JUAN 9 - Wanaadi A'deddu

Tänuuquemjönö ejiichö’tä’jödö

¹ Yaawä töötädaawä Jesuuquidiito dhanwa cöneedantäi; tänuuquemjönö cönä’jaacä, yennu’jödö jonnoto’jödöödä.

² Yaawä ñoowanoomadö Jesuuquidiito cöneecamma’joicho: —Owaanomaanei, ¿änääcö cone’nadiiyö jo’tädööje tänuuque’da määdhä cönennui, yuumö’ja, töwööne? quee cönä’döa’to.

³ Jesuuquidiito cöneccujä’a’to: —Töcoone’nadiiyö jo’tädööje’da määdhä tänuuque’da cönennui, yuumö, yeenö cone’nadiiyö jo’tädööje’da mmaja, Wanaadi töjäädudu ñeenejooto’meene.

⁴ Öwö tödööjai wa yaanontänei’jödö tadaawaajui ano naadawäädä; coijaicho ne’a wetaadawa’cajooto’jönö.

⁵ Edä nono de’wä weichawäädä edä nono de’woncomo yeijoneichomooje wa; quee cönä’döaacä Jesuuquidiito.

⁶ Yääje töwä’dö’jeje nono jo cönääta’däi yaawä; nono cönsoco’näi yaawä tätaacudu que. Yää tänuuquemjönö enuudu jäcä cönaajoijoi;

⁷ cönä’döaacä chäwwä: —Äjäänë; adheecoccata Siidoé cu’jäi aca; quee. Anontaajä; quee töwä’dö’se yeichö yää Siidoé, quee naadö. Ñäädä tänuuquemjönö cöntämä yaawä; chu’jä aca cöneecoccai. Yaawä iiñano’jödö töwä’döa’jäcä töneene cönä’jaacä.

⁸ Yaawä ijimmä mmaja, tänuuque’da yeichö enennamo’jödö mmaja, cönä’döa’to: —¿Määdhäjöönö ca ñäädä, shuucu jödaata tönaateme’que cönä’ja’dö? quee cönä’döa’to.

⁹ Anejjacoomo cönä’döa’to: —Ñäädä mma’ne; quee. Anejjacoomo ’quene cönä’döa’to: —Ng’jn, ñäädäjöönö, ñöngato mma; quee. Töwö jaiñoone cönääcammaacä: —Öwö ñäädä; quee cönä’döaacä.

¹⁰ Yaawä ñanno soto cöneecamma’joicho: —¿Aaquene mmaja töneene mä’döi chea? quee cönä’döa’to.

¹¹ Töwö cöneccujä’a’to: —Ñäädä Jesuuquidiitoje chäätö naichö nono nishooco’näi; yeenudu jäcä nödöi yaawä. Töwö nä’döaanä öwwä: “Siidoé cu’jäi aca adheecoccata;” quee. Weiya yaawä iiña; yeecoccai. Töneene wä’döi yaawä; quee cönä’döaacä ñäädä tänuuquemjönö’jödö.

¹² Yaawä ñanno cöneecamma’joicho dea: —¿Äsha ca ñäädä nai eduuwa? quee cönä’döa’to. Töwö cönä’döaacä: —Ödha, yoowanääcä’da na; quee.

Jaadiseeo wwäiñe tänuuquemjönö’jödö ecamma’jojäätö’jödö

¹³ Yääje mma yaawä tönwanno ñäädä tänuuquemjönö’jödö cönaadoicho jaadiseeo döiñaiñe.

¹⁴ Wäädeetatoojo anooto awä cönä’jaacä socoojato tödöödawä Jesuuquidiito wwä tänuuquemjönö enuudu jäcä.

¹⁵ Yääje yeijäcä ñanno jaadiseeo tänuuquemjönö’jödö cöneecamma’joicho: —¿Aaquene töneene mä’döi? quee cönä’döa’to. Töwö cönä’döaacä: —Yeenudu jäcä socoojato nödöi; yeecoccai yaawä. Eduuwa töneene wa; quee cönä’döaacä.

¹⁶ Yaawä anejjacoomo jaadiseeo cönä’döa’to: —Wanaadi anoonöje’da na ñäädä dhanwa, yääje ayöödöichö, wäädeetatoojo anooto onnontä’da naadö naane’; quee cönä’döa’to. Anejjacoomo ’quene cönä’döa’to: —¿Aaquene mmaja dhanwa conemjönö ene’ju’tojo ännödö deaade’ ? quee. Äänönge’da chö’tajäätödööcomo cönä’jaacä.

¹⁷ Yaawä tänuuquemjönö’jödö cöneecamma’joicho dea: —¿Änääcöje nichö’taanä äwwä ñäädä adheenudu choonecaanei’jödö? quee cönä’döa’to. Ñäädä cöneccujä’a’to yaawä: —Wanaadi anoonöje öwwä nichö’ta; quee.

¹⁸ Judhíocoomo aneecamjö’da cönä’ja’to tänuuque’da yeichö jonno yääjichö’tä’jödö. Yääje yeijäcä tönwanno cöna’dejjaicho tänuuquemjönö’jödö umö, yeenö mmaja;

¹⁹ cöneecamma’joicho: —¿Ñäädä ca määdhä ännacontoncomo, tänuuque’da yennu’jödö mecamma’quennö? ¿Aaquene mmaja töneene nai chea eduuwa? quee cönä’döa’to.

²⁰ Yuumö cöneccujä’a’to yaawä: —Ñaa owaanäcä na ñaa nnedööje yeichö, tänuuque’da yennu’jödö yeichö mmaja.

²¹ Töneene yä’dö’jödö mmaane ñaa owaanäcä’da na; enu’tänei’jödö ñaa owaanäcä’da mmaja. Inchomo dajaane mä’dä, töwööne ecamma’jotääcä; töwö dea ääcammajai ña; quee cönä’döa’to tänuuquemjönö’jödö umö.

²² Tönwanno yääje cönä’döa’to judhíocoomo nontädööje, yääje yä’dö’jocoomo weijäcä: “Anejja wwä Äwaanacaaneije Jesuuquidiito e’ta’jäcä tu’ca na’de yaawä cöjaadäiñe yeichö jonno;” quee yä’dö’jocoomo weijäcä.

²³ Yääje yeijäcä yuumö yääje cönä’döa’to: “Inchomo dajaane mä’dä, töwööne ecamma’jotääcä;” quee.

²⁴ Yää ’jeje cöna’dejjaicho dea ñäädä tänuuquemjönö’jödö; cönä’döa’to chäwwä: —Wanaadi netaadöje ääcammacä; ñaa owaanäcä na ñäädä dhanwa conemjönööje yeichö; quee cönä’döa’to.

²⁵ Yaawä töwö cöneccujä’a’to: —Yoowanääcä’da na aashicha yeichö, cone’da yeichö jeiñe mma. Yää mma yoowanääcä na, öwö tänuuque’da wä’jaaquene, eduuwaane töneene wa; quee.

²⁶ Yaawä cöneecamma’joicho dea: —¿Aaquene ayöödöi? ¿Aaquene adheenu’täi? quee cönä’döa’to.

²⁷ Töwö cönä’döaacä chäwwäiñe: —Wecammai cheeade’; yeeta’se’da mmaja mä’jaato deeade’. ¿Ane’cotoojo eta’se maato dea eduuwa? ¿Änwanno mmaja ca shootoije awei’sheiñe maato dea? quee cönä’döaacä.

²⁸ Yaawä tönwanno cönquiimajä’a’to; cönä’döa’to chäwwä: —Amäädääne ’cännä shootoije ma. Ñaa mmaane Moisé sotoije ñaa na.

²⁹ Ñaa owaanäcä na Moisé wwä Wanaadi wa’deuwö’jödö. Ñäädä dhanwa mecammaadö mmaane yeejö’jödö jadä’jödöödä ñaa owaanäcä’da na; quee cönä’döa’to.

³⁰ Yaawä ñäädä tänuuquemjönö’jödö cönä’döaacä chäwwäiñe: —¿Aaqueneeto mädä? Änwanno odhoowanääcäiñe’da töwö yeichaame yeenudu nichoonecai töwö.

³¹ Cönwanno cowaanäcäiñe na Wanaadi aneeta’da yeichö conemjönö tödöönei a’deddu. Ñäädä a’deddu mmaane töneeta Wanaadi, tujummanei a’deddu, töwaanontä’jödö tödöönei a’deddu.

³² Cönwanno aneeta’da dea caato soto wwä tänuuquemjönö wennuaajä ejiichö’tä’jödö.

³³ Ñäädä dhanwa Wanaadi anoonöje’da ei’jo tödööjai’chaane eijai; quee cönä’döaacä ñäädä tänuuquemjönö’jödö.

³⁴ Yaawä ñanno judhío cönä’döa’to chäwwä: —¿Amäädä mmädä ñaa mowaanomannea, conemjönö acaano wennuaajä mmädä? quee cönä’döa’to. Töjaadäiñe yeichö jonno cunu’caicho yaawä.

Tänuuque’da jaadiseeo wei’jocoomo

³⁵ Yääje mma yaawä Jesuuquidiito cöneetaacä tänuuquemjönö’jödö u’ca’jödö. Yaawä dhacä töwoojodööa’comjäcä töwö cönä’döaacä chäwwä: —¿Mecaanö’anä Wanaadi nnedö? quee.

³⁶ Ñäädä cönä’döaacä yaawä: —¿Änääcö töwö, wecamjöiye?

³⁷ Jesuuquidiito cönä’döaacä: —Meneeaquenneeade’ töwö; öwö ñäädä, adhaacä ya’deuwaadö; quee cönä’döaacä.

³⁸ Yaawä tä’mudhe ñäädä cönä’döi Jesuuquidiito je’taca; cönä’döaacä chäwwä: —Wecaanö’a, Cajiichaana; quee.

³⁹ Yaawä Jesuuquidiito cönä’döaacä: —Öwö we’ne edä nonoodö de’cäi wätämmencajoonä ajäntojo, ñanno tänuuquemjöncomo töneene ä’döiyeto, ñanno tänuuca’como ’quene tänuuque’da ä’döiyeto; quee cönä’döaacä Jesuuquidiito.

⁴⁰ Yäätä cönä’ja’to anejjacoomo jaadiseeo. Tönwanno eöneeta’to yääje ya’deuwödö; cönä’döa’to: —¿Tänuuque’da mmaja ca ñaa nai chea yääje yeiya’jäcä?

⁴¹ Jesuuquidiito cönä’döaacä chäwwäiñe: —Tänuuqueiñe’da meicho’jo mmaane ocoone’nadiiyöcoomo jo’tädööje täuwemje’da meichädö, töwäädä töneeneene töwäätä’tä määnetäänene’; yääje yeijäcä yää jo’tädööje täuwemje maato.