EEWEDEO 10 - Wanaadi A'deddu

¹ Jenaado’jä waanontänä Moisé nimennä’jödö cönä’jaacä aashichaato töwe’emö chu’täneije mma, ñeenejöönö mma. Yääje weiñä necamma wedu waadäi yää dea saaquidiijiisiyo tödöödö. Yää ecammajai’cha cönä’jaacä soto wecoonecaato’como, ñanno yää tödöödö que Wanaadi wwadäädä iicha’como.

² Yää jenaado’jä waanontänä coneecatä ei’jo mmaane saaquidiijiisiyo tödöödö oto’nomjadö cöneiyacä yaawä tooniye mma. Ñäädä saaquidiijiisiyo tödöönei tooniye conemjönö jonno yeecocca’jäcä yäätonno conemjönö ’je’da ä’canö’jai ña yaawä töwö.

³ Yaawääne’, yääje’daane na; yää dea saaquidiijiisiyo wedu waadäi choone’nadiiyöcoomo töntö’tamme’jo weneeneto,

⁴ conemjönö choccajai yeichöjöönö jaaca aquiiyö, chiiwo aquiiyö mmaja.

⁵ Yääje yeijäcä edä nonoodö de’cäi töweejödaawä edääje Jesuuquidiito cönä’döaacä Wanaadi wwä: Amäädä saaquidiijiisiyo ämjumma’da ma, odoocojaato amiiñä’caajä utuudu ämjumma’da mmaja. Yääje yeijäcä yeejö mamoode’näne.

⁶ Amäädä a’cwaincha’da ma dea odoocojaato yau’cwaajä utuudu jäcä, conemjönö choccajootojo saaquidiijiisiyo utuudu jäcä mmaja.

⁷ Yääje yeijäcä edääje wä’döaaquene äwwä: “Eetä wa öwö, amäädä Wanaadi, owoije tödööneije, jääcä jajeedä imennaajä wä’dödö naadöje dea;” quee cönä’döaacä Jesuuquidiito Wanaadi wwä.

⁸ Awa’deene Quidiito necamma saaquidiijiisiyo ämjumma’da Wanaadi weichö, odoocojaato amiiñä’caajä utuudu ämjumma’da yeichö mmaja, saaquidiijiisiyo yau’cwaajä utuudu mmaja, yää conemjönö choccajootojo. Tameedä mädoocomo jenaado’jä waanontänä tönnöjo yeichaame, Wanaadi a’cwaincha’da na chääjäcä.

⁹ Yää ’jeje edääje mmaja Quidiito nä’döa dea: “Eetä wa öwö, amäädä Wanaadi, owoije tödööneije;” quee. Yääje töwä’dödö que yää saaquidiijiisiyo tödöödö cönä’ja’dö Jesuuquidiito cönaacoichajoi, anejja inwacaanoje tödöödö wetä.

¹⁰ Töwö Jesuuquidiito Wanaadi woije saaquidiijiisiyooje cönä’tui, tooniye mma yeichöödäje töweiyemööje. Yää saaquidiijiisiyo tödöödö jäcäinchädä Wanaadi cösoomatääne.

¹¹ Anooto waadäi ñanno Wanaadi wwä töwa’deuwaamo saaquidiijiisiyo tönnöe weneeneto weiñäje, conemjönö choccajai’cha yeichaame yää.

¹² Jesuuquidiito mmaane tooniye mma saaquidiijiisiyooje cönä’tui yeichöödäje töweiyemööje. Yää ’jeje Wanaadi nnäcä cönaatajiimai, ämu’demjönö dö’se.

¹³ Yäätä töwö niyoomo’ca to’cäi tutu’de’tännamo tödöödö Tumö wwä.

¹⁴ Tooniye töwä’tudu que töwö Jesuuquidiito yeichöödäje chäänönge cönnöicho ñanno shooma’como.

¹⁵ Epíiditu Santo mmaja mädä necamma dea cöwwäiñe. Edääje töwö cönä’döaacä:

¹⁶ Yääje Cajiichaana nä’döa: Edääje na’de chäwwäiñe neecammadö yää cu’nädaawä. Öwö ya’deddu wödööa’de chääwanööcomo jäcä, chö’tajäätödööcomo jäcä wimenna’de; quee Cajiichaana wä’dödö Epíiditu Santo necammadö na.

¹⁷ Edääje mmaja Epíiditu Santo cönä’döa’dea: Choone’nadiiyöcoomo tö’taque’a’de, tameedä conemjönö iiñö’jocoomo jäcä mmaja; quee.

¹⁸ Yääje yeijäcä conemjönö encwanno’jotoojo töweiye yeiya’jäcä yäätonno conemjönö choccajootojo utuudu tujunne’da na yaawä.

Wanaadi wwadäädä täjai cöweichöcoomo

¹⁹ Yääje yeijäcä jimmä, Jesuuquidiito aquiiyö jäcäinchädä tösaade’da omomjai caato eduuwa yää Aashichaato Jaiñoone taca.

²⁰ Jesuuquidiito töwäämadö que yää taca cöwoomonto’como cöna’ducai Wanaadi weichojo nejoonö ai. Yää Wanaadi weichojo nejoonö weshiichadö cönä’jaacä Jesuuquidiito wäämadö cu’tädööje.

²¹ Jesuuquidiito ñäädä cöjääcäinchädäiñe Wanaadi wwä töwa’deuwemö o’jodhaato, Wanaadi sotoi edhaajotoncomo.

²² Yääje yeijäcä Wanaadi wwadäädä cöötätäiye chäänönge cötö’tajäätödööcomo yeiyancädä, chäänönge ecaanö’ancädä mmaja, conemjönö jonno cötö’tajäätödööcomo chocca’jödö weijäcä chäwwä, cäjööcomo chocca’jödö weijäcä mmaja tuna aashichaato que.

²³ Yäätäädä cötö’tajäätödööcomo cöödöto’ñojo cöwo’womoocödööcomo jäcä, cöweejäduuqueancädäiñe’da, cowaanäcäiñe yeijäcä chäänönge Wanaadi wwä tödöötojo yää cöwwäiñe töneecamma’jödö.

²⁴ Cöwe’wa’tädööcomo quencano’tätäiye, cöwwäädäiñe cöwä’jummajoodöcoomo mmaja, cöwwäädäiñe aashichaato tödööjodö mmaja.

²⁵ Cöwe’jummadööcomo e’nomjajai’cha caato, dhantai tä’da weneenetoodöje’daane. Töwä’wätuuja mmaane ä’wätuujajai caato, jooje’cä jeene eduuwa, amoinche’da Cajiichaana Jesuuquidiito we’tojo weijäcä.

²⁶ Chäänöngato cowaanäcäiñe tödöödö’jo cöwoijeiñe conemjönö acaadä cöweiya’comjäcä yaawä, yäätonno anejja saaquidiijiisiyo ’je’da na conemjönö choccajaicho.

²⁷ Yää mma niyoomo’ca ñäädä yääjato, yäätä’maminchajootojo tönoiñato mma, joojato wa’to mmaja, yää tameedä Wanaadi chu’de’tännamo ennanö’cato’como.

²⁸ Ñäädä Moisé waanontädö imennaajä ija’do’jonei töneema weneeneto wentumje eneeancädä’da, aacä, aaduwaawä jeiñe mma conemjönö iiñö’jödö enennamo’jödö yeiya’jäcä.

²⁹ Töwaacö’je tömaaminchaamöje na ñäädä Wanaadi nnedö chiiñeme’nei, dhaquiiyö chimmanei mmaja, Epíiditu Santo jäcä conemjönö wa’deuwödö mmaja, ñäädä tujummanei, Wanaadi dö’sennoto we’ajä. Yää Jesuuquidiito aquiiyö cösoomaneichomooje na, chäänönge Wanaadi necamma’jödö weichö cu’tädööje mmaja.

³⁰ Cowaanäcäiñe na yääje Cajiichaana wä’dö’jödö: “Öwwono yää woojo’tänä; öwööne wejeema’de;” quee yä’dö’jödö. Edääje mmaja cönä’döa’dea töwö: “Cajiichaana tösootoi nemmencaato’de;” quee.

³¹ Tönoiñe töweiye nai Wanaadi nudooto wwä wätä’maminchajoonä.

³² Ätö’tatääcä jenaadä awei’jocoomo jäcä; yaawä ä’weijoonöje aweichöcoomo joojato wäntunaanö’nä tönshinchä mä’ja’quene.

³³ Änwanno soto wwäiñe mä’quiiñeme’jotääne, mätä’maminchajootäne dea tameedä täneemöje. Ajimmotoncomo wätä’maminchajoodawäiñe äwwäiñe mmaja yää se’ne cönä’ja’dea, äwäätä’maminchajoodöcoomo awooto wa’cä mmaja.

³⁴ Änwanno wentumje töneene mä’ja’quene ñanno jedeesoja’como. Anejjacoomo wwäiñe ännöjäätödööcomo que adhenwajiiñataame cone’da ä’döjo’da töweiye mä’ja’quene, odhoowanääcäiñe yeijäcä caju ña äwwäiñe aashichaato jaiñoone töweiye yeichö, töwaatamemjönööne.

³⁵ Yääje yeijäcä aneecamjödööcomo mäncuna’matäi; yää aneecamjödööcomo eje’jödö adai’jä na’de.

³⁶ Aaquiñu’tä’da aweicho’como tujunne na äwwäiñe, Wanaadi woijato tödöödö wetä yaawä äwwäiñe, ñeecamma’jödö mejoodötäiye yaawä.

³⁷ Edääje Wanaadi a’deddu imennaajä nä’döa: Eduuwa mma ñäädä töwe’emööje naadö ne’a’de; töwö encwainchejö’da na’de.

³⁸ Ñäädä öwö jaadono töneecamjödö jäcäinchädä töweichö neneea’de. Yaawääne’, iiña mmaja yennaca’jäcä ta’cwaiñe’da wa’de chääjäcä; quee nä’döa Wanaadi a’deddu.

³⁹ Ñannojöönööne cönwanno töwännamjödööcomo wetä iiña mmaja töwennaca’comoojönööne; ecamjödö ’ja’comoone cönwanno, töwääwanaacaamoone.