JUAN 14 - Wanaadi A'deddu

Jesuuquidiito ääma neeneje yeichö

¹ “Cone’da’daane eichäcä adheewanööcomo jäcä. Wanaadi ecaanö’täcä, öwö mmaja cäcaanö’täcääde.

² Jaaja mmai chaca jooje weichojo na. Yääje’da ei’jo mmaane wecammadö äwwäiñe. Öwö wöta aweicho’como chooneca.

³ Aweicho’como choonecaadö wä’ca’jäcä we’a’dede; yaawä manaadäaato’de, öwö weichojo dö’tä mmaja meichäiye.

⁴ Änwanno odhoowanääcäiñe öötotoojo, chääma’tädö odhoowanääcäiñe mmaja; quee cönä’döaacä Jesuuquidiito.

⁵ Yaawä Tomá cönä’döaacä: —Owaanomaanei, ñaa owaanäcä’da na äätotoojo, ¿aaquene ñaa owaanäcä eichöde’ chääma’tädö? quee cönä’döaacä.

⁶ Jesuuquidiito cönä’döaacä chäwwä: —Öwö ñäädä ääma neene, chäänöngato a’deu mmaja, do’ta edhaajä mmaja. Jaaja wwadäädä täjai’cha weiñä na; öwö joi mma täjai.

⁷ Öwö odhoowanääcäiñe weiya’jäcä Jaaja mmaja odhoowanääcäiñe yaawä. Eduuwa Jaaja odhoowanääcäiñe na, töneene aweichomjäcä; quee cönä’döaacä Jesuuquidiito.

⁸ Yaawä Jediipe cönä’döaacä chäwwä: —Cajiichaana, Oomo eneejocä ñaa wwä, täncanoode’da ñaa eiye yaawä; quee.

⁹ Jesuuquidiito cönä’döaacä chäwwä: —¿Numa ajaadäiñe weichaame odhoowanääcä’da dea wanä, Jediipe? Ñäädä yeenenei, töneene mmaja Jaaja. ¿Aaquene yääje mä’döaanä: “Oomo enoojocä;” quee?

¹⁰ ¿Aneecamjö’da ca manä Jaaja yaaca yeichö, öwö Jaaja aca weichö mmaja? Mädä töwa’deuwe wääneneedö öwö woije mma’da ya’deuwa. Määdhä Jaaja, yaaca naanei, määdhääne nödööja.

¹¹ Cäcaanö’täcä Jaaja aca weichö, Jaaja yaaca yeichö mmaja. Ya’deddu aneecamjö’da aweiya’comjäcä, önnödö jäcäinchädä cäcaanö’täcä.

¹² Chäänönge yääje wä’döa äwwäiñe, öwö yeecanö’nei, öwö önnödö nönge mmaja nödööa’dede. Önnödö e’jodhe’cä nödööa’de, Jaaja döiña öötädö weijäcä.

¹³ Tameedä yeetö joi ane’catäädöcoomo öwö wödööa’de, aashicha Tumö weichö Iiñedö wwä eneejodö wetä.

¹⁴ Öwö wödööa’de tameedä öwö yeetö joi ane’catäädöcoomo.

Epíiditu Santo enno’jatoojo Jesuuquidiito necamma’jödö

¹⁵ “Äwwäiñe jumma’jäcä öwö waanontädö tödöötäcä.

¹⁶ Jaaja wwä we’ca’a’de, töwö äwwäiñe nu’a’de yaawä Ä’wa’täneichomo, yeichöje ajaadäiñe töweiyemööje, ñäädä Epíiditu Santo, chäänöngato a’deu edhaajä.

¹⁷ Edä nono de’woncomo ñäädä ijummajai’cha naato, aneene’da yeichomjäcä, dhowaanäcäiñe’da yeichomjäcä mmaja. Änwanno mmaane odhoowanääcäiñe na, ajaadäiñe yeijäcä; töwö yeichöje ataacaiñe na’de.

¹⁸ Owö äjääcäjeeneiñe änäntäiñe’da wa; öwö we’a’de adöiñaiñe.

¹⁹ Numa’da mma na eduuwa eetä weichojo, yäätonno yaawä edä nono de’woncomo yeene’da naato’de; änwanno mmaane cäneeato’de. Öwö nudä weijäcä änwanno nudä mmaja maato’dede.

²⁰ Yää anooto awä änwanno odhoowanääcäiñe na’de Jaaja aca weichö, öwö taaca aweichöcoomo mmaja, ataacaiñe weichö mmaja.

²¹ Ñäädä öwö waanontädö etaanei, tödöönei mmaja, ñäädä ñäädä jummanei ñeene. Jaaja nijumma’de ñäädä jummanei; öwö mmaja wijumma’dede, wääneja’de chäwwä; quee cönä’döaacä Jesuuquidiito.

²² Yaawä Juudha cönä’döaacä chäwwä, ñäädä Icaadiyootejöönö: —Owaanomaanei, ¿ane’que’nei ñaa wwä mma määnejaanä’de, tameedä soto wwäiñe äänejo’da?

²³ Jesuuquidiito cöneccujä’acä: —Ñäädä öwö jummanei ya’deddu woije nödööa; Jaaja nijumma’de ñäädä. Ñaa ne’a’de yöiña; chääjadä ñaa na’de.

²⁴ Ñäädä jummaneijönö mmaane ya’deddu woije ännö’da töweiye nai. Yää neecammajäätödö töneeta määnetäänedö öwö ya’deddujöönö yää, Jaaja a’dedduune, ñäädä yaanontänei’jödö.

²⁵ “Edä äwwäiñe wecammajä’a ajaadäiñe dea weichö.

²⁶ Öwö ne’catäädö woije Jaaja nanonta’de Ä’wa’täneichomo, ñäädä Epíiditu Santo. Ñäädä Epíiditu Santo odhoowanoomaato’de tameedäädä; ätö’tamme’jaato’de tameedä neecammajäätö’jödö.

²⁷ “Öötääje täncanoode’da aweicho’como wu’a, yää öwwono. Täncanoode’da weiñä edä nono de’wono nöngemjönö wu’a äwwäiñe. Cone’da’daane eichäcä adheewanööcomo jäcä; tösaade’da mmaja eichäcääde.

²⁸ Änwanno metaato äwwäiñe ya’deuwöichö: “Öwö wöta, yää ’jeje we’a’dede adöiñaiñe”; quee wä’döannö. Äwwäiñe jumma’jäcä ta’cwaiñe meichädö Jaaja döiña öötädö eta’jäcä, Jaaja ye’jodhe yeijäcä.

²⁹ Dhowaajodä dea mädä wecamma äwwäiñe, äwwäiñe eneea’jäcä mecaanö’täiye yaawä.

³⁰ “Mädä jonno jooje a’deuwö’da wa’de äwwäiñe, edä nono de’wono waanontädö weejödö weijäcä, ñäädä odo’sha; töwö ye’jodheinchajai’cha na.

³¹ Yääje yeichaame mädä yeeja’do’tojo na, tameedä soto owaanäcäiñe yeichö wetä Jaaja tumjumma weichö, Jaaja waanontä’jödö tönnöe weichö mmaja. Ääma’tätääcä eduuwa; cöötätäiye; quee cönä’döaacä Jesuuquidiito.