JUAN 13 - Wanaadi A'deddu

Tönoowanoomadö ’judu chocca’jödö Jesuuquidiito wwä

¹ Tooni anooto mmädä a’que cönä’jaacä Weja’dätä’jä anooto comjedensiyai’chädö tödöötojo cu’nädö aca yä’dötoojo. Yaawä Jesuuquidiito dhowaanäcä cönä’jaacä chu’nädö aca yä’dödö Tumö döiña töötotoojo edä nono de’wonno. Yääje yeichaame töjaadoncomo jäcäiñe tötö’tajä’e dea cönä’jaacä, ñanno edä nono de’woncomo; ijummadööcomooje dea cönä’jaacä, tumjummaiñe cönä’ja’döje dea.

^2-4 Yaawä odo’sha cönääwaacai Juudha Icaadiyoote tö’tajäätödö aca, ñäädä Simón nnedö, Jesuuquidiito utuudu jäcä chö’tamme’jodö wetä chäwwä. Jesuuquidiito dhowaanäcä cönä’jaacä Wanaadi jonno töweejö’jödö, Wanaadi döiña töötotoojo mmaja; dhowaanäcä cönä’ja’dea Tumö nutuudu töwwä tameedä o’jodhe töweichojo. Yaawä töwääwashinchädaawäiñe Jesuuquidiito cönammöi meesa dö’tonno. Töwoomö de’wono cunu’cai; tö’dhau’cwäcä jaañu que cönä’möi yaawä.

⁵ Yaawä tuna cönaccai jinsheeda aca. Cönaajäntäi yaawä tönoowanoomadö ’juduucomo coccadö; yää jaañu, tö’dhau’cwäcä cönä’ja’dö que cönsede’nanö’jätöi chea.

⁶ Yaawä Simón Peedhodo döiña yä’döa’jäcä Peedhodo cönä’döaacä chäwwä: —Owaanomaanei, ¿amäädäde’ca u’judu michoccaanä?

⁷ Jesuuquidiito cöneccujä’acä: —Mädä wödööaadö odhoowanääcä’da na eduuwa; äcuude odhoowanääcä na’de; quee cönä’döaacä.

⁸ Yaawä Peedhodo cönä’döaacä: —U’judu choccajai’cha ma; quee. Jesuuquidiito cönä’döaacä chäwwä: —Oncocca’da weiya’jäcä jaadonooje eijai’cha ma; quee.

⁹ Yaawä Simón Peedhodo cönä’döaacä: —Yääje yeiya’jäcä u’judu mma’da choccacä, yaamädö, ju’jä mmajaane; quee cönä’döaacä.

¹⁰ Jesuuquidiito cönä’döaacä: —Ñäädä yeecoccaajä i’judu mma töcoccamje na, tameedä töcocca yeijäcä. Änwanno töcocca maato, tameedä’daane; quee cönä’döaacä Jesuuquidiito.

¹¹ Töwö dhowaanäcä cönä’jaacä tu’nei; yääje yeijäcä yääje cönä’döaacä: “Tameedä’daane töcocca maato;” quee.

¹² Yää ’jeje i’juduucomo choccajäätö’jeje, Jesuuquidiito cöneewontäi chea töwoomö de’wono que. Cönaatajiimai chea yaawä meesa dö’tä; cönä’döaacä tonoowanoomadö wwäiñe: —¿Odhoowanääcäiñe’ nai äjääcäiñe wödöichö?

¹³ Änwanno odhoowanoomaneichomooje cä’taato, adheedhajootoncomooje mmaja; chäänönge yääje äwä’dödööcomo, ñäädääne weiyajä.

¹⁴ Öwö odhoowanoomaneichomooje weichaame, adheedhajootoncomooje weichaame mmaja, ä’juduucomo wichoccai; töwaacö’je änwanno choccajai maato äjimmotoncomo ’judu.

¹⁵ Mädä äjääcäiñe wödöichö äwwäiñe tödööemö weneejoi, önnö’jödö nönge mmaja tödöödö wetä äwwäiñe.

¹⁶ Chäänönge yääje wä’döa äwwäiñe, dhanoonö tädhaajä e’jodhe’da na, anontaajä tanontänei’jödö e’jodhe’da mmaja.

¹⁷ ¿Odhoowanääcäiñe jönca näätaanä? Ta’cwaiñe eijai maato mädä tödööajäcä äwwäiñe.

¹⁸ “Tameedä’da äwwäiñe ya’deuwa; öwö yoowanääcä naato neichö. Yääje yeichaame Wanaadi a’deddu imennaajä naadöje dea neja’dä’a’de. Edääje nä’döa yää imennaajä: “Ñäädä jaadono wääwashinchädö dea yeema’se na;” quee imennaajä nä’döa.

¹⁹ Dhowaajodä dea wecamma äwwäiñe, yaawä neecamma’jödö nönge yeeja’dä’a’jäcä änwanno ecaanö’jai maato chäänöngatooje weichö.

²⁰ Chäänönge yääje wä’döa äwwäiñe, yaanonö aashicha tödöödö, aashicha yöödödö wa’cä mmaja na dea. Ñäädä aashicha yöödönei, yaanontänei’jödö aashicha tödöödö wa’cä mmaja na dea; quee cönä’döaacä Jesuuquidiito.

Juudha wwä tutuudu jäcä Jesuuquidiito necamma’jödö

²¹ Yääje töwa’deuwödö’jo Jesuuquidiito cone’da cönä’döjoi jooje. Töwö cönä’döaacä: —Chäänönge yääje wä’döa äwwäiñe, töweiye na adhantawäiñe yu’nei; quee.

²² Yaawä ñoowanoomadö cönääne’ma’to tönwannoje dea. Tönwanno cöntö’tajä’a’to: ¿Änääcö ja’dha? quee.

²³ Tooni ñoowanoomadö cönä’jaacä Jesuuquidiito dö’tä yaatajiimaajä; ñäädä cönä’jaacä Jesuuquidiito nijummadö.

²⁴ Ñäädä wwadäädä Simón Peedhodo cöneenejoojä’acä, “Ecamma’jocä, ¿änääcö jäcä mädääje nä’döaanä?” quee töucwadööje.

²⁵ Yaawä ñäädä Jesuuquidiito dö’tono Jesuuquidiito wwadäädä cönootommoi; cönä’döaacä chäwwä: —Owaanomaanei, ¿änääcö ecammancädä yääje mä’döaanä? quee cönä’döaacä chäwwä.

²⁶ Jesuuquidiito cöneccujä’acä: —Ñäädä uu i’jiyaajä chäwwä wu’a’dedö, ñäädä ñäädä; quee cönä’döaacä. Yaawä uu cöni’ji; cuntui yaawä Juudha Icaadiyoote wwä, ñäädä Simón nnedö wwä.

²⁷ Yaawä uu enaajödö ncäcäädä Caajuushawa cönääwaacai Juudha aca. Yaawä Jesuuquidiito cönä’döaacä Juudha wwä: —Ma’da’cä tödööcä mädä äwwä tödööemö; quee cönä’döaacä.

²⁸ Ñanno meesa dö’toncomo towoinchadäiñe cönä’ja’to; dhowaanäcäiñe’da cönäätaacä Jesuuquidiito wa’deuwödö.

²⁹ Ñäädä Juudha cönä’jaacä töjöödataichomo edhaajäje ñeewaacadööcomo; yääje yeijäcä anejjacoomo cöntö’tajä’a’to äwanshi ejeema anontaatäi jeiñe mma, wentumja’como wwä jödaata u’jaatäi jeiñe mma.

³⁰ Yaawä uu enaajö’jeje Juudha cöneeja’cai. Coijai cönä’jaacä yaawä.

Eduuwaato waanontänä

³¹ Yaawä Juudha weja’ca’jeje Jesuuquidiito cönä’döaacä: —Eduuwa näänea aashicha Soto nnedö weichö; aashicha Wanaadi weichö mmaja näänea dea Soto nnedö jäcä.

³² Aashicha Wanaadi weichö töneenejo weijäcä eduuwaiche mma töwö neneeja dea aashicha öwö weichö.

³³ Önnacoomo’cä, numa’da mma ajaadäiñe weichojo na eduuwa. Änwanno a’que cujiiyato’de; judhío wwäiñe wä’döaaquennöje mmaja wä’döa dea äwwäiñe: Öwö öötotoojo döiña änwanno täjai’cha maato; quee.

³⁴ Eduuwaato waanontänä wecamma äwwäiñe: Ä’jummatääcä; änwanno mämjummaatoodöje mmaja ajimmotoncomo ijummajai maato.

³⁵ Äwä’jumma’comjäcä tameedä soto dhowaanäcäiñe eijai ña yaawä sootoije aweichöcoomo; quee cönä’döaacä Jesuuquidiito.

Peedhodo wwä töjoome’dotoojo Jesuuquidiito necamma’jödö

³⁶ Yaawä Simón Peedhodo Jesuuquidiito cöneecamma’joi: —Owaanomaanei, ¿äsha mötäätai’che? quee cönä’döaacä. Jesuuquidiito cöneccujä’acä: —Öwö öötotoojo döiña täjai’cha maato eduuwa; äcuude’cä jeene mötaato’de; quee cönä’döaacä.

³⁷ Yaawä Peedhodo cönä’döaacä: —Owaanomaanei, ¿ane’que’nei ajaadä täjai’cha wanä eduuwa? Äämajai chajaane wa ajunnei; quee.

³⁸ Jesuuquidiito cöneccujä’aca: —¿Äämajai ätö’taanä öwö junnei? Chäänönge yääje wä’döa äwwä, wameedi wetöömödö owaajo amäädä cöjoome’da’de aaduwaawäde.