EUJEESIYO 3 - Wanaadi A'deddu

Judhíojöncomo wwä ecammajä’neije Paudo wei’jödö

¹ Yääje yeijäcä öwö Paudo Wanaadi wwä ya’deuwa; öwö jedeesoje wa äjääcäinchädäiñe, änwanno judhíojöncomo, Jesuuquidiito töneecanö’e weichö jo’tädööje.

² Änwanno odhoowanääcäiñe nichö’ta Wanaadi wwä yaanontä’jödö äjääcäinchädäiñe aashichaato wätunnä ecammajä’neije; töwö yääje yöödöne aashicha töweichö woije.

³ Töwö Wanaadi öwwä cöneenejoi yää owaanojöönö’jödö, chääjäcä joojede’da’cä wimennäichö.

⁴ Yää a’de’ta’jäcä äwwäiñe odhoowanääcäiñe eijai ña yaawä Quidiito jäcä owaanojöönö’jödö yoowanääcä yeichö.

⁵ Yää owaanojöönö’jödö jenaadä täneejo’da cönä’jaacä soto wwäiñe. Eduuwaane Wanaadi woije Epíiditu Santo yää cöneenejoi aashicha’como anonta’como wwäiñe, Wanaadi wa’deuwödö ecammannamo wwäiñe mmaja.

⁶ Edä yää owaanojöönö’jödö: Aashichaato wätunnä ecammajäätödö que ñanno judhíojöncomo naato eduuwa Wanaadi nutuudu eiñamooje, judhío naatoodöje mmaja. Tönwanno judhíojöncomo naato dea yää dea ejööje mmaja, Wanaadi necamma’jödö enennamooje töweiyaamoje mmaja, yää Jesuuquidiito jäcäinchädä cöneecammaichö.

⁷ Yääje eijaichojöönö wa’cä weichaame töwö Wanaadi yöödöne aashichaato wätunnä ecammajä’neije, töwö töjäädudu woije.

⁸ Tameedä Wanaadi sotoi o’näiñe wa; yääje yeichaame Wanaadi mädä taadawaajui cuntui öwwä, judhíojöncomo wwäiñe ecammajäätödö wetä öwwä Quidiito nödöödö aashichaato, yäätonno ’jemjönö.

⁹ Wanaadi yaanontäne tameedä soto wwäiñe ecaademeecödö wetä töwwä tödöötojo yää owaanojöönö’jödö. Yää owaanojöönö’jödö numa tacaade’da cönä’jaacä, Wanaadi woije dea, ñäädä tameedä tödöönei’jödö.

¹⁰ Wanaadi mädä cönnöi quedeiyentecoomo jäcäiñe aneejejaiñene’jödöödoto tösejjedö ecaademeecödö wetä tameedä caju ñancomo cajiichaanacoomo wwä, jäduuja’como wwä mmaja.

¹¹ Wanaadi yääje cönnöi jenaadä töntö’tammecö’jödö woije, yää Cädhaajotoncomo Jesuuquidiito ai cönnöichö.

¹² Quidiito jadä cöweichomjäcä, töneecanö’e cöweichomjäcä mmaja, tösaade’da Wanaadi wwadäädä täjai caato.

¹³ Yääje yeijäcä yääje wä’döa äwwäiñe, ejääduqueejö’da eichäcä mädä äjääcäinchädäiñe wäntunaanö’aadö e’nei, aashicha ayöödöto’comoone yeiyajä.

Quidiito cujummatäiñe yeichö

¹⁴ Yääje yeijäcä Cädhaajotoncomo Jesuuquidiito umö wwadäädä tä’mudhe wä’döa, ya’demeecödööje.

¹⁵ Töwö choojoi tä’tä naato tameedä edä nono de’wono wä’jimmä’tädö, caju ñancomo wä’jimmä’tädö mmaja.

¹⁶ Wanaadi wwä we’ca’a töwwä aashichaato naadö que odo’tadööcomo wejäädu’totoojo Epíiditu Santo ai, ñäädä Wanaadi jonnoto we’ajä.

¹⁷ Yaawä ecamjödö jäcäinchädä Quidiito ätö’tajäätödööcomo aca eijai ña, jäduuje aweichöcoomo wetä yaawä wä’jummanä jäcä, dee tömiichato töweiye naichöje.

¹⁸ Yaawä änwanno tameedä quedeiyente jädäiñe odhoowanääcäiñe eijai ña täjuujiñe yeichö Quidiito cujummatäiñe yeichö, nuwe yeichö mmaja, sö’je yeichö mmaja, cawä yeichö mmaja.

¹⁹ Yääje yeijäcä odhoowanääcäiñe yei’she wa Quidiito cujummatäiñe yeichö, tameedä jeene cowaanäcäiñe tödööjai’cha cöweichaameiñe. Mädääje na; tameedä Wanaadi weichö ’je awei’sheiñe wa.

²⁰ Töwö Wanaadi töjäädudu cötaacaiñe naadö que tödööjai ña tameedä cöne’catäädöcoomo e’jodhe, cöntö’tammecöödöcoomo e’jodhe mmaja.

²¹ Quedeiyente jäcäinchädäiñe, Jesuuquidiito jäcäinchädä mmaja, Wanaadi aashicha wa’deutojooje na, yeichöödäje. Amén.