JIDIIPENSE 2 - Wanaadi A'deddu

O’jodhe chö’tajäätö’da Quidiito wei’jödö

¹ Yääje yeijäcä, Quidiito äjäädu’tätäiñe yeiya’jäcä, töwö inchudu wä’jummanä awa’dätäiñe yeiya’jäcä mmaja, Epíiditu Santo ’je aweiya’comjäcä mmaja, tujunne äneetä aweiya’comjäcä, wentumje äneetä mmaja,

² ca’cwaimatääcä yääje yeiya’jäcä yää dea ätö’tajäätödööcomo tödöödö que, äwä’jummadööcomo que mmaja, aata’deucone aweichöcoomo que mmaja, yää dea ijummancädä.

³ Änwanno mma awei’sheiñe aweiyancädäiñe’da eichäcä, o’jodhe awei’sheiñe aweiyancädäiñe’da mmaja. Edääjeene eichäcä: O’jodhe ätö’tajä’ancädäiñe’da ajimmotoncomo adhe’jodheiñe tödöötäcä.

⁴ Amäädä aweichö mmajöönö encano’täcä, ajimmä weichö mmajaane.

⁵ Jesuuquidiito tö’tajäätödö wei’jödö nönge mmaja ätö’tajä’täcä.

⁶ Töwö cönä’ja’dö naane’, Wanaadije töweichaame Wanaadi wa’cä mmaja töweichö to’nomjamje’da ane’tä’da cöneiyacä.

⁷ Tummichaane cunummichai yaaje töweichö tanontäjä’emööje töwä’dödö wetä, sotooje töwennudu que.

⁸ Sotooje töwä’döa’jäcä i’she’jödööje cönä’döjoi. Wanaadi woije cönä’jaacä töwäämaane’jödöödä, yää cuduusa jäcä cönäämaichö.

⁹ Yääje yeijäcä Wanaadi tameedä o’jodhe cönnöi; chäätö cuntui tameedä äätö e’jodhaato,

¹⁰ Jesuuquidiito eetö etaadö’jo tameedä tä’mudhe ä’döiyeto yaawä ya’demeecödööje, ñanno caju ñancomo, nono de’woncomo mmaja, co’dhejeñancomo mmaja,

¹¹ tameedä Jesuuquidiito Cajiichaanaje e’täiyetoode. Mädääje Cumöötoncomo Wanaadi aashicha wa’deutojooje eijai ña.

Adhaawa nönge cöweichöcoomo

¹² Yääje yeijäcä, jimmä umjummadö, ajaadäiñe weichö öwö woije tönnöe mä’ja’quennöje dea eichäcä, jooje’cä mmaane eduuwa ajaadäiñe’da weijäcä. Töwääwanaaca aweichöcoomo jäcä oowoinchatääcä, o’jodhe ätö’tajä’ancädäiñe’da, tönoiñe äneetä aweiyancädäiñeene.

¹³ Wanaadi chea äwwäiñe nu’a aashichaato tödö’se aweicho’como. Töwö dea ä’wa’taato aashichaato tödöötojo jäcä, tumjummadö chäänöngato woije.

¹⁴ Tameedä tödöötäcä awenta’me’cancädäiñe’da, äwäätäuwancädäiñe’da mmaja.

¹⁵ Mädääje täcammajä’aamoje’da eijai maato, tämentaamoje’da mmaja. Mädääje Wanaadi nnacoomo chäänönga’comooje eijai maato soto conemjöncomo antawaiñe, ñanno chäänöngemjöncomo. Änwanno adhaawa nönge dhantawäiñe miyeijaato edä nono tööjato de’wä,

¹⁶ weichojo a’deu ecammajä’ancädä. Mädääje aweiya’comjäcä äjääcäinchädäiñe ta’cwaiñe eijai wa yaawä Quidiito we’a’jäcä, töwäädämma’da töwäämannä’e wei’jödö weijäcä, töwäädämma’da taadawaajui’jödö weijäcä mmaja.

¹⁷ Öwö ta’cwaiñe dea eijai wa saaquidiijiisiyo nönge töwä’tueemöje weichaame, yää saaquidiijiisiyo ännödööcomo de’wä mmaja, ecamjödö que tönnöe määnetäänedö. Adhaacoodaaneiñe ta’cwaiñe eijai wa.

¹⁸ Änwanno mmaja yaacoodaane ta’cwaiñe eijai maato dea.

Tiimoteo, Epaujodiito jäcäiñe Paudo nimennä’jödö

¹⁹ Cajiichaana Jesuuquidiito woije yeiya’jäcä, adöiñaiñe Tiimoteo anontä’se wa eduuwa mma, ta’cwaiñe weiye yaawä adheecadööcomo eta’jäcä öwwä.

²⁰ Anejja öwö jaadono ’je’da na määdhä Tiimoteo nöngato, chäänöngato que aweichöcoomo encano’tänei.

²¹ Tameedä anejjacoomo tönnödööcomo mma tönencano’tä weneeneto, Jesuuquidiito nödöödöjöönö mma.

²² Aashicha Tiimoteo weichö mmaane odhoowanääcäiñe na änwanno, mude’cä’cä tumö jadoono wetaadawa’cajoodö nönge jaadä yeetadaawa’cajo’jödö aashichaato wätunnä ecammajäätödö jäcä.

²³ Yääje yeijäcä adheeneiñe anontä’se wa, öwö weichojo yoowanääcä yä’döa’jäcä mma.

²⁴ Cajiichaana Jesuuquidiito woije yeiya’jäcä öwö jaiñoone adöiñaiñe öötä’se wa eduuwaiche mma.

²⁵ Epaujodiito mmaane eduuwa mma wiiñacaanö’ja adöiñaiñe, ñäädä öwwadäädä ö’wa’täneije menno’jatäänedö. Weichacoono töwö, weetadaawa’cajoodö jäcä ö’wa’tänei’jödö, wewäänä’tänä jäcä mmaja.

²⁶ Töwö jooje adheene’seiñe na. Cone’da cönä’döjoi cädäije töwei’jödö eta’jödö weijäcä äwwäiñe.

²⁷ Cädäije dämma cönä’jaacä, äämajai tödööene; töwäädä Wanaadi wentumje cöneene’maiñe’. Töwö mma’da wentumje cöneene’mai, öwö mmajaane, wentumje weichö jona mma wentumje wei’ñode yaawä.

²⁸ Yääje yeijäcä jooje enno’ja’se wa, ta’cwaiñe aweichöcoomo wetä yaawä eneea’jäcä äwwäiñe, wentumje’daiche weiyede öwö yaawä.

²⁹ Yääje yeijäcä Jesuuquidiito jäcäinchädä aashicha tödöötäcä’de mä’dä Epaujodiito, adha’cwaniiyöcoomo que. Määdhä nöngato ijummatääcä.

³⁰ Töwö Quidiito tadaawaajui jäcäinchädä äämadö cöneiyacä. Äämajai töweichaame öwwä tönnöjä’e cönä’jaacä yää öwwonooje tödööjai’cha mä’ja’quennö.