JUAN 5 - Wanaadi A'deddu

Cädäijato adonca’jödö Weteesada ña

¹ Yää ’jeje Jesuuquidiito cönennacai chea Jeduusadén ña, judhíocoomo comjedensiyai’chädö tödöödö döiña.

² Yäätä Jeduusadén ña cönä’jaacä tuna wa’donnatoojo choonecaajä. Amoinche’da yää cönä’jaacä oweeja etöijatoojo nata’tadö jäcä. Yää chu’jä eewedeeo a’deucwe töne’tä cönä’ja’to Weteesadaaje. Yää awoodhecääcä cönä’jaacä ijaatoodea amääajä.

³ Yää amääajä tawä töweiye cönä’ja’to jooje cädäija’como, tänuuquemjöncomo mmaja, secumja’como mmaja, anönnä’ja’como mmaja. Tönwanno tönwomo’que cönä’ja’to tuna wätu’medö.

⁴ Tucu’näque amoode töwä’tä töweiye cönä’jaacä caju ñanno yää chu’jä aca, tuna e’jimi’che. Yaawä ñäädä awa’deeto tuna wä’jimi’chödö acaano we’ducca’jödö töweeja’ca cönä’jaacä tadoiñe, cädäije’da.

⁵ Yäätä cönä’jaacä cädäijato, aacä wedu mmädä aacä sotooto wedu aneejodö’da chäädäichö cönä’jaacä.

⁶ Jesuuquidiito cöneeneaacä ñäädä wemo’taajä. Töwö dhowaanäcä cönä’jaacä numa cädäije yeichö; cönä’döaacä chäwwä: —¿Awaadonca’se manä?

⁷ Ñäädä cädäijato cöneccujä’acä: —Ö’wa’tänei ’je’da weneene, chu’jä aca yeenö’tänei tuna wä’jimi’chödaawä. Wammödaawä dea mma anejja töwe’ducca weneene yoowajo; quee cönä’döaacä.

⁸ Jesuuquidiito cönä’döaacä chäwwä: —Aanöncä, adhe’wötö shoomacä; äjääne; quee.

⁹ Yaawä dea mma ñäädä cädäijato cönaadoncai. Tä’wötö shoomadö’jo cöntämä yaawä. Yää cönä’jaacä wäädeetatoojo anooto.

¹⁰ Yääje yeijäcä judhíocoomo cönä’döa’to ñäädä cädäijato’jödö wwä: —Wäädeetatoojo anooto dajaane mädä eduuwa; adhe’wötö adääjai’cha ma.

¹¹ Töwö cönä’döaacä chäwwäiñe: —Ñäädä yaadoncaichö dea yääje nä’döaanä öwwä: “Adhe’wötö shoomacä; äjääne;” quee nä’döaanä öwwä; quee cönä’döaacä ñäädä dhanwa cädäijato’jödö.

¹² Tönwanno cöneecamma’joicho yaawä: —¿Änääcö yääje nä’döaanä äwwä: “Adhe’wötö shoomacä; äjääne;”? quee.

¹³ Ñäädä dhowaanäcä’da cönä’jaacä tadoncanei’jödö, jooje soto wei’jocoomo weijäcä yäätä, Jesuuquidiito wootone’tä’jödö weijäcä mmaja yo’tacaiñe.

¹⁴ Äcuude Jesuuquidiito tönaadonca’jödö cöneejodöi Wanaadi weichojo taca; cönä’döaacä chäwwä: —Amäädä töwaadonca ma eduuwa. Conemjönö mma männöi’che eduuwa, anejja conemjönö’cä jaiñoone äjääcä e’ducca’no yaawä; quee cönä’döaacä Jesuuquidiito chäwwä.

¹⁵ Ñäädä dhanwa cöntämä; judhíocoomo wwäiñe cöneecammai yaawä Jesuuquidiito tadoncanei’jödööje yeichö.

¹⁶ Yääje yeijäcä judhíocoomo yuunaca’se töweiye cönä’ja’to Jesuuquidiito. Tönwanno ema’se cönä’ja’to yää tönnöe yeijäcä wäädeetatoojo anooto awä.

¹⁷ Yaawä Jesuuquidiito cönä’döaacä chäwwäiñe: —Yääje yeichaame Jaaja tönnöe dea; öwö mmaja tödöödöje dea eijai wa; quee.

¹⁸ Yääje yeijäcä judhíocoomo jooje’cä jeene Jesuuquidiito ema’se cönä’ja’to, wäädeetatoojo anooto awä tödööemjönö tönnöe yeijäcä, Wanaadi wa’cotooje töwäätä’tä yeijäcä mmaja iiñedööje töwäätä’tädö que.

Jesuuquidiito Tumö acä äänönge yeichöcoomo

¹⁹ Yaawä Jesuuquidiito cönä’döaacä chäwwäiñe: —Chäänönge yääje wä’döa äwwäiñe, Wanaadi nnedö töwoije mma tödööjai’cha na, Tumö nödöödö eneedö’jo mmaane tödööjai. Tameedä Tumö nödöödö tönnöe mmaja Iiñedö.

²⁰ Jaaja Tönnedö nijumma; chäwwä töneenejo weneene tameedä tönnödö. Mädä tönnöe wääneneedö e’jodhaato’cä mmaja töwö neneeja’de öwwä, töwääcatoncaane määcatoncatäiye.

²¹ Jaaja yä’ja’a’como tönaadonca, yeichöcoomo tunu’e. Mädääje mmaja Iiñedö tumjummadö wwäiñe tunu’e yeichöcoomo.

²² Jaaja soto anemmenca’da na. Töwö Tönnedö wwä cuntui soto emmencato’como.

²³ Yääje yeijäcä tameedä soto tönoiñe eneejai ñaato ñäädä Iiñedö, Yuumö nontädö wa’cä mmaja. Ñäädä Iiñedö ñontäneijönö Yuumö onnontä’da mmaja na dea, ñäädä Iiñedö anontänei’jödö.

²⁴ “Chäänönge yääje wä’döa äwwäiñe, ñäädä ya’deddu etaanei, yaanontänei’jödö ecaanö’nei, ñäädä wwä töweiye na yeichö töwaatamemjönö. Ñäädä töwännanö’emööje’da na; töwö töwäämamjönööje töwä’döe yaawä töwäämaamöje töweichö jonno.

²⁵ Chäänönge yääje wä’döa äwwäiñe, chu’nädö aca wä’dönääje na eduuwa yä’ja’a’como nönga’como wwä etaatojo Wanaadi nnedö a’deddu. Ñanno etannamo’jödö wwäiñe töweiye na’de yeichöcoomo.

²⁶ Jaaja wwä töweiye do’ta u’tojo. Töwö Tönnedö wwä cuntui chea do’ta u’tojo.

²⁷ Töwö cuntui chea chäwwä soto emmencato’como, Soto nnedööje yeijäcä.

²⁸ Mädä wa’deuwödö jäcä määcatoncatäi; aneedawä na’de äwa acancomo wwä etaatojo Soto nnedö a’deddu.

²⁹ Tönwanno naanöngaato’de yaawä täwaadöcoomo acanno. Ñanno aashichaato tödönnamo’jödö naanöngaato’de yeichöödäje töweicho’comooje; conemjönö tödönnamo’jödö mmaane naanöngaato’de töwännanö’to’comooje daja.

Jesuuquidiito jäcä ecammannamo

³⁰ “Öwö jäädudu que mma tödööjai’cha wa. Wanaadi wwä yaanontädö woije tönemmenca öwö. Chäänönge öwö nemmencadö. Öwö woije mma ännö’da wa, ñäädä Jaaja, yaanontänei’jödö woijeene.

³¹ Öwö jääcä dea wääcamma’jäcä chäänönge’da wääcammadö eijai ña.

³² Anejja töweiye na jääcä töwa’deuwemö; yoowanääcä na chäänönge yeichö töwö ya’deuwödö jääcä.

³³ Änwanno Juan Wautiita mecamma’jojootäne; töwö chäänönge cöneecammaacä äwwäiñe.

³⁴ Soto wwä yeecammajäätödö tujunne’da yeichaame. Edääje mmädä yääje wä’döaanä äwwäiñe, äwääwanaacadööcomo wetä.

³⁵ Juan cönä’jaacä adhaawa nönge; töwö tawaane tönweijo cönä’jaacä. Änwanno a’dhe ta’cwaiñe mä’ja’quene töwö tönweijo cönä’ja’dawä.

³⁶ Töweiye öwwä na Juan necamma’jödö e’jodhaato jaiñoone. Mädä Jaaja waanontädö tönnöe wääneneedö nene’ju’ja Jaaja yaanontänei’jödööje yeichö.

³⁷ Ñäädä Jaaja, yaanontänei’jödö dea, töneenejo weneene tanoonöje weichö. Änwanno aneeta’da maato dha’deddu, aneene’da mmaja maato dea töwö.

³⁸ Töwö dha’deddu ’je’da na äwwäiñe, dhanoonö aneecamjö’da maatoodö naane’.

³⁹ Änwanno Wanaadi a’deddu imennaajä töna’de’tä määnetääne; yää a’de’tädö que mma aweichöcoomo chaana’cajai aweiyaatäiñe. Öwö jääcä ecammajä’taame yää imennaajä

⁴⁰ öwwadäädä aweejö’seiñe’da maato yää aweichöcoomo wutuiye yaawä.

⁴¹ “Aashicha jääcä soto wa’deuwödö tujunne’da öwwä na.

⁴² Yoowanääcä maato a’que äwwäiñe yeichö Wanaadi jummadö.

⁴³ Jaaja woije weejö’jödö weichaame änwanno jumma’da maato. Anejja töwoijato we’ajä yeiya’jäcä mmaane ecaanö’jai maato.

⁴⁴ ¿Aaquene änwanno mmädä maneecanö’tädööde’ ? Änwanno awaacö’comje naadö naane’ aashicha soto wa’deuwödö äjääcäiñe, Wanaadi yäätonno ’jemjönö necammadö ämjumma’da.

⁴⁵ Chäänönge’da aweichöcoomo Jaaja wwä adheecammajä’täiñe’da wa’de öwö. Moisé mmaane adheecammaato’de, ñäädä mecaanö’atoodö.

⁴⁶ Moisé nimennä’jödö töneecanö’e meicho’jo öwö mmaja cäcaanö’tädö dea, öwö jääcä imennäätö’da chäwwä.

⁴⁷ Änwanno immennä’jödö aneecamjö’da maatoodö naane’, ¿aaquene mmaja ya’deddu maneecanö’tädööde’ ? quee cönä’döaacä Jesuuquidiito judhío wwäiñe.