EUJEESIYO 6 - Wanaadi A'deddu

¹ Änwanno mudeeshi’chä, quedeiyenteje aweijäcäiñe oomotoncomo woije eijai maato, aanötoncomo woije mmaja; aashicha yääje weiñä.

² Edä yää äwa’deeto waanontänä aashichaato ecammadö ’jano: “Oomo aashicha tödööcä, aanö mmaja,

³ ta’cwaiñe meiye yaawä, numa edä nono de’wä meiyede;” quee nä’döa waanontänä.

⁴ Änwanno töwenneca’como, ännacontoncomo maneetömaajotäi’che; yäätuujancädäiñeene iiñejencatääcä, owaanomancädäiñe mmaja, Cajiichaana ecamjöiyeto.

⁵ Änwanno tädhaajäca’como, adheedhajootoncomo edä nono de’woncomo woije eichäcä, ñontancädäiñe, aashicha tödööancädäiñe mmaja, tooni mma ätö’tajäätödööcomo tödööancädä, Quidiito wwä tödöödö töweiye naichöje.

⁶ Adheedhajootoncomo neneedöje mma meichäi’che, soto a’cwaimadaawä weiñä töweiye naichöje’daane. Quidiito anoonö nönge deaane eichäcä; tödö’se aweichöcoomo queene Wanaadi waanontädö tödöötäcä.

⁷ Ta’cwaiñe aweichöcoomo que ataadawaajuichomo tödöötäcä, Cajiichaana Jesuuquidiito wwä tödöödawä weiñä naichöjeene, soto wwä’daane.

⁸ Änwanno odhoowanääcäiñe na soto waadäi Cajiichaana Jesuuquidiito wwä ejeemato’como aashichaato iiñö’jödö woije, tädhaajäcaato, tädhaajäquemjönö mmaja.

⁹ Änwanno ädhaamo, mädääje mmaja osootoi jäcäiñe eichäcääde, ecaatoncancädäiñe’da, odhoowanääcäiñe yeijäcä ñäädä caju ñano adheedhajootoncomooje yeichö. Ñäädä caju ñano ooto’jodhe soto ämjumma’da naato.

Wewäänä’tänaawä quedeiyente woowontoto’como

¹⁰ Jäduujeiñe eichäcä Cajiichaana ni’wa’tädö que, töwö ijäädudu que mmaja.

¹¹ Adheewontätääcä tameedä owoowontoto’como que, yää Wanaadi nutuudu, jäduuje aweichöcoomo wetä yaawä odo’sha adhencu’tä’seiñe yeichawä.

¹² Cönwanno quewäänä’taato soto jadäiñe’da, äänejöncomo jadäiñeene, ñanno caju ñancomo odo’shancomo, ñanno jäduuja’como, edä nono tööjato edhaamo.

¹³ Yääje yeijäcä tameedä tödöötäcä Wanaadi nutuudu owoowontoto’como, conemjönö cu’nädaawä jäduuje meichäiye. Yaawä tameedä äwwäiñe tödööemö tödööa’jäcä, yäätäädä eijai maato.

¹⁴ Yäätäädä eichäcä; chäänöngato wätunnä ä’dha’mötööcomooje tödöötäcä; chäänönge weiñä que oowontätääcä, suddau tö’dojöödö womö tönnöe töweiye naichöje.

¹⁵ Ä’juduucomo ewontätääcä aashichaato wätunnä que, yää täncanoode’da weichojo ecammanei; täcoije meichäiye yaawä ecammajä’e.

¹⁶ Tameedä mädä de’wä mmaja jeene ecamjödö tödöötäcä odo’tadööcomo ewontotoojoje. Yää que uncwe’cajai maato tameedä odo’sha shimaadai emjannaajä weejödö.

¹⁷ Wääwanaacanä tödöötäcä aju’jocoomo ewontotoojoje. Wanaadi a’deddu awaichadööcomooje tödöötäcä, yää Epíiditu Santo nutuudu.

¹⁸ Tameedä mädä tödöötäcä yeichöje Wanaadi wwä awa’deuwancädäiñe Epíiditu Santo ni’wa’tädö que; chäwwä adha’deutäcä ämjummadööcomo e’ca’ancädä. Odhoowadäädäiñe eichäcä mädä jäcä, aweejäduuque’ancädäiñe’da, tameedä Wanaadi sotoi jäcäiñe Wanaadi wwä awa’deuwancädäiñe.

¹⁹ Öwö jääcä mmaja Wanaadi wwä adha’deutäcä’dede, soto wwäiñe wa’deuwödö waadäi wa’deutojo äntuiye yaawä, tösaade’da wecammajäätöiye yaawä aashichaato wätunnä owaanojöönö’jödö jäcä.

²⁰ Yää wätunnä ecammajä’neije weichö wetä Wanaadi yaanontäne, ijo’tädööje jedeesoje waadö. Wanaadi wwä e’ca’täcä tösaade’da neecammajo’tojo, töweiye naichöje deaane.

Yä’ca’jödö

^21-22 Määdhä Tíiquico wanonta äwwadäädäiñe. Ñaa weichacoono tujuunato töwö, ñaa ’wa’tänei chäänöngato mmaja Cajiichaana tadaawaajui tödöödö jäcä. Töwö tameedä öwö weichö necammajä’a’de äwwäiñe, tameedä taadawaajui mmaja. Mädääjatooje dea määdhä Tíiquico adöiñaiñe wanonta, tameedä ñaa weichö odhoowanääcäiñe yeichö wetä, äjäädu’täneichomooje mmaja.

²³ Tameedä quedeiyentecoomo wwä täncanoode’da yeicho’como yei’she wa, wä’jummanä mmaja, ecamjödö mmaja, Cumöötoncomo Wanaadi nutuudu, Cädhaajotoncomo Jesuuquidiito nutuudu mmaja.

²⁴ Wanaadi nutuudu aashichaato yei’she wa dea tameedä wä’jummanä töwaatamemjönö que Cädhaajotoncomo Jesuuquidiito jummannamo wwä. Amén.