JIDIIPENSE 1 - Wanaadi A'deddu

Yaajäntä’jödö

¹ Öwö Paudo, Tiimoteo mmaja, Jesuuquidiito anoonö, edä ñaa nimenna äwwadäädäiñe, änwanno tameedä quedeiyentecoomo Jidiipo ñancomo, Wanaadi sotoi, Jesuuquidiito jadoncomo; ansiyaano wwadäädäiñe mmaja ñaa nimenna dea, diyaacono wwadäädäiñe mmaja.

² Aashichaato, täncanoode’da aweicho’como mmaja, äwwäiñe yei’she ñaa na Cumöötoncomo Wanaadi nutuudu, Cajiichaana Jesuuquidiito nutuudu mmaja.

Quedeiyente jäcäiñe Wanaadi wwä Paudo wa’deuwö’jödö

³ Äjääcäiñe tö’tadö waadäi Wanaadi wwä aashicha töwa’deuwe wäänene.

⁴ Chäwwä wa’deuwödö waadäi ya’cwaniiyö que äjääcäiñe töwa’deuwe wäänene,

⁵ ö’wa’tä’jödö weijäcä äwwäiñe aashichaato wätunnä ecammajäätödö jäcä, awa’deene äwwäiñe eta’jödö jonnoto’jödöödä eduuwa naadö jona tödööene.

⁶ Yoowanääcä na ñäädä äjääcäiñe aashichaato tödöödö cönaajäntäichö chäänönge tödöödöje dea yeichö, Jesuuquidiito weejödö wa’cä.

⁷ Chäänönge mädääje äjääcäiñe tötö’tajä’e wäänene, öwwä tujunne aweijäcäiñe. Jedeesoje weichö jeiñe mma, aashichaato wätunnä chu’de’tännamo ye’wononcadööje weichö jeiñe mma, ecammajäätödööje weichö jeiñe mma, tameedä änwanno jaadä tönooneja mmaja Wanaadi nutuudu aashichaato.

⁸ Wanaadi dhowaanäcä na jooje äjummatäiñe weichö, wä’jummanä Jesuuquidiito nutuudu que.

⁹ Wanaadi wwä töne’ca’e wäänene jooje’cä äwä’jummadööcomo wejantojo, töseedujä’ne aweicho’como jadä, tösejjeque aweicho’como jadä mmaja,

¹⁰ odhoowanääcäiñe yeichö wetä yaawä aashichaato jaiñoone edantädö. Mädääje conemjönö ’je’da eijai maato, tämentaamoje’da mmaja, Quidiito we’a’jäcä.

¹¹ Mädääje Jesuuquidiito ni’wa’tädö que aashichaato tödöödö ’je eijai maato. Yaawä tacaade eijai ña aashicha Wanaadi weichö; aashicha soto a’deujai ñaato yaawä chääjäcä.

Quidiito töweichojooje yeichö Paudo necammajäätö’jödö

¹² Jimmä, odhoowanääcäiñe yei’she wa mädä öwö jääcä cöneeja’dätäichö aashichaato wätunnä ejanno’to’me yeichö.

¹³ Tacaade na eduuwa tameedä waadiya wwäiñe ñanno acu’shänä mmai chawoncomo, anejjacoomo eetoncomo wwä mmaja, Quidiito ecamjödö jäcäinchädä jedeesoje weichö.

¹⁴ Yääje yeijäcä jooje quedeiyentecoomo jäduuje’cä naato eduuwa Wanaadi a’deddu ecammajäätödö jäcä, jedeesoje weichö nijäädu’tädööje. Tösaade’da Wanaadi a’deddu töneecammajä’e weneeneto, Cajiichaana ecaanö’ancädä.

¹⁵ Anejjacoomo Quidiito töneecammajä’e weneeneto tö’neniiyöcoomo que, ye’jodhe töwei’she töweichöcoomo que mmaja; anejjacoomo ’quene aashicha töweichöcoomo que daja.

¹⁶ Ñanno chäänöngemjöncomo Quidiito töneecammajä’e weneeneto ye’jodhe töwei’she töweichöcoomo que mmädä, chäänönge tötö’tajä’ancädäiñe’da, cone’da yöödöjo’se’jödö jedeesoje weichö jäcä.

¹⁷ Ñanno chäänönga’como mmaane töneecammajä’e weneeneto öwö jummadö e’nei, towaanäcäiñe yeijäcä eetä weichö aashichaato wätunnä chu’de’tännamo ye’wononcaneichomooje.

¹⁸ Aaquene mmaja cone’da wä’döjoodö deeade’. Necammajä’aato mma’ne’, ye’jodhe töwei’she töweichöcoomo que, chäänönge töwei’she töweichöcoomo que jeiñe mma. Quidiito deaane necammaato; yää jäcäinchädä ta’cwaiñe wa. Ta’cwaiñe dea wa’de,

¹⁹ yoowanääcä yeijäcä mädä jedeesoje waadö aashichaatoje jääcä töweeja’caamöje yeichö, Wanaadi wwä awa’deuwödööcomo que, Jesuuquidiito nutuudu Epíiditu Santo ni’wa’tädö que mmaja.

²⁰ Öwö tö’tajäätödö she’caasa ömjöichädö ’je yei’she’da. Tösaade’da weichö que mmaane Quidiito aashicha wa’deuto’me tödö’se wa, weichö nöngeedä, nudä weichö que jeiñe mma, wäämadö que jeiñe mma.

²¹ Öwö öwwä Quidiito weichojooje na, wäämadö mmaane öwwä chaana’cadööje eijai ña.

²² Nudä dea weiya’jäcä jooje’cä taadawaajui’jödö eijai ña. Yääje yeijäcä yoowanääcä’da na umjummadö.

²³ Aacä weichojo antawä wa. Öwö tö’tajäätödö ööta’se, Quidiito jadä weichö wetä yaawä, yää aashichaato jaiñoone.

²⁴ Yaawääne’ nudä weichö tujunne’cä jeene na, aweijäcäiñe.

²⁵ Yääje yeijäcä nudä weichojo yoowanääcä na, ajaadäiñe weichö wetä, quedeiyenteje aweichöcoomo jäcä ä’wa’täneichomooje, aneecamjödööcomo jäcä ta’cwaiñe aweichöcoomo wetä mmaja.

²⁶ Jesuuquidiito woije jooje’cä ta’cwaiñe eijai maato yaawä, ajaadäiñe deja weijäcä mmaja.

²⁷ Edääje mma eichäcä’de, Quidiito wätunnäi aashichaato necammadö woije mma. Yaawä adöiñaiñe ööta’jäcä, tä’da weiya’jäcä jeiñe mma, aashicha dea adheecadööcomo äätäiye’de öwwä, jäduujeedä aweichöcoomo, aata’deucone aweichöcoomo mmaja, aashichaato wätunnä ecamjödö jäcäinchädä tujuumä töweewänä’tä aweichöcoomo mmaja äätaiye’dede.

²⁸ Ane’cä’cä jäcäinchädä mma ätu’de’tännamo monnontätäi. Yää tösaade’da aweichöcoomo na’de chäwwäiñe töwännanö’e töweichöcoomo yääne’ju’to’comooje. Äwwäiñe mmaane na’de Wanaadi nutuudu töwääwanaaca aweichöcoomo ene’ju’to’me.

²⁹ Änwanno maato Quidiito ecaanö’nnamooje töweiyaamoje mma’da, ijunnei töwäntunaanö’aamoje mmajaane.

³⁰ Änwanno eduuwa moneejato wewäänä’tänä, ajaadäiñe weichö öwö jääcä töneene mä’ja’quennö, eduuwa jääcä dea yeichö töneeta määnetäänedö dea.