JUAN 11 - Wanaadi A'deddu

Dáasado wääma’jödö

¹ Dhanwa cädäije cönä’jaacä, Dáasadooje chäätö. Töwö ijaatadö cönä’jaacä Wetaaniya ña, yää Madía jataadö, ijaichö Maadata jataadö mmaja.

² Ñäädä Madía cönä’jaacä juu shimi’jotoojo accanei’jödö Jesuuquidiito ’judu de’cäcä, tuju’jädö que choccanei’jödö mmaja; ñäädä jiyö cädäije cönä’jaacä.

³ Ñanno Dáasado jadui’chomo soto cönaanontoicho Jesuuquidiito döiña, edääje ecamma: —Owaanomaanei, aweichacoono cädäije na; quee ecamma.

⁴ Jesuuquidiito wwä eta’jäcä töwö cönä’döaacä: —Yää chäädäichö wäämato’jönö mma, jäduuje Wanaadi weichö eneejotoojoone, jäduuje Wanaadi nnedö weichö eneejotoojo mmaja; quee cönä’döaacä.

⁵ Jesuuquidiito jooje tumjumma cönä’jaacä Maadata, ijaichö Madía mmaja, ijiiyötoncomo Dáasado mmaja.

⁶ Yääje yeichaame Dáasado cädäije yeichö eta’jäcä Jesuuquidiito wwä, yäätäädä töwö cönä’jaacä aacä anooto, Dáasado döiña tä’da.

⁷ Yää ’jeje aacä anoototo ai töwö cönä’döaacä tönoowanoomadö wwäiñe: —Judheea ña cöötätäiyede; quee.

⁸ Yaawä ñoowanoomadö cönä’döa’to: —Owaanomaanei, eduuwaiche mma judhíocoomo täju que äwääjätö’se cönä’ja’to; ¿yääje yeichaame äätä’se mannea iiña mmaja? quee cönä’döa’to.

⁹ Jesuuquidiito cönä’döaacä chäwwäiñe: —Chääwa’cä na anooto numa yeichö. Ñäädä anooto wäämannäjöödö eju’cätä’da na, töwö töneene yeijäcä anooto nawaananö’cadö.

¹⁰ Ñäädä tööjano’tacaano wäämannäjöödö mmaane töweeju’cä’e, yeijotoojo ’je’da yeijäcä; quee cönä’döaacä Jesuuquidiito.

¹¹ Yää ’jeje edääje mmaja Jesuuquidiito cönä’döa’dea: —Cöjimmotoncomo Dáasado nönö’ca; öwö wöta iiñöcöödö jonno emjaca; quee.

¹² Ñoowanoomadö cönä’döa’to yaawä: —Iiñöcöödö mma yeiya’jäcä töwö ä’jäjai ña; quee.

¹³ Jesuuquidiito cöna’deuwacä Dáasado wäämadö jäcä; tönwanno cöneecanö’a’to iiñöcöödö jäca ya’deuwaatäi.

¹⁴ Yaawä Jesuuquidiito sa’donna cöna’deuwöi chäwwäiñe: —Dáasado töwääma na.

¹⁵ Dhamma jeene chääjadä’da wä’jaaquene; äjääcäinchädäiñe yääje wä’döa, mecaanö’täiye. Queenetantäiye eduuwa; quee cönä’döaacä Jesuuquidiito tönoowanoomadö wwäiñe.

¹⁶ Yaawä Tomá, ñäädä Canaacuje chäätö cönä’ja’dö, cöna’deuwöi töjimmä wwäiñe, ñanno Jesuuquidiito nowaanomaadö wwäiñe. Töwö cönä’döaacä chäwwäiñe: —Cöötätäiye cönwanno, chääjadä cä’ja’täiye; quee cönä’döaacä.

Jesuuquidiito do’ta edhaajäje yeichö

¹⁷ Yaawä Dáasado döiña Jesuuquidiito wä’döa’jäcä aacäichea anooto cönä’jaacä ewaaca’jödö jonno yeichö.

¹⁸ Yää Wetaaniya ñano cönä’jaacä amoinche’da Jeduusadén ñano jäcä, tooni shii wä’seca’jödö wötäänä ’cäwa’cä mma amoinche yeichö.

¹⁹ Yääje yeijäcä jooje judhío Jeduusadén ñancomo cöntonto Wetaaniya ña, Maadata, Madía döiñaiñe, ya’dädööcomo wetä ijiiyötoncomo wääma’jödö jäcä.

²⁰ Yaawä Jesuuquidiito weejödö eta’jäcä Maadata cöneeja’cai a’dejja; Madía cöno’nomjoi ä’saca.

²¹ Yaawä Maadata cönä’döaacä Jesuuquidiito wwä: —Owaanomaanei, amäädä eetä mei’jo jiiyö ääma’da eichö cöneiyacä.

²² Yääje yeichaame yoowanääcä na Wanaadi u’jai yeichö tameedä chäwwä ane’catäädö; quee cönä’döaacä.

²³ Yaawä Jesuuquidiito cönä’döaacä Maadata wwä: —Ajiiyö naadonca’de; quee.

²⁴ Maadata cöneccujä’acä: —Yoowanääcä na yaadoncatoojo, yä’ja’a’como waadoncato’como anooto awä, anooto wataamedaawä; quee cönä’döaacä.

²⁵ Jesuuquidiito cönä’döaacä chäwwä: —Öwö ñäädä töwäämaajo jonno weja’canä edhaajä, do’ta edhaajä mmaja. Ñäädä yeecanö’nei, töwääma’jödö weichaame naadonca’de.

²⁶ Ñäädä öwö yeecanö’nei ääma’da na’de yeichöje. ¿Yääje yeichö mecaanö’anä amäädä? quee cönä’döaacä Jesuuquidiito.

²⁷ Maadata cönä’döaacä chäwwä: —Ee, Owaanomaanei, öwö wecaanö’a Äwaanacaaneije aweichö, Wanaadi nnedööje aweichö, edä nono de’cäi töwe’emööje cönä’ja’dö; quee cönä’döaacä Maadata Jesuuquidiito wwä.

Dáasado ewaadö dö’tä Jesuuquidiito waamo’jödö

²⁸ Yääje töwa’deuwö’jeje Maadata cöntäma töjiishö Madía a’dejja. Tacaade’da cöna’deuwöi chäwwä; cönä’döaacä: —Owaanomaanei nä’döi; adha’dejjaanä; quee cönä’döaacä.

²⁹ Töwwä eta’jäcä Madía cönammöi yaawä; Jesuuquidiito döiña cöntämä.

³⁰ Jataaca ä’dö’da dea Jesuuquidiito cönä’jaacä; yäätä dea cönä’jaacä, Maadata acä töwoojodö’jocoomo dö’täädä.

³¹ Tamjä’ne Madía weja’cadö judhíocoomo cöneenea’to, ñanno chääjadä maa tacancomo’jödö, ijiiyötoncomo wääma’jödö jäcä ya’dännamo’jödö. Tönwanno cöneeja’caicho yaawä inchäcä; äwa döiña töwaamodö wetä iichaatäi cöneecanö’a’to.

³² Yaawä Jesuuquidiito döiña Madía wä’döa’jäcä tä’mudhe cönädöi ije’taca; cönä’döaacä: —Owaanomaanei, amäädä eetä mei’jo jiiyö ääma’da eichö cöneiyacä; quee cönä’döaacä.

³³ Yaamodö eneea’jäcä Jesuuquidiito wwä, judhío chääjadoncomo weejö’jödö waamodööcomo eneea’jäca mmaja, wentumje cönä’döjoi yaawä; jooje cone’da cönä’jaacä.

³⁴ Töwöcönä’döaacä chäwwäiñe: —¿Äsha mewaacatääne? Tönwanno cönä’döa’to: —Ä’cäde, meneiye; quee.

³⁵ Yaawä Jesuuquidiito cönaamoi.

³⁶ Yaawä judhío cönä’döa’to: —Joojeene tumjumma cönä’jaacä; quee.

³⁷ Anejjacoomo judhío cönä’döa’to: —Tänuuquemjönö ejiichö’tänei’jödö määdhä; ¿aaquene Dáasado anaadonca’da cönä’jaacä, ääma’da yeichö wetä? quee cönä’döa’to.

Dáasado adonca’jödö

³⁸ Yaawä Jesuuquidiito cone’da cönä’döjoi chea; cönä’döi yaawä äwa döiña. Yää cönä’jaacä ya’tadö mmädä; täju cönä’jaacä ye’wä, dha’dutuuje tödööajä.

³⁹ Jesuuquidiito cönä’döaacä: —Täju eseecatääcä; quee. Yaawä Maadata, ñäädä yäämaajä jaduichömjödö, cönä’döaacä: —Owaanomaanei, töcääque na töwö eduuwa; aacäichea anooto nä’döi eduuwa yääma’jödö jonno yeichö; quee cönä’döaacä.

⁴⁰ Yaawä Jesuuquidiito cönä’döaacä chäwwä: —¿Yääje jönca wä’döaanä äwwä, ecaanö’a’jäcä äwwä Wanaadi jäduudu meneea’de; quee jönca wä’döaanä? quee cönä’döaacä Jesuuquidiito.

⁴¹ Yaawä täju cöneesecaicho yäämaajä a’duaajä de’wonno. Caju ña ene’mancädä Jesuuquidiito cönä’döaacä: —Jaaja, ta’cwaiñe wa ya’deddu töneeta aweijäcä.

⁴² Öwö yoowanääcä na wa’deuwödö töneeta aweichö. Canno eetä naatoodö netaadöcoomoje ya’deuwa äwwä, tönwanno ecamjöiyeto yaanontänei’jödööje aweichö; quee cönä’döaacä Jesuuquidiito.

⁴³ Yääje töwa’deuwödö’jo täta cöna’deuwöi: —Dáasado, adheeja’cacä; quee cönä’döaacä.

⁴⁴ Yaawä ñäädä yäämaajä’jödö cöneeja’cai. Dhamäädö, i’judu mmaja tömööjä’e cönä’jaacä yäämaajä iwontotoojo que. Ijeedö töwonque cönä’jaacä jaañaweeda que. Yaawä Jesuuquidiito cönä’döaacä soto wwäiñe: —Yoncatääcä eduuwa, oojoimaiye; quee.

Jesuuquidiito ajäichö a’de’tä’jödö

⁴⁵ Yaawä jooje judhío, ñanno Madía döiñancomo weejö’jödö, Jesuuquidiito cöneecamjöicho yääje iiñödö eneedö’jo.

⁴⁶ Dhantai mmaane jaadiseeo döiñaiñe cöntonto; chäwwäiñe cöneecammajäätöicho Jesuuquidiito nödö’jödö.

⁴⁷ Yaawä jaadiseeo cöne’jummaicho Wanaadi wwä töwa’deuwaamo edhaajotoncomo jadäiñe, äcamma’jonnamo jadäiñe mmaja. Tönwanno cönä’döa’to: —¿Aaquene tödööjai caato? Ñäädä dhanwa jooje ene’ju’tojo tönnöe weneene.

⁴⁸ Ännö’da cöweiya’comjäcä tameedä soto ecaanö’jai ñaato yaawä. Yaawä domaanocoomo e’jai ñaato Wanaadi weichojo cönaamo’jocoomo chaadaca, cöja’eiñe mmaja; quee cönä’döa’to.

⁴⁹ Yaawä Caijaasa cöna’deuwöi; ñäädä cönä’jaacä Wanaadi wwä töwa’deuwaamo edhaajotoncomooje yää wedu awä. Töwö cönä’döaacä: —Chö’tajäätö’da deja maato dea änwanno.

⁵⁰ ¿Aaquene äntö’tammecö’da maato dea tooni dhanwa mma äämajai yeichö tameedä judhíocoomo wä’jajoodöcoomo queiñe? quee cönä’döaacä Caijaasa.

⁵¹ Töwö towoinchadä yääje cönä’döaacä. Töwö Caijaasa yää wedu awä Wanaadi wwä töwa’deuwaamo edhaajotoncomooje yeijäcä Wanaadi yääje cöna’deujojoi judhío jäcäinchädäiñe Jesuuquidiito wäämadö jäcä.

⁵² Judhío jäcäinchädäiñe mma’da Jesuuquidiito wäämadö; tameedä soto jäcäinchädäiñeene, tameedä Wanaadi nnacoomo wäämecanta’como i’jummadööcomo wetä.

⁵³ Yää anooto jonnoto’jödöödä ñanno judhío täneejuca’como töntö’tamme’que cönä’ja’to Jesuuquidiito emaadö.

⁵⁴ Yääje yeijäcä tacaade Jesuuquidiito äämannäjö’da töweiye cönä’jaacä judhío döiñaiñe. Judheea ñanno töwö cöntämä anejja jataaca, jata ’jemjönö jäcä amoinche’da; Eujadaín ñano cönä’jaacä yää jata. Yäätä töwö cönä’jaacä tönoowanoomadö jadäiñe.

⁵⁵ Yaawä amoinche’da cönä’jaacä Weja’dätä’jä anooto comjedensiyai’chädö, yää judhío we’jummato’como cu’nädö. Jooje soto cöntonto Jeduusadén ña töwaatamoichadööcomo wetä yää anootoi’chädö owaajo.

⁵⁶ Tönwanno Jesuuquidiito cunuujiya’to. Yaawä Wanaadi weichojo taca töweichöcoomo tönwannoje dea cönä’döa’to: —¿Aaquene nichö’taanä äwwäiñe, eejö’da ca Jesuuquidiito eichai’che comjedensiya döe? quee cönä’döa’to.

⁵⁷ Ñanno jaadiseeo, Wanaadi wwä töwa’deuwaamo edhaajotoncomo mmaja, cönä’döa’to: —Jesuuquidiito eneea’jäcä äwwäiñe ecammatantäcä’de ñaa wwä, jedeesoje ñaa tödöiye yaawä; quee.