EEWEDEO 11 - Wanaadi A'deddu

Ecamjödö ’je weiñä

¹ ¿Aaquene töwä’dö’se yeichö mädä ecamjödö ’je weiñä quee ’ja? Ecamjödö yää töwoomo’quemö töwwä yä’tutoojo towaanäcä weiñä, äänejöönö ene’ju’tojo mmaja.

² Töneecanö’e yeichöcoomo jäcäinchädä ñanno jenaado’jocoomo aashicha täcaadöcoomo cöneetajoicho.

³ Ecamjödö que cowaanäcäiñe na töwa’deuwödö que mma edä nono tödö’jödö Wanaadi wwä. Töwäänemjönö que töwö cönnöi tameedä edä täneemöje naadö.

⁴ Ecamjödö que mmaja Aweede Wanaadi wwonooje saaquidiijiisiyo cönnöi, Caín cönnöichö e’jodhe’cä. Yää jäcäinchädä Wanaadi töjaadonooje Aweede cönnöi yaawä. Inchudu’jödö mmaja aashicha Wanaadi cöne’täi chea. Töwö Aweede töwääma yeichaame tacaade dea na, ecamjö’jödö weijäcä chäwwä.

⁵ Ecamjödö que mmaja ääma’da Enooco cönaatadoojoi anejja töweichojo ña; a’que soto cunuujicho yaawä Wanaadi wwä adä’jödö weijäcä. Wanaadi a’deddu imennaajä chääcadö necamma töwaatadoojodö jonaane Wanaadi a’cwaima’jödö chäwwä.

⁶ Ecamjödö ’je’da cöweiya’comjäcä mmaane Wanaadi a’cwaimajai’cha caato yaawä. Ñäädä Wanaadi wwadäädä töötä’sato aneecamjö’da’da eijai ña Wanaadi töweiye yeichö, tujummannamo töni’wa’tä yeichö mmaja.

⁷ Ecamjödö que mmaja Noé aashicha cöneetai Wanaadi necamma’jödö äcuude töweeja’dä’emö jäcä; töwö cönnöi jidaawa töwä’jimmä’tädö ewaanacaato’comooje. Yää töneecamjödö que chäänönge’da ñanno soto weichöcoomo cöneenejoi. Töneecamjödö jäcäinchädä Wanaadi jadoonoje cönä’döjoi, yää ecamjödö aiño tojoodöeemö.

⁸ Ecamjödö que mmaja Aawadán Wanaadi waanontä’jödö cönnöi, aneiñaja tönoonodööje töweiyemö ña tanontädaawä. Töwö töjaatawonno cönääma’täi towaanäcä’da yeichaame töötotoojo.

⁹ Töneecanö’e töweijäcä töwö Aawadán tönoonodö ecammaajä de’wä töweiye cönä’jaacä, anejja nonoodö de’wä weiñä töweiye naichöje. Odoocojaato iji’jämjödö amääajä tawä töweiye cönä’jaacä. Yääje mmaja cönä’ja’to dea Isaaca, Jacoowo mmaja, ñanno chäwwäiñe mmaja Wanaadi necamma’jödö töweiyemööje cönä’ja’todö.

¹⁰ Töwö Aawadán tönwomo’que töweiye cönä’jaacä jata yäätäädono, Wanaadi nödöödööne, Wanaadi namäädö mmaja.

¹¹ Ecamjödö que mmaja Saada töwensu’taamöje cönä’döi, yennacaatojo töweeja’dä’e yeichaame. Töwö cönennecai yaawä töwwä ecamjö’jödö weijäcä chäänönge Wanaadi töneecamma’jödö tödööjai yeichö.

¹² Mädääje ñäädä Aawadán, äämajai täwä’dö’jödö weichaame, jooje dhatöödö cöneejamöicho, shidiichä naatoodö wa’cä, cashiishi töweiye naichodö wa’cä mmaja.

¹³ Tameedä ñanno we’toichodö cönä’jajoicho ecamjödööje dea, Wanaadi necamma’jödö aneene’da töwei’jocoomo weichaame. Ecamjödö ’je töweichomjäcä amoinchenno mma yää Wanaadi necamma’jödö cöneene’ma’to, aashicha cöneeta’to dea. Ta’cwaiñe mmaja cönä’ja’to dea yää jäcäinchädä. Töjaataquemjöncomooje töwääcamma cönä’ja’to, a’dhe edä nono de’wä töweiyaamoje mma.

¹⁴ Mädääja’como wä’dödö nääne’ju’jaato töjaatadööcomo neene tönencano’tä töweichöcoomo.

¹⁵ Yää jata töweejö’jocoomo jäcä tötö’tajä’e töweiya’comjäcä mmaane iiña mmaja ennecaajai yei’jocoomo na.

¹⁶ Yääje’daane cönä’ja’to; jata aashichaato jaiñoone cönencano’ta’to, caju ñanoone. Yääje yeijäcä Wanaadi ejöichä’da na Yaanadiiyöcoomoje töwäätä’tädö jäcä, ijaatädööcomo cönconeecaichö naane’.

¹⁷ Ecamjödö que mmaja Aawadán, Wanaadi wwä toneejadaawä, tönnedö Isaaca cunu’acä saaquidiijiisiyooje. Töwö Aawadán tönnedö tooniyaano cunu’acä edääje Wanaadi wä’dö’jödö weichaame chääjäcä:

¹⁸ “Isaaca nnacoomo adhaatödööje me’taato’de;” quee Wanaadi wä’dö’jödö weichaame.

¹⁹ Töwö Aawadán dhowaanäcä cönä’jaacä Wanaadi yäämaajä adoncajai yeichö. Yäämaajä waadoncaajä wa’cä tönnedö cöntö’taacä yaawä chäwwä Wanaadi aneemajo’da yei’jödö ncäcäädä.

²⁰ Ecamjödö que mmaja Isaaca cöneecammai äcuude aashichaato tödöötojo Wanaadi wwä tönnacoomo jäcäiñe, ñanno Jacoowo, Esaú mmaja.

²¹ Ecamjödö que mmaja Jacoowo, äämajai töwä’döa’jäcä, Wanaadi wwä aashichaato cönnöjaacä José nnacoomo jäcäiñe; Wanaadi jäcä aashicha cöna’deuwöi chea, tä’sejöi jonaadä yäätä’se’taajä.

²² Ecamjödö que mmaja José töwäämadaawä cöneecammai Ejiito ñanno Iisadaaediitacoomo wötooto’como. Töwö töjimmä cönaanontoicho dea tödhe’jämjödö tödöötojo jäcä.

²³ Ecamjödö que mmaja Moisé wennua’jäcä yeenö cöneetone’toicho aaduwaawä nuunä, iiñataajaasa edantä’jödö weijäcä töwwäiñe. Tönwanno yää jata cajiichaanai’chädö waanontä’jödö cönnoncaicho, yää shiichu’cä emaadö jäcä.

²⁴ Ecamjödö que mmaja Moisé adai’jä töwä’döa’jäcä Ejiito ñano cajiichaanai’chädö nnedö nnedööje töwäätä’täjo’se’da cönä’jaacä.

²⁵ Wanaadi sotoi jadäiñe töwäntunamjödö aashicha’cä jeene cöntö’taacä chäwwä, conemjönö jäcä a’dhe töshiiye weiñä e’jodhe’cä.

²⁶ Töwö chäwwä cöntö’taacä aashicha’cä jeene Quidiito jäcäinchädä wä’quiiñeme’jonä, tameedä Ejiito ñano mösooma dha’me weiñä e’jodhe’cä; Wanaadi wwä täjeemadööne cönencano’taacä töwö.

²⁷ Ecamjödö que mmaja Moisé cöntämä Ejiito ñanno, yää nonoodö cajiichaanai’chädö wäätömaadö onnontä’da. Yäätäädä Moisé cönä’jädu’taacä, Wanaadi töwäänemjönö töwwä ene’dawooto wa’cä.

²⁸ Ecamjödö que mmaja töwö Moisé cönnöi Weja’dätä’jä anootoi’chädö awä tödööemö. Munu que mönaatata cönencu’shiimajoi, wäämanä edhaajä canaadöje ääma’da yeichöcoomo wetä yaawä ñanno awa’de’como iisadaaediitacoomo nnacoomo.

²⁹ Ecamjödö que mmaja iisadaaediitacoomo Seweichato Cu’jäi cöni’yetoicho, nono sedejjato de’cäcä wötäänä töweiye naichöje mma. Ñanno Ejiito ñancomo mmaane yääje mmaja inchäcäiñe töwe’dätä’se töweichawäiñe töwä’ja’e mma cönä’jajoicho.

³⁰ Ecamjödö woije mmaja Jediicó ñano cudaadai’chä’jödö cöne’duccai aacä amoojato anooto awoodhenta’jäcä iisadaaediita wwäiñe.

³¹ Ecamjödö que mmaja ñäädä masuudui Dajaawa ääma’da cöneiyacä ñanno conemjöncomo jadä, töwwä aashicha tödö’jödö weijäcä iisadaaediitacoomo, ñanno jata ene anonta’como.

³² ¿Ane’cäämö neene mma mädä de’wä waneecammajäätödö deaade’? Mädääje mma anooto täde’da eijai ña soto ime’cu’tädööcomooje, ñäädä Jeedheón, Wadaaca mmaja, Sansón mmaja, Jeté mmaja, Dawí mmaja, Samueede mmaja, Wanaadi wa’deuwödö ecammannamo’jödö mmaja.

³³ Dhantai ecamjödö que soto töne’jodheincha cönä’ja’to, aashichaato tönnöe cönä’ja’to dea, Wanaadi necamma’jödö tö’wa’toto’como cöneedhajä’toicho dea. Ecamjödö que mmaja mado cönincha’duicho,

³⁴ wa’to joojato tununcwe’ca cönä’ja’to dea, sauda canaadöje töwä’ja’to’comoojato’jödö töneemaicha mmaja cönä’ja’to dea. Ñanno jäduujemjöncomo cönä’jädu’toicho; jäduuje töweiye cönä’ja’to yaawä wänä tödöödö jäcä. Tutu’dedööcomo töne’jodheinchaiñe töweiye cönä’ja’to.

³⁵ Ecamjödö que anejjacoomo wodiiñamo töwä’jimmä’tädö wä’ja’a’como’jödö Wanaadi wwä cönaadoncajoicho. Anejjacoomo jenaado’jocoomo cönä’jajoicho töwäätä’maminchajoodöcoomo awä; töwäätu’cajo’seiñe’da töweiye cönä’ja’to, aashichaato jaiñoone töweicho’como aca töwaadoncadööcomo wetä yaawä.

³⁶ Dhantai töwäätana’tajoojä’e töweiye cönä’ja’to, töwaataiju’jojä’e mmaja, cadheena que’jödöödä töwä’möjoojä’e töweiye cönä’ja’to dea, jedeesoje töwä’döjoojä’e mmaja.

³⁷ Täju que mmaja töweewäjoojä’e töweiye cönä’ja’to, anejjacoomo ’quene annai töwaatacä’jo; töwä’yunaacajo töweiye cönä’ja’to dea, sauda canaadoje töwäämajo mmaja. Tönwanno oweeja iji’jämjödö awä töwäämannä’e cönä’ja’to, chiiwo iji’jämjödö awä mmaja. Wentumje töweiye cönä’ja’to, täntunaanö’e mmaja, tömaamincha mmaja.

³⁸ Jata ’jemjönö aca töwääneje cönä’ja’to, jöö do’taca mmaja; yaadö aca mmaja tönnö’que cönä’ja’to dea, nono dha’tadö aca mmaja. Yääje yei’jocoomo weichaame tönwanno cönä’ja’to edä nono de’woncomo e’jodheiñe.

³⁹ Tameedä ñanno töneecamjödööcomo jäcäinchädä aashicha täcaadöcoomo cönnöichodö’je, yaawääne’, Wanaadi necamma’jödö jaiñoone aneejodö’da cöneiya’to.

⁴⁰ Aashichaato jaiñoone Wanaadi nichö’tammecöödö cönä’jaacä, cönwanno cöjääcäinchädäiñe. Yääje yeijäcä tönwanno cowaajodäiñe chäänöngato jaiñoone ejoodöjai’cha cönä’ja’to.