EEWEDEO 3 - Wanaadi A'deddu

Jesuuquidiito Moisé e’jodhe yeichö

¹ Yääje yeijäcä jimmä shooma’como, änwanno Wanaadi sotoije a’dejja’como, Jesuuquidiito jäcä ätö’tajä’täcä, ñäädä Anontaajä, cöjääcäinchädäiñe Wanaadi wwä töwa’deuwemö, ñäädä queecanö’atoodö.

² Töwö Jesuuquidiito cönä’jaacä chäänönge, Wanaadi woije, ñäädä yää tödööneije täwaacanei’jödö woije. Moisé mmaja chäänönge cönä’ja’dea Wanaadi sotoi edai’chädööcomo jäcä.

³ Moisé e’jodhe Jesuuquidiito na, maa amäänei’jödö tönaamädö e’jodhe töweiye naichöje mmaja.

⁴ Tameedä maa amäänei’jödö ’je’da’da töweiye nai; Wanaadi mmaane tameedä tödööajä tödöönei’jödööje na.

⁵ Moisé chäänönge cönä’jaacä tameedä Wanaadi sotoi edai’chädööcomo jäcä; Wanaadi anoonöje cönä’jaacä töwö. Töwö chaadawaajui cönä’jaacä äcuude Wanaadi wwä täcammaamö ecammadö.

⁶ Quidiito mmaja chäänönge na dea Wanaadi sotoi edai’chädööcomo jäcä. Yaawääne’, Wanaadi nnedööjeene töwö na, dhanoonöje mma’da. Ñanno cönwanno Wanaadi sotoi tädai’chaamo, yaatameedö jona tödööene ejääduqueejö’da cöweiya’comjäcä cöneecamjödööcomo jäcä, ta’cwaiñe cöweiya’comjäcä mmaja yää cönwomoocödööcomo jäcäinchädä.

Wanaadi sotoi wäädeetato’como

⁷ Yääje yeijäcä ätö’taque’täi’che Epíiditu Santo wä’dö’jödö jäcä, yää Wanaadi a’deddu imennaajä jäcä naadö. Edääje nä’döa yää: Eduuwa Wanaadi a’deddu eta’jäcä äwwäiñe,

⁸ töwäätuujacoone’da’daane eichäcä, ñanno jenaado’jocoomo Wanaadi jäcä cönä’jädu’toichodööje’daane, yaawä jata ’jemjönö aca töweichöcoomo Wanaadi cönooneja’todaawä.

⁹ Yäätä adhaadai’choncomo yoonejaaquento, aacä soto wedu töwwäiñe ene’jödö weichaame aashichaato tödöödö öwwä.

¹⁰ Yääje yeijäcä cone’da wä’jaaquene ñanno soto jäcäiñe. Edääje tö’tajä’aqueene yaawä: “Tönwanno chö’tajäätödööcomo tösaadijange weneene jonno; öwö woije töwei’sheiñe’da weneeneto;” que tö’tajä’aqueene.

¹¹ Yääje yeijäcä cone’da chääjäcäiñe wä’jaaquene; tumjunne’da tö’tajä’aqueene yaawä. Edääje wä’döaaquene yaawä: “Tönwanno aneejodö’da naato’de öwö untudu wäädeetatoojo;” quee wä’döaaquene; quee imennaajä nä’döa.

¹² Jimmä, odhoowadäädäiñe eichäcä, anejja mma adhantawäiñe cone’da chö’tajäätö’no, Wanaadi nudooto jonno ä’sancwajo’no yaawä aneecamjö’da töweichö woije.

¹³ Töweejädu’tääne adheejädu’tätääcä anooto waadäi, eduuwa naadawäädä, anejja mma adhantawäiñe conemjönö wwä ätäncu’täjo’no, töwäätuujacoone’da ei’ñode yaawä.

¹⁴ Cönwanno Quidiito jadoncomooje caato, yaatameedö jona tödööene ejääduqueejö’da cöweiya’comjäcä cöneecamjödööcomo jäcä, yää yaajäntä’jödö jonnoto’jödöödä queecanö’täneedö.

¹⁵ ¿Edääje jönca imennaajä nä’döaanä: Eduuwa Wanaadi a’deddu eta’jäcä äwwäiñe, töwäätuujacoone’da’daane eichäcä, ñanno jenaado’jocoomo Wanaadi jäcä conä’jädu’toichodööje’daane; quee jönca imennaajä nä’döaanä?

¹⁶ ¿Änä’camo ñanno cönä’ja’to töwwäiñe Wanaadi a’deddu eta’jödö weichaame cönä’jädu’toichodö? ¿Ñanno jönca cönä’ja’to, Ejiito ñanno Moisé nadä’jödö?

¹⁷ ¿Änä’camo jäcäiñe cone’da Wanaadi cönä’jaacä aacä soto wedu? ¿Ñanno jäcäiñe jönca, conemjönö cönnöichodö jäcäiñe, jata ’jemjönö aca cönä’jajoichodö?

¹⁸ ¿Änä’camo jäcäiñe yääje Wanaadi cönä’döaacä: “Tönwanno aneejodö’da naato’de öwö untudu wäädeetatoojo;” quee? Ñanno jäcäiñe jönca yääje cönä’döaacä, ta’deddu woije ännöjöncomo’jödö jäcäiñe?

¹⁹ Mädääje na; aneecamjö’da yei’jocoomo weijäcä aneejodö’da cöneiya’to yää wäädeetatoojo.