EEWEDEO 1 - Wanaadi A'deddu

Tönnedö ai Wanaadi wa’deuwö’jödö

¹ Jenaadä ta’deddu ecammannamo ai weiñäje Wanaadi töwa’deuwe cönä’jaacä cadai’choncomo wwäiñe, aneejejaiñene’jödöödä.

² Eduuwa, anooto ataamejai yä’döa’jäcä, töwö cöna’deuwöi Tönnedö ai chaja. Tönnedö ai Wanaadi cönnöi tameedä yeichö wa’cä; chäwwä cöneecammai chea tameedä iiñödööje yeichojo.

³ Töwö Jesuuquidiito aashicha Wanaadi weichö neneeja; töwö na Wanaadi weichö nönge dea. Töwö dha’deddu jäduujato que dea tameedäädä töweiye weneene. Cöcoone’nadiiyöcoomo choccadö’jo töwö Jesuuquidiito cönaatajiimai Wanaadi mudei yö’tä caju ña, ämu’demjönö dö’se.

Wanaadi nnedö amoode e’jodheiñe yeichö

⁴ Töwö Jesuuquidiito na amoode e’jodheiñe, yeichojo ecammaajä cho’jodheiñe’cä yeijäcä.

⁵ Amoode wwä’da edääje Wanaadi cönä’döaacä: Önnedö amäädä; eduuwa aweichö wutui; quee. Amoode wwä’da mmaja edääje Wanaadi cönä’döa’dea: Öwö wa’de yuumöje, töwö önnedööje na’de; quee.

⁶ Edääje Wanaadi cönä’döaacä awa’deeto Tönnedö anonta’jäcä edä nono de’cäi: Tameedä Wanaadi amoodedö niya’demeecö’ña’to; quee cönä’döaacä.

⁷ Edääje Wanaadi cönä’döaacä tamoodedö jäcäiñe: Töwö Wanaadi tamoodedö nödööaato jejeichä nönge; tanoonö nödööaato wa’to udiiñö nönge; quee cönä’döaacä.

⁸ Tönnedö jäcä mmaane edääje Wanaadi nä’döa: Yeichöje cajiichaanaje ma’de, amäädä Wanaadi. Chäänönge aweichö que cajiichaanaje ma.

⁹ Chäänönge weiñä awaacö’je na; chäänönge’da weiñä mmaane awaacö’je’da. Yääje yeijäcä Wanaadi, ñäädä Awaanadiiyöje naadö, ajimmä e’jodhe’cä adha’cwaniiyö cuntui; quee Wanaadi nä’döa Tönnedö jäcä.

¹⁰ Edääje mmaja Wanaadi nä’döa dea Tönnedö jäcä: Amäädä Cajiichaana, jenaadä mödööne edä nono o’wadö; caju mmaja adhaamädö que mödööne.

¹¹ Tameedä mädä anaamode’nädö naadö nataamea’de; amäädä mmaane ataame’da ma’de yeichöje. Yää nadaicha’de, womö töwaadaicha töweiye naichöje.

¹² Amäädä mimonga’de womö momöödö töweiye naichöje; tönwacaama na’de yaawä, camiisha inwacaamadö töweiye naichöje. Amäädä mmaane chäänöngeedä ma, yeichöje; aweichö ataame’da na’de; que Wanaadi wä’dödö na Tönnedö jäcä.

¹³ Amoode wwä’da edääje Wanaadi cönä’döaacä: Önnäcä ataajimaacä, ämu’demjönö dö’se, odho’cäi ätu’de’tännamo tödöödö wa’cä öwwä; quee.

¹⁴ Ñanno tameedä Wanaadi amoodedö naato tanontaamoje mma, töwääwanaacaamo i’wa’tännamooje anonta’como.