JUAN 3 - Wanaadi A'deddu

Jesuuquidiito döiña Niicodheemo wötä’jödö

¹ Dhanwa cönä’jaacä, Niicodheemoje chäätö; jaadiseeoje töwö cönä’jaacä, judhío täneejucaato.

² Töwö cöntämä Jesuuquidiito döiña, coijai; cönä’döaacä chäwwä: —Owaanomaanei, ñaa owaanäcä na Wanaadi nanontä’jödööje aweichö ñaa owaanomaaneije. Anejja tödööjai’cha mädä täneemö tönnöe määneneedö Wanaadi chääjadä’da yeiya’jäcä; quee cönä’döaacä Niicodheemo Jesuuquidiito wwä.

³ Yaawä Jesuuquidiito cönä’döaacä chäwwä: —Chäänönge yääje wä’döa äwwä, ñäädä eduuwaatoje ennujöönö Wanaadi jataadö eneejai’cha na; quee cönä’döaacä Jesuuquidiito.

⁴ Niicodheemo cöneecamma’joi yaawä: —¿Aaquene mmaja inchomo ennudu deeade’ ? Senö wenwaca mmaja omomjai töweichöjöönö töwennudu wetä mmaja; quee cönä’döaacä.

⁵ Jesuuquidiito cönä’döaacä chäwwä: —Chäänönge yääje wä’döa, ñäädä tuna ai ennujöönö, Epíiditu Santo ai ennujöönö mmaja Wanaadi jataacäi täjai’cha na.

⁶ Ñäädä tujuunu aiño wennuaajä sotooje na; ñäädä Epíiditu Santo aiño wennuaajä mmaane Wanaadi wwonooje na.

⁷ Määcatoncai mädä wa’deuwödö jäcä äwwä: “Eduuwaatoje ennujai maato dea;” quee wä’döannö.

⁸ Jejeichä naadö naane’, tumjummadö woije na’jimma. Töwääta mma äwwä ña’jimmadö, yääne’ yeejödö odhoowanääcä’daane’, iichotoojo odhoowanääcä’da mmaja. Mädääje mmaja ñanno Epíiditu Santo aiño wennua’como; quee cönä’döaacä Jesuuquidiito.

⁹ Yaawä Niicodheemo cönä’döaacä: —¿Aaquene mädääje eijai ñai?

¹⁰ Jesuuquidiito cönä’döaacä chäwwä: —¿Iisadaaediita owaanomaaneichomo tacaadatooje aweichaame mädä odhoowanääcä’da nai?

¹¹ Chäänönge yääje wä’döa äwwä, towaano jäcä ñaa na’deuwa, töneene’jödö mmaja ñaa necammajä’a dea äwwäiñe; yääje yeichaame aneecamjö’da maato ñaa necammajäätödö.

¹² Edä nono de’wono jäcä neecammajäätödö aneecamjö’da maatoodö naane’. Töwaacö’je mma caju ñano jäcä neecammajäätödö aneecamjö’da eijai maato.

¹³ “A’que na caju ñano wäncudu ’je’da, ñäädä Soto nnedö mmaane, caju ñanno cönä’täichö dea.

¹⁴ Jata ’jemjönö aca töweichö Moisé äcääyu cönannäjöichöje mmaja Soto nnedö natannä’ja’de.

¹⁵ Tameedä Soto nnedö ecaanö’nei ännamjö’da na’de, yeichö töwaatamemjönö töweiye na.

Wanaadi wwä cujumma’jocoomo

¹⁶ “Wanaadi tameedä soto cumjumma’to jooje, chääjäcäinchädäiñe Tönnedö yäätonno ’jemjönö tu’ene’jödöödä. Iiñedö ecaanö’nei ännamjö’da na’de, yeichö töwaatamemjönö töweiye na.

¹⁷ Wanaadi Tönnedö cönaanontäi edä nono de’cäi tameedä soto ennanö’caiñe’da, ewaanacaiñeene.

¹⁸ “Ñäädä ecaanö’nei töwännanö’emööje’da na. Ñäädä aneecanö’jönö mmaane töwännanö’emööje na, aneecamjö’da yeijäcä Wanaadi nnedö yäätonno ’jemjönö.

¹⁹ Weiyu cöneejä edä nonoodö de’cäi. Soto cumjumma’to tööjato, weiyu e’jodhe’cä, cone’da tönnödööcomo weijäcä. Yääje yeijäcä ñanno aneecanö’jöncomo töwännanö’aamoje naato.

²⁰ Ñäädä conemjönö tödöönei tawaanato yaacö’je’da töweiye nai; tawaanato wwadäädä eejö’da töwö tönnödö tacaade yä’dödö queiñe.

²¹ Chäänönge tödöönei mmaane töwe’e tawaanato wwadäädä, Wanaadi woije iiñödö weichö tacaade yä’dödö wetä; quee cönä’döaacä Jesuuquidiito Niicodheemo wwä.

Jesuuquidiito jäcä Juan Wautiita necammajäätö’jödö

²² Yää ’jeje Judheea ña Jesuuquidiito cöntämä tönoowanoomadö jadäiñe. Äächädä anooto iiña cönä’jaacä chääjadäiñe, wautisaaje soto tödöödöcoomoje.

²³ Juan mmaja wautisaaje soto cönnöa’to Enón ña, amoinche’da Sadi ñano jäcä, jooje tuna yäätä yeijäcä. Soto cöne’a’to chäwwadäädä wautisaaje ä’döjo.

²⁴ Yää cönä’jaacä jedeesoje Juan ä’döjo’dadä.

²⁵ Yaawä Juan nowaanomaadö cönäätäccujä’a’to judhío jadäiñe, wataamoichanä jäcä.

²⁶ Tönwanno cöntonto yaawä Juan döiña; cönä’döa’to chäwwä: —Owaanomaanei, ñäädä Joodadán mänsemjo ajaadä cönä’ja’dö, ñäädä mecammajä’aquennö, wautisaaje soto tödöödöcoomoje na. Tameedä soto chäwwadäädä nötaato; quee cönä’döa’to.

²⁷ Yaawä Juan cönä’döaacä chäwwäiñe: —Töweichojo Wanaadi nutuudu mma tödöödö toweiye nai.

²⁸ Änwanno odhoowanääcäiñe wääcamma’jödö: “Äwaanacaaneijönö öwö, dhowaajo anontaajäje mma;” quee wä’dö’jödö.

²⁹ Jötaanawä töweiye naichö naane’, ñäädä töjöötaamööne wodi yö’tä nä’döa. Ñäädä töjöötaamö weichacoono töjöötaamö a’deddu niyoomo’ca; töwö na’cwaincha yaawä ya’deuwödö etaadö’jo. Mädääje wa öwö, ta’cwaiñe wa jooje.

³⁰ Töwö täneejuque jeene ä’döjai ña, öwö mmaane dho’nä dea täjai wa; quee cönä’döaacä Juan Wautiita.

Caju ñanno we’ajä

³¹ Ñäädä cacoiño we’ajä tameedä o’jodhe na. Edä nonoodö de’wono mmaane edä nono de’wonooje na; edä nono de’wono jäcä ya’deuwödö töwö. Caju ñanno we’ajä mmaane tameedä soto e’jodhe na.

³² Töwö na’deuwa töneene’jödö jäcä, töneeta’jödö jäcä mmaja. Yääje yeichaame soto eta’se’da naato töwö ñeecammajäätödö.

³³ Ñeecammajäätödö ecaanö’nei mmaane nene’ju’ja Wanaadi chäänöngatooje yeichö.

³⁴ Ñäädä Wanaadi nanontädö Wanaadi a’deddu necamma; Wanaadi Epíiditu Santo nu’a chäwwä ewontancädä’da.

³⁵ Yuumö wwä Tönnedö tujunne na; töwö cönnöi tameedä cajiichaanaje.

³⁶ Ñäädä Iiñedö ecaanö’nei, yeichö töwaatamemjönö töweiye na. Ñäädä Iiñedö ecamjö’semjönö ’quene, töweichö aneene’da na’de; Wanaadi wwä töwäätä’maminchajoomöje mma na.