EUJEESIYO 4 - Wanaadi A'deddu

Epíiditu Santo ni’wa’tädö que töwoojodööe cöweichöcoomo

¹ Yääje yeijäcä edääje mänwätuujaato, öwö Cajiichaana jo’tädööje jedeesojaato: Chäänönge eichäcä, Wanaadi na’dejjadö weichö nöngeene, ña’dejjadööne aweiya’como.

² O’jodhe chö’tajäätö’da eichäcä, soto jäcäiñe jäduuje’da mmaja; aashicha ä’shinchätääcä; ta’cwaiñe eichäcä ääjäcä, äwä’jummancädäiñe.

³ Epíiditu Santo ni’wa’tädö que aata’deucwe aweichöcoomo encano’tätääcä aweichöcoomoje, ääweichacoonoje aweiyancädäiñe.

⁴ Tooni chääjö na, tooni mmaja Epíiditu Santo, tooni mmaja onwomoocödööcomo, yää äwwoncomooje yeichö wetä Wanaadi adha’dejjatäänedö.

⁵ Tooni ña Cajiichaana, tooni cöneecamjödööcomo, tooni wautisaaje wä’döjoonä;

⁶ tooni mmaja Wanaadi, ñäädä tameedä Cumöötoncomooje naadö. Töwö tameedä o’jodhe na, tameedä yeichö wa’cä mmaja, tameedä cötaacaiñe mmaja.

⁷ Cöwaadäiñe cönä’tui cöweicho’como, Quidiito nutuudu woije.

⁸ Yääje yeijäcä edääje Wanaadi a’deddu imennaajä nä’döa: Caju ña töwäncudaawä töjaadä cönaadoicho ñanno jedeesoja’como; täjemjönö cuntui soto wwäiñe; quee imennaajä nä’döa.

⁹ ¿Aaquene töwä’dö’se yeichö mädä “caju ña töwäncudaawä”, quee ’ja? Edääje töwä’dö’se yeichö: Töwö cönä’täi awa’de nono nwacäi, cawä töwäncudu wetä yaawä, quee.

¹⁰ Ñäädä cönä’täichö dea cawä cönäncui chea tameedä caju ejoodhe, tameedä yeichö wa’cä töweichö wetä.

¹¹ Töwö Quidiito cöwaadaiñe cuntui cöweicho’como; anejjacoomo wwä cuntui anonta’comooje yeicho’como, anejjacomo ’quene Wanaadi nutuudu woije ecammajä’nnamooje yeicho’como, anejjacoomo ta’deddu adännamooje, anejjacoomo quedeiyentecoomo es’e’tännamooje, owaanomannamooje mmaja.

¹² Mädääje töwö Quidiito tösootoi wetaadawa’cajooto’como cuntui, chäänönge yeichöcoomo wetä tötaadawaajuichomo tödöödö jäcä, aashicha quedeiyentecoomo i’wa’tädööcomo wetä mmaja chäwwäiñe, ñanno Quidiito ejööje naatoodö.

¹³ Mädääje tameedä cönwanno äänönge ä’döjai caato cöneecamjödööcomo jäcä, Wanaadi nnedö cowaanäcäiñe cöweichöcoomo jäcä mmaja. Yaawä chäänönge yä’döaajä töweiye naichöje eijai caato, chäänönge Quidiito weichö nönge mmaja aatö’näjai caato dea.

¹⁴ Mudeeshi’chä nönge eijai’cha caato eduuwa, aneene’jutu’da’da; wätunnä waadäi ataadojoojai’cha caato dea, jejeichä nemannäjöödö töweiye naichöje. Ñanno wätäncu’tänä jäcä towaanojo’na’como wwäiñe ätäncu’tojoojai’cha mmaja caato dea, ñanno chäänöngemjönö ai cadä’seiñe weneenetoodö.

¹⁵ Edääjeene eijai caato, chäänönge a’deujai caato cöwä’jummancädäiñe, Quidiito jadä cöwaatö’näjöödöcoomo wetä tameedä cöweichöcoomo jäcä. Töwö Quidiito cuju’jocoomoje na.

¹⁶ Töwö yoije chääjö tojoodöjo na; tameedä chääjö jäcoono tojoodöjoojä’e na chu’nädö que. Tameedä chääjö jäcoono chäänönge yeetadaawa’caja’jäcä aashicha chääjö naatö’nä’a yaawä; wä’jummanääje adai’jä nä’döa.

Quidiito nutuudu eduuwaato weiñä

¹⁷ Yääje yeijäcä edä wecammaadö Cajiichaana woije mänwätuujaato: Änwanno Wanaadi dhowaanojöncomo nönge eijai’cha maato eduuwa, ñanno tötö’tajäätödööcomo chäänöngemjönö woije weneenetoodö.

¹⁸ Tönwanno chö’tajäätödööcomo tötööjannä’ca na. Töwäätuujacoone’da töweichöcoomo woije towaanojo’ne’da naato; yääje yeijäcä Wanaadi weichö ’je’da naato.

¹⁹ Tönwanno ijöichöcoomo ’je’da na. Tönwanno töwä’tue naato conemjönö wwä, töwäätätäädä töweichöcoomo que aneejejaiñene’jödöödä conemjönö tödöödö wetä töwwäiñe.

²⁰ Änwanno mmaane mädääje’da Quidiito jäcä moowanoomatääne.

²¹ ¿Chäänönge jönca chääcadö metaatäne? ¿Chäwwä jönca moowanoomajootäne chäänöngato jäcä, yää Jesuuquidiito jadä weiñä jäcä?

²² Jenaadä awei’jocoomo e’nomjatääcä, yää tujuunu nijummadö tödöödö. Yää jenaado’jä weiñä töweecone’ma na; töwäätäncu’tojo na dea conemjönö tumjummadö que.

²³ Töweecamjiyaacaane eijai maato ätö’tajäätödööcomo jäcä, aweichöcoomo jäcä mmaja.

²⁴ Eduuwaato weiñä äwwäiñe tödööjai maato, yää Wanaadi nijummadö woije tödööajä naadö. Yääje weiñä nääneja chäänöngato tödöödö que, aashichaato tödöödö que mmaja.

²⁵ Yääje yeijäcä juutuje’da eichäcä eduuwa; tameedä na’deuwö’ña’to chäänöngato que töweichacoono wwä, yää dea ejööje cöweiya’como.

²⁶ Äwäätömaadawäiñe conemjönö männötäi yää e’nei. Töwäätömaadä mma ano ñadäädoto mämja’do’jotäi’che.

²⁷ Äwwadäädäiñe odo’sha we’tojo mma männötäi’che.

²⁸ Ñäädä tämeenato’jödö tämeene’da nei’ñojo eduuwa; töweetadaawa’cajoone netaadawa’cajo’ñojo. Tamäädö que tadaawaaju aashichaato nödö’ñojo, chäwwä töweiye yeichö wetä yaawä a’ca’como wwä tu’emö.

²⁹ A’deu conemjönö mma äntaiñe mämja’canö’jotäi, aashichaato dea mmaane, ’wa’tänei chea mmaja, wa’deutojo cu’nädö awä mma, tameedä etannamo aashicha etaiyeto.

³⁰ Wentumje mma Epíiditu Santo männöjootäi, ñäädä Wanaadi jonnoto we’ajä. Ñäädä Epíiditu Santo que mä’madaaca’ñojootäne Wanaadi sotoije aweichöcoomo adheene’ju’to’comooje, äwääwanaacadööcomo chäänönge yä’dödö wa’cä.

³¹ E’nomjatääcä tameedä wä’tu’de’tänä, tääde’cwade weiñä mmaja, wätäccujä’nä mmaja, töwäätöma’se weiñä mmaja, wata’de’tänä mmaja, tameedä anejja conemjönö mmaja.

³² Ta’cwaiñe mmaane eichäcä ääjäcä, wentumje äneetä mmaja; ajimmotoncomo cone’nadiiyö encwanno’jotääcä, Wanaadi ocoone’nadiiyöcoomo cönencwanno’joichöje mmaja, Quidiito jäcäinchädä.