JUAN 15 - Wanaadi A'deddu

Natö nönge töweichö Jesuuquidiito necamma’jödö

¹ Edääje Jesuuquidiito cönä’döaacä: —Öwö ñäädä chääjö, chäänöngato wejössataadö; chuu dänei nönge Jaaja na.

² Tameedä dhajäädö täjössemjönö Jaaja najääca; täjössato mmaane Jaaja nichooneca, jooje’cä yeejössataadö wetä.

³ Änwanno töcooneca maato eduuwa a’deu töwa’deuwe wääneneedö que.

⁴ Jaadäädä eichäcä, ajaadäiñeedä waadöje mmaja. Chääjö jonno dhajäädö waajäca’jäcä töwoije ejössataajai’cha töweiye nai. Yääje mmaja änwanno, jaadä’da aweiya’comjäcä aashicha aweichöcoomo ejaamö’da eijai ña yaawä.

⁵ “Öwö chääjö nönge wa, änwanno yaajädö nönge maato. Ñäädä öwö jaadäädono, öwö chääjadä weiya’jäcä mmaja, ñäädä nödöödö nejanga’de, täjösse weiñä töweiye naichöje; öwö jaadä’da mmaane tödööjai’cha maato.

⁶ Ñäädä öwö jaadäädonoojönö nätäämaja yaawä, dhajäädö yu’taajä tödöödö naichöje. Yää dhajäädö yu’taajä soto ni’jummaato yaawä wa’to nwaca yau’cwadö wetä.

⁷ “Jaadä dea aweiya’comjäcä, neecammajäätödö chö’taqueejö’da aweiya’comjäcä mmaja, yaawä tameedä ane’catäädöcoomo äwwäiñe nä’tua’de.

⁸ Ännödööcomo wejanga’jäcä aashicha Jaaja weichö eneejojai maato; yaawä sootoi chäänönga’comooje äänejoojai maato.

⁹ Jaaja jummaadöje mmaja mämjummaato öwö; umjummadööje dea eichäcä.

¹⁰ Öwö waanontädö tödööa’jäcä äwwäiñe umjummadööje dea eijai maato, Jaaja nijummadööje waadöje mmaja, ñaanontädö tönnöe weijäcä.

¹¹ “Mädääje äwwäiñe ya’deuwa öwö ya’cwaniiyö ’je aweichöcoomo wetä, chäänönge jeene adha’cwaniiyöcoomo eiye.

¹² Edä yää öwö waanontädö: Ä’jummatääcä öwö mämjummaatoodöje mmaja.

¹³ Töweichacoono junnei wäämanä yää yää wä’jummanä chäänöngato; anejja ’je’da na yää nöngato wä’jummanä e’jodhaato.

¹⁴ Änwanno jimmäje maato öwö waanontädö tödööa’jäcä äwwäiñe.

¹⁵ Yaanonööje adhe’tätäiñe’da wa eduuwa. Dhanoonö dhowaanäcä’da töweiye nai tädhaajä wwä tödöötojo. Jimmäjeene mane’taato eduuwa, äwwäiñe ecamma’jödö weijäcä tameedä Jaaja wwä neeta’jödö.

¹⁶ Änwanno yei’cha meiya’quene; öwööne maneichäne. Öwö mane’tätääne aweejössataadöcoomo wetä, yeichöje adheejedöödöcoomo yeichö wetä. Tameedä öwö yeetö joi Jaaja wwä ane’catäädöcoomo, töwö nu’a’de.

¹⁷ Edääje manaanontaato: Ä’jummatääcä.

Edä nono de’woncomo Wanaadi sotoi ämjumma’da yeichöcoomo

¹⁸ “Edä nono de’woncomo wwä aquiiñeme’ca’comjäcä odhoowajoodäiñe’cä chäwwäiñe quiiñemeecö’jödö mmaja chö’tamme’täcä’de.

¹⁹ Edä nono de’woncomo jimmäje meicho’jo yaawääne äjummajaiñe naato, töjimmotoncomo tumjumma weneenetoodöje dea. Tönwanno aquiiñeme’cato töjimmotoncomooje’da aweijäcäiñe, chääjadäiñe aweichöcoomo jonno ayu’ca’jocoomo weijäcä öwwä.

²⁰ Ätö’tatääcä äwwäiñe wa’deuwö’jödö jäcä: Dhanoonö tädhaajä e’jodhe’da töweiye nai; quee wä’dö’jödö jäcä. Ñanno öwö maaminchaneetodö, amaaminchatantäi’chede; ñanno ya’deddu etannamo’jödö, adha’dedducoomo mmaja netaato’dede.

²¹ Tönwanno mädääje ayöödöaato’de sootoije aweichöcoomo jo’tädööje, towaanäcäiñe’da yeijäcä yaanontänei’jödö.

²² “Öwö eejö’da wei’jo, chäwwäiñe aneecammajäätö’da wei’jo mmaja, yaawääne äächädääjemma choone’nadiiyöcoomo eichö. Eduuwa ya’deuto’como ’je’da na töcoone’nadiiyöcoomo jäcä.

²³ Ñäädä öwö quiiñeme’nei, Jaaja quiiñemeecödö wa’cä mmaja na dea.

²⁴ Dhantawäiñe jooje aashichaato ännö’da wei’jo äächädääjemma choone’nadiiyöcoomo eichö. Tönwanno cöneenea’to yää önnö’jödö; yääje yeichaame quiiñeme’caato, Jaaja nichiiñeme’caato dea.

²⁵ Tönwanno mädääje naato töjaajedaichomo imennaajä wä dödö nönge: “Tönwanno quiiñeme’caato ijo’tädööje’da mmädä;” quee imennaajä wä’dödö naichö nönge.

²⁶ “Ä’wa’täneichomo we’a’jäcä, ñäädä äwwadäädäiñe wanonta’dedö, töwö aashicha necammajä’a’de öwö jääcä. Jaaja nanontädö ñäädä Epíiditu Santo, chäänöngato a’deu edhaajä.

²⁷ Änwanno mmaja jääcä mecammajä’ato’dede, yaajäntä’jödö jonnoto’jödöödä jaadä aweichomjäcä.