JUAN 18 - Wanaadi A'deddu

Jesuuquidiito ajäi’jödö

¹ Yääje töwa’deuwö’jeje Jesuuquidiito cönääma’täi Seedhodón mänsemjona tönoowanoomadö jadäiñe. Yäätä cönä’jaacä jödoodo, natö weichojo. Iiña cönä’döi yaawä tönoowanoomadö jadäiñe.

² Juudha, ñäädä Jesuuquidiito u’nei, dhowaanäcä mmaja cönä’ja’dea yää natö weichojo, weiñäje yäätä Jesuuquidiito tönoowanoomadö jadäiñe töwe’jumma yei’jocoomo weijäcä.

³ Yaawä Juudha cöntämä iiña suddau jadäiñe, Wanaadi weichojo edai’chännamo jadäiñe mmaja. Ñanno cönä’ja’to Wanaadi wwä töwa’deuwaamo edhaajotoncomo nenno’ja’jocoomo, jaadiseeo nenno’ja’jocoomo mmaja. Tönwanno töwaichaqueiñe cönä’ja’to, adhaawa dha’me mmaja.

⁴ Jesuuquidiito dhowaanäcä cönä’jaacä tameedä töjääcä yeeja’do’tojo; yääje yeijäcä töwö cöntämä ñanno wwadäädäiñe; cönä’döaacä chäwwäiñe: —¿Änääcö mujiiyato? quee.

⁵ Tönwanno cönä’döa’to: —Ñaa nujiiya Jesuuquidiito, Naasade ñano; quee cönä’döa’to. Jesuuquidiito cönä’döaacä chäwwäiñe: —Öwö ñäädä; quee. Juudha mmaja chääjadäiñe cönä’ja’dea, ñäädä Jesuuquidiito u’nei.

⁶ “Öwö ñäädä;” ca’jäcä Jesuuquidiito wwä tönwanno tönwadheedädäiñe cöne’duccaicho yaawä nono jo.

⁷ Yaawä Jesuuquidiito cöneecamma’joicho dea: —¿Änääcö mujiiyato? quee cönä’döaacä. Tönwanno cönä’döa’to: —Ñaa nujiiya Jesuuquidiito, Naasade ñano; quee.

⁸ Yaawä Jesuuquidiito cönä’döaacä: —Wääcammai cheeade’, öwö ñäädä. Öwö mma yuujiya’jäcä äwwäiñe canno jaadoncomo nötä’ña’to; quee cönä’döaacä Jesuuquidiito.

⁹ Töwö mädääje cönä’döaacä töwa’deuwö’jödö nönge yeichö wetä: “Canno Jaaja nutuudu öwwä tooni’chä ännamjö’da na;” quee cönä’döa’dö.

¹⁰ Yaawä Simón Peedhodo tösaudai cunu’cai; Wanaadi wwä töwa’deuwaamo edhaajotoncomo anoonö cömjanaacätäi ämu’demjönö dö’se. Ñäädä ñeetunui’chä’jödö eetö cönä’jaacä Maadaco.

¹¹ Yaawä Jesuuquidiito cönä’döaacä Peedhodo wwä: —Asaudai ewaacacääde chääwötö aca. Aaquene mmaja änshinchä’da weichöde’ mädä Jaaja nutuudu wäntunaanö’tojo; quee cönä’döaacä Jesuuquidiito.

Wanaadi wwä töwa’deuwaamo edhaajotoncomo je’taca Jesuuquidiito wei’jödö

¹² Yaawä ñanno suddau, chäädhajootoncomo mmaja, judhío anoonö mmaja, Jesuuquidiito cönaajoicho; cömmöicho yaawä.

¹³ Tönwanno cönaadoicho yaawä Aná döiña, ñäädä Caijaasa wodöömä. Caijaasa cönä’jaacä Wanaadi wwä töwa’deuwaamo edhaajotoncomooje yää wedu awä.

¹⁴ Ñäädä dea cönä’jaacä judhío iwäätuujaneichomo, edääje cönä’döa’nei: “Tooni dhanwa mma äämajai ña tameedä soto jäcäinchädäiñe;” queeto wä’dö’jödö dea.

Peedhodo wwä Jesuuquidiito jome’dä’jödö

¹⁵ Jesuuquidiito ncäcä cönta’to Simón Peedhodo, anejja Jesuuquidiito nowaanomaadö mmaja. Wanaadi wwä töwa’deuwaamo edhaajotoncomo owaano cönä’jaacä ñäädä Peedhodo acä cönta’dö; yääje yeijäcä töwö cönoomomöi chäädhajootoncomo ’dodoi aca, Jesuuquidiito jadäiñe.

¹⁶ Peedhodo mmaane jödo’na cönä’jaacä, mönaatajo. Äcuude ñäädä Wanaadi wwä töwa’deuwaamo edhaajotoncomo owaano cöneeja’cai; cöna’deuwöi yaawä mönaatata edai’chänei wwä; yaawä ñäädä mönaatata edai’chänei Peedhodo cönaamonno’joi ä’saca.

¹⁷ Yaawä ñäädä wodi, mönaatata edai’chäneije cönä’ja’dö, cönä’döaacä Peedhodo wwä: —¿Ñäädäjöönö ca amäädä, Jesuuquidiito nowaanomaadöjöönö? Peedhodo cönä’döaacä chäwwä: —Ng’jn; quee.

¹⁸ Cämme yeijäcä ñanno dhanoonöcoomo mmaja, suddau mmaja, wa’to cönemjannoicho; yää dö’tä cönä’ja’to wääsunuunäje. Peedhodo mmaja chääjadäiñe cönääsunuua’dea.

Wanaadi wwä töwa’deuwaamo edhaajotoncomo wwä Jesuuquidiito ecamma’jojäätö’jödö

¹⁹ Yaawä Wanaadi wwä töwa’deuwaamo edhaajotoncomo Jesuuquidiito cöneecamma’joi shootoi jäcäiñe, ñeecammajäätödö jäcä mmaja.

²⁰ Jesuuquidiito cöneccujä’acä: —Tameedä soto netaadöcoomoje töneecammajä’e wä’jaaquene. Tönoowanoomaiñe wä’jaaquene we’jummatoojo taca, Wanaadi weichojo taca mmaja, yää tameedä judhío we’jummato’comooje weneenedö. Tacaade’da a’deuwö’da töweiye wä’jaaquene.

²¹ ¿Ane’que’nei öwö cäcamma’jaanä? Etannamo’jödööne ecamma’jocooto; tönwanno dhowaanäcäiñe na öwö wa’deuwö’jödö; quee cönä’döaacä Jesuuquidiito.

²² Yääje ya’deuwa’jäcä Wanaadi weichojo edai’chänei Jesuuquidiito cömjojeeta’moi; cönä’döaacä chäwwä: —¿Mädääje Wanaadi wwä töwa’deuwaamo edhaajotoncomo meccujä’anä? quee cönä’döaacä.

²³ Yaawä Jesuuquidiito cönä’döaacä: —Cone’da wa’deuwa’jäcä änwanno a’deujai maato. Chäänönge dajaane ya’deuwöi. ¿Ane’cotoojo caiju’canä? quee cönä’döaacä Jesuuquidiito.

²⁴ Yaawä Aná Jesuuquidiito tömööjä’e cönaadojoi Caijaasa wwadäädä, ñäädä Wanaadi wwä töwa’deuwaamo edhaajotoncomo.

Yää ’jejaato Jesuuquidiito jome’dä’jödö Peedhodo wwä

²⁵ Peedhodo wääsunuunäje dea cönä’jaacä wa’to dö’tä. Yaawä ñanno yäätoncomo cönä’döa’to chäwwä: —¿Ñoowanoomadööjönö ca amäädä dea? quee cönä’döa’to. Töwö Peedhodo cömjome’däi; cönä’döaacä: —Ng’jn, ñäädäjöönö dajaane öwö; quee.

²⁶ Yäätä mmaja cönä’ja’dea Wanaadi wwä töwa’deuwaamo edhaajotoncomo anoonö, Peedhodo nijaanacäätä’jödö jimmä. Töwö cönä’döaacä Peedhodo wwä: —¿Amäädäjöönö ca chääjadä maneeneaanä jödoodo aca? quee.

²⁷ Yaawä Peedhodo cömjome’däi chea. Yaawä dea mma wameedi cöneetömöi.

Pidaato je’taca Jesuuquidiito wei’jödö

²⁸ Yaawä Caijaasa jonno Jesuuquidiito cönaadoicho acu’shänä ewöötö taca. Tööjanaacadä cönä’jaacä; ñanno Jesuuquidiito adännamo judhíocoomo omoomö’da cöneiya’to acu’shänä ewöötö taca töwaamoi’chädööcomo queiñe, Weja’dätä’jä anooto awoono amiiñä’caajä änäänä’da töweichöcoomo queiñe yaawä.

²⁹ Yaawä Pidaato cöneeja’cai jödo’na, ñanno judhío omomjöncomo’jödö döiñaiñe. Töwö cönä’döaacä chäwwäiñe: —¿Ane’cäämö jäcäinchädä määdhä dhanwa mene’to öwwadäädä? quee cönä’döaacä.

³⁰ Tönwanno cöneccujä’a’to: —Conemjönö tödööneijönö ei’jo äntu’da ñaa eichö äwwä; quee cönä’döa’to.

³¹ Yaawä Pidaato cönä’döaacä chäwwäiñe: —Adäätäcä, änwannoone ecamma’jotääcä ajaajedaichomo imennaajä wä’dödö woije; quee. Yaawä ñanno judhío cönä’döa’to: —Ñaa judhío töwoije mma soto emaajai’cha ñaa na; quee cönä’döa’to.

³² Mädääje chäänönge cönä’döi Jesuuquidiito necamma’jödö töwäämatoojo jäcä.

³³ Yää ’jeje Pidaato cönoomomöi chea acu’shänä ewöötö taca. Töwö Jesuuquidiito töwwadäädä cöna’dejjai; cönä’döaacä chäwwä: —¿Judhío Cajiichaanaichomo amäädä? quee.

³⁴ Yaawä Jesuuquidiito cönä’döaacä chäwwä: —¿Amäädä owoije ca mädääje mä’döaanä öwwä, anejjacoomo necamma’jocoomo woijeene? quee cönä’döaacä.

³⁵ Pidaato cöneccujä’acä: —¿Judhío ca öwö? Ajimmä dea dajaane ayuutuicho öwwä, Wanaadi wwä töwa’deuwaamo edhaajotoncomo mmaja. ¿Ane’cäämö mödööne? quee cönä’döaacä.

³⁶ Jesuuquidiito cönä’döaacä yaawä: —Edä nono de’wonoojönö cajiichaanaje weichojo na. Dha’da ei’jo sootoi ewäänä’tädö neiyaato, judhío wwäiñe tu’e’da weichö wetä. Edä nono de’wonoojönööne cajiichaanaje weichojooje na öwö; quee cönä’döaacä Jesuuquidiito Pidaato wwä.

³⁷ Yaawä Pidaato cönä’döaacä chäwwä: —¿Cajiichaana ca amäädä, yääje yeiya’jäcä? Jesuuquidiito cöneccujä’acä: —Ee, cajiichaana öwö, mecammaadöje. Mädääjatooje yennune; edä nono de’cäi we’ne a’deu chäänöngato ecammajä’neije. Tameedä ñanno a’deu chäänöngato woija’como ya’deddu töneeta weneeneto; quee cönä’döaacä Jesuuquidiito.

³⁸ Yaawä Pidaato cönä’döaacä: —¿Ane’cäämö yää a’deu chäänöngato mecammaadö? quee. Yääje töwa’deuwö’jeje Pidaato cöneeja’cai chea judhío döiñaiñe; cönä’döaacä chäwwäiñe: —Conemjönö iiñö’jödö aneejodö’da weiya.

Tämaamöje Jesuuquidiito ecamma’jödö

³⁹ Änwanno aweichöcoomo Weja’dätä’jä comjedensiyai’chädö tödöödö waadäi tooni jedeeso änu’cajoodöcoomo öwwä. ¿Ñäädä u’cajo’se ca maato, judhío Cajiichaanaichomo? quee cönä’döaacä Pidaato ñanno judhío wwäiñe.

⁴⁰ Yaawä tameedä tönwanno cöncä’tömjä’a’to: —Ñäädäjöönööne; Wadaawaane u’cacä; quee cönä’döa’to. Ñäädä Wadaawa cönä’jaacä tämeenato’jödö.