JUAN 19 - Wanaadi A'deddu

¹ Yaawä Pidaato Jesuuquidiito cönaiju’jojäätöi.

² Ñanno suddau wesooca aca’ajä ijeemöichöje cönnöicho. Yaawä camiisha seweichato awä cönwontoicho.

³ Tönwanno cömjojeeta’mojäätöicho; cönä’döa’to: —Amäädä ñäädä judhío Cajiichaanaichomo; quee cönä’döa’to.

⁴ Yaawä Pidaato cöneeja’cai chea judhío döiñaiñe mmaja; cönä’döaacä chäwwäiñe: —Määdhä weneejä äwwadäädäiñe odhoowanääcäiñe yeichö wetä conemjönö iiñö’jödö aneejodö’da weichö; quee cönä’döaacä.

⁵ Yaawä Jesuuquidiito cöneeja’cai wesooca döaajä tuju’jä de’wä, seweichato awä. Pidaato cönä’döaacä judhío wwäiñe: —Määdhä ñäädä dhanwa; quee.

⁶ Töwwäiñe Jesuuquidiito eneea’jäcä ñanno Wanaadi wwä töwa’deuwaamo edhaajotoncomo, waadiya mmaja, cönaajäntoicho töcä’tömjätöödöcoomo: —Cuduusa jäcä ajoijojoocä. Cuduusa jäcä ajoijojoocä; quee cönä’döa’to. Pidaato cönä’döaacä chäwwäiñe: —Änwannoone adäätäcä; cuduusa jäcä majoijotäiye. Öwö mmaane conemjönö iiñö’jödö aneejodö’da wa; quee.

⁷ Judhíocoomo cöneccujä’a’to yaawä: —Ñaa wwä töweiye na waanontänä imennaajä; yää wä’dödö woije tämamje na määdhä, Wanaadi nnedööje töwäätä’tä yeijäcä.

⁸ Yää eta’jäcä jooje’cä jeene Pidaato cönääcatoncai yaawä.

⁹ Töwö cönoomomöi chea yaawä täwöötö taca; Jesuuquidiito cöneecamma’joi: —¿Äshano amäädä? quee cönä’döaacä. Äucwätä’da Jesuuquidiito cönä’jaacä.

¹⁰ Yaawä Pidaato cönä’döaacä chäwwä: —¿Yeccujäätö’da manä? ¿Äntö’tammecö’da manä cuduusa jäcä adhaajoijojoojai weichö, ayu’cajai weichö jeiñe mma? quee cönä’döaacä.

¹¹ Jesuuquidiito cöneccujä’acä yaawä: —Wanaadi mädääje yöödöjo’se’da yeiya’jäcä yöödöjai’cha meichö. Ñäädä, äwwä yu’nei’jödö, jooje’cä jeene choone’nadiiyö na; quee cönä’döaacä Jesuuquidiito.

¹² Yäätonno Pidaato cöntö’tajäätöi u’ca’se, töwäädä judhíocoomo jooje cöncä’tömjä’a’tone’ yaawä. Tönwanno cönä’döa’to: —Määdhä äwwä u’ca’jäcä acu’shänä sotoije’da ma yaawä. Ñäädä cajiichaanajaato wätä’tädö acu’shänä tu’dedö ñäädä; quee cönä’döa’to judhíocoomo.

¹³ Yää eta’jäcä Pidaato Jesuuquidiito cömja’cai yaawä jödo’na. Töwö cönaatajiimai yaawä äcamma’jonei a’täi ye’wä; yää weichojo eetö eewedeeocoomo töne’tä cönä’ja’to Cawaataje; Täju ’Dodoi; quee töwä’dö’se yeichö.

¹⁴ Yaawä cönä’jaacä anunnaque yeichö, Weja’dätä’jä anooto waajäntotoojo jenamma naadöje. Yaawä Pidaato cönä’döaacä judhíocoomo wwä: —Eneetäcä’ma acaajichaanaichomo.

¹⁵ Tönwanno cöncä’tömjä’a’to yaawä: —Emaajocä; emaajocä. Cuduusa jäcä ajoijojoocä; quee. Yaawä Pidaato cönä’döaacä chäwwäiñe: —¿Aaquene mmaja acaajichaanaichomo mmädä cuduusa jäcä wanaajoijojoodö deeade’ ? quee cönä’döaacä. Ñanno Wanaadi wwä töwa’deuwaamo edhaajotoncomo cöneccujä’a’to yaawä: —Anejja ñaa cajiichaanaije’da na, ñäädä acu’shänä mma; quee cönä’döa’to.

¹⁶ Yaawä Pidaato Jesuuquidiito cuntui chäwwäiñe cuduusa jäcä ajoijodö wetä. Ñanno cönaadoicho yaawä.

Cuduusa jäcä Jesuuquidiito ajoijo’jödö

¹⁷ Yaawä Jesuuquidiito tucuudusai ya’me cöntämä Ye’caichö’jödö ña; eewedeeocoomo yää töne’tä cönä’ja’to Coodocoota ñanoo; quee.

¹⁸ Yäätä Jesuuquidiito cuduusa jäcä cönaajoijoicho. Aacä anejjacoomo mmaja cuduusa jäcä cönaajoijoicho dea; ääjato ñanno cönä’ja’to Jesuuquidiito nnäcä, Jesuuquidiito mmaane dhantawäiñe.

¹⁹ Pidaato cömmennäjoi yaawä ta’de’täämö; cönaajoijojoi yaawä cuduusa jäcä. Edääje cönä’jaacä yää imennaajä: “Määdhä ñäädä Jesuuquidiito Naasade ñano, judhío Cajiichaanaichomo;” quee imennaajä cönä’jaacä.

²⁰ Jooje judhíocoomo cöna’de’ta’to yää imennaajä, amoinche’da yeijäcä jata jäcä. Yää imennaajä cönä’jaacä eewedeeo a’deucwe, quidiiyeeco a’deucwe mmaja, datiino a’deucwe mmaja.

²¹ Yaawä ñanno Wanaadi wwä töwa’deuwaamo edhaajotoncomo cönä’döa’to Pidaato wwä: —“Judhío Cajiichaanaichomo;” quee mämmennäjoi. Edääje mmaane imennäjoocä: “Judhío Cajiichaanaichomooje yäätä’tä’jödö;” queene; quee cönä’döa’to Pidaato wwä.

²² Pidaato cönä’döaacä chäwwäiñe: —Yää wimennäjoichö yääje nei’ñojo; quee.

²³ Cuduusa jäcä Jesuuquidiito ajoijo’jeje ñanno suddau töwaadäiñe Jesuuquidiito womö’jödö cöneijätöicho, aacäicheai. Yoomö o’näno cönä’jaacä töca’ajä, iichotontä’jödö ’je’da.

²⁴ Yääje yeijäcä tönwannoje dea suddau cönä’döa’to: —Änsedeijätö’da queichäiye; cöwä’cana’cato’como cännötäiye, chaana’canei’jödö töwwä tödöiye yaawä; quee cönä’döa’to. Mädääje Wanaadi a’deddu imennaajä wä’dödö nönge cönä’jaacä: “Woomö’jödö töwaadäiñe cönnöicho, wä’cana’canä tödöödö’jo;” quee imennaajä wä’dödö. Mädääje cönnöicho ñanno suddau.

²⁵ Jesuuquidiito cuduusai yö’tä cönä’jaacä yeenö; yeenö acoono mmaja cönä’ja’dea, ñäädä Madía, Quedeeojaasa jiñamo; Madía Maacadeena mmaja cönä’ja’dea.

²⁶ Jesuuquidiito töwwä senö eneea’jäcä, tönoowanoomadö tumjummadö eneea’jäcä mmaja, töwö cönä’döaacä senö wwä: —Määdhä ñäädä ännedö, maama; quee cönä’döaacä, tönoowanoomadö tumjummadö ecammancädä.

²⁷ Yaawä tönoowanoomadö wwä töwö cönä’döaacä: —Määdhä ñäädä aanö; quee. Yää ’jeje ñäädä ñoowanoomadö Madía töjaadä tönnöe cönä’jaacä tömmai chaca.

Jesuuquidiito wääma’jödö

²⁸ Yää ’jeje Jesuuquidiito dhowaanäcä cönä’jaacä tameedä chäänönge töwä’döe yeichö. Yaawä Wanaadi a’deddu imennaajä wä’dödö nönge yeichö wetä töwö cönä’döaacä: —Emjätö’se wa; quee.

²⁹ Yäätä cönä’jaacä tucuudi aca chääjedöödö eccudu casantaajä. Yaawä camiisha cönennöichaicho yää chääjedöödö eccudu que; isoopo ajäädö jo’wa cöneenejoicho Jesuuquidiito wwadäädä, shuumadö wetä chäwwä.

³⁰ Yää casamjato shuuma’jäcä Jesuuquidiito cönä’döaacä: —Chäänönge nä’döi eduuwa; quee. Tuju’jä emmodö’jo cönaatacoichai yaawä.

Sucuuji che Jesuuquidiito töwä’jödö

³¹ Yää cönä’jaacä Weja’dätä’jä anooto owaajo; yää anooto täneejuque cönä’jaacä judhío wwäiñe. Yääje yeijäcä tönwanno Jesuuquidiito cuduusa jäcäädä tödö’se’da cönä’ja’to wäädeetatoojo anooto awä. Tönwanno Pidaato wwä cönaiyojoojä’a’to cuduusa jäcä cönä’ja’todö jetööcomo, enö’tädööcomo wetä yaawä.

³² Yaawä suddau cöntonto; a’nädäncädä cönaiyojootöicho Jesuuquidiito jadoncomo cuduusa jäcä ajoija’como jetööcomo.

³³ Töwwäiñe Jesuuquidiito töwääma yeichö eneea’jäcä ijeetö anaiyo’da cöneiya’to.

³⁴ Tooni suddau sucuuji che cönwäi shuudadö ai. Munu cöneeja’cai yaawä, tuna mmaja.

³⁵ Ñäädä eneenei’jödö jaiñoone mädä necammajä’a; chäänönge töwö ñeecammajäätödö na. Töwö dhowaanäcä mmaja chäänönge töneecammajäätödö weichö, änwanno mmaja mecaanö’taiye.

³⁶ Tameedä yää cönä’jaacä Wanaadi a’deddu imennaajä wä’dödö nönge yeichö wetä, yää yääje yä’dödö naichö: “Ye’jä anaiyo’da naato’de;” quee yä’dödö naichö.

³⁷ Edääje mmaja imennaajä wä’dödö: “Tönwanno nene’maato’de tönwo’jocoomo;” quee.

Jesuuquidiito ewaaca’jödö

³⁸ Yääje mma yaawä José Aadimaatea ñano Pidaato wwä cöne’catäi Jesuuquidiito equeejödö; Pidaato cönaadojoi chäwwä. Ñäädä José cönä’jaacä Jesuuquidiito ecaanö’nei, tacaade’daane, judhío tönnontä töweijäcä. Ñäädä cöntämä yaawä; Jesuuquidiito equeejödö cönaadäi.

³⁹ Niicodheemo mmaja yäätä cönä’ja’dea, ñäädä Jesuuquidiito döiña coijai cöneiya’nei. Töwö cönnejä juu shimi’jotoojo oimaajä, aacä sotooto quiidoto ’cäwa’cä.

⁴⁰ Ñanno José, Niicodheemo mmaja, Jesuuquidiito equeejödö cönaiñantoicho saawana que, yää juu shimi’jotoojo ’jano que, judhío newaacadööcomo nönge dea.

⁴¹ Cuduusa jäcä ajoijo’jödö dö’tä cönä’jaacä natö weichojo. Yää awä cönä’jaacä äwa tödööenö, yäämaajä ewaacatoojo; ta’cu’täjöönö yää cönä’jaacä.

⁴² Yää aca Jesuuquidiito equeejödö cöneewaacaicho amoinche’da yeijäcä, judhío wäädeetato’como anootoi’chädö aca ä’döjai yeijäcä mmaja.