EUJEESIYO 5 - Wanaadi A'deddu

Wanaadi sotoi weicho’como

¹ Wanaadi nönge aweichöcoomo encano’tätääcä, iiñacoomo imjummadööje aweijäcäiñe.

² Wä’jummanä ’je eichäcä, Quidiito cujummatäänedööje mmaja. Töwö saaquidiijiisiyooje cönä’tui cöjääcäinchädäiñe, oweeja nnedö’cä töweiye naichöje. Yää yä’tu’jödö Wanaadi wacö’je cönä’jaacä, Wanaadi wwä u’ajä caadono ijoodö töweiye naichöje.

³ Eduuwa Wanaadi jadoncomooje aweichomjäcä masuuduichanä jäcä a’deujai’cha jadä’jödöödä maato, anejja chäänöngemjönö jäcä mmaja, ane’cä’cä ijummadö jäcä töwäätätäädä weiñä jäcä mmaja.

⁴ Nossajaato jäcä’da adha’deutäcä, töjaado’joone töshiiye wa’deunä jäcä’da mmaja, conemjönö ai wääjanä jäcä’da mmaja; dötä’da na mädä. Wanaadi wwä aashicha wa’deunä mmaane äntaiñe ija’canö’jojai maato.

⁵ Odhoowanääcäiñe na masuuduijato, conemjönö tödöönei mmaja, ane’cä’cä jäcä töwäätätäädooto mmaja, Quidiito jataacäi täjai’cha yeichö, Wanaadi jataacäi täjai’cha mmaja; yää ane’cä’cä ijummadö jäcä töwäätätäädä weiñä chu’taajä ijummadö wa’cä dea na.

⁶ Anejja mma adhencu’tätäi’che töwäätunnäi iiña mmädooto que; tameedä mädä wime’cu’täichö jo’tädööje Wanaadi woijemjöncomo nätä’maminchajaato’de chäwwä.

⁷ Yääje yeijäcä ñanno yääja’como jädäiñe meichäi’che.

⁸ Jenaadä änwanno mä’ja’quene tööjano’taca; eduuwa mmaane tawaanato aca maato Cajiichaana jadä aweichöcoomo jäcäinchädä. Yääje yeijäcä tawaanato acancomo nönge deaane eichäcä.

⁹ Yää tawaanato aca weiñä nä’dhe’ma ta’cwaiñe weiñäje, chäänöngatooje mmaja, aashicha weiñäje mmaja.

¹⁰ Äwwäiñe Cajiichaana a’cwaimatoojo jäcä oowanoomatääcä.

¹¹ Tööjano’tacancomo nödöödö mma männötäi’che änwanno, yää döneijönö; täcaademe’jo mmaane ecaademe’jotääcä.

¹² Yää tacaade’da tönnöe weneenetoodö jäcä wa’deunä’jödö jadäädä jöije na.

¹³ Tawaanato necaademeecödö tacaade nä’döa yaawä, yää tawaanato tameedä tacaade tödööjoneiñe yeiyajä.

¹⁴ Yääje yeijäcä edääje wä’dönä nai: Ä’jäcä amäädä wetuujato; aanöncä awäämaajo jonno, Quidiito aweijoiye yaawä; quee.

¹⁵ Yääje yeijäcä odhoowadäädäiñe eichäcä aweichöcoomo jäcä; towaanojo’nemjöncomo nönge’da eichäcä, towaanojo’na’como nöngeene.

¹⁶ Anooto mma mämmacuudatäi’che, weiñä conemjönö acaane cöweiya’como.

¹⁷ Tämje’daiñe eichäcä; Cajiichaana woijato odhoowanääcäiñe yeichojo encano’tätääcä.

¹⁸ Ä’dacu’da eichäcä; yääje weiñä wecoone’manä nejoodöja. Epíiditu Santo jäduudu ’jeene eichäcä.

¹⁹ Änwannoje dea Cajiichaana jäcä töwa’deujä’e eichäcä, chäwwonooje töweecanta’ñä mmaja, saadomo jäcä, anejja wecanta’ñotoojo jäcä mmaja; aashicha Cajiichaana miya’deme’täiye, adheewanööcomo jadäädä.

²⁰ Cädhaajotoncomo Jesuuquidiito eetö joi aweichöcoomoje aashicha adha’deutäcä Cumöötoncomo Wanaadi wwä, tameedä äjääcäiñe töweeja’dä’e weneenedö jäcä.

Quedeiyente weicho’como

²¹ Äwwäädäiñe ä’tutääcä, Wanaadi tönnontä aweijäcäiñe.

²² Ñäädä töiñocaato töiño woije eijai ña, Cajiichaana Jesuuquidiito woije weiñä wa’cä deaane.

²³ Dhanwa wodi ju’jäje na, Quidiito quedeiyentecoomo ju’jäje naadöje mmaja. Quidiito dea quedeiyentecoomo Ewaanacaaneichomooje na dea, ñanno chääjöje naatoodö.

²⁴ Quedeiyentecoomo Quidiito woije naatoodöje mmaja töiñoca’como töiñonootoncomo woije eijai ñaato dea ya’deuwödööcomo waadäi.

²⁵ Ñäädä tö’dhato töjiiñamo ijummajai ña, Quidiito quedeiyentecoomo cumjummaichodööje mmaja, chääjäcäinchädäiñe töwä’tudu jonaane.

²⁶ Töwö Quidiito cönä’tui quedeiyentecoomo shoomadööcomo wetä, tuna que choccadööcomo que, ta’deddu que choccadööcomo que mmaja.

²⁷ Yaawä töwö Quidiito towaadäädä quedeiyentecoomo nödööaato’de aashicha yeichöcoomo ’je, conemjönö ’je’da mmaja, chäänöngemjönö ’je’da mmaja, tameedä yää nöngato ’je’da mmaja, tösoomaiñeene, chäänöngeiñe mmaja.

²⁸ Mädääje mmaja tö’dhato töjiiñamo ijummajai ña dea, töwä’jummadö nönge dea. Ñäädä töjiiñamo ijummanei töwwäädä nä’jumma.

²⁹ Töwwäädä ä’quiiñemeecö’da weiñä nai; töwä’jumma’cä mmaane nä’jumma, töwäädai’chä dea. Mädääje mmaja Quidiito quedeiyentecoomo tönnöeiñe weneeneto,

³⁰ täjööje yeichomjäcä. Cönwanno ñanno chääjö jäcoono, ijuunuja’como, ye’jäja’como mmaja.

³¹ Edääje Wanaadi a’deddu imennaajä nä’döa: “Yääje yeijäcä dhanwa tumö shancwajai ña, senö mmaja, töjiiñamo jadä töwä’dödö wetä. Yaawä aacä töweichaameiñe tooniño nönge naato’de;” quee nä’döa imennaajä.

³² Sö’jato mädä, owaanojöönö’jödö mmaja. Mädä wecamma Quidiito jadä quedeiyentecoomo weichö ecammancädä.

³³ Yaawääne adheecammancädäiñe mmaja mädääje nä’döa dea. Änwanno tö’dha’como, awaadäiñe ajiiñanto’como ijummatääcä, äwä’jummadööcomo wa’cä dea; wodiiñamo mmaja töiñonootoncomo niñontä’ña’to.