EEWEDEO 9 - Wanaadi A'deddu

Wanaadi weichojo amääajä jäcä ecammajäätödö

¹ Yää awa’deeto’jä weiñä ecammaajä Wanaadi wwä tödöötojo cöneecammaacä. Yaawääne’, yääje weiñä cönä’jaacä edä nono de’wono Wanaadi weichojo taca tödööemö mma.

² Edääje yää Wanaadi weichojo amääajä cönä’jaacä: Aacä acä’jaajä cönä’jaacä. Awa’deeto acä’jaajä taca cönä’jaacä adhaawa a’täi, meesa mmaja, uu tödööajä a’täi. Yää uu cönä’jaacä Wanaadi neneedöje tödööajä. Yää acä’jaajä eetö cönä’jaacä Aashichaatoje.

³ Yää ’jejaato acä’jaajä nejoonö ncadheedä cönä’jaacä anejja weichojo mmaja. Yää eetö cönä’jaacä Aashichaato Jaiñooneje.

⁴ Yää taca cönä’jaacä juu shimi’jotoojo yau’cwatoojo, oodo döaajä. Jatuuwa mmaja yää taca cönä’ja’dea, oodo que inchaiñantaajä tameedäädä. Yää jatuuwa aca cönä’jaacä ädiiñä, oodo döaajä, ädeeja ewöötö, Aadón e’sejöi’jödö mmaja, yää cönaadetaichö. Täju mmaja yää jatuuwa aca cönä’ja’dea, Wanaadi necamma’jödö imennaajä a’täi.

⁵ Yää jatuuwa de’wä cönä’jaacä queeduwiine cu’ta’como, ñanno Wanaadi amoodedö, Wanaadi yäätä yeichö cu’tädööje. Ñanno chu’ta’como tajäi’saichomo que jatuuwa a’dutu cönnejonta’to, yää conemjönö choccajootojo saaquidiijiisiyo dötoojo. Mädä jäcä sö’je jeene a’deujai’cha caato eduuwa.

⁶ Yääje choonecaajä döiña weiñäje ñanno Wanaadi wwä töwa’deuwaamo töwoomonge weneeneto Wanaadi weichojo awa’deeto aco’jo’jödö taca, tötaadawaajuichomo tödööe.

⁷ Yää ’jejaato aco’jo’jödö taca mmaane chäädhajootoncomo mma töwoomonge weneene, tooniye mma wedu waadäi. Munu dha’me’da’da töwoomonge weneene, conemjönö tönnö’jödö choccajootojo, soto nödö’jocoomo choccajootojo mmaja.

⁸ Yää que Epíiditu Santo nene’ju’ja Aashichaato Jaiñoone taca womonto’me’da yeichö, awa’deeto aco’jo’jödö yäätä yeichö wadaadäädä.

⁹ Tameedä yää na eduuwa weiñä naadö cu’tädööje. Yää yäätä Wanaadi wwä u’ajä töwä’tue weneenedö, saaquidiijiisiyo tönnöe weneenetoodö mmaja, u’nei’jödö tö’tajäätödö choonecaajai’cha na.

¹⁰ Yääje weiñä töweiye na äwanshi choonecaadö jäcä mma, wocö choonecaadö jäcä mmaja, wataamoichanä jäcä mmaja. Tameedä yää na ye’wono que mma tödööemö. Yää tödööemje cönä’jaacä Wanaadi wwä inwacaamatoojo cu’nädö aca tödööene mma.

¹¹ Eduuwa mmaane Jesuuquidiito töwe’e na. Töwö na Wanaadi wwä töwa’deuwaamo edhaajotoncomooje, mädä aashicha weiñä naadö tödööneije. Töwö cönoomomöi Wanaadi weichojo neene taca, Aashichaato Jaiñoone taca, soto namäädöcoomojöönö, edä nono de’wonoojönö mmaja.

¹² Chiiwo aquiiyö dha’me’daane yää taca Jesuuquidiito cönoomomöi, jaaca nnedö’cä aquiiyö dha’me’da mmaja, töwö taquiiyö dha’meene. Töwö Jesuuquidiito cönoomomöi yää Aashichaato Jaiñoone taca tooniye mma, yeichöödäje yeichö wetä. Mädääje töwö cöneejodöi cöwääwanaacato’como yeichöödoto.

¹³ Chiiwo aquiiyö tönnöe weneeneto tamoichaamo encu’shiimatoojoje; jaaca aquiiyö mmaja, jaaca nnedö’cä yau’cwaajä wedennäi mmaja yää dötoojoje tönnöe weneeneto dea. Yää tönconeeca weneene ñanno soto, tönaamoicha weneeneto dea, ye’wono mma.

¹⁴ Dha’daane Quidiito aquiiyö, jäduuje’cä jeene yää; cötö’tajäätödööcomo jaiñoone choccajai ña, wäämatoojo ännö’da cöweichöcoomo wetä, Wanaadi nudooto anoonöjeene cöweichöcoomo wetä. Töwö Quidiito yeichöödoto Epíiditu Santo woije Wanaadi wwä cönä’tui saaquidiijiisiyo chäänöngatooje.

¹⁵ Yääje yeijäcä töwö Jesuuquidiito na eduuwaato weiñä ecammaajä tödööneije. Quidiito wääma’jödö weijäcä töweiye na eduuwa conemjönö choccatoojo, yää awa’deeto’jä weiñä cönä’ja’dawä soto cönnöichodö choccatoojoje. Yääje yeijäcä ñanno Wanaadi na’dejjadö wwäiñe ä’tujai ña yää töwaatamemjönö tu’emö, chäwwäiñe Wanaadi cöneecammaichö dea.

¹⁶ Soto wwä jajeeda jäcä imenna’jäcä naadö naane’ töwääma’jäcä soto wwäiñe tödööemö; yääma’jäcä jeene yää immennä’jödö woije tödööjai ñaato yaawä ñanno soto.

¹⁷ Nudä dea yeichö mmaane yää immennä’jödö ä’döjai’cha na, yääma’jäcä jeene.

¹⁸ Yääje yeijäcä yää awa’deeto’jä weiñä mmaja wääma’jä que dea cöneiyacä.

¹⁹ Tameedä waanontänä imennaajä Moisé cöneecammajäätöi tameedä soto wwäiñe. Yää ’jeje camiisha seweichato mmaja, isoopo adö mmaja cöneedhemmai jaaca nnedö’cä aquiiyö que, chiiwo aquiiyö que mmaja, tuna jadä oimaajä. Yää que Moisé jajeedä cönencu’shiimai yaawä, yää Wanaadi a’deddu imennaajä a’täi; soto mmaja cönencu’shiimaicho dea.

²⁰ Töwö Moisé cönä’döaacä soto wwäiñe: “Edä munu na äwwäiñe Wanaadi necamma’jödö chäänönge yeichö cu’tädööje, yää äwwäiñe Wanaadi cönnöjoichö;” quee cönä’döaacä Moisé.

²¹ Munu que mmaja Moisé cönencu’shiimai chea Wanaadi weichojo amääajä, tameedä chaaca tödööajä töweiye cönä’ja’dö mmaja.

²² Jenaado’jä waanontänä imennaajä wä’dödö woije munu que amoichadö töweiye cönä’jaacä. Munu we’comoodö ’je’da yeiya’jäcä conemjönö choccatoojo ’je’da na yaawä.

Conemjönö choccatoojoje Quidiito wääma’jödö yeichö

²³ Mädääje na; jenaadä yää saaquidiijiisiyo tödööjätöödö tujunne cönä’jaacä yää caju ñano cu’taajä amoichatoojoje. Caju ñano neene mmaane saaquidiijiisiyo aashichaato que jeene tödööemje na.

²⁴ Quidiito cönoomomöi Wanaadi weichojo neene taca, yää soto namäädöjöönö. Yää soto namä’jödö cönä’jaacä Wanaadi weichojo neene cu’taajäje mma. Caju ñaane Jesuuquidiito cöntämä. Töwö na eduuwa Wanaadi döiña, cöjääcäinchädäiñe töwa’deuwemööje.

²⁵ Ñäädä Wanaadi wwä töwa’deuwaamo edhaajotoncomo Aashichaato Jaiñoone taca töwoomonge weneene wedu waadäi, tönaamiiñä’ca’jödö aquiiyö dha’me. Jesuuquidiito mmaane weiñäje saaquidiijiisiyooje ä’tu’da na.

²⁶ Yääje ei’jo mmaane weiñäje Jesuuquidiito äämadö cöneiyacä edä nono tödö’jödö jonnoto’jödöödä. Dha’da cönäänejoichö naane’, tooniye mma eduuwa anooto ataamejai yä’döa’jäcä. Töwö cöneejä conemjönö choccadö wetä saaquidiijiisiyooje töwä’tudu que.

²⁷ Soto wäämatoojo ecammaajä na tooniye mma, yää ’jeje yäätämmencajootojo.

²⁸ Yääje mmaja Quidiito, tooniye saaquidiijiisiyooje cönä’tui jooja’como soto cone’nadiiyöcoomo choccatoojoje. Äcuude töwö ne’a’dede sadä, conemjönö choccaneije’da yaawä, töwoomo’nenaamo ewaanacäiñeene.