JUAN 10 - Wanaadi A'deddu

Oweeja cudaadaichomo dö’seeno

¹ “Chäänönge yääje wä’döa äwwäiñe, ñäädä oweeja cudaadaichomo nata’tadö ai omomjönö, aneetajaacocoono womoomödö, tämeenato ñäädä, chäänöngemjönö mmaja.

² Ñäädä oweeja edai’chäneichomo mmaane mönaatata ai yoomomöödö.

³ Ñäädä wwääne mönaatata edai’chänei na’duca; oweeja töneeta weneeneto töwö dha’deddu. Töwö täcöntomo oweeja töna’dejjaiñe weneeneto chäätöcoomo ai, tömja’canö’joiñe yaawä.

⁴ Tameedä ija’canö’ja’comjäcä dhowaajoiñe töötä yaawä töwö. Oweeja nötaato yaawä inchäcä, dhowaanäcäiñe yeijäcä dha’deddu.

⁵ Towaanojöncomo ncäcä mmaane tä’da weneeneto ñanno oweeja; töwääneje mma näänejeeaato, dhowaanäcäiñe’da yeijäcä anejja a’deddu; quee cönä’döaacä Jesuuquidiito.

⁶ Jesuuquidiito mädääje cöna’deuwöi chäwwäiñe yö’seeno joi; tönwanno dhowaanäcäiñe’da cönäätaacä.

Jesuuquidiito oweeja edai’chäneichomo aashichaatoje yeichö

⁷ Edääje mmaja Jesuuquidiito cönä’döa’dea chäwwäiñe: —Chäänönge yääje wä’döa äwwäiñe, öwö ñäädä mönaatata, oweeja womonto’como.

⁸ Tameedä yoowajoodä cönä’ja’todö tämeena’como ñanno, chäänöngemjöncomo mmaja. Oweeja aneeta’da cöneiya’to dha’dedducoomo.

⁹ Mönaatata öwö; ñäädä öwö yaiño womoomödö nääwanaaca’de. Töwö cudaada aca nomonga, töweeja’ca mmaja, täwanshiñö töneedantä yaawä.

¹⁰ “Tämeenato ne’a ememme’que mma, ema mmaja, imaaminchaiñe mmaja; öwö mmaane we’ne chäwwäiñe yeicho’como töweiye yeichö wetä töwä’caamöje’da.

¹¹ Öwö ñäädä oweeja edai’chäneichomo aashichaato. Edai’chänei aashichaato töweichö nu’a oweeja jäcäinchädäiñe.

¹² Ñäädä täjeemadö jäcäinchädä mma oweeja edai’chänei mmaane to’nomja mma oweeja ne’nomjaato mado weejödö edanta’jäcä; näänejeea yaawä, oweeja edai’chänei ñeeneje’da töweijäcä, töwwonooje’da yeichomjäcä mmaja ñanno oweeja. Yaawä ñäädä mado oweeja neecajä’aato, nemeecantajaato dea.

¹³ Ñäädä ewaacaajä näänejeea anontaajäje mma töweijäcä; oweeja tujunne’da naato chäwwä.

^14-15 “Öwö ñäädä oweeja edai’chäneichomo aashichaato. Jaaja owaanäcä wa öwö; öwö mmaja Jaaja yoowanääcä na dea. Mädääje mmaja sootoi, ñanno oweeja nönga’como; yoowanääcä naato dea, öwö dhowaanäcäiñe mmaja wa dea. Chääjäcäinchädäiñe weichö wu’a’de.

¹⁶ Anejja oweeja töweiye mmaja naato dea öwwä, edä cudaada acancomoojönö; tönwanno mmaja täne’emje naato dea. Tönwanno netaato’de ya’deddu; tooni mma na’de cudaada, tooni mmaja oweeja edai’chäneichomo.

¹⁷ “Jaaja jummatä weneene weichö tunu’e weijäcä, nudä weichö wetä mmaja yaawä yää ’jeje.

¹⁸ Anejja yeemajai’cha na; öwö woije dea weichö wu’a. Öwö dea weichö u’jai wa, öwö mmaja eijai wa dea. Mädääje Jaaja yaanontäne; quee cönä’döaacä Jesuuquidiito.

¹⁹ Yää eta’jäcä töwwäiñe äänönge’da judhío tö’tajäätödööcomo cönä’jaacä.

²⁰ Dhantai cönä’döa’to: —Odo’sha ’je na; tö’jeta na. ¿Ane’cotoojo dha’deddu metaato? quee.

²¹ Anejjacoomo ’quene cönä’döa’to: —Mädääje a’deuwö’da tö’jetaato töweiye nai. ¿Aaquene mmaja odo’sha tänuuquemjönö enuudu aneejichö’tädö deaade’ ? quee cönä’döa’to.

Judhío wwäiñe Jesuuquidiito jo’ma’jödö

²² Tu’que yeichö cönä’jaacä yaawä; Jeduusadén ña judhíocoomo comjedensiya cönnöa’to, yää Wanaadi weichojo amä’jödö jäcä tö’tajo’tojo anootoi’chädö.

²³ Yaawä Jesuuquidiito cönäämannä’acä Wanaadi weichojo taca, ijeesai chawä, Saadomón namääjo’jödö tawä.

²⁴ Judhío chäwwadäädä cöntonto yaawä; cönä’döa’to chäwwä: —¿Ächännauwä’coto mädä ñaa wwä ääcamma’da maadö? Äwaanacaaneije aweiya’jäcä tooniye ääcammacä; quee cönä’döa’to.

²⁵ Yaawä Jesuuquidiito cönä’döaacä chäwwäiñe: —Wääcammane deeade äwwäiñe; änwanno aneecamjö’da meiya’quene. Yää Jaaja woije tönnöe wääneneedö yää nene’ju’ja chäänöngatooje weichö.

²⁶ Yääje yeichaame aneecamjö’da maato, sootoije’da aweichomjäcä, jenaadä wä’döaaquennöje dea.

²⁷ Öwö sootoi ya’deddu töneeta weneeneto, tädhaajä a’deddu oweeja töneeta töweiye naichodööje. Yoowanääcä tönwanno; tönwanno öncäcä töötä weneeneto.

²⁸ Öwö wu’a chäwwäiñe töwaatamemjönö weichojo. Tönwanno ännamjö’da naato’de yeichöje. Anejja sootoi che yenwajiiñajai’cha na.

²⁹ Jaaja cuntuicho öwwä, ñäädä tameedä o’jodhaato; anejja sootoi che Jaaja enwajiiñajai’cha mmaja na dea.

³⁰ Öwö mmaja, Jaaja mmaja, ñäädä dea ñaa; quee cönä’döaacä Jesuuquidiito.

³¹ Yää ’jeje yaawä judhío täju cönannä’jätöicho Jesuuquidiito töwääjätöödö wetä.

³² Yaawä töwö cönä’döaacä chäwwäiñe: —Jooje aashichaato wödööne aneenedööcomooje, Jaaja jäduudu woije; ¿äshono jo’tädööje wääjätö’se maato?

³³ Judhío cönä’döa’to yaawä chäwwä: —Aashichaato tödö’jödö jo’tädööje’da äwääjätö’se ñaa na, Wanaadi jäcä cone’da awa’deuwödö jo’tädööjeene. Sotooje aweichaame Wanaadije äwäätä’tädö; quee cönä’döa’to judhíocoomo.

³⁴ Jesuuquidiito cönä’döaacä: —Edääje imennaajä äwwäiñe naadö nä’döa: “Wanaadi yääje nä’döa: Wanaadija’como änwanno;” quee.

³⁵ Ñäädä Wanaadi ta’deddu tödönnamo wanaadija’comooje cöne’ta’to; cowaanäcäiñe na Wanaadi a’deddu imennaajä töquiiñeme’quemje’da yeichö.

³⁶ Jaaja ye’täne edä nono de’cäi töwe’emööje. Yääje yeijäcä ¿ane’que’nei cone’da Wanaadi jäcä wa’deuwödö me’taato iiñedööje wäätä’tädö weijäcä?

³⁷ Jaaja nödöödö nönge mmaja ännö’da weiya’jäcä yaawääne yeecamjö’da eijai maato.

³⁸ Dha’da Jaaja nödöödö nönge mmaja öwwä tödööa’jäcä önnödööne ecaanö’jai maato, öwö ya’deddu aneecamjö’da aweichaameiñe. Mädääje odhoowanääcäiñe eijai ña Jaaja yaaca yeichö, öwö dhaca weichö mmaja; quee cönä’döaacä Jesuuquidiito chäwwäiñe.

³⁹ Yää ’jeje mmaja judhío ajäi’she cönä’ja’to dea, töwäädä Jesuuquidiito dhantawonnoiñe cöneeja’caiñe’.

⁴⁰ Yaawä Jesuuquidiito cönennacai chea Joodadán mänsemjona, Juan Wautiita wautisaaje tönnöe yei’jödö doiña; yäätä cönä’jaacä yaawä.

⁴¹ Jooje soto töötä cönä’ja’to yöiña. Tönwanno cönä’döa’to: —Juan Wautiita ene’ju’tojo ännö’da cöneiyacä, yääje yeichaame Jesuuquidiito jäcä tameedä ya’deuwö’jödö chäänönge na; quee cönä’döa’to.

⁴² Jooje yäätoncomo Jesuuquidiito cöneecamjöicho.