JIDIIPENSE 3 - Wanaadi A'deddu

Chäänönge weiñä

¹ Edääje mmaja wä’dö’se wa dea jimma: Cajiichaana Jesuuquidiito jäcäinchädä ta’cwaiñe eichäcä. Yaaquiñuuduje’da na yää dea öwwä imennädö äwwadäädäiñe, chäänönge aweicho’comoojeene yeiyajä.

² Odhoowoinchadäiñe’da eichäcä sö’na nönga’como jäcäiñe, ñanno conemjönö tödönnamo, täjööcomo cone’mannamo.

³ Cönwannoone ñanno siicunsidaadoje tödööajä chäänönga’como, Epíiditu Santo ai Wanaadi jummannamo mmaja. Cönwanno ta’cwaiñe caato Jesuuquidiito jäcäinchädä; cujuunucoomo weichö mmaane ecaanö’jai’cha caato.

⁴ Juunu weichö jäcä o’jodhe ääcanö’jai mmaja weichaame öwö. Anejja o’jodhe yääcänö’a’jäcä, töwaacö’je öwö.

⁵ Öwö siicunsidaadoje yöödöneeto aaduwaawä amoojato anooto wennu’jödö weichö. Iisadaaeeda weichö öwö, Wemjamín atö’jödö. Eewedeeo neene mmaja öwö dea, eewedeeo nnacontoncomo. Jaadiseeoje mmaja wä’ja’quennea jenaado’jä waanontänä dödö jäcä.

⁶ Quedeiyente tömmaminchaiñe’jödöödä judhío weichö töneecanö’e wä’jaaquene. Öwö wä’jaaquene tämentämje’da jenaado’jä waanontänä dödö jäcä.

⁷ Yääje yeichaame yää anejjacoomo e’jodhe wei’jödö wöja’ne Quidiito jäcäinchädä.

⁸ Tameedäädä töja’emje yeichö wichö’tamme’ne Yeedhajä Jeduuquidiito yoowanääcä tödöödö jäcäinchädä, yää aashichaato jaiñoone. Quidiito junnei tameedä yää wöja’ne, chääta’jödö nönge na eduuwa öwwä, Quidiito chaana’cadö wetä öwwä,

⁹ chääjadä weiye yaawä, aashicha weichö jenaado’jä waanontänä jäcäinchädooto que’da, Quidiito ecamjödö jäcäinchädooto queene. Yää aashicha weiñä Wanaadi tunu’e tameedä täcaanö’nei wwä.

¹⁰ Quidiito yoowanääcä tödö’se wa, ijäädudu mmaja, yää chääque töwäämaajo jonno cönaadoncaichö. Töwö chääjadä mmaja yäntunamjödö oneeja’se wa dea, töwö cönäämaichöje mmaja wäämaiyede öwö yaawä,

¹¹ yä’ja’a’como antawonnoiñe waadoncatoojo wejoodöiye.

Chäänöngato ejoodödö wetä ä’jädu’täjai cöweichöcoomo

¹² Mädä wecammannö aneejodö’da dea weichaame, chäänönge ä’dö’da dea weichaame mmaja; ene’jununtädööje deaane wa, ejoodödö wetä yää chääjäcäinchädä Jesuuquidiito tösootoije yöödöneedö.

¹³ Jimmä, yää tojoodöe öwwä yeichö ane’tä’da wa. Edääje mma wa, öncadheedä naadö wencwannä’ja; yoowajo naadö wwadäädä öötädö jäcä wä’jädu’ta.

¹⁴ Nwaadädä dea wöta, chu’nä’taajä döiña tödööene, caju ñano aashichaato wichaana’caiye, yää chääjäcäinchädä Wanaadi tanoonöje cödöötäneedö, Jesuuquidiito sotoije cöweijäcäiñe.

¹⁵ Yääje yeijäcä cönwannoodä, chäänönge caatoodö, mädääje cötö’tajä’täiye. Aneiñaja ätö’tajäätödööcomo yeiya’jäcä mmaane yää mmaja Wanaadi nisha’dumincha’da äwwäiñe.

¹⁶ Yää queejodöötäneedö woije mmaane cötö’tajä’täiye; yää woije queichäiye.

¹⁷ Jimmä, öwö nönge mmaja eichäcä. Ñannoone ene’matääcä, adhantawäiñe ñaa töweiye cönä’ja’dö nönga’como deaane.

¹⁸ Jooje naato Quidiito wääma’jödö jäcä ecammajäätödö tu’de’tännamo, ñanno weiñäje äwwäiñe töneecamma wä’jaaquentodö; eduuwa waamoancädä wecammaato dea.

¹⁹ Tönwanno töwännanö’aamoje naato. Tujuunucoomo nijummadö mma tädhaajotoncomooje tönnöe weneeneto. Yää töjöichöcoomoje eijaicho’jödö yeewataashimaato’comooje mma na. Tönwanno chö’tajäätödööcomo edä nono de’wono jäcä mma.

²⁰ Cönwanno cöjaatadööcomo mmaane na caju ña. Iiñanno Äwaanacaanei weejödö quiiyomo’cato, ñäädä Cajiichaana Jesuuquidiito.

²¹ Töwö ninwacaama’de cäjööcomo conemjönö töwö täjö aashichaato nönge. Yää nödööa’de töjäädudu que, yää tameedä to’nä tönnöe weneenedö que dea.