EEWEDEO 4 - Wanaadi A'deddu

¹ Yääje yeijäcä cowoinchadäiñe’da queichäiye, Wanaadi nutuudu wäädeetatoojo ecammaajä cöwwäiñe yeichaame mma anejja adhantawäiñe aneemaicha’no.

² Cönwanno cöwwäiñe mmaja aashichaato wätunnä cönäätäcammai, ñanno wwäiñe cönäätäcammaichöje mmaja. Yaawääne’, yää wätunnä eta’jödö ännö’daiñe cöneiyacä, aneecamjö’da yei’jocoomo weijäcä töneeta’jocoomo.

³ Cönwanno ecaanö’nnamo mmaane queejodööato yää wäädeetatoojo. ¿Edääje jönca töwö Wanaadi cönä’döaacä: Yääje yeijäcä cone’da chääjäcäiñe wä’jaaquene; tumjunne’da tö’tajä’aqueene yaawä. Edääje wä’döaaquene yaawä: “Tönwanno aneejodö’da naato’de öwö untudu wäädeetatoojo;” quee wä’döaaquene; quee jönca Wanaadi cönä’döaacä? Töwö yääje cönä’döaacä tameedä tötaadawaajui jäcä töwä’ca’jödö weichaame, edä nono tödö’jödö jonnoto’jödöödä.

⁴ Edääje Wanaadi a’deddu imennaajä nä’döa yää aacä amoojatooto anooto jäcä: Tameedä tötaadawaajui tödöödö’jo töwö Wanaadi cönäädeetai aacä amoojatooto anooto awä; quee imennaajä nä’döa.

⁵ Edääje mmaja nä’döa dea: Tönwanno aneejodö’da naato’de öwö untudu wäädeetatoojo; quee.

⁶ Yääje yeijäcä töweiye dea naato anejjacoomo, yää wäädeetatoojo ejoodönnamooje töweiyaamo. Ñanno awa’deene aashichaato wätunnä etannamo’jödö yää wäädeetatoojo aneejodö’da cöneiya’to töneeta’jocoomo woije ännö’da töwei’jocoomo weijäcä.

⁷ Yääje yeijäcä anejja anooto Wanaadi cuncu’nä’täi yaawä, mädä eduuwa caatoodö. Wanna wedu yä’döa’jäcä Wanaadi cöna’deuwöi Dawí ntai, yää imennaajä jäcä naadö wecammannö. Edääje nä’döa yää imennaajä: Eduuwa Wanaadi a’deddu eta’jäcä äwwäiñe, töwäätuujacoone’da’daane eichäcä; quee.

⁸ Iisadaaediita wwäiñe yää wäädeetatoojo Josué äntu’jo mmaane, anejja anooto Wanaadi äncu’nä’tä’da eichö cöneiyacä yää ’jeje.

⁹ Yääje yeijäcä töweiye deaane na Wanaadi nutuudu wäädeetatoojo tojoodöeemö Wanaadi sotoi wwäiñe.

¹⁰ Ñäädä Wanaadi nutuudu wäädeetatoojo ejoodönei tadaawaaju tödöödö jonno näädeeta, Wanaadi tötaadawaajui tödö’jeje cönäädeetaichöje mmaja.

¹¹ Yääje yeijäcä cä’jädu’tätäiye cönwanno, yää wäädeetatoojo ejoodödö wetä, anejja mma cantawäiñe ecoone’ma’no, ñanno aneecanö’jöncomo’jödö cöneecone’maichodööje mmaja.

¹² Wanaadi a’deddu yeichöödäje na, jäduuje mmaja, sauda ääjatooto dhejiiyajä e’jodhe seqque yeichö. Sö’je chäcä yääwaacadö cödo’tacaiñe, cötö’tajäätödööcomo tojoodöeene. Cötö’tajäätödööcomo jaiñoone nene’ju’ja, cötö’tajo’to’como mmaja.

¹³ Ane’cä’cä tödööajä ’je’da na Wanaadi wwä ootone’täjaicho. Tameedä täne na chäwwä, tacaade mmaja, ñäädä cämmencaneichomooje töweiyemö wwä.

Wanaadi wwä cöjääcäinchädäiñe töwa’deuwemööje Quidiito weichö

¹⁴ Ñäädä Jesuuquidiito, Wanaadi nnedö o’jodhaato, Tumö wwä cöjääcäinchädäiñe töwa’deuwemööje na. Töwö Wanaadi döiña cöntäma. Yääje yeijäcä chäänöngeedä queichäiye cöneecamjödööcomo jäcä.

¹⁵ Ñäädä Jesuuquidiito, Tumö wwä cöjääcäinchädäiñe töwa’deuwemööje naadö, wentumje cäneetäiñe’da’da weneene jäduuje’da cöweichawäiñe, töwö töwä’yunaacajo’jödö weijäcä mmaja tameedä conemjönö jäcä, cönwanno cäänetäänedööje mmaja; yaawääne’, conemjönö ännö’daane’ töwö cöneiyacä.

¹⁶ Yääje yeijäcä tösaade cöweiyancädäiñe’da täjai caato cujummaneichomo Wanaadi mudei wwadäädä, wentumje cäne’matäiye töwö yaawä, aashicha töweichö woije cö’wa’tätäiyede jäduuje’da cöweichawäiñe.