DUUCA 3 - Wanaadi A'deddu

Juan Wautiita necammajäätö’jödö

¹ Juujatonno wedu Tiweediyo acu’shänääje yeichö, Ponsiyo Pidaato cajiichaanaje cönä’jaacä Judheea ña. Yaawä Edoodhe cajiichaanaje cönä’jaacä Caadideea ña. Dhacoono Jediipe mmaane cajiichaanaje cönä’jaacä Ituudea ña, Tadaaconiite ña mmaja. Disaaniya cajiichaanaje cönä’ja’dea yaawä Aawidiiniya ña.

² Yaawä Aná cönä’jaacä Wanaadi wwä töwa’deuwaamo edhaajotoncomooje, Caijaasa acä. Yää wedui’chädö awä Wanaadi wa’deuwödö cönäätai Juan wwä, Saacadía nnedö wwä, jata ’jemjönö aca.

³ Yaawä Juan cönäämanä’acä tameedä Joodadán weichö wa’cä. Töwö töwä’döe cönä’jaacä: —Wautisaaje ä’döjootäcä; ätö’tajäätödööcomo sha’duminchatääcä, ocoone’nadiiyöcoomo ätäncwanno’joiye; quee töwä’döe cönä’jaacä.

⁴ Töwö cönä’jaacä Isaía cömmennäichöje, ñäädä Wanaadi wa’deuwödö ecammanei. Edääje cömmennäi Isaía: Töcä’de dha’deddu nääta’de jata ’jemjönö aca: “Choonecaatäcä Cajiichaana eemadö, chäämadö sha’duminchatääcä.

⁵ Tameedä dhanwadö tutu’cannä’e na’de; tameedä jöö ’jano acaanaje nä’döa’de. Tameedä täcuumejä’ato nesa’dumincha’de. Ääma juudhani’jödööja’como nenoonoi’cha’de.

⁶ Yaawä tameedä soto neneeaato’de Wanaadi woijato wääwanaacatoojo;” quee dha’deddu nääta’de; quee cömmennäi Isaía.

⁷ Tödöiña wautisaaje ä’döjo soto we’a’comjäcä, Juan cönä’döaacä chäwwäiñe: —Äcääyu nönga’como änwanno. ¿Änääcö äwäätuujatääne äwääwanaacadööcomo wetä conemjönö weejödö owaajo?

⁸ Aweichöcoomo sha’duminchatääcä, tötö’tajäätödööcomo yeesa’dumincha’como weichö nönge deaane. Edääje chö’tajä’jai’cha maato: “Aawadán weichö dea ñaa;” quee cajai’cha maato. Yääje wä’döa äwwäiñe, edä täju mmädä Wanaadi amoode’näjai ña Aawadán weichöje.

⁹ Täämiyä dajaane wööwö na, imiichö ai dee dacaatojooje. Aashicha dee eje’ta’da yeiya’jäcä, yaacadö yaawä, yau’cwadö wetä yaawä wa’to nwaca; quee cönä’döaacä Juan.

¹⁰ Ñanno soto cöneecamma’joicho yaawä: —¿Ane’cäämö tödööjai ñaa nai, yääje yeiya’jäcä?

¹¹ Töwö Juan cöneccujä’a’to: —Ñäädä aacono yoomö’tädö, tooni näntu’ñojo a’cato wwä; ñäädä täwanshichaato yaatocaajai ña dea, a’cato wwä utuudu wetä; quee cönä’döaacä.

¹² Acu’shänä jödaatai i’jummannamo cöneejoto dea Juan döiña, wautisaaje ä’döjo. Tönwanno cönä’döa’to chäwwä: —Owaanomaanei, ¿ane’cäämö tödööjai ñaa nai?

¹³ Juan cöneccujä’a’to: —Adheedhajootoncomo ne’ca’jo’jödö de’wä mma jödaata mane’ca’täi’che soto wwäiñe; quee cönä’döaacä.

¹⁴ Suddaucoomo mmaja cöneecamma’joicho dea: —¿Ñaa ’na, ane’cäämö tödööjai ñaa nai? quee. Töwö cöneccujä’a’to: —Eemiyä’jä’ancädä mma anejja nödöödö manaadätäi’che yoije’da; iiña mmädä maneementätäi’chede iiñödö que enwajiiñadö wetä. Adheejema’jocoomo de’wä mma awääjemaajo’seiñe meichäi’che; quee cönä’döaacä Juan suddau wwäiñe.

¹⁵ Soto cönwomo’ca’to Juan wääcammadö; jooje yääcamma’se cönä’ja’to Äwaanacaaneije yeichö töneecanö’e töweichomjäcä.

¹⁶ Juan cönä’döaacä tameedä chäwwäiñe: —Öwö wautisaaje männöaato tuna que. Ñäädä öncäcä ne’a’nei mmaane Epíiditu Santo que wautisaaje ayöödöaato’de, wa’to que mmaja. Töwö jäduuje jeene na. Shaajatui shaacaneije jadä’jödöödä eijai’cha wa, ye’jodhe töwö yeijäcä.

¹⁷ Töwö na äiña ji’jämjödö töja’nei eijai ñaichöje mmaja, sheemeecatoojo dha’me. Jödoodo sheemeecadö’jo yää äiña nishooma yaawä shoomatoojo taca. Iji’jämjödö mmaane niyau’cwa wa’to töwäätunque’emjönö que; quee cönä’döaacä Juan Wautiita soto wwäiñe.

¹⁸ Mädä wä’wätuujanä que, jooje anejjacoomo que mmaja, Juan töneecammajä’e cönä’jaacä aashichaato wätunnä soto wwäiñe.

¹⁹ Acu’shänä Edoodhe mmaja Juan cönwätuujai chea, Edoodhía dö’tä yeijäcä, ñäädä dhacoono Jediipe jiñamo; tameedä anejja conemjönö iiñö’jödö jäcä mmaja cönwätuujai chea.

²⁰ Yää aneeta’da Edoodhe cönä’jaacä. Jooje’cä mma töcoone’nadiiyö cöneejannäjöi Juan jedeesoje tödöödö que.

Wautisaaje Jesuuquidiito wä’döjo’jödö

²¹ Yääje mma yaawä tameedä soto wautisaaje yä’döja’comjäcä, Jesuuquidiito mmaja wautisaaje cönä’döjoi chea. Yaawä Wanaadi wwä ya’deuwödaawä caju cönaata’ducai.

²² Epíiditu Santo cönä’täi ye’wä, täne, jaduuma nönge. A’deu cönäätaacä yaawä caju ña: —Önnedö umjummadö amäädä; ta’cwaiñe wa äjääcä; quee cönäätaacä.

Jesuuquidiito adai’chomo’jödö eetöcoomo

²³ Tooni sotooto de’wä amoojadä wedu cönä’jaacä Jesuuquidiito ecammajäätödö jäcä töwaajäntädaawä. Töwö cönä’jaacä José nnejaajä, ñäädä Edí nnedö.

²⁴ Edí cönä’jaacä Mataata nnedö. Mataata cönä’jaacä Dewí nnedö. Dewí cönä’jaacä Meedequi nnedö. Meedequi cönä’jaacä Jaana nnedö. Jaana cönä’jaacä José nnedö.

²⁵ José cönä’jaacä Maatatía nnedö. Maatatía cönä’jaacä Amooso nnedö. Amooso cönä’jaacä Nawuumo nnedö. Nawuumo cönä’jaacä Eesedi nnedö. Eesedi cönä’jaacä Naacai nnedö.

²⁶ Naacai cönä’jaacä Maato nnedö. Maato cönä’jaacä Maatatía nnedö. Maatatía cönä’jaacä Seemei nnedö. Seemei cönä’jaacä José nnedö. José cönä’jaacä Judhá nnedö.

²⁷ Judhá cönä’jaacä Joaana nnedö. Joaana cönä’jaacä Deesa nnedö. Deesa cönä’jaacä Sodoowaweede nnedö. Sodoowaweede cönä’jaacä Sadaatiyeede nnedö. Sadaatiyeede cönä’jaacä Needi nnedö.

²⁸ Needi cönä’jaacä Meedequi nnedö. Meedequi cönä’jaacä Aadi nnedö. Aadi cönä’jaacä Cosán nnedö. Cosán cönä’jaacä Eedemodán nnedö. Eedemodán cönä’jaacä Eddo nnedö.

²⁹ Eddo cönä’jaacä Josué nnedö. Josué cönä’jaacä Eediyeeseede nnedö. Eediyeeseede cönä’jaacä Jodín nnedö. Jodín cönä’jaacä Mataato nnedö. Mataato cönä’jaacä Dewí nnedö.

³⁰ Dewí cönä’jaacä Simeón nnedö. Simeón cönä’jaacä Judhá nnedö. Judhá cönä’jaacä José nnedö. José cönä’jaacä Jonán nnedö. Jonán cönä’jaacä Eediyaquín nnedö.

³¹ Eediyaquín cönä’jaacä Medeea nnedö. Medeea cönä’jaacä Maiñán nnedö. Maiñán cönä’jaacä Mataata nnedö. Mataata cönä’jaacä Natán nnedö. Natán cönä’jaacä Dawí nnedö.

³² Dawí cönä’jaacä Isaí nnedö. Isaí cönä’jaacä Oweede nnedö. Oweede cönä’jaacä Wooso nnedö. Wooso cönä’jaacä Saadamón nnedö. Saadamón cönä’jaacä Naasón nnedö.

³³ Naasón cönä’jaacä Amiinadhaawa nnedö. Amiinadhaawa cönä’jaacä Adaama nnedö. Adaama cönä’jaacä Eesedón nnedö. Eesedón cönä’jaacä Jaade nnedö. Jaade cönä’jaacä Judhá nnedö.

³⁴ Judhá cönä’jaacä Jacoowo nnedö. Jacoowo cönä’jaacä Isaaca nnedö. Isaaca cönä’jaacä Aawadán nnedö. Aawadán cönä’jaacä Tadé nnedö. Tadé cönä’jaacä Nacoodo nnedö.

³⁵ Nacoodo cönä’jaacä Seduucu nnedö. Seduucu cönä’jaacä Dacau nnedö. Dacau cönä’jaacä Pedeeque nnedö. Pedeeque cönä’jaacä Eweede nnedö. Eweede cönä’jaacä Saada nnedö.

³⁶ Saada cönä’jaacä Caiñán nnedö. Caiñán cönä’jaacä Aajasaada nnedö. Aajasaada cönä’jaacä Seeme nnedö. Seeme cönä’jaacä Noé nnedö. Noé cönä’jaacä Dameeque nnedö. Dameeque cönä’jaacä Matuusadén nnedö.

³⁷ Matuusadén cönä’jaacä Enooco nnedö. Enooco cönä’jaacä Jadé nnedö. Jadé cönä’jaacä Maadadeede nnedö. Maadadeede cönä’jaacä Caiñán nnedö. Caiñán cönä’jaacä Enoose nnedö.

³⁸ Enoose cönä’jaacä Seete nnedö. Seete cönä’jaacä Adhán nnedö. Adhán cönä’jaacä Wanaadi nnedö.