichaana weejödö weneeaqueene wannacoomo tösootoi aashicha’como jadäiñe,

¹⁵ tameedä soto emmencadööcomo wetä, tameedä Wanaadi woijemjöncomo maminchadööcomo wetä mmaja tameedä conemjönö iiñö’jocoomo jo’tädööje, yää Wanaadi nijummadö woije’da cönnöichodö. Tameedä töjääcä cone’da ya’deuwö’jocoomo jo’tädööje mmaja nimaaminchaato’dede;” quee cönä’döaacä Enooco.

¹⁶ Töwenta’me’ca’como ñanno chäänöngemjöncomo, taquiiñuca’como mmaja. Conemjönö tumjummadööcomo woije mma weneeneto. Tönwanno töwa’deuwe weneeneto aashichaato wa’cä, soto emu’näjöödöcoomoje, iiñödööcomo jäcäinchädä mma.

Quedeiyente wätuuja’jocoomo

¹⁷ Änwanno mmaane jimmä umjummadö, tötö’ta deaane eichäcä Cädhaajotoncomo Jesuuquidiito nanontädö wa’deuwö’jocoomo jäcä.

¹⁸ Edääje ñanno cönä’döa’to: “Anooto ataamejai yä’döa’jäcä anejjacoomo naato’de Wanaadi enno’jä’nnamooje. Conemjönö tumjummadööcomo woije mma naato’de;” quee cönä’döa’to Jesuuquidiito nanontädö ñanno chäänöngemjöncomo jäcä.

¹⁹ Ñanno chäänöngemjöncomo töwäätunnäichomo que änwannoje dea ätu’de’täjootäiñe weneeneto. Ñäädä Wanaadi dö’sennoto Epíiditu Santo ’je’da naato; edä nono de’wono woije mma weneeneto.

²⁰ Änwanno mmaane jimmä umjummadö, jooje’cä aatö’nä’täcä aneecamjödööcomo aashichaato que. Epíiditu Santo jäduudu que adha’deutäcä Wanaadi wwä.

²¹ Wanaadi nijummadööje eichäcä. Töwäämaamöje’da cöweicho’como utuutojo anootoi’chädö yoomo’täcä, yää wentumje äneetä töweichö woije Jesuuquidiito cöwwäiñe nu’a’dedö.

²² Ñanno aneecanö’jöncomo i’wa’tätääcä, ecamjöiyeto.

²³ Anejjacoomo ’quene ewaanacaatäcä, wa’to o’wawonno ijiiñadö töweiye naichöje. Anejjacoomo mmaane wentumje ene’matääcä, odhoowadäädäiñe aweiyancädäiñeene, yoomöcoomo jadä’jödöödä ñontancädä, yää conemjönö iiñödööcomo que yeecodoimaajä.

Yä’ca’jödö

²⁴ Ñäädä Wanaadi jäduuje na aweejuccadööcomo queiñe adheedai’chädööcomooje. Töwö chäwwä na töweichojo aashichaato döiña adhaadoto’como, conemjönö ’je’da, ta’cwaiñe mmaja.

²⁵ Ñäädä mma ñäädä Wanaadi, töseedujä’nato, Cäwaanacaaneichomo. Töwö Wanaadi Cädhaajotoncomo Jesuuquidiito ai aashicha wa’deutojooje na, o’jodhaatoje tä’täämöje mmaja; töwö cajiichaanaje mmaja na dea. Jenaado’jä ’jödöödä eduuwa naadö jona tödööene mädääje na, yeichöödäje yääje töweiyemööje dea. Amén.