EEWEDEO 7 - Wanaadi A'deddu

Mequiisedeeque wei’jödö nönge mmaja Jesuuquidiito weichö

¹ Ñäädä Mequiisedeeque cönä’jaacä Saden ñano cajiichaanai’chädööje, Wanaadi o’jodhaato wwono wa’deuwödööje mmaja. Töwö Mequiisedeeque Aawadán cöneejodöi cajiichaanacoomo e’jodheinchanei’jödö yennacaadö. Yaawä Mequiisedeeque Wanaadi wwä cöna’deuwöi Aawadán jäcä, chääjäcä aashichaato tödööjodööje.

² Ñäädä wwä Aawadán cuntui dhantai töweewänä’tädaawä töncana’ca’jödö. Edääje töwä’dö’se yeichö mädä Mequiisedeeque eetö: “Chäänönge weiñä edhaajä;” quee. Saden ñano cajiichaanai’chädööje töwö cönä’jaacä. “Täncanoode’da weiñä;” quee töwä’dö’se yeichö mädä “Saden” quee naadö. Yääje yeijäcä “Täncanoode’da weiñä edhaajä;” quee töwä’dö’se yeichö mmaja mädä Mequiisedeeque eetö.

³ Owaanäcä’da na ñäädä Mequiisedeeque umö, yeenö mmaja; yä’jimmä’tädö owaanäcä’da mmaja. Yennu’jödö owaanäcä’da mmaja na dea, yääma’jödö mmaja. Yääje yeijäcä Wanaadi nnedö cu’tädööje täcammajä’emööje na, yeichöödäjaato Wanaadi wwono wa’deuwödööje yeichö.

⁴ Eneetäcä’ma, adai’jä dämma Mequiisedeeque wei’jödö, Aawadán cadai’choncomoode cuntuichö naane’ chäwwä töncana’ca’jödö dato, yää cajiichaanacoomo töne’jodheincha’jocoomo nsomaadö’jödö.

⁵ Ñanno Dewí atöödö, Wanaadi wwono wa’deuwödööje weneenetoodö, waanontänä Moisé nimennä’jödö woije jödaata que töwääjemaajo weneeneto soto wwäiñe, töjimmotoncomo wwäiñe, Aawadán atöödöje yeichaameiñe mmaja ñanno ijimmotoncomo.

⁶ Ñäädä Mequiisedeeque mmaane Dewí atöödöje’da töweichaame täjemjönö cönei Aawadán wwonno, ñäädä chäwwä Wanaadi necamma’jödö cönä’ja’dö wwonno. Töwö Mequiisedeeque Wanaadi wwä aashichaato cönnöjoi chea Aawadán jäcä.

⁷ Mädääje na; ojodhaato to’nono jäcä Wanaadi wwä aashichaato tönnöjo töweiye nai.

⁸ Ñanno Dewí atöödö, jödaata que töwääjemaajo wecammaatoodö, töwä’ja’aamoje mma naato. Ñäädä Mequiisedeeque mmaane Wanaadi a’deddu imennaajä necamma nudooto nönge dea.

⁹ Ñäädä Dewí, tameedä dhatöödö mmaja, ñanno eduuwa jödaata que töwääjemaajo weneenetoodö, u’nnamooje daja cönä’ja’to yaawä, Mequiisedeeque wwä Aawadán cuntuichawä,

¹⁰ Aawadán nwaju’jaca dea yei’jocoomo weijäcä yaawä, Mequiisedeeque acä cönäänea’todaawä.

¹¹ Waanontänä imennaajä cönä’tui iisadaaediita wwäiñe ñanno dewiitacoomo Wanaadi wwä töwa’deuwaamoje yeichawäiñe, ñanno Aadón atöödö. Yääje yeichaame ñanno dewiitacoomo chäänönge tödööjaiñe’da cönä’ja’to ñanno soto, yää waanontänä tödönnamo. Yääje yeijäcä anejjejaato Wanaadi wwono wa’deuwödö tujunne cönä’jaacä, Aadón cönä’ja’döje’daane, Mequiisedeeque cönä’ja’döjeene.

¹² Yaawä ñäädä Wanaadi wwono wa’deuwödö wenwacaama’jäcä waanontäna mmaja cönenwacaamai chea.

¹³ Ñäädä Jesuuquidiito, chääjäcä imennaajä na’deuwaadö, anejja atöödöje cönä’jaacä, töwö dhadaichö atöödö Wanaadi wwono wa’deuwödööje ei’cha cönä’ja’to.

¹⁴ Cowaanäcäiñe na Judhá atöödöje Cädhaajotoncomo Jesuuquidiito weichö. Judhá atöödö Wanaadi wwono wa’deuwödööje yeichojo Moisé aneecamma’da cöneiyacä.

¹⁵ Wanaadi wwono wa’deuwödööje weiñä töwenwacaama yeichö cowaanäcäiñe na eduuwa anejja Wanaadi wwono wa’deuwödö töweiye yeijäcä eduuwa, Mequiisedeeque cönä’ja’döjaato mmaja.

¹⁶ Ñäädä Jesuuquidiito Wanaadi wwono wa’deuwödööje na eduuwa tadai’jödö jäcäinchädä’daane, töweichö yeichöödoto jäduudu jäcäinchädääne.

¹⁷ Edääje Wanaadi nä’döa Jesuuquidiito jäcä: Amäädä Wanaadi wwono wa’deuwödööje ma, yeichöödäje töweiyemööje, Mequiisedeeque cönä’ja’döje mmaja; quee.

¹⁸ Mädääje na; jenaado’jä waanontänä täseeca na eduuwa, jäduuje’da yeijäcä, tödööjai’cha yeijäcä mmaja.

¹⁹ Yää waanontänä, Moisé nimennä’jödö, chäänönge ännö’da cöneiyacä. Yää nwacaanoje na eduuwa aashichaato jaiñoone; yää jäcäinchädä Wanaadi wwadäädä cöötaato.

²⁰ Jesuuquidiito Wanaadi wwono wa’deuwödööje cönä’döi Wanaadi wääcammadö que.

²¹ Ñanno Wanaadi wwono wa’deuwödööje cönä’ja’todö mmaane Wanaadi wääcammadö que’da töwääwaaca cönä’ja’to. Jesuuquidiito mmaane Wanaadi wääcammadö que cönääwaacai. Edääje Wanaadi a’deddu imennaajä nä’döa mädä jäcä: Cajiichaana cönääcammai; yäätonno tötö’tajäätödö aninwacaama’da na’de: “Amäädä Wanaadi wwono wa’deuwödööje ma, yeichöödäje töweiyemööje, Mequiisedeeque cönä’ja’döje mmaja;” quee Cajiichaana wä’dödö na; quee imennaajä nä’döa.

²² Yääje yeijäcä awa’de weiñä ecammaajä cönä’ja’dö e’jodhaato’cä tödööneije Jesuuquidiito na.

²³ Ñanno Wanaadi wwono wa’deuwödööje cönä’ja’todö wanna töweiye cönä’ja’to. Tönwanno töwäämaamoje töweijäcäiñe yeichöödäje Wanaadi wwono wa’deuwödööje eijai’cha cönä’ja’to.

²⁴ Jesuuquidiito mmaane yeichöödäje Wanaadi wwono wa’deuwödööje na, töwäämamjönööje töweijäcä.

²⁵ Yääje yeijäcä töwö yeichöödäje ewaanacaajai ñaato ñanno töjoinchomo Wanaadi wwadäädoncomo wötäädö, yeichöödäje nudä töweijäcä; chääjäcäinchädäiñe töwö töwa’deuwe weneene Wanaadi wwä.

²⁶ Cöwwäiñe tujunne töweiye cönä’jaacä yääjato cöjääcäinchädäiñe Wanaadi wwä töwa’deuwemö. Aashichaato töwö, conemjönö ’jemjönö mmaja, conemjönö dönnamo jonnoto wä’sancwajaajä mmaja, tameedä caju ñancomo e’jodhaato mmaja.

²⁷ Anejjacoomo Wanaadi wwä töwa’deuwaamo anooto waadäi saaquidiijiisiyo tönnöe weneeneto, awa’deene töcoone’nadiiyöcoomo coccajootojooje, yää ’jeje yaawä soto cone’nadiiyöcoomo coccajootojooje daja. Ñanno wei’yejeiñe’da Jesuuquidiito na. Töwö dea töwä’tudaawä saaquidiijiisiyo cönnöi tooniye mma, yeichöödäje töweiyemööje.

²⁸ Waanontänä Moisé nimennä’jödö woije Wanaadi wwono wa’deuwödööje töwääwaaca weneeneto conemjönö tödönnamo mma. Yää waanontänä wä’tu’jeje töwö Wanaadi töwääcammadö que anejja cöneewaacai yaawä töwwono wa’deuwödööje, ñäädä Tönnedö, yeichöödäje chäänönge tödööajä naadö.