EEWEDEO 12 - Wanaadi A'deddu

Jesuuquidiito ene’majai cöweichöcoomo

¹ Mädääje na; jooje naato ñanno ecamjödö ’ja’como wäänejoodö cöwwäiñe. Yääje yeijäcä cummichaatäiye tameedä cämu’däneichomooje naadö, conemjönö cashiichuudäneichomooje naadö mmaja. Chincha’da cöweiyancädäiñe cöötätäiye cäämadööcomo tai.

² Jesuuquidiito ene’mancädä queichäiye, ñäädä cöneecamjödööcomo äjäntänei’jödö, chäänönge tödöönei mmaja. Töwö Jesuuquidiito cuduusa jäcä cönäntunamjöi yääje töwäämadö ijöichancädä’da. Töwö dhowaanäcä cönä’jaacä töwäntunamjö’jeje ta’cwaiñe töweichojo, aashicha töweichojo mmaja. Yää ’jeje töwö cönaatajiimai Wanaadi mudei yö’tä, ämu’demjönö dö’se.

³ Yääje yeijäcä ñäädä jäcä ätö’tajä’täcä, ñäädä conemjönö dönnamo wwäiñe tutuushimaadö shinchänei’jödö, aquinchadööcomo queiñe, aweejäduuquejöödöcoomo queiñe mmaja.

⁴ Munu töseichajoone ä’jädu’tä’da dea maato conemjönö shinchädö jäcä.

⁵ ¿Tötö’taque’e ca maato Wanaadi wwä äwäätuujadööcomo jäcä, yää tönnedö wwä wa’deunä naichöje äwwäiñe cöna’deuwöichö? Edääje nä’döa dha’deddu imennaajä jäcä: Önnedö, mänquiiñemeecöi Cajiichaana wwä äwäätuujadö. Chäwwä acuuseijadaawä mmaja ejääduqueejö’da eichä’de.

⁶ Cajiichaana tumjummadö niyäätuuja; tameedä tönnedööje töne’tädö töwö nichuuseija dea; quee Wanaadi a’deddu wä’dödö na.

⁷ Töshinchääne shinchätääcä Wanaadi wwä äwäätuujadööcomo. Töwö Wanaadi mädääje ayöödöaato tönnacoomoje aweijäcäiñe. ¿Änääcö tönnedö änwätuuja’da töweiye nai?

⁸ Äwäätuujatäiñe’da Wanaadi weiya’jäcä, tameedä tönnacoomo tönnöeiñe weneenedööje, tuncato töweiye naichöje’da maato yaawä; masuuduicha’jä nönge mma eijai maato yaawä, tunquemjöncomo nönge mma.

⁹ Tameedä cönwanno mude’cä’cäje cöweichöcoomo cöwäätuujaneichomo töweiye cönä’ja’to ñanno cumöötoncomo edä nono de’woncomo. Ñanno tönoiñe töneene cä’ja’quene. Töwaacö’je Cumöötoncomo caju ñano wwä ä’tujai caato, cöweicho’como töweiye yeichö wetä yaawä.

¹⁰ Ñanno cumöötoncomo edä nono de’woncomo a’dhe mma cöwäätuujaneichomooje cönä’ja’to, töwwäiñe chäänönge chö’tadö woije mma. Wanaadi mmaane cöwäätuujaato chäänönge jeene cöweichöcoomo wetä, aashicha cödöödöcoomo wetä mmaja, töwö tönönge mmaja.

¹¹ Wä’wätuujanaawä mma aashicha’da chö’tadö, se’ne mma. Äcuude’cääne yää nä’dhe’ma yaawä aashichaatoje, täncanoode’da weichojooje mmaja, yääcato wäämu’ca’como jäcäiñe.

Wanaadi a’deddu chiiñemeecödö tönoiñe yeichö

¹² Yääje yeijäcä awaajä’su’ta’como ijäädu’tätääcä, ojoode’su’ta’como mmaja;

¹³ sha’duminchatääcä adheemadööcomo. Yaawä ye’tomongajä e’tomoncajai ña, yäätonno e’tomoomö’da yeichö wetä.

¹⁴ Tameedä soto jäcä äätu’dedööje’da aweicho’como encano’tätääcä, aashicha aweiyancädäiñe. Ñäädä aashicha yeichö ’jemjönö Cajiichaana aneene’da na’de.

¹⁵ Äädai’chätääcä, anejja mma adhantawaiñe Wanaadi nutuudu aneejodö’da ei’ño; conemjönö mma adhantawäiñe mmaja eja’ca’no tameedä ocoone’maneichomooje, adheeme’täneichomooje mmaja, imiichö conemjönö wa’taajä töjimmä töncone’ma töweiye naichöje.

¹⁶ Anejja mma adhantawäiñe imaasuduichai’che, Wanaadi onnontä’da mma ei’che, Esaú cönä’ja’döje. Töwö Esaú täwanshiñö jäcäinchädä mmädä tacoono wwä cöneecammai yää aashichaato töwwä töweiyemööjato’jödö. Yää aashichaato cönä’jaacä awa’deeto dhanwa wennuaajä wwä töweiyemö.

¹⁷ Yää ’jeje odhoowanääcäiñe Esaú wei’jödö yaawä yää aashichaato tacoono wwä töneecamma’jödö tumö wwä e’catä’se cönä’ja’dawä; töwo’joomajo mma cöno’joomajoi yaawä. Jooje töwaamo’jödö weichaame tönnö’jödö inwacaamatoojo aneejodö’da cöneiyacä.

¹⁸ Täneenato wwadäädä’da me’täne änwanno, yää jöö iisadaaediitacoomo chäwwadäädä cöntontodö nönge’da, yää wa’to wätuudinchadö ’jano, tööjato ’jano mmaja, cadeemedu ’jano mmaja.

¹⁹ Janau’cwa wäätadö aneeta’da mmaja maato dea, Wanaadi wa’deuwödö neene aneeta’da mmaja. Yää a’deu etannamo’jödö töwwäiñe ya’deuwö’se’da cönä’ja’to.

²⁰ To’jodheiñe cöntö’taacä yää waanontänä cönä’ja’dö: “Odoocojaato wwä’jödö jadäädä jöö ajooja’jäcä tämaane emaatäcä’de täju que, sucuuji che jeiñe mma;” quee waanontänä cönä’ja’dö.

²¹ Yää wa’cä tönoiñe cönä’jaacä, Moisé wwä’jödöödä. Töwö Moisé cönä’döaacä: “Jooje täätä’nönga tösaade weijäcä;” quee cönä’döaacä.

²² Siyon ’jödö wwadäädääne me’täne, Wanaadi jataacäi mmaja, yää caju ñano Jeduusadén ñanoi’chädö. Jooja’como amoode we’jumma’como wwadäädäiñe mmaja me’täne dea, ñanno Wanaadi jäcä aashicha töwa’deuwaamo,

²³ Wanaadi nnacoomo we’jumma’como wwadäädäiñe mmaja, ñanno caju ña chäätöcoomo tömennä naadö. Wanaadi wwadäädä mmaja me’täne dea, ñäädä tameedä soto emmencaneichomo, aashicha’como do’tadööcomo wwadäädä mmaja, ñanno Wanaadi nichoonecaadö,

²⁴ Jesuuquidiito wwadäädä mmaja, ñäädä eduuwaato weiñä ecammaajä chäänönge tödöönei. Dhaquiiyö encu’shiimaajä wwadäädä mmaja me’täne dea, Aweede saaquidiijiisiyoi’chädö aquiiyö e’jodhaato.

²⁵ Yääje yeijäcä töquiiñeme’que mma mänquiiñeme’täi’che ñäädä cöwwäiñe na’deuwaadö. Ñanno töwä’cuseijadööcomo aneemaicha’da cöneiya’todö naane’, edä nono de’wä Wanaadi wwä töwäätuujadööcomo cönquiiñemeecöichodö. Töwaacö’je cönwanno Wanaadi wwä cöwä’cuseijajoodöcoomo emaichajai’cha caato ñäädä caju ñanno cöwwäiñe na’deuwaadö chiiñeme’ca’jäcä.

²⁶ Yaawä Wanaadi a’deddu edä nono cunu’mei. Eduuwa mmaane edääje Wanaadi nä’döa: “Tooniye mmädä nono wu’mea’dede eduuwa, nono mmajöönö, caju mmajaane;” quee.

²⁷ Yää “tooniye mmädä” quee naadö necamma tameedä tödööajä acoichajootojo Wanaadi wwä, ätu’mejaichojöönö mmaane äädetöiye yaawä.

²⁸ Cöwwäiñe Wanaadi nutuudu na cöjaatadööcomo ätu’mejöönö. Yääje yeijäcä ta’cwaiñe queichäiye Wanaadi jäcä; quiiya’deme’täiye töwö yaacötö tödööancädä, ñontancädä mmaja.

²⁹ Wa’to nönge na ñäädä Cöwaanadiiyöcoomo, tameedä acoichajoonei.