EEWEDEO 2 - Wanaadi A'deddu

Wääwanaacatoojo chiiñeme’jai’cha cöweichöcoomo

¹ Yääje yeijäcä aashichaane ijaanataajai caato yää wätunnä queetatäänedö jäcä, choojonno mma cösaadijanto’no.

² Yää wätunnä jenaadä Wanaadi amoodedö cöneecammajäätöichodö chäänönge cönä’jaacä. Yääje yeijäcä yää woijemjönö, ija’do’jonei’jödö mmaja, chäänönge töwäätä’maminchajo cönä’jaacä.

³ Töwaacö’je cönwanno eduuwa. ¿Aaquene cöwäätä’maminchajoodöcoomo caneemaichatäädöde’ mädä wa’coto wääwanaacatoojo chiiñeme’ca’jäcä cöwwäiñe? Cajiichaana Jesuuquidiito yää wätunnä cöneecammajäätöi awa’deene. Yää ’jeje ñanno Cajiichaana necammajäätödö etannamo’jödö chäänönge cöneecammajäätöicho dea cöwwäiñe.

⁴ Wanaadi mmaja chäänönge yää wätunnä weichö cöneenejoi ene’ju’tojo tödööjodö que, täneemö tödööjodö que mmaja, jooje aashichaato tödööjodö que mmaja, aneejejaiñene’jödöödä Epíiditu Santo utuudu que mmaja, tumjummadö woije.

Töjimmä nöngeiñe Jesuuquidiito wä’döjo’jödö

⁵ Tamoodedööjönööne Wanaadi cöne’toicho weiñä ne’a’dedö edhaamoje, yää chääjäcä ca’deuwatoodö.

⁶ Edääje Wanaadi a’deddu imennaajä nä’döa: ¿Aaquene mmaja soto jäcä mmädä tötö’tajä’e manä, amäädä Wanaadi? ¿Aaquene soto weichö mmädä tujunne äwwä nai?

⁷ A’dhe mma soto mödööne amoode o’näiñe. Aashicha wa’deutojooje mödööne; o’jodhe yeichojo mu’ne dea. Amäädä mödööne tameedä anaamode’nädö edhaajäje.

⁸ Tameedä cajiichaanaje mödööne; quee Wanaadi a’deddu imennaajä nä’döa. Wanaadi cönnöi soto tameedä tönnödö edhaajäje töweiyemööje; cho’jodhe töweiyemö ännö’da cöneiyacä, töwäädä o’jodhe soto weichö ääne’da dea naane’ cöwwäiñe.

⁹ Jesuuquidiito o’jodhe yeichö mmaane queeneaato, ñäädä a’dhe amoode o’näiñe cönä’ja’nei. Töwö Jesuuquidiito cönäämai tameedä cöjääcäinchädäiñe, aashicha Wanaadi weichö woije. Eduuwa töwö na o’jodhaatoje, aashicha wa’deutojooje mmaja, töwäntunamjö’jödö weijäcä töwäämadaawä.

¹⁰ Tameedä tödööajä naadö Wanaadi wwonooje na; töwö iiñödö dea mädä tameedä. Töwö tameedä tönnacoomo aashicha töweichö nönge dea tödö’se cönä’ja’to. Yääje yeijäcä aashicha cöntö’taacä chäwwä wäntunaanö’nä que Jesuuquidiito shoomadö, ñanno töneewanaacadö ewaanacaaneichomooje.

¹¹ Ñanno shooma’como, shoomaneichomo’jödö mmaja, ñäädä dea Yuumötoncomooje na. Yääje yeijäcä töwö Jesuuquidiito, ñäädä Wanaadi nnedö, ijöichöje’da na töjimmäje ñanno e’tädööcomo.

¹² Edääje Jesuuquidiito wä’dödö na, yää Wanaadi a’deddu imennaajä jäcä naadö: Äjääcä wecammajä’a’de jimmä wwäiñe; ye’jumma’como antawäiñe aashicha yeecanta’ña’de äjääcä; quee yä’dö’jödö na.

¹³ Edääje mmaja Jesuuquidiito wä’dö’jödö na dea: Wanaadi ecamjödööje dea wa’de; quee. Edääje mmaja aneetaja yä’dö’jödö imennaajä na dea: Eetä wa, önnacoomo Wanaadi nutuudu jadäiñe; quee.

¹⁴ Ñanno “önnacoomo” quee naadö, soto ecammancädäiñe yääje nä’döa. Yääje yeijäcä Jesuuquidiito sotooje cönä’döi, töwäämadö que wäämanä edhaajä e’jodheinchadö wetä yaawä, ñäädä odo’shaje naanei.

¹⁵ Mädääje tösaade yeichöcoomo jonno töwö Jesuuquidiito cunu’caicho ñanno töwäämadööcomo tönnontä cönä’ja’todö. Jedeeso nönge ñanno töweiye cönä’ja’to, yää töwäämadööcomo tönnontä töweichomjäcä.

¹⁶ Tamoodedö i’wa’täiñe’da Jesuuquidiito cöneejä, Aawadán atöödööne.

¹⁷ Yääje yeijäcä Jesuuquidiito tameedä töweichö jäcä töjimmä nöngeiñe mmaja töwä’döeemöje cönä’jaacä, wentumje äneetä töweichö wetä yaawä soto jäcäinchädäiñe Wanaadi wwono wa’deuwödööje töwääwaaca’jäcä, chäänönge Wanaadi owaadäädä töweichö wetä mmaja, sotoocomo cone’nadiyöcoomo choccadö wetä yaawä saaquidiijiisiyooje töwä’tudu que.

¹⁸ Töwö töwäntunamjö’jödö weijäcä, töwä’yunaacajo’jödö weijäcä mmaja, i’wa’täjai ñaato eduuwa ñanno töwä’yunaacaja’como.