EEWEDEO 8 - Wanaadi A'deddu

Eduuwaato weiñä ecammaajä tödööneije Jesuuquidiito weichö

¹ Edääje wä’dö’se weichö mädä: Cöwwäiñe töweiye na wecammaadöjaato cöjääcäinchädäiñe Wanaadi wwä töwa’deuwemö. Töwö caju ña na Wanaadi mudei yö’tä yaatajiimaajä, ämu’demjönö dö’se.

² Töwö na Wanaadi wwono wa’deuwödööje Wanaadi weichojo neene taca, yää Cajiichaana nödöödö taca, soto nödöödöjöönö.

³ Ñäädä Wanaadi wwono wa’deuwödö ewaacadö nai Wanaadi wwä u’ajä ecammaneije, saaquidiijiisiyo tödööneije mmaja. Yääje yeijäcä Jesuuquidiito wwä töweiye mmaja eijai ña dea tu’emö.

⁴ Edä nono de’wä dea Jesuuquidiito ei’jo Wanaadi wwono wa’deuwödööje’da eichö, eetä töweiye yeijäcä ñanno Wanaadi wwä töwa’deuwaamo, chäwwä u’ajä ecammannamo, waanontänä Moisé nimennä’jödö wä’dödö nönge.

⁵ Canno edä nono de’woncomo Wanaadi wwä töwa’deuwaamo caju ñano cu’tädööje mma naato. Edääje Wanaadi cönä’döaacä Moisé wwä, chäwwä töweichojo amoojooje: “Tameedä tödööcä’de jöö de’wä aweichö äwwä weneejoneedö nönge;” quee cönä’döaacä Wanaadi.

⁶ Jesuuquidiito nödööaadö mmaane canno nödöödöcoomo e’jodhe’cä na, eduuwaato weiñä ecammaajä jenaado’jä e’jodhe’cä yeijäcä, chäänönge ecammaajä que jeene tödö’jödö weijäcä.

⁷ Yää jenaado’jä weiñä ecammaajä chäänönge ei’jo mmaane tujunne’da eichö cöneiyacä anejja.

⁸ Wanaadi chäänönge’da jenaado’jocoomo cöneedantoicho. Edääje ñanno soto jäcäiñe yä’dö’jödö imennaajä na: Edääje nä’döa Cajiichaana: Aneedawä chu’nädö na’de anejjeja weiñä öwwä ecammatoojo Iisadaaeedä weichö jäcäiñe, Judhá weichö jäcäiñe mmaja.

⁹ Yää ecammadö na’de ñanno dhadai’choncomo wwäiñe wecammaneedöje’da, yaawä jämjäcä Ejiito ñanno wene’netoodawä. Yaawä tönwanno neecammadö nönge ännö’da cöneiya’to; yääje yeijäcä wetöömaneeto; quee nä’döa Cajiichaana.

¹⁰ Edääje mmaja Cajiichaana nä’döa dea: Edääje na’de Iisadaaeeda weichö wwäiñe neecammadö yää cu’nädaawä. Öwö ya’deddu wödööa’de chö’tajäätödööcomo aca, chääwanööcomo jäcä wimenna’de. Yaawä Yaanadiiyöcoomoje wa’de, tönwanno sootoije naato’de.

¹¹ Öwö jääcä töjimmotoncomo owaanomaadö tujunne’da na’de yaawä, töjaatawoncomo owaanomaadö mmaja. “Cajiichaana Wanaadi odhoowanääcä tödööcä,” quee ca’da naato’de töjimmotoncomo wwä. Tameedä soto owaanäcäiñe wa’de yaawä, täneejuquemjönö mmaja, täneejucaato mmaja.

¹² Conemjönö iiñödööcomo wencwannä’ja’de; choone’nadiiyöcoomo jäcä tö’taque’a’de; quee Wanaadi wa’deuwö’jödö imennaajä na.

¹³ Anejja weiñä ecammatoojo e’tädö que Wanaadi wwä, yää awa’deeto’jä jenaado’jäje cönnöi. Yää jenaado’jä wataamenääje na eduuwa.