DUUCA 9 - Wanaadi A'deddu

Ecammajä’e tönoowanoomadö anonto’jocoomo Jesuuquidiito wwä

¹ Yääje mma yaawä Jesuuquidiito cöni’jummaicho tönoowanoomadö, ñanno amoojadooto de’wä aaco’como. Chäwwäiñe cuntui ijääduduucomo, odo’shancomo ija’canö’joto’como, cädäi ejiichö’totoojo mmaja.

² Töwö cönaanontoicho Wanaadi töcaajichaanaije tödöödö jäcä ecammajä’e, cädäija’como adonca mmaja.

³ Töwö cönä’döaacä chäwwäiñe: —Töuwaque’da mmaane ojoncomo. Adhe’sejiichomo manaadätäi’che, acanwaichomo mmaja, ädducoomo mmaja, ajöödataichomo mmaja. Tooni mma owoomöcoomo anaadätääcä’de, aacä’da.

⁴ Yää maa chaaca mä’döaato’dedö taca eichäcä’de aneiñaja äätädööcomo wa’cä.

⁵ Anejja jataawoncomo aashicha ayöödötäiñe’da yeiya’comjäcä, yää jataawonno ojoncomo’de, ä’juduucomo she’secaadöje mma, eta’se’da yeichöcoomo ene’ju’tojooje; quee cönä’döaacä Jesuuquidiito.

⁶ Ñanno cönääma’toicho yaawä. Jata waadäi cöntonto aashichaato wätunnä ecammajä’ancädä, soto ejiichö’tancädäiñe mmaja, tameedä yeichö wa’cä.

Juan Wautiita wääma’jödö

⁷ Yääje mma yaawä cajiichaana Edoodhe cöneetaacä Jesuuquidiito ecaadö. Jooje tötö’tajä’e cönä’jaacä, edääje anejjacoomo wä’dödööcomo weijäcä: “Juan ñäädä, töwäämaajo jonno yaadoncaajä;” quee yä’dödööcomo weijäcä.

⁸ Anejjacoomo ’quene Edíaje töne’tä cönä’ja’to; anejjacoomo mmaane Wanaadi wa’deuwödö ecammanei jenaado’jä waadoncaajäje töne’tä cönä’ja’to.

⁹ Edoodhe cönä’döaacä yaawä: —Juan wijönco’jone. ¿Änääcö määdhä, yääje yeiya’jäcä, mädä wa’cä tacaade naadö? quee cönä’döaacä. Ene’se töweiye cönä’jaacä.

Ijaatoodea miide soto ewanshincho’jocoomo

¹⁰ Ñanno anonta’como wennaca’comjäcä Jesuuquidiito wwä cöneecammajäätöicho tameedä tönnö’jocoomo. Jesuuquidiito töjaadä cönaadoicho yaawä Wesaada ña, soto ’jemjönö aca.

¹¹ Soto wwäiñe iiña yeichö eta’jäcä, cönaaje’caicho yaawä. Töwö aneenejä’täiñe’da’da cöneiyacä; Wanaadi töcaajichaanaije weiñä jäcä cöneecammajä’acä chäwwäiñe. Cädäija’como cönaadoncaicho dea.

¹² Cho’momjai yä’döa’jäcä, ñanno amoojadooto de’wä aaco’como ñoowanoomadö cöneejoto Jesuuquidiito wwadäädä; cönä’döa’to chäwwä; —Enno’jacooto canno soto, jata cawoodhecääcäiñe naadö aca täiyeto, täwanshiñööcoomo aneejodöiyeto iiña, tönnö’to’como mmaja, jataawä cöweichöcoomojöönö; quee cönä’döa’to ñoowanoomadö.

¹³ Jesuuquidiito cönä’döaacä chäwwäiñe: —Änwannoone ewanshinchätääcä. Tönwanno cönä’döa’to: —Ijaatoodea uu i’yaca’jödö mma cöwwäiñe na, na’cwacaano’cä aacä mma, jataaca cööto’jocoomode äwanshi ejeema, tameedä canno ewanshiñööcomo; quee cönä’döa’to.

¹⁴ Ñanno töwääwashinchaamo cönä’jaato ijaatoodea miide dhanwaacomo. Jesuuquidiito cönä’döaacä yaawä tönoowanoomadö wwäiñe: —Soto ajiimajootäcä wannai, aaca sotooto de’wä amoojadäi.

¹⁵ Ñoowanoomadö cönnöicho yaawä tanonto’jocoomo nönge; soto cönaajimaajoicho yaawä.

¹⁶ Jesuuquidiito uu cönannäjöi yaawä, yää ijaatoodea i’yaca’jödö, na’cwacaano’cä mmaja, a’nädäncädä. Caju ña ene’mancädä yää äwanshi jäcä cöna’deuwöi. Uu cöni’yajäätöi yaawä. Tönoowanoomadö wwäiñe cuntui yaawä soto wwäiñe ecaamodö wetä.

¹⁷ Tameedäädä cönääwashinchoicho yaawä, töwensu’tädööcomo wa’cä. Yää ’jeje i’yajä’ajä wäädetö’jödö cönancuicho yaawä, amoojadooto de’wä aacä wöwa.

Peedhodo wwä Äwaanacaaneije Jesuuquidiito weichö ecamma’jödö

¹⁸ Yääje mma yaawä Jesuuquidiito töudäje Wanaadi wwä ya’deuwödaawä, ñoowanoomadö chääjadä cönä’ja’to. Töwö cöneecamma’joicho: —¿Änääcöje soto ye’tätä weneeneto? quee cönä’döaacä.

¹⁹ Tönwanno cöneccujä’a’to: —Anejjacoomo Juan Wautiitaje adhe’tätä weneeneto; anejjacoomo ’quene, Edíaje. Anejjacoomo mmaane, Wanaadi wa’deuwödö ecammannamo jenaado’jocoomo jimmä waadoncaajäje adhe’tädö weneeneto; quee cönä’döa’to.

²⁰ Jesuuquidiito cönä’döaacä chäwwäiñe: —¿Änwanno ’na, änääcöje ye’tätä määnetääne? Yaawä Peedhodo cönä’döaacä: —Äwaanacaanei amäädä, ñäädä Wanaadi nnedö; quee cönä’döaacä.

Jesuuquidiito necamma’jödö töwäämatoojo

²¹ Jesuuquidiito tönoowanoomadö cönwätuujaicho jooje Äwaanacaaneije töweichö aneecammajäätö’da yeichöcoomo wetä.

²² Töwö cönä’döaacä chäwwäiñe: —Soto nnedö töwäntunaanö’emööje na; töwä’quiiñeme’joomöje na dea inchoncomo wwä, Wanaadi wwä töwa’deuwaamo edhaajotoncomo wwäiñe mmaja, judhío owaanomannamo wwä mmaja. Tönwanno nemaato’de. Yaawä aaduwaawä anoototo ai töwö naadonca’de; quee cönä’döaacä.

²³ Yaawä töwö cöna’döa’dea tameedä chäwwäiñe: —Ñäädä jaadä töwei’shato tötö’tajäätödö woije mma eijai’cha na. Töwö cone’da tödööjai’cha na anooto waadäi öwö jääcäinchädä töwäntunamjödö, cuduusa jäcä tajoijodö jadä’jödöödä. Umjummadö woije eijai ña.

²⁴ Ñäädä töweichö ewontänei, töweichö nennanö’ca’de. Ñäädä öwö jääcäinchädä töweichö u’nei mmaane, töweichö neneea’de.

²⁵ ¿Aaquene mmaja aashicha eichö deeade’ tameedä edä nono de’wono chaana’ca’jäcä soto wwä töweichö ennanö’cataame?

²⁶ Ñäädä öwö Soto nnedö jöichänei, ya’deddu jöichänei mmaja, öwö mmaja wijöicha’dede Cajiichaanaje we’a’jäcä, Jaaja nnataadö jääcä, amoode aashicha’como nnataadö jääcä mmaja.

²⁷ Chäänönge yääje wä’döa äwwäiñe, dhantai eetä maatoodö äwäämadööcomo owaajo meneeato’de Wanaadi Cajiichaanaje yäänejoodö; quee cönä’döaacä Jesuuquidiito.

Jesuuquidiito wenwacaama’jödö

²⁸ Yääje mma yaawä aaduwaawä amoojato anooto yääje töwa’deuwö’jeje, Jesuuquidiito cöntämä jöö de’cäi, Wanaadi wwä a’deuwe. Chääjadä cönä’ja’to Peedhodo, Jacoowo mmaja, Juan mmaja.

²⁹ Wanaadi wwä töwa’deuwödaawä, Jesuuquidiito jedö cönenwacaamai yaawä anejjeja. Yoomö mmaja cönenwacaamai chea tajääde’de, weijotä.

³⁰ Yaawä cönäänejoicho aacä dhanwaacomo; Jesuuquidiito jadä cöna’deujä’a’to. Ñanno cönä’ja’to Moisé, Edía mmaja.

³¹ Tönwanno cönäänea’to tawaanato tawoodhecääcäiñe. Jeduusadén ña Jesuuquidiito wäämatoojo jäcä cöna’deuwa’to.

³² Peedhodo, ijimmä mmaja, wetuuje töweichaameiñe, öncö’da cönä’ja’to; Jesuuquidiito nnataadö cöneenea’to yaawä, ñanno aaco’como dhanwaacomo chääjadä cönä’ja’todö nnataadö mmaja.

³³ Yääje mma yaawä Jesuuquidiito jonno ñanno wä’sancwadaawäiñe Peedhodo cönä’döaacä Jesuuquidiito wwä. —Owaanomaanei, aashicha eetä caato. Ämmaichomo ñaa nanaamo’ñojo aaduwaawä, tooni amäädä ämmai, tooni mmaja Moisé mmai, tooni mmaja Edía mmai; quee. Towaanäcä’da yeichaame yääje töwö cöna’deuwacä.

³⁴ Yääje ya’deutaame dea ca’dutu cöneejä yaawä immai’chäiñe. Tönwanno cönääcatoncaicho ca’dutu do’taca töwäädanta’comjäcä.

³⁵ A’deu cönäätaacä yaawä ca’dutu do’taca: —Määdhä ñäädä önnedö umjummadö; dha’deddu etaatäcä; quee cönäätaacä a’deu.

³⁶ Yää a’deu wä’ca’jäcä Jesuuquidiito töjääcäjeene cöneedantoicho. Yää ncäcäädä tönwanno äucwätä’da cönä’ja’to; anejjacoomo wwäiñe aneecammajäätö’da cöneiya’to töneene’jocoomo.

Mude’cä’cä odo’sha’ jano adonca’jödö

³⁷ Yää jenamma naadöje jöö de’wonno töwä’tä’jejeiñe, jooje soto cöneejoto Jesuuquidiito wwadäädä.

³⁸ Ñanno soto do’tacannoiñe tooni dhanwa Jesuuquidiito cöna’dejjaacä; cönä’döaacä: —Owaanomaanei, önnedö eneejo’se wa äwwä, dhanwa’cä. Ñäädä mma määdhä önnedö.

³⁹ Edääje weneene töwö; odo’sha chääjäcä weneene; jadheedä töcä’tönge töwö yaawä. Yaawä odo’sha töneenönnäi’chä weneene, tönta’deweecajoone. Mädääje tömmamincha weneene, etööma’se’da.

⁴⁰ Onoowanoomadö wwäiñe wijaacanö’jojannö’je, a’que noneejaicho; quee cönä’döaacä ñäädä dhanwa.

⁴¹ Jesuuquidiito cöneccujä’acä; cönä’döaacä: —Mädä wa’cä aneecamjö’da maato. ¿Ä’waasa’cäne mma numa ajaadäiñe wei’she maato? Numa dajaane wä’döi äshinchädööcomooje. Sadäädä ene’cä mä’dä ännedö; quee cönä’döaacä Jesuuquidiito.

⁴² Jesuuquidiito wwadäädä yeejödaawä ñäädä mude’cä’cä, odo’sha nono jo cöneemajjoi; tumjunne’da cöneenönnäi’chäi. Yaawä Jesuuquidiito odo’sha cöneuwöi; mude’cä’cä cönaadoncai; yuumö wwä cuntui yaawä.

⁴³ Tameedä cönääcatoncaicho yaawä, o’jodhe Wanaadi weichö ene’jödö weijäcä töwwäiñe. Töwwä tödööjätöödö eneedö’jo tameedä soto wääcatoncadööcomo weijäcä, Jesuuquidiito cönä’döaacä tönoowanoomadö wwäiñe:

Töwäämatoojo jäcä Jesuuquidiito necammajäätö’jödö mmaja

⁴⁴ —Tätaane etaatäcä edä ya’deuwaadö; ätö’taque’täi’che. Soto nnedö nä’tuja’de soto wwäiñe; quee cönä’döaacä.

⁴⁵ Ñoowanoomadö dhowaanäcäiñe’da cönäätaacä yääje ya’deuwödö, etaatojo ’je’da yeijäcäiñe. Tösaade cönä’ja’to, Jesuuquidiito ecamma’jo’se’da yääje yä’dö’jödö jäcä.

¿Änääcö o’jodhe’cä nai?

⁴⁶ Yääje mma yaawä Jesuuquidiito nowaanomaadö cönaajäntoicho töwäätäccujäätödööcomo: ¿Änääcö cantawäiñe o’jodhe’cä nai? queeto jäcä cönäätäccujä’a’to.

⁴⁷ Jesuuquidiito dhowaanäcä cönä’jaacä yääje chö’tajäätödööcomo. Töwö mude’cä’cä cönä’dejjai; tödö’tä cönnöi.

⁴⁸ Yaawä töwö cönä’döaacä tönoowanoomadö wwäiñe: —Ñäädä öwö jääcäinchädä määdhä mude’cä’cä aashicha tödöönei, öwö mmaja aashicha yöödöa dea. Ñäädä aashicha yöödönei, yaanontänei’jödö aashicha tödöödö wa’cä mmaja na dea yää. Ñäädä dho’noncomo adhantawäiñe, ñäädä ñäädä adhe’jodha’como; quee cönä’döaacä Jesuuquidiito.

Cutu’de’täneichomoojönö cö’wa’täneichomooje yeichö

⁴⁹ Yääje mma yaawä Juan cönä’döaacä chäwwä: —Owaanomaanei, soto ñaa cöneeneaacä odo’shancomo ija’canö’jodööje amäädä adhe’tancädä. Chäwwä yääje ännöjo’da ñaa cöneiyacä, cöjaadoncomooje’da yeijäcä.

⁵⁰ Jesuuquidiito cönä’döaacä chäwwä: —Ännöjo’da’daane eichäcä’de. Ñäädä cutu’de’täneichomoojönö, cö’wa’täneichomooje na; quee cönä’döaacä Jesuuquidiito.

Jesuuquidiito wwä Jacoowo, Juan wätuuja’jocoomo

⁵¹ Yääje mma yaawä caju ña töötotoojo cu’nädö amoinche’da yä’döa’jäcä, Jesuuquidiito Jeduusadén ña töötädö jäcä cönä’jädu’täi.

⁵² Töwö tösootoi towaajo cönaanontoicho. Ñanno cöntonto Samaadiya ñano jataaca, Jesuuquidiito wä’dötoojo edantädö wetä.

⁵³ Ñanno Samaadiya ñancomo tödöiñaiñe Jesuuquidiito wä’dö’se’da cönä’ja’to, Jeduusadén ña iichädö weijäcä.

⁵⁴ Yää eneea’jäcä ñoowanoomadö wwäiñe, Jacoowo, Juan mmaja, cönä’döa’to: —Cajiichaana, ¿wa’to ja ca’ ñaa nänne’jaanä caju ñanno, yau’cwato’comooje, Edía cönnöichöje mmaja? quee cönä’döa’to.

⁵⁵ Jesuuquidiito cönä’jedennacai chäwwadäädäiñe; cömjiiyemeecöicho; cönä’döaacä: —Ng’jn; odhoowanääcäiñe’da dajaane na aweicho’como.

⁵⁶ Öwö, Soto nnedö, we’ne soto töja’eiñe’da, ewaanacaiñeene; quee cönä’döaacä. Yää ’jeje tönwanno cöntonto anejja jataaca.

Jesuuquidiito jadä töwei’sha’como’jödö

⁵⁷ Ääma tai töötädaawäiñe anejja dhanwa cönä’döaacä Jesuuquidiito wwä: —Cajiichaana, ajaadä wötäiye. Äätäjäätödö waadäi täjä’jai wa ajaadä; quee cönä’döaacä.

⁵⁸ Jesuuquidiito cönä’döaacä chäwwä: —Que’cweedu täwö’que töweiye nai; tadiiñaamo mmaja taiñanque töweiye naicho dea. Soto nnedö mmaane iiñö’tojo ’je’da na; quee cönä’döaacä Jesuuquidiito.

⁵⁹ Edääje cönä’döa’dea anejja wwä: —Ma’che jaadä; quee. Ñäädä cönä’döaacä yaawä: —Cajiichaana, jaaja weneeta’ñojo awa’de, yääma’jäcä wewaacaiye’de; quee cönä’döaacä.

⁶⁰ Jesuuquidiito cönä’döaacä chäwwä: —Yä’ja’a’como dea mmaane newaaca’ña’to töwä’ja’a’como. Amäädä mmaane Wanaadi töcaajichaaneije tödöödö jäcä ecammajä’ta; quee cönä’döaacä.

⁶¹ Anejja daja yääje cönä’döa’dea yaawä Jesuuquidiito wwä: —Cajiichaana, ajaadä wei’she wa. Wääcammata’ñojo awa’de jimmä wwäiñe; quee cönä’döaacä.

⁶² Jesuuquidiito cönä’döaacä chäwwä: —Ñäädä öwö taadawaajui tödöödö jäcä töwaajäntä’jödö weichaame jenaadä töwei’jödö wwadäädä töwä’jedennaca’sato Wanaadi anoonöje eijai’cha na; quee cönä’döaacä Jesuuquidiito.