JUAN 2 - Wanaadi A'deddu

Caná ña jötaanä tödö’jödö

¹ Aaduwaawä anoototo ai jötaanä soto cönnöa’to Caná ña, yää Caadideea nono de’wono jata. Yäätä Jesuuquidiito dhenö cönä’jaacä.

² Jesuuquidiito mmaja, ñoowanoomadö mmaja cönaata’dejjajoicho dea jötaanä tödöödö döiña.

³ Yaawä yoocödööcomo chääjedöödö eccudu wataamea’jäcä Jesuuquidiito dhenö cönä’döaacä chäwwä: —Chääjedöödö eccudu nataamei; quee.

⁴ Jesuuquidiito cönä’döaacä chäwwä: —¿Ane’cotoojo mädä mecammaanä öwwä, maama? Cu’nädö aca ä’döjai’cha dea na; quee cönä’döaacä.

⁵ Yaawä Jesuuquidiito dhenö cönä’döaacä äwanshi ecaamonnamo wwä: —Tödöötäcä tameedä ñaanontädö woije; quee cönä’döaacä.

⁶ Yäätä cönä’jaacä tooni amoojato tuna ewöötö, ädiiñä döaajä. Adai’jocoomo cönä’jaacä yää, canaawa adai’joto ’cäwa’cä. Tuna ewöötö yää cönä’jaacä, judhío nödöödöcoomo, ñaamoichato’como.

⁷ Yaawä Jesuuquidiito cönä’döaacä äwanshi ecaamonnamo wwä: —Tuna ewöötö adö’tätääcä tuna que. Tönwanno cönaadö’toicho tu’que.

⁸ Yaawä Jesuuquidiito cönä’döaacä: —Anaanöntäcä eduuwa tuna ewöötö acanno; adäätäcä äwanshi ejoodödö edhaajä wwadäädä; quee cönä’döaacä. Tönwanno cönnöicho ñaanontä’jödö woije.

⁹ Ñäädä äwanshi ejoodödö edhaajä cönoonejai yää chääjedöödö eccudu, tunaaje awa’de cönä’ja’dö. Töwö dhowaanäcä’da cönä’jaacä tunaaje yei’jödö. Ñanno mmaane, tuna eiñamo’jödö mmaane dhowaanäcäiñe cönä’jaacä. Yaawä äwanshi ejoodödö edhaajä cöna’dejjai ñäädä töjöötaamö;

¹⁰ cönä’döaacä chäwwä: —Soto wocöödöcoomo chääjedöödö eccudu ecaamodö töweiye nai aashichaato awa’de; yää ’jeje jeene, a’dejja’como wwä enga’jäcä jeene aashichamjönöiche mma ecaamodö. Amäädä mmaane chääjedöödö eccudu aashichaato medeemuntäi eduuwa tängemööje; quee cönä’döaacä äwanshi ejoodödö edhaajä.

¹¹ Yää cönä’jaacä awa’deeto täneemö Jesuuquidiito wwä tödöödö. Yää cönnöi Caná ña, Caadideea ñano jataawä. Yää tödöödö que töwö täjäädudu cöneenejoi; ñoowanoomadö cöneecamjöicho yaawä.

¹² Yää ’jeje Jesuuquidiito cöntämä Cajeedamu ña, senö jadä, tacontomo jadäiñe mmaja, tönoowanoomadö jadäiñe mmaja. Yäätä cönä’ja’to äächädä anooto mma.

Wanaadi weichojo tacanno töwäätätöijaamo ija’canö’jo’jödö

¹³ Yaawä amoinche’da cönä’jaacä Weja’dätä’jä anooto, yää judhíocoomo comjedensiyai’chädö tödöötojo cu’nädö. Yääje yeijäcä Jesuuquidiito cöntämä Jeduusadén ña.

¹⁴ Yäätä Wanaadi weichojo tawä cöneedantäi töwäätätöijaamo. Tönwanno cöneejemaaja’to jaaca, oweeja mmaja, jaduuma mmaja. Jödaata chamjiyaacannamo yäätä cönä’ja’to dea, shuucu.

¹⁵ Yää eneea’jäcä töwö Jesuuquidiito ato cönnöi aiju’jo’to’comooje. Tameedä cömja’canö’joicho yaawä Wanaadi weichojo tacanno, oweeja jadä, jaaca jadä mmaja. Jödaata chamjiyaacannamo meesaichomo cönaawotönnacaajätöi ijöödataichomo emja’madööje mma.

¹⁶ Töwö cönä’döaacä jaduuma ejeemajonnamo wwä: —Canno adääcoto eetonno. Wätäätöijatoojoje mma Jaaja mmai männötäi; quee cönä’döaacä.

¹⁷ Yaawä ñoowanoomadö cöntö’taicho Wanaadi a’deddu imennaajä jäcä. “Äämajai tödööene ämmai jäcä tö’neiñe wäänene;” queeto jäcä cöntö’taicho.

¹⁸ Yaawä judhíocoomo cönä’döa’to Jesuuquidiito wwä: —¿Ane’cäämö täneemöje tödööjai manä ñaa neneedöje, ñaa owaanäcä yeichö wetä mädä tödöötojo ’je aweichö?

¹⁹ Jesuuquidiito cöneccujä’a’to; cönä’döaacä chäwwäiñe: —Edä Wanaadi weichojo emajja’jäcä äwwäiñe öwö wödööa’dede aaduwaawä anooto; quee.

²⁰ Yaawä judhíocoomo cönä’döa’to: —Aacä sotooto de’wä tooni amoojato wedu dajaane cönä’ja’to edä Wanaadi weichojo amäädöje. ¿Amäädä amääjai ätö’taanä aaduwaawä anooto mma? quee cönä’döa’to Jesuuquidiito wwä.

²¹ Töwö Jesuuquidiito cöna’deuwacä tödo’tadö jäcääne; Wanaadi weichojooje tödo’tadö cöne’taacä.

²² Äcuude’cä, töwäämaajo jonno Jesuuquidiito waadonca’jäcä, ñoowanoomadö cöntö’taicho yaawä yääje yä’dö’jödö jäcä. Tönwanno cöneecamjöicho yaawä Wanaadi a’deddu imennaajä; Jesuuquidiito wa’deuwö’jödö mmaja cöneecamjöicho dea.

Jesuuquidiito tameedä dhowaanäcä yeichö

²³ Yaawä Weja’dätä’jä anooto comjedensiyai’chädö awä Jeduusadén ña Jesuuquidiito cönä’jaacä. Yaawä jooje soto cöneecamjöicho täneemö iiñödö eneedö’jo.

²⁴ Jesuuquidiito mmaane ätäncu’tojo’da cönä’jaacä chäwwäiñe, towaanäcä yeijäcä tameedä soto tö’tajäätödööcomo.

²⁵ Anejja chäwwä ecammajai’cha cönä’jaacä soto weichö, töwö dea dhowaanäcä yeijäcä tameedä soto tö’tajäätödööcomo.