JUAN 6 - Wanaadi A'deddu

Ijaatoodea miide soto ewanshincho’jocoomo

¹ Yää ’jeje Jesuuquidiito cöntämä Caadideea cu’jäi mänsemjona, yää Tiweediya cu’jäije töne’tä cönä’ja’todö.

² Jooje soto cöntonto chääjadä töwwäiñe ene’jödö weijäcä ene’ju’tojo iiñö’jödö, yää cädäija’como adoncadööcomo.

³ Yaawä Jesuuquidiito cöntämä jöö de’cäi; yäätä cönaatajiimai tönoowanoomadö jadäiñe.

⁴ Yaawä amoinche’da cönä’jaacä Weja’dätä’jä anooto, judhíocoomo comjedensiyai’chädö tödöötojo cu’nädö

⁵ Yaawä Jesuuquidiito cöneeneaacä ñanno jooja’como soto töwwadäädä yeejödööcomo. Töwö cönä’döaacä Jediipe wwä: —¿Äsha ejeemajai caato canno jooja’como uduucomo? quee cönä’döaacä Jesuuquidiito.

⁶ Töwö yääje cönä’döaacä towaanäcä yeichaame töwwä tödöötojo; Jediipe oneejadööje mmädä yääje cöna’deuwacä.

⁷ Yaawä Jediipe cönä’döaacä: —Amoojadä sotooto ’cäwa’cä jödaata chääwa’cä’da dea eijai ña canno ewanshiñööcomo ejeematoojoje, shemeiñaasai ecaamotaame; quee cönä’döaacä Jediipe.

⁸ Yaawä Antedé cöna’deuwöi; ñäädä cönä’jaacä Jesuuquidiito nowaanomaadö, Simón Peedhodo acoono. Töwö cönä’döaacä Jesuuquidiito wwä:

⁹ —Määdhä mude’cä’cä wwä töweiye na ijaatoodea uu i’yaca’jödö, äiña döaajä; aacä na’cwacaano’cä mmaja. Jooje naato soto, cho’naiñe’da; quee cönä’döaacä Antedé.

¹⁰ Yaawä Jesuuquidiito cönä’döaacä: —Soto ajiimajootäcä; quee. Jooje woi cönä’jaacä yäätä; yää de’wä cönaatajiimaicho tameedä. Wanna dhanwaacomo cönä’ja’to, ijaatoodea miide.

¹¹ Yaawä Jesuuquidiito uu cönannäjöi. Chääjäcä töwa’deuwödö’jo cuntui tönoowanoomadö wwäiñe; ñanno cöneecamoicho yaawä soto wataajima’como wwäiñe. Yääje mmaja cönnöi chea na’cwacancomo, imjummadööcomo wa’cä.

¹² Yaawä yensu’ta’comjäcä Jesuuquidiito cönä’döaacä tönoowanoomadö wwäiñe: —Yäädetö’jödö amu’täcä; emaacudo’no; quee.

¹³ Tönwanno cönancuicho yaawä; amoojadooto de’wä aacä wöwa cuntu’cannäjöicho uu wäädetö’jödö que, ñanno soto wääwashincho’jocoomo.

¹⁴ Ñanno soto Jesuuquidiito nödöödö ene’ju’tojo enennamo’jödö cönä’döa’to yaawä: —Ñäädä määdhä Wanaadi wa’deuwödö ecammanei töwe’emööje cönä’ja’dö; quee cönä’döa’to.

¹⁵ Jesuuquidiito dhowaanäcä cönä’jaacä töwoije’da cajiichaanaje täwaaca’se yeichöcoomo. Yääje yeijäcä töjääcäjeene cöntämä jöö de’cäi.

Tuna de’wä Jesuuquidiito wötä’jödö

¹⁶ Yaawä cho’monga’jäcä Jesuuquidiito nowaanomaadö cöntonto chu’jä döiña.

¹⁷ Cudiiyada aca töwä’ta’comjäcä chu’jä mänsemjo cöne’dä’a’to yaawä, Cajeedamu ñano wwadäädä. Tööje cönä’jaacä yaawä; Jesuuquidiito eejö’da dea cönä’jaacä.

¹⁸ Yaawä jooje jejeichä weijäcä madaataca cönaajäntäi.

¹⁹ Numa cönsequiima’to. Yaawä amoinche töwä’döa’comjäcä Jesuuquidiito cöneedantoicho tuna de’wä yeejödö; chäwwadäädäiñe cöne’acä. Tönwanno cönääcatoncaicho.

²⁰ Töwö Jesuuquidiito cönä’döaacä chäwwäiñe: —Öwö mma; tösaade’daane eichäcä; quee cönä’döaacä.

²¹ Tönwanno ta’cwaiñe cönä’ja’to yaawä cudiiyada aca Jesuuquidiito wä’ta’jäcä. Yaawä dea mma nono cöneejodöicho, töötoto’como döiña.

Soto wwäiñe Jesuuquidiito uji’jödö

²² Yää jenamma naadöje chu’jä mänsemjo dea soto cönä’ja’to. Tönwanno dhowaanäcäiñe cönä’jaacä tooni mma cudiiyada yäätä yei’jödö, yää ñoowanoomadö dhawä cöntontodö, Jesuuquidiito jadä’da.

²³ Yääje mma yaawä anejja cudiiyada cönä’döi Tiweediya ñanno. Yäätä cönaajäi, uu jäcä Jesuuquidiito wa’deuwödö’jo soto wääwashincho’jocoomo dö’tä.

²⁴ Yaawä Jesuuquidiito ’je’da eneea’jäcä, ñoowanoomadö ’je’da eneea’jäcä mmaja, ñanno soto cönä’toicho cudiiyada aca; cöne’dätoicho yaawä Cajeedamu ña Jesuuquidiito ujiiye.

Jesuuquidiito weichojo uu

²⁵ Yääje mma yaawä mänsemjona töwä’döa’comjäcä Jesuuquidiito cöneedantoicho. Tönwanno cöneecamma’joicho: —Owaanomaanei, ¿ächännauwä’cä me’ne dea sadä? quee cönä’döa’to.

²⁶ Jesuuquidiito cöneccujä’a’to: —Chäänönge yääje wä’döa äwwäiñe, änwanno cujiiyato yää aashichaato wödöönedö töntö’tamme’que aweichöcoomo jäcäinchädä’da, jooje äwääwashincho’jocoomo weijäcääne, yää wu’nedö que.

²⁷ Äwanshi töwaatameemö cana’cadööje mma adheetadaawa’cajootäi’che; äwanshi töwaatamemjönö cana’cadööjeene adheetadaawa’cajootäcä, yää yeichöödäje aweicho’comooje. Yääjato äwanshi tunu’e öwö, Soto nnedö; ñäädä Jaaja Wanaadi cuntui öwwä yääje tödöötojo; quee cönä’döaacä Jesuuquidiito.

²⁸ Yaawä tönwanno cöneecamma’joicho: —¿Aaquene Wanaadi tadaawaajui tödööjai ñaa nai? quee cönä’döa’to.

²⁹ Jesuuquidiito cönä’döaacä: —Edä yää Wanaadi tadaawaajui tödöödö, töwö dhanoonö ecamjödö; quee.

³⁰ Yaawä tönwanno cönä’döa’to chäwwä: —¿Ane’cäämö äwääne’ju’tojooje tödööjai manä ñaa neneedöje, ñaa maneecamjöiye yaawä? ¿Ane’cäämö mödöötai?

³¹ Ñaa adai’jödö ädeeja tönäu’cwe cönä’ja’to jata ’jemjönö aca töweichöcoomo, Wanaadi a’deddu imennaajä wä’dödö naadöje dea: “Wanaadi uu caju ñano cuntui chäwwäiñe, yuduucomooje;” quee imennaajä wä’dödö; quee cönä’döa’to ñanno soto Jesuuquidiito wwä.

³² Yaawä Jesuuquidiito cönä’döaacä chäwwäiñe: —Chäänönge yääje wä’döa äwwäiñe, Moiséjönööne cuntui äwwäiñe uu caju ñano; Jaajaane uu caju ñano neene nu’a äwwäiñe.

³³ Wanaadi nutuudu yää uu caju ñano we’ajä, tameedä soto weicho’comooje; quee cönä’döaacä Jesuuquidiito.

³⁴ Yaawä tönwanno cönä’döa’to chäwwä: —Cajiichaana, ñaa wwä änu’cä yää uu yeichöje.

³⁵ Jesuuquidiito cönä’döaacä: —Öwö ñäädä weichojo uu. Ñäädä öwwadoodono we’ajä ämiije’da na’de; öwö yeecanö’nei emjätö’se’da na’dede.

³⁶ Yääje wä’döaaquene äwwäiñe: “Öwö yeene’mataame äwwäiñe, aneecamjö’da maato;” quee.

³⁷ Tameedä öwwonooje Jaaja nutuudu ne’a öwwadäädä. Ñäädä öwwadoodono we’ajä änquiiñemeecö’da wa.

³⁸ Öwö caju ñanno we’ne öwö woijato tödööe’da, yaanontänei’jödö woijeene.

³⁹ Jaaja, yaanontänei’jödö woije dea tooni’chä anennanö’ca’da wa’de ñanno öwwä inchudu; öwö wadoncaato’de yaawä anooto wataamedaawä.

⁴⁰ Ñäädä Iiñedö eneenei, ecaanö’nei mmaja, yeichö töwaatamemjönö töweiye na, yaanontänei’jödö woije dea; öwö wadonca’de yaawä anooto wataamedaawä; quee cönä’döaacä Jesuuquidiito.

⁴¹ Yaawä judhíocoomo chääjäcä cönenta’me’ca’to, yääje yä’dö’jödö weijäcä: “Öwö ñäädä uu caju ñano we’ajä;” quee yä’dö’jödö weijäcä.

⁴² Tönwanno cönä’döa’to: —¿Jesuuquidiitojöönö ca määdhä, José nnedö? ¿Cowaanäcäiñe jönca yuumö, yeenö mmaja? ¿Ane’que’nei caju ñanooje nätä’tannea? quee cönä’döa’to.

⁴³ Yaawä Jesuuquidiito cönä’döaacä chäwwäiñe: —Mädääje adhenta’me’täi’che.

⁴⁴ Anejja e’jai’cha na öwwadäädä ñäädä Jaaja yaanontänei’jödö nenno’jadööje’da yeiya’jäcä; öwö wadonca’de yaawä anooto wataamedaawä.

⁴⁵ Edääje nä’döa Wanaadi wa’deuwödö ecammannamo nimenno’jocoomo jäcä: “Tameedä noowanoomajaato’de Wanaadi wwä;” quee nä’döa. Ñäädä Jaaja a’deddu etaanei, Jaaja nowaanomaadö mmaja, ñäädä ne’a öwwadäädä.

⁴⁶ “A’que yeichaame Jaaja eneenei; ñäädä Wanaadi jonnoto we’ajä mmaane töneene.

⁴⁷ Chäänönge yääje wä’döa äwwäiñe, öwö yeecanö’nei wwä töweiye na töwaatamemjönö yeichojo.

⁴⁸ Öwö ñäädä weichojo uu.

⁴⁹ Adhaadai’choncomo cönä’jajoicho ädeeja täcu’jödö weichaame chäwwäiñe jata ’jemjönö aca töweichöcoomo.

⁵⁰ Yää caju ñano we’ajä uu wecammannö täu’nei mmaane ääma’da na’de.

⁵¹ Öwö ñäädä uu neene, caju ñano we’ajä. Ñäädä edä täu’nei yeichöje töweiye na’de. Öwö yeejö wu’a’de tameedä soto weicho’comooje; quee cönä’döaacä Jesuuquidiito chäwwäiñe.

⁵² Yaawä judhíocoomo tönwannoje dea cöna’deuwa’to: —¿Aaquene mmaja tujuunu cöwwäiñe äntudu deaade’ tänäädö wetä cöwwäiñe? quee cönä’döa’to.

⁵³ Yaawä Jesuuquidiito cöna’döaacä chäwwäiñe: —Chäänönge yääje wä’döa äwwäiñe, Soto nnedö junu änäänä’da aweiya’comjäcä, dhaquiiyö aneenö’da aweiya’comjäcä mmaja, aweicho’como ’je’da na yaawä.

⁵⁴ Ñäädä juunu tänäänei, yaaquiyö ennei mmaja, töwaatamemjönö yeichojo töweiye na; öwö wadonca’de yaawä anooto wataamedaawä.

⁵⁵ Juunu yää tänäämö neene; yaaquiyö yää wocö neene.

⁵⁶ Ñäädä öwö jääcuinchato, yaaquiyö ennei mmaja, öwö yaaca na, öwö mmaja chaaca wa dea.

⁵⁷ Ñäädä yaanontänei’jödö wwä töweiye na do’ta; öwö töweiye wäänene töwö inchudu que. Yääje mmaja ñäädä öwö jääcuinchato, öwö untudu que yeichojo na’de.

⁵⁸ Yää uu caju ñano we’ajä wecammaadö adhaadai’choncomo cönäu’cwaichodö nönge’da na. Yää ädeeja täcu’jödö weichaame cönä’jajoicho tönwanno. Mädä wecammaadö täu’nei mmaane yeichöje töweiye na’de; quee cönä’döaacä Jesuuquidiito.

⁵⁹ Jesuuquidiito yääje soto cönoowanooma’to Cajeedamu ña, judhío we’jummato’como taca.

Weichojo a’deu

⁶⁰ Yää eta’jäcä ñoowanoomadö wwäiñe tönwanno dhantai cönä’döa’to: —Äätaque’jönö mädä ecammajäätödö. ¿Änääcö mädä etaajai ñai? quee.

⁶¹ Jesuuquidiito dhowaanäcä cönä’jaacä yääje ya’deuwödööcomo. Töwö cöneecamma’joicho yaawä: —¿Cone’da ca ayöödöjaato mädä ecammajäätödö?

⁶² ¿Aaquene ä’döjai maato äwwäiñe eneea’jäcä Soto nnedö wäncudu caju ña, töweejö’jödö döiña mmaja?

⁶³ Epíiditu Santo ñäädä weichojo u’nei; ajuunu mmaane wa’tätä’da na. Yää äwwäiñe töneecammajä’e wääneneedö, chäänöngato a’deu yää, Wanaadi jäcoono, weichojo a’deu mmaja.

⁶⁴ Yääje yeichaame änwanno dhantai aneecamjö’da dea maato; quee cönä’döaacä Jesuuquidiito. Töwö Jesuuquidiito jenaadäde dhowaanäcä cönä’jaacä ñanno aneecanö’jöncomo, tu’neije töweiyemö mmaja.

⁶⁵ Töwö cönä’döaacä: —Yääje yeijäcä yääje wä’döaanä äwwäiñe, anejja e’jai’cha na öwwadäädä Jaaja nenno’jadööje’da yeiya’jäcä; quee cönä’döaacä.

⁶⁶ Yää etaadö’jo ñoowanoomadö wwäiñe tönwanno dhantai cöne’nomjaicho; chääjadä töwei’sheiñe’da cönä’ja’to yaawä.

⁶⁷ Yaawä Jesuuquidiito cönä’döaacä ñanno amoojadooto de’wä aaco’como tönoowanoomadö wwäiñe: —¿Änwanno mmaja cösancwatantäi’chede? quee.

⁶⁸ Simón Peedhodo cönä’döaacä chäwwä: —Owaanomaanei, ¿änääcö wwadäädä ñaa tädö deaade’ ? Amäädä äwwä mmaane yeiyajä yeichöödoto weichojo a’deu.

⁶⁹ Ñaa maneecanö’a; ñaa owaanäcä na Äwaanacaaneije aweichö, Wanaadi nudooto nnedööje aweichö; quee cönä’döaacä Simón Peedhodo Jesuuquidiito wwä.

⁷⁰ Yaawä Jesuuquidiito cönä’döaacä chäwwä: —Öwö dea sootoije mane’tätääne, änwanno amoojadooto de’wä aacä maatoodö. Yääje yeichaame tooni adhantawäiñe odo’shaje na; quee.

⁷¹ Töwö yääje cönä’döaacä Juudha Icaadiyoote ecammancädä, ñäädä Simón nnedö; ñäädä cönä’jaacä Jesuuquidiito u’neije töweiyemö. Töwö cönä’jaacä ñanno amoojadooto de’wä aaco’como jimmä dea.