JIIDEMÓN 1 - Wanaadi A'deddu

Yaajäntä’jödö

¹ Öwö Paudo, Jesuuquidiito ecamjödö jo’tädööje jedeesojaato, Tiimoteo acä ñaa nimenna äwwadäädä, amäädä ñaa nijummadö Jiidemón, ñaa wetaadawa’cajoodö weichacoono.

² Ñaa jaduichö Aapia wwadäädä mmaja ñaa nimenna dea, Aadiquiipo wwadäädä mmaja, ñaa jadoono wewäänä’tädö. Tameedä quedeiyente ämmai chaca töweecanta’ñä weneenetoodö wwadäädä mmaja ñaa nimenna dea, amäädä weichacoono Jiidemón.

³ Aashichaato, täncanoode’da aweicho’como mmaja äwwäiñe yei’she wa, Cumöötoncomo Wanaadi nutuudu, Cajiichaana Jesuuquidiito nutuudu mmaja.

Wä’jummanä ’je Jiidemón wei’jödö

⁴ Wanaadi wwä wa’deuwödö waadäi aashicha chäwwä töwa’deuwe wäänene äjääcäinchädä,

⁵ öwwä eta’jödö weijäcä Cajiichaana Jesuuquidiito töneecanö’e aweichö, tameedä Wanaadi sotoi tumjumma aweichö mmaja.

⁶ Ñanno aneecamjödö jäcäinchädä cöneecamjöicho jäcäiñe Wanaadi wwä töwa’deuwe wäänene, chäänönge dhowaanäcäiñe yö’dödö wetä yää Jesuuquidiito nutuudu aashichaato cöwwäiñe naadö.

⁷ Weichacoono, mädä wä’jummanä ’je aweichö ya’cwaimatä weneene, jäädu’tätä mmaja, amäädä ani’wa’tädö que quedeiyentecoomo tömjädu’täiñe aweijäcä.

Onéesimo jäcäinchädä Paudo ne’catä’jödö

⁸ Yääje yeijäcä, Jesuuquidiito nanontädööje weijäcä, äwwä tödööemö jäcä tanontääne adhaanontäjai weichaame,

⁹ yaawääne’ wä’jummanä jäcäinchädä täcamma’jo mmaane maneecamma’ja, öwö Paudo, inchomo’cä, Jesuuquidiito jäcäinchädä jedeesojaato.

¹⁰ Edääje wä’dö’se wa äwwä mä’dä önnedö Onéesimo jäcä, jedeesoje weichö quedeiyenteje önnödö.

¹¹ Jenaadä adhaanonööje’da mä’dä Onéesimo töweiye cönä’jaacä. Eduuwa mmaane adhaanonööje eijai ña, öwö yaanonööje mmaja.

¹² Öwö wiiñacaanö’ja adöiña; yääje yeijäcä aashicha tödööcä’de öwö yöödöjai maadö wa’cä dea.

¹³ Jaadä dea tödö’se waadö’je aashichaato wätunnä jo’tädööje jedeesoje weichö wadaadäädä ö’wa’täneije, amäädä eijai maadöjaatoje.

¹⁴ Yaawääne’ äwwä etaadö’jo’da yääje tödö’se’da wä’jaaquene, owoije’da mma aashichaato männö’no jääcä, owoijeene mödöiye.

¹⁵ Mädääje töwä’döeemöje’da ca asancwaneedö jääcä a’dhe, eduuwa yeichöje ajaadä yeichö wetä.

¹⁶ Adhaanonööje mma’da töwö na eduuwa, aweichacoonoje mmajaane. Öwwä tujunne na jooje, töwaacö’je äwwä eijai ña, adhaanonööje yeichö jäcäinchädä mma’da, Jesuuquidiito jäcäinchädä aweichacoonoje yeijäcä mmajaane.

¹⁷ Yääje yeijäcä, aweichacoonoje äwwä tö’ta’jäcä, aashicha mä’dä Onéesimo tödööcä’de, öwö yöödöjai maadö wa’cä dea.

¹⁸ Conemjönö äjääcä iiñö’jödö yeiya’jäcä, chäwwä adheejeque’nä’a’jäcä jeiñe mma, öwö neejemaadöje tödööcä’de.

¹⁹ Öwö, Paudo dea, edä wimenna, öwö wejeema’de, amäädääne aweichö que jeene yeejeque’nä’taame.

²⁰ Weichacoono, öwö daja aashichaato que emeetacaamajo’se wa äwwä. Quidiito jäcäinchädä ca’cwaimacä mädä äwwä wödööjaadö jäcä.

²¹ Äwwadäädä wimennäi neecammadö tödööjai aweichö yoowanääcä yeiyancädä. Yoowanääcä na wecammaichö e’jodhe’cä töödööjai aweichö.

²² Adhe’saca wä’dötoojo choonecaacä’de yoowajo. Jääcä Wanaadi wwä awa’deuwödööcomo weijäcä jedeesoje weichö jonno yu’cadö nichö’ta, adöiñaiñe öötädö wetä yaawä.

Yä’ca’jödö

²³ Mä’dä Epaujada, Jesuuquidiito ecamjödö jo’tädööje jedeesoje weichö weichacoono, ta’deujödö nadääja äwwadäädäiñe.

²⁴ Maadoco mmaja, Aaditaaducu mmaja, Deema mmaja, Duuca mmaja, ta’deujocoomo nadääjaato dea; tönwanno naato weetadaawa’cajoodö jimmäje.

²⁵ Cädhaajotoncomo Jesuuquidiito nutuudu aashichaato äwwäiñe yei’she wa. Amén.