EUJEESIYO 2 - Wanaadi A'deddu

Aashicha Wanaadi weichö woije töwääwanaaca cöweichöcoomo

¹ Wanaadi aweichöcoomo cuntui Quidiito jadä, ocoone’nadiiyöcoomo awä töwääma awei’jocoomo weichaame, yää conemjönö

² tönnöe mä’ja’quennö. Yaawä edä nono de’wono woije tönnöe mä’ja’quene; odo’sha edhaajotoncomo woije töweiye mä’ja’quene, ñäädä jejeichä äiño wäämannäjöödö, Wanaadi woijemjöncomo ijäädu’täneichomo.

³ Tameedä ñaa mmaja mädääje töweiye ñaa cönä’ja’dea. Cumjummadööcomo woije töweiye cä’ja’quene; cujuunucoomo nijummadö woije mma tönnöe cä’ja’quene, cötö’tajäätödööcomo woije mmaja. Yääje yeijäcä Wanaadi wwä töwäätä’maminchajaamoje cä’ja’quene, anejjacoomo soto naatoodöje mmaja.

⁴ Yääje yeichaame töwö Wanaadi wentumje äneetä töweijäcä, jooje cujummatäiñe töweijäcä mmaja,

⁵ cöweichöcoomo cuntui Quidiito jadä, cöcoone’nadiiyöcoomo awä töwääma cöwei’jocoomo weichaame. Aashicha Wanaadi weichö woije töwääwanaaca maato.

⁶ Töwö Wanaadi cadoncatääne dea Jesuuquidiito jadä; chääjadä cajiimajootäne dea caju ña.

⁷ Yää cöjääcäiñe töwö cönnöi yeichöödäje eneejodö wetä cujummatäiñe töweichö, Jesuuquidiito jäcäinchädä cöjääcäiñe ta’cwaiñe töweichö mmaja.

⁸ Aashicha Wanaadi weichö woijeene töwääwanaaca maato, ecamjödö que, änwanno aashicha aweichöcoomo jäcäinchädä’da, Wanaadi nutuudu woijeene.

⁹ Tödöödö jäcäinchädä’da wääwanaacanä töweiye nai; yääje yeijäcä anejja o’jodhe chö’tajä’jai’cha na mädä jäcä.

¹⁰ Cönwanno caato Wanaadi nödöödöje; Jesuuquidiito jadä cöwä’dödööcomo que töwö cödöötäne aashichaato tödönnamooje, jenaadä töwö cöntö’tammecöichöje dea.

Quidiito jäcäinchädä ääweichacoonoje cöweichöcoomo

¹¹ Yääje yeijäcä änwanno judhíojöncomo, ätö’tatääcä jenaadä awei’jocoomo jäcä. Judhíoje’da aweichomjäcä ñanno judhío siicunsidaadojemjöncomooje adhe’tätäiñe cönä’ja’to. Tönwanno mmaane siicunsidaadoja’comooje yäätä’tädööcomo weneene, yää täjööcomo jäcä tönnöe weneenetoodö jäcäinchädä.

¹² Yaawä Quidiito jadä’da mä’ja’quene. Töudäje mä’ja’quene, Iisadaaediita jadäiñe’da. Odhoowanääcäiñe’da cönä’ja’dea weichojo, yää Wanaadi necamma’jödö. Edä nono de’wä mä’ja’quene onwomoocödööcomo ’je’da, Wanaadi jadä’da mmaja.

¹³ Eduuwa mmaane Quidiito jadä äwä’dödööcomo que änwanno amoincha’como’jödö amoinche’da maato, Quidiito wääma’jödö jäcäinchädä.

¹⁴ Töwö Quidiito ääweichacoonoje cödööneichomo’jödööje na. Aacä iju’jä cöweichöcoomo jonno töwö cojoodöjootäne, judhío, judhíojöncomo mmaja, tooni iju’jä mma cöweichöcoomo wetä. Töwö cöneemai cöneejontäneichomo’jödö, yää äätu’dedööje cöwei’jocoomo.

¹⁵ Töwäämadö que Quidiito cönaacoichajoi waanontänä imennaajä, yää töwaanontäämöje cönä’ja’dö. Töwö töjaadonooje cönnöicho ñanno aacä iju’jä cönä’ja’todö, judhío, judhíojöncomo mmaja; tooni iju’jä mma cönnöicho. Mädääje töwö ääweichacoonoje cönnöicho.

¹⁶ Cuduusa jäcä töwäämadö que töwö Quidiito cönaacoichajoi yää äätu’dedööje yei’jocoomo ñanno judhío, judhíojöncomo mmaja; töwö Wanaadi jadä ääweichacoonoje cönnöicho, tooni iju’jä mma cönnöicho.

¹⁷ Töwö Quidiito cöneejä aashichaato wätunnä ecammajä’neije, yää äätu’dedööje’da weiñä jäcä ecammajäätödö. Töwö yää cöneecammajäätöi äwwäiñe, änwanno amoincha’como’jödö; judhío wwäiñe mmaja cöneecammajäätöi chea, ñanno amoinchemjöncomo.

¹⁸ Tameedä cönwanno, judhío, judhíojöncomo mmaja, Quidiito jäcäinchädä täjai caato Cumöötoncomo wwadäädä, ñäädä dea Epíiditu Santo ni’wa’tädö que.

¹⁹ Yääje yeijäcä anejjacoomoje’da maato eduuwa, töjaataquemjöncomooje’da mmaja. Yää jataawoncomooje dea maato, tameedä Wanaadi sotoi naatoodöje mmaja; Wanaadi sotoi jimmäje maato eduuwa.

²⁰ Maa amääajä töweiye naichöje maato; änwanno tösö’ma maato anonta’como necammajäätö’jocoomo de’wä, Wanaadi wa’deuwödö ecammannamo’jödö necammajäätö’jocoomo de’wä mmaja, maa a’täi ye’wä shö’madö töweiye naichöje. Jesuuquidiito mmaane anno’tojooje na, yää täju tameedä chä’sejöije töweiye naichöje, täju que maa amäädawä.

²¹ Quidiito woije tameedä maa tojoodöjo na; yää adai’jä nataamäa Cajiichaana weichojo aashichaatoje yä’dödö wetä.

²² Änwanno mmaja Quidiito jadä aweichomjäcä Epíiditu Santo ni’wa’tädö que tameedä anejjacoomo jadä tojoodöjo maato Wanaadi weichojooje.