JUAN 8 - Wanaadi A'deddu

¹ Jesuuquidiito mmaane cöntämä Odiiwo ’jödö de’cäi.

² Yää jenamma jenaadäne cönennacai yaawä Wanaadi weichojo taca. Yaawä tameedä soto cöne’jummaicho yöiña. Töwö cönaatajiimai yaawä owaanomaadöcoomo wetä.

³ Yaawä judhío owaanomannamo mmaja, jaadiseeo mmaja wodi cönnejooto yöiña, töiño jonno anejja dhanwa enaawä töneedanto’jocoomo. Ñäädä wodi cönnöicho yäätoncomo antawäiñe;

⁴ cönä’döa’to Jesuuquidiito wwä: —Owaanomaanei, määdhä wodi ñaa nedantäi töiño jonno anejja dhanwa enaawä.

⁵ Moisé waanontädö necamma täju que määdhä nöngato emaadö. ¿Aaquene amäädä äwä’dödö? quee cönä’döa’to.

⁶ Tönwanno yääje cönä’döa’to Jesuuquidiito oneejadööje mmädä, cone’da chääjäcä töwa’deuwödööcomo wetä yää ’jeje. Jesuuquidiito cönootommoi yaawä; tamäädö dhadaadö que cönaajäntäi yaawä imennädö nono de’wä.

⁷ Tönwanno cöneecamma’joicho dea; yaawä töwö cöneesa’duminchai; cönä’döaacä chäwwäiñe: —Ñäädä conemjönö ännöjöönö naajänto’ñojo täju que töwäädö; quee.

⁸ Yääje töwa’deuwödö’jo Jesuuquidiito cönootommoi chea nono de’wä imennädö wetä mmaja.

⁹ Ñanno wodi ene’nnamo’jödö cone’da cönä’döjoicho yaawä täwaanöcoomo jäcä. Tönwanno cöneeja’caicho yaawä tooni nshai, inchoncomo awa’de, mudeeshi jona tödööene. Jesuuquidiito mma töjääcäjeene cöno’nomjoi yaawä, ñäädä wodi acä mma.

¹⁰ Yaawä töweesa’dumincha’jäcä töjääcäjeene mma Jesuuquidiito wodi cöneedantäi yäätä. Töwö cönä’döaacä chäwwä: —¿Äsha ñanno ätu’de’tännamo’jödö naicho eduuwa? ¿A’que eduuwa adheunei ’je’da? quee cönä’döaacä.

¹¹ Wodi cönä’döaacä: —A’que na, Owaanomaanei. Yaawä Jesuuquidiito cönä’döaacä chäwwä: —Öwö mmaja ätu’de’tä’da wa; äjääne eduuwa, conemjönö mma männöi’chede eduuwa; quee cönä’döaacä Jesuuquidiito.

Jesuuquidiito edä nono de’woncomo weiyuuduje yeichö

¹² Yää ’jeje Jesuuquidiito cöna’deuwöi chea soto wwäiñe; cönä’döaacä: —Öwö ñäädä weiyu, sotoocomo yeijonei. Ñäädä jaadono wötäädö tööjano’taca ei’cha na’de; chäwwä töweiye na’de weichojo weiyu; quee cönä’döaacä.

¹³ Yaawä jaadiseeo cönä’döa’to chäwwä: —Amäädä deja mma määcamma; yääje yeijäcä chäänönge’da äwääcammadö na; quee cönä’döa’to.

¹⁴ Jesuuquidiito cönä’döaacä chäwwäiñe: —Öwö dea wääcammataame chäänönge wääcammadö na. Öwö yoowanääcä na weejö’jödö, öötotoojo yoowanääcä mmaja. Änwanno mmaane odhoowanääcäiñe’da na öwö weejö’jödö, öötotoojo odhoowanääcäiñe’da mmaja na dea.

¹⁵ Änwanno ajuunucoomo woije mma tönemmenca määnetääne; öwö mmaane anemmenca’da wa.

¹⁶ Yaawääne’, öwwä emmencadaawä chäänöngeene öwö nemmencadö, umjummadö woije mma tönemmenca weichöjöönö, ñäädä Jaaja, yaanontänei’jödö jaadä weneene.

¹⁷ Yääje nä’döa waanontänä imennaajä, yää äwwäiñe naadö: “Aacä soto wwäiñe yää dea ecammajä’a’jäcä täcaanö’emje yaawä ya’deuwödööcomo;” quee nä’döa imennaajä.

¹⁸ Mädääje na; öwö dea wääcamma, Jaaja mmaja yeecamma dea, ñäädä yaanontänei’jödö; quee cönä’döaacä Jesuuquidiito.

¹⁹ Yaawä tönwanno cöneecamma’joicho: —¿Äsha oomo nai? quee cönä’döa’to. Töwö cönä’döaacä: —Änwanno odhoowanääcäiñe’da wa, Jaaja odhoowanääcäiñe’da mmaja. Odhoowanääcäiñe wei’jo mmaane, Jaaja odhoowanääcäiñe mmaja eichö dea; quee cönä’döaacä Jesuuquidiito.

²⁰ Jesuuquidiito yääje cöna’deuwacä Wanaadi weichojo taca töweichö, jödaata ewöötö dö’tä. Ñanno soto anaajäi’cha cöneiya’to, chu’nädö aca ä’dö’da dea yeijäcä.

“Öötotoojo döiña täjai’cha maato”

²¹ Edääje mmaja Jesuuquidiito cönä’döa’dea chäwwäiñe: —Öwö wöta’de; änwanno a’que cujiiyato’de. Mä’ja’aato’de ocoone’nadiiyöcoomo ’je dea. Öwö öötotoojo döiña täjai’cha maato; quee cönä’döaacä.

²² Yaawä tönwannoje dea judhíocoomo cönä’döa’to: —¿Töwoije mmädä’da äämatai’che? ¿Ane’que’nei yääje nä’döaanä: “Öwö öötotoojo döiña täjai’cha maato;” quee?

²³ Jesuuquidiito cönä’döaacä chäwwäiñe: —Änwanno nono jo’como; öwö mmaane cacoiño. Änwanno edä nono de’woncomo; öwö mmaane edä nono de’wonoojönö.

²⁴ Yääje yeijäcä yääje wä’döaanä äwwäiñe: “Änwanno mä’ja’aato’de ocoone’nadiiyöcoomo ’je dea;” quee. Yeecamjö’da aweiya’comjäcä ocoone’nadiiyöcoomo ’je mä’ja’aato’de; quee cönä’döaacä Jesuuquidiito.

²⁵ Yaawä tönwanno cöneecamma’joicho: —¿Änääcöömä amäädä? quee cönä’döa’to. Jesuuquidiito cönä’döaacä chäwwäiñe: —Wääcammane deeade’ jenaadä.

²⁶ Öwwä töweiye na jooje äjääcäiñe täcammajä’emö, chäänönge’da aweichöcoomo jäcä. Chäänöngato ñäädä yaanontänei’jödö; öwö ya’deuwa soto wwäiñe töwö ñeecamma’jödö nönge mmaja; quee cönä’döaacä Jesuuquidiito.

²⁷ Tönwanno dhowaanäcäiñe’da cönä’jaacä Tumö jäcä ya’deuwödö yeichö.

²⁸ Yääje yeijäcä Jesuuquidiito cönä’döaacä chäwwäiñe: —Soto nnedö annä’a’jäcä äwwäiñe yaawääne odhoowanääcäiñe wa’de ñäädä töwääcamma wääneneedöje weichö, öwö woije mma ännö’da weichö mmaja odhoowanääcäiñe na’dede. Jaaja wwä yoowanooma’jödö que töwa’deuwe wäänene.

²⁹ Ñäädä yaanontänei’jödö jaadä weneene; Jaaja jääcäjeene näämä’da na, yaacötö tönnöe weijäcä; quee cönä’döaacä Jesuuquidiito.

³⁰ Yääje ya’deuwa’jäcä jooje soto cöneecamjöicho.

Wanaadi nnedööje weiñä, conemjönö anoonöje weiñä mmaja

³¹ Yää ’jeje Jesuuquidiito cönä’döaacä ñanno judhío täcaanö’nnamo wwäiñe: —Ya’deddu woije dea aweiya’comjäcä noowanoomadö chäänönga’comooje eijai maato yaawä.

³² Änwanno odhoowanääcäiñe na’de a’deu chäänöngato; yää a’deu chäänöngato tanontaamoje aweichöcoomo jonno ayu’caato’de; quee cönä’döaacä Jesuuquidiito.

³³ Yaawä tönwanno cönä’döa’to: —Aawadán atöödöje ñaa; anejja anoonöje ei’cha. ¿Aaquene yääje mä’döaanä: “Ayu’caato’de tanontaamoje aweichöcoomo jonno;” quee?

³⁴ Jesuuquidiito cöneccujä’a’to: —Chäänönge yääje wä’döa, ñäädä conemjönö tödöönei conemjönö anoonöje na.

³⁵ Ñäädä dhanoonö yeichöje ei’cha tädhaajä mmai chawä; iiñedö neene mmaane yeichöje eijai.

³⁶ Wanaadi nnedö wwä ocoone’nadiiyöcoomo jonno ayu’ca’comjäcä conemjönö anoonöje’da eijai maato yaawä.

³⁷ Yoowanääcä na Aawadán atöödöje aweichöcoomo. Yääje yeichaame änwanno yeema’se maato, ya’deddu aneeta’da aweichomjäcä.

³⁸ Öwö töneecamma wäänene Jaaja neneejo’jödö öwwä; änwanno ’quene tönnöe määnetääne oomotoncomo necamma’jödö daja; quee cönä’döaacä Jesuuquidiito.

³⁹ Yaawä tönwanno cönä’döa’to Jesuuquidiito wwä: —Aawadán dajaane ñaa umööje na; quee. Jesuuquidiito cönä’döaacä yaawä: —Aawadán atöödöje meicho’jo iiñödö’jödö nönge mmaja mödöötädö.

⁴⁰ Yääje’daane maato; chäänöngato Wanaadi wwä neeta’jödö töneecamma weichaame yeema’se maato. Mädääje’daane Aawadán cönä’jaacä.

⁴¹ Änwanno mödööato oomotoncomo nödöödö; quee cönä’döaacä. Yaawä tönwanno cöneccujä’a’to: —Wannato yuumöjöönö ñaa; tooni ñaa umö na, ñäädä Wanaadi; quee cönä’döa’to.

⁴² Jesuuquidiito cönä’döaacä chäwwäiñe: —Wanaadi oomotoncomooje ei’jo mmaane änwanno cujummatäädö, Wanaadi döiñanno we’eetö’da. Öwö woije’da we’ne, Wanaadiiñe yaanontäne.

⁴³ ¿Ane’que’nei aashicha aneeta’da maato neecammajäätödö? Etaajai’cha aweichöcoomo mmädä mädä.

⁴⁴ Odo’shaane oomotoncomooje na; änwanno tödö’se määnetääne oomotoncomo odo’sha woije. Töwö cönä’jaacä ämaatä awa’deene yaajäntä’jödö jonnoto’jödöödä. Töwä’dune töwö jooje; chäänöngato ’je’da na chäwwä. Juutuje töwa’deuwe weneene, juutuje töweijäcä, juutuje weiñä edhaajäje töweijäcä mmaja.

⁴⁵ Öwö mmaane yeecamjö’da maato chäänöngato töneecamma weijäcä.

⁴⁶ ¿Änääcö adhantawäiñe ecammajai ñai conemjönö önnö’jödö? ¿Ane’que’nei aneecamjö’da maato, chäänönge ecammajä’taame öwwä?

⁴⁷ Ñäädä Wanaadi nnedö Wanaadi a’deddu töneeta töweiye nai. Änwanno mmaane aneeta’da maato, Wanaadi nnacoomoje’da aweijäcäiñe; quee cönä’döaacä Jesuuquidiito.

Jesuuquidiito Aawadán owaajodootoje yeichö

⁴⁸ Yaawä judhío cönä’döa’to Jesuuquidiito wwä: —Chäänönge dämma samaaditaanoje adhe’tätä ñaa weneene, odo’sha ’janooje mmaja; quee cönä’döa’to.

⁴⁹ Jesuuquidiito chäwwäiñe cönä’döaacä: —Odo’sha ’je’da wa. Öwö Jaaja wa’cwaima; änwanno maane cöquiiñeme’cato.

⁵⁰ Täneejuque weichojo anencano’tä’da wa; yääje yeichaame töweiye na täneejuque weichojo encano’tänei, ñäädä tameedä emmencanei.

⁵¹ Chäänönge yääje wä’döa äwwäiñe, ñäädä ya’deddu woije tödöönei ääma’da na’de; quee cönä’döaacä Jesuuquidiito.

⁵² Yaawä ñanno judhíocoomo cönä’döa’to chäwwä: —Eduuwa ñaa owaanäcä na odo’sha ’je aweichö. Aawadán töwääma na, tameedä Wanaadi wa’deuwödö ecammannamo’jödö mmaja; yääje yeichaame yääje mä’döaanä: “Ya’deddu woije tödöönei ääma’da na’de;” quee.

⁵³ ¿Ñaa adaichö Aawadán e’jodhaato ca amäädä, Wanaadi wa’deuwödö ecammannamo’jödö e’jodhaato mmaja? Tönwanno tameedä cönä’jajoichodö naane’. ¿Änääcöje ätö’taanä amäädä? quee cönä’döa’to Jesuuquidiito wwä.

⁵⁴ Yaawä töwö cöneccujä’a’to; cönä’döaacä: —Öwö dea aashichaatoje wäätä’ta’jäcä, täje’da eijai ña yaawä wääcammadö. Jaajaane aashichaatoje ye’ta, ñäädä Awaanadiiyöcoomoje me’taatoodö.

⁵⁵ Yääje yeichaame odhoowanääcäiñe’da na töwö; öwö mmaane yoowanääcä na. Yoowanääcä’da e’ta’jäcä öwwä, juutuje mmaja eijai wa dea yaawä, awei’yejeiñe mmaja. Yoowanääcääne na töwö, dha’deddu woije tönnöe wäänene dea.

⁵⁶ Ñäädä adhaadai’choncomo Aawadán öwö woomocöödöje töweiye cönä’jaacä, weejödö ene’se töweijäcä. Töwö cöneeneaacä weejödö; cöna’cwainchai yaawä; quee cönä’döaacä Jesuuquidiito.

⁵⁷ Yaawä judhíocoomo cönä’döa’to: —Aacä sotooto de’wä amoojadä weduuto ejoodöjai’cha dea ma amäädä. ¿Aaquene Aawadán maneenedö deaade’ ?

⁵⁸ Jesuuquidiito cönä’döaacä: —Chäänönge yääje wä’döa, Aawadán owaajodä dea öwö wa; quee.

⁵⁹ Yää etaadö’jo täju cönannä’jätöicho Jesuuquidiito töwäädö wetä, töwäädä töwö cönootone’täiñe’; tacaade’da töwö cöneeja’cai yaawä yo’tacannoiñe, Wanaadi weichojo tacanno cöntämä yaawä.