DUUCA 24 - Wanaadi A'deddu

Töwäämaajo jonno Jesuuquidiito waadonca’jödö

¹ Semaana waajäntädö anootoi’chädö wawaanadaawä ñanno wodiiñamo cönennacaicho yaawä äwa döiña, juu shimi’jotoojo tönsomaajätö’jocoomo dha’meiñe. Anejjacoomo wodiiñamo chääjadäiñe cönta’to dea.

² Töwä’döa’comjäcä täseeca täju cöneedantoicho äwa nata’tajonno.

³ Yaawä äwa taca töwoomonga’comjäcä cajiichaana Jesuuquidiito equeejödö a’que cöneedantoicho.

⁴ Tönwanno cönääcatoncaicho yaawä. Yää jäcä a’que chö’tajäätödaawäiñe aacä dhanwaacomo yö’täiñe cönäänejoicho, yoomöcoomo weijotä.

⁵ Ñanno wodiiñamo tösaade töweichomjäcä tä’mudhe cönä’döicho, tu’dhe. Yaawä ñanno dhanwaacomo cönä’döa’to chäwwäiñe: —Ane’cotoojo nudooto mujiiyato yä’ja’a’como weichojo aca?

⁶ A’que na sadä; töwaadonca na. Ätö’tatääcä äwwäiñe yääcamma’jödö jäcä Caadideea ña töweichö dea,

⁷ yää yääje cönä’doä’dö: “Soto nnedö töwä’tueemöje na conemjönö dönnamo wwäiñe, cuduusa jäcä tajoijoomöje mmaja, aaduwaawä anoototo ai töwaadoncaamöje mmaja;” quee cönä’döa’dö; quee cönä’döa’to ñanno dhanwaacomo wodiiñamo wwäiñe.

⁸ Yaawä ñanno wodiiñamo cöntö’taicho Jesuuquidiito wa’deuwö’jödö jäcä.

⁹ Äwa döiñano’jödö tameedä cöneecammajäätöicho ñanno amoojadooto de’wä tooni’chomo wwäiñe, tameedä anejjacoomo wwäiñe mmaja.

¹⁰ Ñanno wodiiñamo cönä’ja’to Madía Maacadeena, Juana mmaja, Madía, Jacoowo dhenö mmaja, anejjacoomo mmaja. Tönwanno yää cöneecammajäätöicho anonta’como wwä.

¹¹ I’jeta’jödö wa’deuwödö nönge mma ya’deuwödööcomo cönäätaacä ñanno anonta’como wwäiñe. Tönwanno aneecamjö’da cönä’ja’to.

¹² Peedhodo mmaane cöneeja’cai; tamjä’ne cöntämä äwa döiña. Chaaca eneea’jäcä saawana mma cöneedantäi yäätä, tösooma. Maa taca cönennacai yaawä, töneene’jödö jäcä töwääcatonca.

Emaú ñancomo wötäädö wwäiñe Jesuuquidiito ene’jödö

¹³ Yää anooto awä dea aacä ñoowanoomadö jimmä Emaú ña cönta’to. Amoinche’daiche mma yää cönä’jaacä Jeduusadén ñano jäcä, aacä shii wääseca’jödö wötäänä ’cäwa’cä mma.

¹⁴ Tameedä yeeja’dätä’jödö jäcä töwa’deuwancädäiñe cönta’to.

¹⁵ Yääje ya’deuwödaawäiñe, yäätäccujäätödaawäiñe mmaja, Jesuuquidiito cöneejodöicho; chääjadäiñe cöntaacä.

¹⁶ Tönwanno tänu’dueiñe cönä’ja’to; töwwäiñe ene’mataame Jesuuquidiitoje yeichö aneene’jutu’da cöneiya’to.

¹⁷ Töwö Jesuuquidiito cönä’döaacä chäwwäiñe: —¿Ane’cäämö jäcä adha’deuwato ääma tai aweejödaawäiñe? ¿Ane’que’nei wentumje maato? quee.

¹⁸ Ñäädä Quedeeojaasa täätö cöneccujä’acä: —Tameedä soto dhowaanäcäiñe na Jeduusadén ña yeeja’dätä’jödö jäcä. ¿Amäädä mma ca aneeta’da manä, iiña awei’jödö weichaame? quee cönä’döaacä.

¹⁹ Töwö cönä’döaacä chäwwäiñe: —¿Ane’cäämö mma? Tönwanno cönä’döa’to: —Yää Jesuuquidiito Naasade ñano jäcä cöneeja’dätäichö. Töwö cönä’jaacä Wanaadi wa’deuwödö ecammajä’nei jäduujato. Jäduuje cönä’ja’dea täneemö tödöödö jäcä, tameedä soto neneedöcoomoje, Wanaadi owaadäädä mmaja.

²⁰ Yaawä Wanaadi wwä töwa’deuwaamo edhaajotoncomo, ñaa cajiichaanaichomo mmaja, cuntuicho ñäädä, emaadö a’de’tädö wetä, cuduusa jäcä ajoijojoodö wetä mmaja,

²¹ chäwwä iisadaaediitacoomo ewaanacaatäiñe ñaa cöneecanö’a’dö’je. Aaduwaawä anooto nä’döi eduuwa yää weja’dätä’jödö.

²² Yaawäne’ tööjanaacadä ñaa wodiichö ñaa ecaatoncaicho. Tönwanno neiyaato äwa döiña.

²³ Chääquejöödö a’que edanta’jäcä nennacaicho yaawä; “Nudä na;” quee töwwäiñe amoode wä’dö’jocoomo necammajä’anto.

²⁴ Ñaa jimmä neiyaato dea yaawä äwa ene. Tönwanno nedantoicho wodiiñamo necammajäätö’jocoomo nönge, Jesuuquidiito aneene’da töweichaameiñe; quee cönä’döa’to Jesuuquidiito wwä.

²⁵ Yaawä Jesuuquidiito cönä’döaacä chäwwäiñe: —¿Aaquene mädä wa’cä aneene’jutu’da maato dea? Mädä wa’cä tameedä Wanaadi wa’deuwödö ecammajä’nnamo nimenno’jocoomo aneecamjö’da maato.

²⁶ ¿Mädääje äntunamjö’da ca Äwaanacaanei weichojo cönä’jaacä, o’jodhe töwä’döjootojo owaajo? quee cönä’döaacä Jesuuquidiito ñanno aaco’como wwäiñe.

²⁷ Töwö cönaajäntäi yaawä chäwwäiñe ecammajäätödö töjääcä Wanaadi a’deddu imennaajä jäcä, Moisé nimennä’jödö jonno tameedä Wanaadi wa’deuwödö ecammannamo nimenno’jocoomo tacoicha tödööene.

²⁸ Cönä’döicho yaawä jataaca, töwä’döto’como döiña. Töwö Jesuuquidiito cömja’dä’a’to.

²⁹ Tönwanno wejiiñäje tödö’täiñe cönnö’nä’ja’to. —Eetä eichä ñaa dö’tä, mäntä mma oco’momö’no; quee cönä’döa’to. Jesuuquidiito cönoomomöi yaawä chääjadäiñe.

³⁰ Yaawä chääjadäiñe töwääwashinchädaawä töwö uu cönannäjöi; chääjäcä cöna’deuwöi yaawä. I’yajäätödö’jo cunu’jätöi chäwwäiñe.

³¹ Yaawä jeene tönwanno cönäänu’ducaicho. Jesuuquidiitoje yeichö cöneedantoicho. Jadheedä töwö cönännamjöi yaawä.

³² Tönwannoje dea cönä’döa’to yaawä: —¿Cajoojoi jönca ñeecammajäätödö, ääma taawä cöwwä ya’deuwödaawä, Wanaadi a’deddu imennaajä wä’dödö jäcä cöneetadööje ecammajäätödaawä mmaja? quee cönä’döa’to.

³³ Yaawä dea mmaane tönwanno cönääma’toicho dea; Jeduusadén ña cönennacaicho. Cöneejodöicho ñanno amoojadooto de’wä tööni’chomo we’jumma’como, anejjacoomo soto mmaja.

³⁴ Ñanno cönä’döa’to aaco’como wwäiñe: —Cädhaajotoncomo naadoncai chämma; Simón wwä näänejoi; quee cönä’döa’to.

³⁵ Yaawä ñanno aaco’como cöneecammajäätöicho yää ääma taawä töjääcäiñe yeeja’dätä’jödö, uu i’yajäätödaawä Jesuuquidiitoje yeichö töwwäiñe edantä’jödö mmaja.

Tönoowanoomadö wwäiñe Jesuuquidiito wäänejo’jödö

³⁶ Yääje ya’deutaameiñe Jesuuquidiito cönäänejoi dhantawäiñe. Töwö cöna’dejjaicho; cönä’döaacä: —Täncanoode’da aweicho’como äwwäiñe yei’she wa; quee.

³⁷ Tönwanno cönääcatoncaicho; jooje tösaade cönä’ja’to. Äcaatomjä töwwäiñe eneeaatäi cöneecanö’a’to.

³⁸ Jesuuquidiito cönä’döaacä chäwwäiñe: —¿Ane’que’nei töwääcatonca maato? ¿Ane’que’nei cone’da ätö’tajä’ato?

³⁹ Eneetäcä’ma yaamädö, u’judu mmaja. Ñäädä dea dajaane öwö. Cajoojotääcä’ma; cäneetäcä. Äcaatomjä tujuune’da töweiye nai, se’jä’da mmaja, cäne’maatoodöje’da; quee cönä’döaacä.

⁴⁰ Yääje töwä’döancädä tamäädö cöneenejoi chäwwäiñe, tu’judu mmaja.

⁴¹ Jooje ta’cwaiñe töweijäcäiñe aneecamjö’da dea cönä’ja’to. Töwääcatonca dea cönä’ja’to. Yaawä Jesuuquidiito cönä’döaacä chäwwäiñe: —¿Tänäämö ’je ca maato?

⁴² Yaawä camjä cuntuicho chäwwä, na’cwacaano asu’caajä, wanä weccudui mmaja.

⁴³ Jesuuquidiito cönäänäi yaawä; ñeenedööcomooje cönääwashinchäi.

⁴⁴ Yaawä töwö cönä’döaacä chäwwäiñe: —Yää öwö jääcä cöneeja’dätäichö cönä’jaacä ajaadäiñe weichö töneecammajä’e wä’jaaquennö nönge dea. Öwö äwwäiñe töneecammajä’e wä’jaaquene jääcä Moisé nimennä’jödö töweeja’dä’emooje yeichö, Wanaadi wa’deuwödö ecammannamo nimenno’jocoomo töweeja’dä’emooje yeichö mmaja, Wecanta’ñotoojo jajeedai’chädö jäcä naadö mmaja; quee cönä’döaacä Jesuuquidiito.

⁴⁵ Yaawä töwö cuntui shejjedööcomo Wanaadi a’deddu imennaajä dhowaanäcäiñe yä’dötoojo.

⁴⁶ Töwö cönä’döaacä chäwwäiñe: —Mädääje Wanaadi a’deddu imennaajä na. Mädääje Äwaanacaanei wäntunaanö’tojo cönä’jaacä, aaduwaawä anoototo ai töwäämaajo jonno yaadoncatoojo mmaja.

⁴⁷ Jeduusadén ñano jonnoto’jödöödä töwö chäätö joi tameedä soto wwäine ätääcammajai ña tötö’tajäätödööcomo sha’duminchatoojo, töcoone’nadiiyöcoomo encwanno’jotoojoje.

⁴⁸ Änwanno ñanno yää enennamo’jödö, ecammajä’nnamooje töweiyaamo.

⁴⁹ Äwwadäädäiñe öwö wanonta’de Jaaja necamma’jödö. Eetäädä, Jeduusadén ñaadä eichäcä’de, caju ñanno äjääduduucomo wä’dödö jonaane; quee cönä’döaacä Jesuuquidiito tönoowanoomadö wwäiñe.

Caju ña Jesuuquidiito wäncu’jödö

⁵⁰ Yääje mma yaawä Jesuuquidiito tönoowanoomadö cönaadoicho jata tö’cäi, Wetaaniya ña tödööene. Tamäädö cönnöi ye’cäcäiñe; Wanaadi wwä cöna’deuwöi chääjäcäiñe.

⁵¹ Chääjäcäiñe töwa’deuwö’jeje töwö cönsancwaicho; caju ña cönaatadoojoi yaawä.

⁵² Yaawä ya’demeecödö’jo, ñoowanoomadö cönennacaicho Jeduusadén ña, ta’cwaiñeiñe jooje.

⁵³ Wanaadi weichojo taca töweiye cönä’ja’to Wanaadi wwä aashicha wa’deunäje. Amén.