JUAN 4 - Wanaadi A'deddu

Wodi Samaadiya ñano acä Jesuuquidiito wa’deuwö’jocoomo

¹ Yääje mma yaawä jaadiseeo cöneeta’to jooje Jesuuquidiito nowaanomaadö weichöcoomo, jooje soto wautisaaje tönnöeiñe yeichö mmaja, Juan e’jodhe’cä.

² Jesuuquidiito jaiñoone wautisaaje ännö’da yeichaame, ñoowanoomadööne wautisaaje soto tönnöeiñe cönä’ja’to.

³ Jaadiseeo wwä tacaade töweichö eta’jäcä Jesuuquidiito cönääma’täi Judheea ñanno; Caadideea ña cöntaacä.

⁴ Samaadiya chäcä chäämadö cönä’jaacä Judheea ña iichotoojo.

⁵ Yaawä töwö cönä’döi Sicaada ña, yää Samaadiya nonoodö de’wono jata. Yää Sicaada ñano cönä’jaacä amoinche’da Jacoowo nonoodö’jödö jäcä, tönnedö José wwä inchudu’jödö.

⁶ Yäätä cönä’jaacä Jacoowo nöca’jödö tuna weja’catoojo. Yaawä anunnaque yeichö Jesuuquidiito cönaatajiimai yää tuna weja’catoojo dö’tä, ääma tai töweejödaawä töquincha’jödö weijäcä.

⁷ Yaawä wodi Samaadiya ñano cöneejä, tuna wetä. Jesuuquidiito cönä’döaacä chäwwä: —Woocödö änne’cä tuna; quee.

⁸ Jesuuquidiito nowaanomaadö ’je’da cönä’ja’to yäätä; jataaca cönä’ja’to äwanshi ejeemadööje.

⁹ Yaawä ñäädä wodi Samaadiya ñano cönä’döaacä Jesuuquidiito wwä: —¿Ane’que’nei judhíoje aweichaame tuna me’ca’anä öwwä, Samaadiya ñano wwä mmädä? quee cönä’döaacä. Töwö yääje cönä’döaacä judhíocoomo oojodö’da yeichomjäcä Samaadiya ñancomo jadäiñe.

¹⁰ Yaawä Jesuuquidiito cöneccujä’acä: —Wanaadi nutuudu odhoowanääcä ei’jo, äwwä tuna ne’ca’aadö odhoowanääcä ei’jo mmaja, amäädääne e’catäädö meiya öwwä, öwö utuudu weiya yaawä äwwä weichojo tuna; quee cönä’döaacä Jesuuquidiito wodi wwä.

¹¹ Yaawä ñäädä wodi cönä’döaacä: —Tuna anöntojo ’je’da dajaane ma; sö’je mmaja mädä tuna weja’catoojo. ¿Äshannoto yää weichojo tuna manammödö deeade’ ?

¹² Cadai’choncomo Jacoowo cöwwäiñe cönnämäi edä tuna weja’catoojo. Edä acaano dea töwö yoocödööje cönä’jaacä, iiñacoomo wocöödöje mmaja, chääcöntomo wocöödöje mmaja. ¿Ñäädä e’jodhaato ca amäädä?

¹³ Yaawä Jesuuquidiito cönä’döaacä chäwwä: —Edä tuna ennei emjätö’se mmaja na’dede yää ’jeje.

¹⁴ Öwö untudu ennei mmaane emjätö’se’da na’de yaawä yeichöje. Öwö untudu na’de tuna weja’catoojo nönge yo’taca, yeichöödäje yeichojooje; quee cönä’döaacä Jesuuquidiito.

¹⁵ Ñäädä wodi cönä’döaacä yaawä: —Änu’cä öwwä yää tuna, emjätö’se ä’dö’da weiye’de yaawä, eejö’da weiye’dede sadä tuna wetä; quee.

¹⁶ Jesuuquidiito cönä’döaacä chäwwä: —Äjääne, oiño a’dejjata; yää ’jeje ä’täcä’de.

¹⁷ Wodi cöneccujä’acä: —Töiñoque’da wa; quee cönä’döaacä. Yaawä Jesuuquidiito cönä’döaacä: —Chäänönge yääje mä’döa: “Töiñoque’da wa;” quee.

¹⁸ Ijaatoodea cönä’ja’to oiñotoomo; ñäädä eduuwa yö’tä maadö oiñojöönö ñäädä. Chäänönge yääje mä’döaanä; quee cönä’döaacä.

¹⁹ Yää eta’jäcä wodi cönä’döaacä: —Wanaadi wa’deuwödö ecammaneije ätö’ta öwwä.

²⁰ Wanaadi wwä ñaa adai’jödö tönnöe cönä’ja’to edä jöö de’wä. Änwanno judhíocoomo äwä’dödööcomo ’quene Jeduusadén ña Wanaadi wwä tödöötojo; quee cönä’döaacä ñäädä wodi Samaadiya ñano Jesuuquidiito wwä.

²¹ Jesuuquidiito cönä’döaacä yaawä chäwwä: —Amäädä wodi, chäänönge yääje wä’döa äwwä, aneedawä na’de äwwäiñe Wanaadi wwä tödöötojo, edä jöö de’wä’daane, Jeduusadén ña’da mmaja.

²² Änwanno samaaditaanocoomo iiña mmädä Wanaadi wwä töwa’deuwe määnetääne, töwö odhoowanääcäiñe’da yeichaame. Ñaa mmaane towaano wwä töwa’deuwe ñaa weneene, judhíocoomo jonnoto we’ajääne wääwanaacatoojo weiyajä.

²³ Chu’nädö aca wä’dönääje na eduuwa chäänöngato que Jaaja wwä tödöötojo; yaawä ñanno Jaaja wwä tödönnamo täwaanöcoomo jadäädä nödööaato’de, chäänönge töweiyancädäiñe mmaja. Yääja’como Jaaja tumjumma weneene tujummannamooje.

²⁴ Äänejöönö töwö Wanaadi. Ñanno ijummannamo täwaanö jadäädä ijummajai ñaato, chäänönge töweiyancädäiñe mmaja; quee cönä’döaacä Jesuuquidiito.

²⁵ Yaawä ñäädä wodi cönä’döaacä: —Yoowanääcä na ñäädä Mesía we’tojo, ñäädä Äwaanacaanei. Töwö ye’a’jäcä tameedä necammajä’a’de cöwwäiñe; quee.

²⁶ Jesuuquidiito cönä’döaacä: —Öwö ñäädä Äwaanacaanei, adhaacä ya’deuwaadö; quee.

²⁷ Yaawä ñoowanoomadö cönä’döicho; cone’da cönä’döjoicho yaawä wodi acä ya’deuwödö weijäcä. Yääje yeichaame aneecamma’jo’da cöneiya’to. “ ¿Ane’cäämö mijummaanä? ¿Ane’que’nei mä’dä acä adha’deujä’anä?” ca’da cönä’ja’to.

²⁸ Yää ’jeje ñäädä wodi tutuucudiiyö cönnämäi; jataaca cöntämä. Töwö cönä’döaacä soto wwäiñe:

²⁹ —Soto eneetantäcä. Töwö necammai öwwä tameedä wei’jödö. ¿Ñäädä’da ñäädä Äwaanacaanei? quee cönä’döaacä.

³⁰ Yaawä ñanno soto jata wwonno cöntonto Jesuuquidiito döiña.

³¹ Soto ä’dö’dadooto ñoowanoomadö cönä’döa’to Jesuuquidiito wwä: —Ääwashinchäcä Owaanomaanei.

³² Töwö cönä’döaacä chäwwäiñe: —Töweiye öwwä yeewanshiñö odhoowanoocomoojönö; quee cönä’döaacä.

³³ Yaawä ñoowanoomadö cönä’döa’to tönwannoje dea: —¿Anejja’da chääwanshiñö nutui? quee.

³⁴ Jesuuquidiito cönä’döaacä chäwwäiñe: —Öwö yeewanshiñö yää yaanontänei’jödö waanontä’jödö tödöödö, chaadawaajui acoichadö wa’cä.

³⁵ ¿Edääje jönca töwä’döe määnetääne: “Aacäichea nuunä a’que na eduuwa natö wau’cwantojo, amu’tojo cu’nädö aca yä’dötoojo;” quee jönca töwä’döe määnetääne? Öwö yääje wä’döa äwwäiñe, eneetäcä’ma, töwau’cwange dajaane natö na eduuwa; amu’tojo cu’nädö aca yä’döaajä mädä.

³⁶ Ñäädä natö amu’nei’jödö täjeema töweiye nai. Töwö ñi’jumma’jödö yeichöödoto yeichojooje na. Yaawä a’nädä ta’cwaiñe eijai ñaato, ñaatö’tänei’jödö acä amu’nei’jödö.

³⁷ Chäänönge yääje soto töwä’döe weneeneto: “Anejja ñaatö’täneije, anejja daja amu’neije;” quee.

³⁸ Öwö manaanontätääne anaatödööcomoojönö amu’que. Anejjacoomo cönnatö’toicho, änwanno mamu’cato eduuwa chaadawaajuichomo’jödö; quee cönä’döaacä Jesuuquidiito.

³⁹ Jooje yäätoncomo Samaadiya ñancomo Jesuuquidiito cöneecamjöicho ñäädä wodi wä’dö’jödö weijäcä: “Tameedä wei’jödö necammai öwwä;” quee yä’dö’jödö weijäcä.

⁴⁰ Yaawä Jesuuquidiito döiña samaaditaanocoomo wä’döa’comjäcä tönwanno cönä’döa’to chäwwä: —Eetä eichä’de ñaa jadä; quee. Yäätä Jesuuquidiito cönä’jaacä chääjadäiñe aacä anooto.

⁴¹ Jooje anejjacoomo cöneecamjöicho yaawä töwö dha’deddu jaiñoone.

⁴² Tönwanno cönä’döa’to ñäädä wodi wwä: —Ñaa necaanö’a eduuwa amäädä aneecamma’jödö jäcäinchädä mma’da; ñaa daja ñaa cöneetai chea dha’deddu. Ñaa owaanäcä na Äwaanacaanei chäänöngatooje yeichö, tameedä soto Ewaanacaaneichomooje yeichö; quee cönä’döa’to.

Acu’shänä sotoi nnedö adonca’jödö

⁴³ Aacä anoototo ai Jesuuquidiito cönääma’täi yäätonno; Caadideea ña cöntaacä.

⁴⁴ Töwö Jesuuquidiito dea cönä’döaacä: “Wanaadi a’deddu ecammanei töquiiñeme’que töweiye nai ijaatawä;” quee.

⁴⁵ Yaawä Caadideea ña yä’döa’jäcä iiñancomo eta’se cönä’ja’to dha’deddu, töwwäiñe ene’jödö weijäcä Jesuuquidiito nödö’jödö Jeduusadén ña, tönwanno mmaja Jeduusadén ña iichäjäätö’jocoomo weijäcä Weja’dätä’jä anooto comjedensiyai’chädö döe.

⁴⁶ Yaawä Jesuuquidiito cönennacai chea Caná ña, yää Caadideea nonoodö de’wono jata, tuna chääjedöödö eccuduuje tönaamode’nä’jödö döiña. Yäätä cönä’jaacä dhanwa, acu’shänä sotoi. Töwö iiñedö cädäije cönä’jaacä Cajeedamu ña.

⁴⁷ Ñäädä acu’shänä sotoi wwä eta’jäcä Judheea ñanno Caadideea ña Jesuuquidiito weejö’jödö, töwö cöntämä yaawä Jesuuquidiito döiña; cönä’döaacä chäwwä: —Ma’che jaadä; önnedö adoncata. Wäämanääje na; quee cönä’döaacä.

⁴⁸ Jesuuquidiito cönä’döaacä chäwwä: —Ene’ju’tojo mmaja, aashichaato mmaja, aneene’da aweiya’comjäcä ecaanö’jai’cha maato; quee.

⁴⁹ Ñäädä acu’shänä sotoi cönä’döaacä chäwwä: —Ma’da’cä ma’che, Owaanomaanei, önnedö ääma’dadä.

⁵⁰ Yaawä Jesuuquidiito cönä’döaacä: —Äjääne, ännedö ääma’da na; quee cönä’döaacä. Ñäädä cöneecamjöi Jesuuquidiito a’deddu; cöntämä yaawä.

⁵¹ Ääma tai töötädaawä töwö tanoonö jadäiñe cönoojodöicho. Ñanno cönä’döa’to chäwwä: —Ännedö ääma’da na; quee.

⁵² Yaawä töwö cöneecamma’joicho: —¿Äsha shii weichö cönaadoncai? quee cönä’döaacä. Tönwanno cönä’döa’to: —Coiñadä, anunnaque yei’jeje wedööcö cuncuna’mai; quee.

⁵³ Ñäädä yuumö dhowaanäcä cönä’jaacä yaawä yäätä shii weichö Jesuuquidiito wa’deuwö’jödö, “Ännedö ääma’da na;” quee yä’dö’jödö. Töwö Jesuuquidiito cöneecamjöi yaawä, tameedä yä’jimmä’tädö mmaja.

⁵⁴ Yää cönä’jaacä aacädeeto täneemö tödöödö Jesuuquidiito wwä Judheea ñano’jödö Caadideea ña töwä’döa’jäcä.