JUAN 1 - Wanaadi A'deddu

A’deu sotooje yä’dö’jödö

¹ Awa’deene cönä’jaacä A’deu. Ñäädä A’deu cönä’jaacä Wanaadi jadä; Wanaadi chea töwö cönä’jaacä.

² Töwö cönä’jaacä awa’deene Wanaadi jadä.

³ Ñäädä ai Wanaadi cönnöi tameedä yeichö wa’cä. A’que na tödööajä iiñödööjönö.

⁴ Töwö chäwwä cönä’jaacä do’ta; yää do’ta cönä’jaacä sotoocomo weiyuuducoomoje.

⁵ Yää weiyu niweija tööjano’taca; oto’jodheinchajo’da na tööjato wwä.

⁶ Wanaadi tanoonöje dhanwa cönaanontäi, Juan Wautiitaje chäätö.

⁷ Ñäädä Juan Wautiita cöneejä weiyu jäcä ecammajä’neije, tameedä soto wwäiñe ecamjödö wetä ñeecammajäätödö etaadö’jo.

⁸ Juan Wautiitajöönööne cönä’jaacä weiyu. Anontaajäje mma töwö cönä’jaacä, weiyu jäcä ecammajä’neije mma.

⁹ Ñäädä weiyu neene, tameedä soto yeijoneichomo, edä nono de’wä wä’dönääje cönä’jaacä.

¹⁰ Ñäädä A’deu cönä’jaacä edä nono de’wä. Töwö dhai tameedä yeichö wa’cä tödö’jödö weichaame Wanaadi wwä, edä nono de’woncomo aneene’jutu’da cöneiya’to.

¹¹ Töwö tönoonodö de’cäi yä’dö’jödö weichaame ijimmä ämjumma’da cöneiya’to.

¹² Dhantai mmaane cumjumma’to; cöneecamjöicho dea. Ñanno wwäiñe töwö cuntui Wanaadi nnedööje yä’döto’como.

¹³ Ñanno ñanno wodi ai’cha yennua’como, tujuunu woije’da yennua’como mmaja, soto woije’da yennua’como mmaja, Wanaadi woije yennua’comoone.

¹⁴ Ñäädä A’deu sotooje cönä’döi. Töwö cöneejata’täi ñaa antawä. Aashichaato cönä’jaacä töwö, chäänöngato mmaja. Ñaa cöneeneaacä aashicha yeichö, yää yäätonno ’jemjönö Yuumö nnedö wwä töweiye naichö.

¹⁵ Juan töneecammajä’e cönä’jaacä chääjäcä; cönä’döaacä: —Ñäädä ñäädä töneecammajä’e wä’jaaquennö: “Öncäcä ne’aanei ye’jodhe na, töwö yoowajoodotooje yeijäcä;” quee töneecammajä’e wä’jaaquennö; quee cönä’döaacä Juan.

¹⁶ Mädä aashichaato töwääde’camjönö chäwwä naadö töwö cuntui cöwwäiñe. Ääde’wä aashichaato tunu’e weneene cöwwäiñe, aashichaato tuntu’jödö de’wä mmaja.

¹⁷ Moisé ai Wanaadi cuntui cöwwäiñe jenaado’jä waanontänä; Jesuuquidiito ai mmaane aashichaato cönä’tui cöwwäiñe, chäänöngato a’deu mmaja.

¹⁸ A’que Wanaadi eneenei ’je’da na, töwäädä ñäädä yäätonno ’jemjönö Iiñedö cöwwäiñe cöneecammajäätöiñe’, ñäädä Yuumö nijummadö.

Jesuuquidiito jäcä Juan Wautiita necammajäätö’jödö

¹⁹ Yaawä judhío Jeduusadén ñancomo tanoonöcoomoje cönaanontoicho Wanaadi wwä töwa’deuwaamo; dewiitacoomo mmaja cönaanontoicho dea, Juan ecamma’jo. Ñanno Juan cöneecamma’joicho: —¿Änääcö amäädä? quee cönä’döa’to. Yaawä sa’donna Juan cönääcammai,

²⁰ ejoome’dä’da cöneiyacä. —Äwaanacaaneijönö öwö; quee cönä’döaacä.

²¹ Tönwanno cöneecamma’joicho dea yaawä: —¿Änääcö amäädä yääje yeiya’jäcä? ¿Ñäädä ca amäädä Edía, Wanaadi wa’deuwödö ecammanei? quee cönä’döa’to. Juan cönä’döaacä: —Ng’jn, ñäädäjöönö öwö; quee. Yaawä tönwanno cönä’döa’to: —¿Ñäädä amäädä, yääje yeiya’jäcä, Wanaadi wa’deuwödö ecammanei töwe’emööje chääcadö naadö? quee cönä’döa’to. Töwö Juan cöneccujä’acä: —Ng’jn; quee.

²² Yaawä tönwanno cönä’döa’to chäwwä: —¿Änääcö amäädä, yääje yeiya’jäcä? Ääcammacääne, ñaa ecammaiye yaawä ñaa anontännamo’jödö wwä. ¿Aaquene amäädä äwäätä’tädö? quee cönä’döa’to Juan wwä.

²³ Juan cönä’döaacä yaawä: —Öwö ñäädä jata ’jemjönö aca ecammajä’nei. “Sha’duminchatääcä Cajiichaana eemadö;” quee töneecammajä’e wäänene, Isaía cöneecamma’döje dea, ñäädä Wanaadi wa’deuwödö ecammanei’jödö; quee cönä’döaacä Juan.

²⁴ Ñanno Juan wwadäädoncomo anonta’como dhantai jaadiseeo cönä’ja’to.

²⁵ Tönwanno Juan cöneecamma’joicho: —Yääje yeiya’jäcä ¿ane’cotoojo soto wautisaaje tönnöeiñe määneneeto, Äwaanacaaneijönö aweichaame, Edíajöönö aweichaame mmaja, Wanaadi wa’deuwödö ecammanei neenejöönö aweichaame mmaja? quee cönä’döa’to.

²⁶ Yaawä Juan cönä’döaacä chäwwäiñe: —Öwö wautisaaje soto wödööaato tuna que. Yaawääne’, töweiye na adhantawäiñe odhoowanoocomoojönö.

²⁷ Öncäcä ye’taame ye’jodhe na. Shaajatui shaacaneije jadä’jödöödä eijai’cha wa, ye’jodhe töwö yeijäcä; quee Juan cönä’döaacä täcamma’jonnamo wwä.

²⁸ Tönwanno mädääje cöna’deuwa’to Wetaawada ña töweichöcoomo, Joodadán mänsemjo, Juan wwä wautisaaje tödöödö döiña.

Jesuuquidiito Wanaadi nanontädööje yeichö

²⁹ Yää jenamma naadöje Juan cöneeneaacä Jesuuquidiito töwwadäädä yeejödö. Töwö Juan cönä’döaacä yaawä: —Eneetäcä, määdhä ñäädä Oweeja nnedö’cä nöngato, Wanaadi nanontädö, tameedä soto cone’nadiiyöcoomo coccanei.

³⁰ Määdhä ecammancädä yääje wä’döaaquene: “Öncäcä ne’a dhanwa ye’jodhaato. Töwö ye’jodhe na yoowajoodotooje yeijäcä;” quee wecammajä’aquennö.

³¹ Öwö jadä’jödöödä yoowanääcä’da töwö cönä’jaacä. Öwö we’ne tuna que soto wautisaaje tödööancädäiñe, tameedä iisadaaediitacoomo dhowaanäcäiñe yeichö wetä töwö; quee cönä’döaacä Juan.

³² Edääje mmaja Juan cönä’döa’dea: —Caju ñanno Epíiditu Santo wä’tädö weneeaqueene, jaduumaje. Ye’wä cönä’täi yaawä.

³³ Yoowanääcä’da cönä’jaacä töwö, töwäädä ñäädä tuna que wautisaaje tödöödö jäcä yaanontänei’jödö yääje cönä’döa’ne’: “Ñäädä Epíiditu Santo ye’wä nä’ta’dedö, ye’wäädä na’dedö, ñäädä ñäädä Epíiditu Santo que wautisaaje tödöönei;” quee yaanontänei’jödö cönä’döaacä öwwä.

³⁴ Öwö weneeaqueene yaawä, yääje yeijäcä wecamma Wanaadi nnedööje yeichö; quee cönä’döaacä Juan Wautiita.

Awa’deena’como Jesuuquidiito nowaanomaadö

³⁵ Yää jenaama naadöje Juan cönä’jaacä aacä tönoowanoomadö jadäiñe.

³⁶ Yää ai Jesuuquidiito weja’dätäädö eneea’jäcä Juan cönä’döaacä: —Eneetäcä, määdhä ñäädä Oweeja nnedö’cä nöngato, Wanaadi nanontädö; quee.

³⁷ Ñanno aaconcomo Juan nowaanomaadö cöneeta’to yääje yä’dödö; Jesuuquidiito ncäcä cöntonto yaawä.

³⁸ Jesuuquidiito cönä’jedennacai yaawä, cöneeneaacä töncäcä yeejödööcomo. Töwö cönä’döaacä chäwwäiñe: —¿Ane’cäämö mujiiyato? quee. Tönwanno cönä’döa’to: —Owaanomaanei, ¿äsha adhe’sadö nai?

³⁹ Töwö cönä’döaacä chäwwäiñe: —Ma’chomo, meneetäiye; quee. Tönwanno cöntonto yaawä; chä’sadö cöneenea’to. Yää anooto cömja’do’joicho chääjadä, cho’momöödawä yeijäcä.

⁴⁰ Tooni Juan wa’deuwödö etaanei’jödö cönä’jaacä Antedé, Simón Peedhodo acoono. Ñäädä Antedé cönä’jaacä Jesuuquidiito jadoono wötä’jödö.

⁴¹ Yaawä dea mma töwö tudui Simón ujiiye cöntämä; cönä’döaacä chäwwä: —Ñaa cöneedantäi Mesía; quee cönä’döaacä. Äwaanacaanei, quee töwä’dö’se yeichö yää Mesía.

⁴² Yää ’jeje töwö Antedé tudui cönaadäi yaawä Jesuuquidiito döiña. Jesuuquidiito wwä Peedhodo eneea’jäcä töwö cönä’döaacä chäwwä: —Simón amäädä, Joná nnedö. Peedhodoojeene adheetö na eduuwa; quee cönä’döaacä Jesuuquidiito. Täju, quee töwä’dö’se yeichö mädä Peedhodo.

Jediipe acä Nataanaeede a’dejja’jocoomo

⁴³ Yää jenamma naadöje Jesuuquidiito töötä’se cönä’jaacä Caadideea ña. Töwö Jediipe cöneedantäi; cönä’döaacä chäwwä: —Jaadä eichä; quee.

⁴⁴ Ñäädä Jediipe cönä’jaacä Wesaada ñano, Peedhodo, Antedé jataawoncomo dea.

⁴⁵ Yääje mma yaawä Jediipe cöntämä Nataanaeede ujiiye; cönä’döaacä chäwwä: —Ñaa cöneedantäi ñäädä Moisé chääjäcä cömmennäichö, Wanaadi wa’deuwödö ecammannamo chääjäcä cömmennoichodö mmaja; Jesuuquidiito töwö, Naasade ñano, José nnedö; quee cönä’döaacä.

⁴⁶ Yaawä Nataanaeede cönä’döaacä chäwwä: —Naasade ñanno mmädä aashichaato eja’cadööde’; quee. Jediipe cönä’döaacä yaawä: —Ma’che’ma, meneetaiye.

⁴⁷ Yaawä töwwadäädä Nataanaeede weejödö edanta’jäcä Jesuuquidiito cönä’döaacä chäwwä: —Määdhä ñäädä iisadaaediita chäänöngato, töwäätäncu’täjä’emjönö; quee cönä’döaacä Jesuuquidiito Nataanaeede jäcä.

⁴⁸ Yaawä Nataanaeede cönä’döaacä chäwwä: —¿Aaquene odhoowanääcä wannea? Jesuuquidiito cönä’döaacä: —Öwö maneeneaanä Jediipe wwä adha’dejja’dadä, waju’nä o’nä aweichö; quee.

⁴⁹ Yaawä Nataanaeede cönä’döaacä: —Owaanomaanei, Wanaadi nnedö amäädä. Ñäädä amäädä iisadaaediitacoomo Cajiichaanaichomo; quee cönä’döaacä.

⁵⁰ Jesuuquidiito cönä’döaacä chäwwä: —¿Yääje wä’dö’jödö weijäcä ca cäcaanö’anä: “Waju’nä o’nä aweichö maneeneaanä;” quee wä’dö’jödö weijäcä? Mädä e’jodhaato’cä meneea’de; quee cönä’döaacä.

⁵¹ Edääje mmaja Jesuuquidiito cönä’döa’dea: —Chäänönge yääje wä’döa äwwäiñe, änwanno meneeato’de caju wata’ducaadö. Wanaadi amoodedö mmaja meneeato’dede, yäncuduucomo mmaja, yä’tädööcomo mmaja Soto nnedö awoodhecääcä; quee cönä’döaacä Jesuuquidiito.