JUAN 20 - Wanaadi A'deddu

Töwäämaajo jonno Jesuuquidiito waadonca’jödö

¹ Semaana waajäntädö anootoi’chädö wawaanadaawä Madía Maacadeena cöntämä äwa döiña, tööje yeichö dea. Yaawä täseeca täju cöneedantäi äwa nata’tajonno.

² Töwö cöneeca’tömöi yaawä Simón Peedhodo döiña, yeichacoono Jesuuquidiito nowaanomaadö döiña mmaja, ñäädä Jesuuquidiito nijummadö. Madía cönä’döaacä chäwwäiñe: —Cädhaajotoncomo equeejödö tadä wedantäi; ¿äsha ca cönnöichodö jäcä; quee cönä’döaacä.

³ Yaawä Peedhodo cöneeja’cai, yeichacoono Jesuuquidiito nowaanomaadö mmaja; äwa döiña cöntonto.

⁴ Tamjä’ne cöneeca’tönga’to äätönnäcä. Peedhodo weichacoono mmaane tamjä’ne’cä cöntaacä, Peedhodo e’jodhe’cä; töwö cönä’döi awa’de äwa döiña.

⁵ Töwö cönootommoi yaawä eneedö wetä. Saawana cöneeneaacä yäätäädä tödööajä; töwö omoomö’da cöneiyacä äwa aca.

⁶ Yää ’jeje yaawä Simón Peedhodo cönä’döi inchäcä. Töwö cönoomomöi äwa aca; yää saawana cöneeneaacä yäätäädä tödööajä;

⁷ Jesuuquidiito ju’jä womö’jödö cöneenea’dea. Saawana jadä’da cönä’jaacä yää, töudäjeene cönä’jaacä ñongajä.

⁸ Yää ’jeje cönoomomöi chea yaawä ñäädä awa’deene äwa döiñano wä’dö’jödö; töwö cöneeneaacä, cöneecamjöi yaawä.

⁹ Tönwanno äntö’tammecö’da dea cönä’ja’to Wanaadi a’deddu imennaajä wä’dödö töwäämaajo jonno Jesuuquidiito waadoncatoojo jäcä.

¹⁰ Cönennacaicho dea yaawä tömmaichomo taca.

Madía Maacadeena wwä Jesuuquidiito wäänejo’jödö

¹¹ Madía mmaane waamonääje cönä’jaacä jödo’na, äwa dö’tä. Yaawä töwaamodaawä cönootommoi äwa aca eneedö wetä.

¹² Aacä amoode cöneedantoicho tajääde’dato awäiñe. Shuucu cönä’ja’to Jesuuquidiito equeejödö wei’jödö dö’tä; tooni iju’jä wei’jödö dö’se cönä’jaacä, yeichacoono i’judu wei’jödö dö’se.

¹³ Ñanno amoode cönä’döa’to Madía wwä: —¿Ane’que’nei maamoaanä? quee. Madía cönä’döaacä chäwwäiñe: —Yeedhajä adä’jödö weijäcä. Yoowanääca’da na, ¿äsha ca cönnöichodö jääcä? quee cönä’döaacä.

¹⁴ Yääje töwa’deuwödö’jo Madía cönä’jedennacai; töncadheedä Jesuuquidiito cöneedantäi; dhowaanäcä’da cönä’jaacä Jesuuquidiitoje yeichö.

¹⁵ Yaawä Jesuuquidiito cönä’döaacä chäwwä: —¿Ane’que’nei maamoaanä? ¿Änääcö mujiiyanä? quee. Töwö Madía cöneecanö’acä äwa edai’chänei atäi; cönä’döaacä chäwwä: —Äwwä adääa’jäcä ecammacä öwwä tödö’jödö, weichaiye yaawä; quee cönä’döaacä.

¹⁶ Jesuuquidiito cönä’döaacä chäwwä: —Madía; quee. Töwö Madía cönä’jedennacai; cönä’döaacä: —Dawooni; quee. Owaanomaanei, quee töwä’döse yeichö eewedeeo a’deucwe.

¹⁷ Jesuuquidiito cönä’döaacä chäwwä: —Canaajäi; äncu’da dea wa Jaaja döiña. Äjääne jimmä döiñaiñe; chäwwäiñe ecammacä’de Jaaja döiña wäncudu, ñäädä Oomotoncomo mmaja, öwö Waanadiiyö, änwanno Awaanadiiyöcoomo mmaja; quee cönä’döaacä chäwwä.

¹⁸ Yaawä Madía Maacadeena cöntämä Jesuuquidiito nowaanomaadö wwäiñe ecamma töwwä Jesuuquidiito ene’jödö, töwwä ya’deuwö’jödö mmaja.

Tönoowanoomadö wwäiñe Jesuuquidiito wäänejo’jödö

¹⁹ Yää anooto co’momöödawä dea tujuumä ñoowanoomadö cönä’ja’to; semaana waajäntädö anootoi’chädö cönä’jaacä. Tönwanno iiñata’tadööcomo ta’duque cönä’jaacä judhío nontädööcomooje. Yaawä Jesuuquidiito cöneejä, dhantawäiñe cönä’jaacä; töwö cöna’dejjaicho; cönä’döaacä chäwwäiñe: —Täncanoode’da aweicho’como äwwäiñe yei’she wa; quee.

²⁰ Yaawä tamäädö cöneenejoi chäwwäiñe, tusuudadö mmaja. Ta’cwaiñe ñoowanoomadö cönä’ja’to yaawä töwwäiñe Tädhaajotoncomo eneea’jäcä.

²¹ Yää ’jeje Jesuuquidiito cönä’döa’dea chäwwäiñe: —Täncanoode’da aweicho’como äwwäiñe yei’she wa. Jaaja yenno’janeedöje mmaja manenno’jaato öwö; quee cönä’döaacä.

²² Yaawä ye’cäcäiñe cöna’jiimai; cönä’döaacä chäwwäiñe: —Epíiditu Santo ’je ä’dötääcä.

²³ Conemjönö anencwanno’jodööcomo täncwanno’jo na. Conemjönö anencwanno’jo’da maatoodö mmaane täncwanno’jo’da na; quee cönä’döaacä Jesuuquidiito.

Tomá wwä Jesuuquidiito ene’jödö

²⁴ Tomá, ñäädä amoojadooto de’wä aaco’como Jesuuquidiito nowaanomaadö jimmä dea, chääjadäiñe’da cönä’jaacä Jesuuquidiito wäänejoodawä. Ñäädä töne’tä cönä’ja’to Canaacuje.

²⁵ Yää ’jeje ijimmä cönä’döa’to chäwwä: —Cädhaajotoncomo ñaa cöneeneaacä; quee. Töwö Tomá cönä’döaacä chäwwäiñe: —Chaajuwa nöwä’jödö öwwä eneea’jäcääde, yää ajooja’jäcä öwwä, shuudadö ajooja’jäcä mmaja, yaawääne ecaanö’jai wa; quee.

²⁶ Aaduwaawä amoojato anoototo ai ñanno Jesuuquidiito nowaanomaadö we’jumma’como cönä’ja’to ä’saca; Tomá chääjadäiñe cönä’ja’dea. Yaawä Jesuuquidiito cöneejä, mönaatata ta’duque yeichaame; dhantawäiñe cönä’jaacä. Töwö cönä’döaacä: —Täncanoode’da aweicho’como äwwäiñe yei’she wa; quee.

²⁷ Yaawä Jesuuquidiito cönä’döaacä Tomá wwä: —Adhaamädö dhadaadö que cajoojocä; yaamädö eneecä; suudadö ajoojocä. Aneecamjö’da’daane eichä, töneecanö’eene; quee cönä’döaacä.

²⁸ Yaawä Tomá cönä’döaacä: —Yeedhajä amäädä, Waanadiiyö mmaja; quee.

²⁹ Jesuuquidiito cönä’döaacä chäwwä: —Amäädä Tomá, äwwä yeene’jödö weijäcä mecaanö’a. Ta’cwaiñe jeene eijai ñaato ñanno yeenedö’jo’da ecaanö’nnamo; quee cönä’döaacä Jesuuquidiito.

Cöwwäiñe ecamjödö wetä edä jajeeda imennä’jödö yeichö

³⁰ Jooje anejja ene’ju’tojo mmaja Jesuuquidiito cönnöi chea tönoowanoomadö neneedöcoomoje. Tameedä’da tömennä na edä jajeeda jäcä.

³¹ Eetä naadö mma tömennä na ecamjödö wetä äwwäiñe Jesuuquidiito Äwaanacaaneije yeichö, Wanaadi nnedööje yeichö mmaja. Yaawä äwwäiñe ecaanö’a’jäcä aweichöcoomo töweiye na’de, töwö chääjäcäinchädä.