DUUCA 23 - Wanaadi A'deddu

Pidaato je’taca Jesuuquidiito wei’jödö

¹ Yaawä ñanno jooja’como soto cönammöicho, Jesuuquidiito cönaadoicho Pidaato wwadäädä.

² Iiña cönaajäntoicho yaawä ementädö; cönä’döa’to: —Määdhä ñaa cöneedantäi soto i’jedäädöcoomoje. Töwö chäwwäiñe jödaata äntujo’da acu’shänä wwä. Äwaanacaaneije töwäätä’tä weneene, cajiichaanaje mmaja; quee cönä’döa’to.

³ Yaawä Pidaato Jesuuquidiito cöneecamma’joi: —¿Judhío Cajiichaanaichomo amäädä? quee cönä’döaacä. Jesuuquidiito cöneccujä’acä: —Ee, ñäädä öwö, mecammaadö; quee cönä’döaacä.

⁴ Yaawä Pidaato cönä’döaacä Wanaadi wwä töwa’deuwaamo edhaajotoncomo wwäiñe, soto wwäiñe mmaja: —Conemjönö määdhä nödö’jödö aneejodö’da weiya; quee cönä’döaacä.

⁵ Tönwanno jooje’cä mma cöna’deuwa’to yaawä; cönä’döa’to: —Tameedä Judheea ñancomo töni’jedäiñe weneene töwwä owaanomaadö que, Caadideea ña yaajäntä’jödö sadä tödööene; quee cönä’döa’to ñanno Wanaadi wwä töwa’deuwaamo edhaajotoncomo.

Edoodhe je’taca Jesuuquidiito wei’jödö

⁶ Yää eta’jäcä Pidaato wwä, töwö soto cöneecamma’joicho Caadideea ñanooje Jesuuquidiito weichö jäcä.

⁷ Cajiichaana Edoodhe nonoodö de’wonooje Jesuuquidiito weichö eta’jäcä töwwä, chäwwadäädä cönaadojoi yaawä, yää anooto awä Edoodhe Jeduusadén ña yei’jödö weijäcä.

⁸ Jesuuquidiito töwwä eneea’jäcä, Edoodhe jooje cöna’cwainchai, ene’se töwei’jödö weijäcä. Jooje chääcadö töneeta töwei’jödö weijäcä, töwö ene’se cönä’jaacä täneemö tödöödö chäwwä.

⁹ Yääje yeijäcä jooje cöneecamma’jojä’acä. Jesuuquidiito aneccujäätö’da cöneiyacä.

¹⁰ Yäätä cönä’ja’to dea Wanaadi wwä töwa’deuwaamo edhaajotoncomo, judhío owaanomannamo mmaja; tönwanno jooje Jesuuquidiito cöneementa’to.

¹¹ Yaawä Edoodhe, shootoi suddau mmaja, Jesuuquidiito cönquimmajä’a’to. Tönwanno enno’jätöödöje cönwontoicho cajiichaana womö awä. Yaawä Edoodhe cöniiñacaanö’joi chea Pidaato wwadäädä.

¹² Yää anooto awä Pidaato cöneeconeecaicho Edoodhe acä, äätu’dedööje töweichöcoomo jonno.

Tämaamöje Jesuuquidiito ecamma’jödö

¹³ Yaawä Pidaato cöni’jummaicho ñanno Wanaadi wwä töwa’deuwaamo edhaajotoncomo, cajiichaanaja’como mmaja, jooje anejjacoomo soto mmaja.

¹⁴ Töwö cönä’döaacä chäwwäiñe: —Änwanno määdhä mene’to öwwadäädä soto i’jedääneichomooje e’tancädä. Öwö wecamma’jojäätöi aneetadööcomooje. Aneejodö’da weiya conemjönö iiñö’jödö, mementaatoodöje’da.

¹⁵ Edoodhe mmaja a’que necamma’joi chea, cöwwadäädäiñe niiñacaanö’joichö naane’. Tämamje’da dajaane na, conemjönö iiñö’jödö töweiye yeichöjöönö.

¹⁶ Imaaminchadö’jo mmaane wishaaca’de; quee cönä’döaacä Pidaato.

¹⁷ Yää comjedensiya tödöödawä tooni jedeeso u’catoojo Pidaato wwä cönä’jaacä, töweichö nöngeedä.

¹⁸ Yaawä tameedä soto aacoodaane cöncä’tömjä’a’to: —Adoojocä mä’dä. Wadaawaane u’cacä; quee cönä’döa’to.

¹⁹ Ñäädä Wadaawa cönä’jaacä jedeesoje yääwaacajo’jödö acu’shänä tu’de’tä’jödö weijäcä töwwä yää jataawä, soto ema’jödö weijäcä mmaja.

²⁰ Yaawä Pidaato cöna’deuwöi chea chäwwäiñe, Jesuuquidiito shaaca’se töweijäcä.

²¹ Tönwanno jooje’cä mma cöncä’tömjä’a’to yaawä; cönä’döa’to: —Cuduusa jäcä ajoijojoocä. Cuduusa jäcä ajoijojoocä; quee.

²² Yaawä aaduwaawädeeto ai Pidaato cöna’deuwöi chäwwäiñe: —¿Ane’cäämö jo’tädööje? ¿Äshono yää conemjönö iiñö’jödö? Tämamje’da dajaane na, conemjönö iiñö’jödö töweye yeichöjöönö. Imaaminchadö’jo mmaane wishaaca’de; quee Pidaato cönä’döaacä.

²³ Tönwanno töcä’de cöncä’tömjä’a’to yaawä; cuduusa jäcä cönaajoijoja’to. Yääje töcä’tömjätöödöcoomo que tumjummadööcomo cöneejodöicho ñanno soto, Wanaadi wwä töwa’deuwaamo edhaajotoncomo mmaja.

²⁴ Yaawä Pidaato imjummadööcomo woije cönnöjoi.

²⁵ Jedeesoje yeichö jonno töwö cunu’cajoi ñäädä acu’shänä tu’de’tänei’jödö, soto emaanei’jödö. Jesuuquidiito mmaane yoijeiñe mma cönnöi.

Cuduusa jäcä Jesuuquidiito ajoijo’jödö

²⁶ Jesuuquidiito töwwäiñe adäädawä soto cönaajoicho, audaajä awonno yeejödö; Sideene ñano cönä’jaacä ñäädä, Simónje chäätö. Ñäädä de’wä cuduusa cönnöicho Jesuuquidiito ncäcä adäädö wetä chäwwä.

²⁷ Jooje soto Jesuuquidiito ncäcä cönta’to, wodiiñamo mmaja. Ñanno wodiiñamo jooje wentumje cönä’ja’to; ijunnei cönaamoa’to.

²⁸ Jesuuquidiito chäwwadäädäiñe cönä’jedennacai; cönä’döaacä: —Änwanno wodiiñamo Jeduusadén ñancomo, öwö junnei mma maamotäi. Änwanno aweicho’como jäcääne aamotääcä, ännacontoncomo weicho’como jäcä mmaja.

²⁹ Yeetunu eneetojo cu’nädö ne’a’de; edääje soto nä’döaato’de yaawä: “Ta’cwaiñe ñäädä ennecaajönö, ñäädä tönnedö ennuichanei’jödööjönö, ñäädä tönnedö yo’janei’jödööjönö;” quee nä’döaato’de yaawä.

³⁰ Yaawä edääje soto nä’döaato’de jöö wwä: “Ñaa de’cäi adhe’duccacä;” quee, “Ñaa nejontäcä;” quee mmaja.

³¹ Natö sheenatoode mädääje nödööaatoone’, töwaacö’je mma yu’taajä tödööjai ñaato; quee cönä’döaacä Jesuuquidiito.

³² Chääjadä cönaadäa’to dea aacä conemjönö dönnamo’jödö, chääjadä tämaamoje.

³³ Cönä’döicho yaawä Ye’caichö’jödö ña. Yäätä cuduusa jäcä cönaajoijoicho. Ñanno conemjönö dönnamo’jödö iiñäcä cönaajoijoicho dea, ääjato.

³⁴ Yääje mma yaawä cuduusa jäcä tajoijodaawä Jesuuquidiito cönä’döaacä: —Jaaja, choone’nadiiyöcoomo encwanno’joca; towaanojöönöcoomo mädääje nödööaato; quee cönä’döaacä. Yaawä ñanno suddau yoomö’jödö töwaadäiñe cöneemecantoicho, wä’cana’canä tödöödö’jo.

³⁵ Yäätä soto cönä’ja’to ene’madööje. Cajiichaanaja’como jadä’jödöödä cönenno’jä’a’to; cönä’döa’to: —Anejjacoomo töneewanaacaiñe cönä’jaacä; töwö dea nääwanaaca’ñojo eduuwa, Äwaanacaaneije Wanaadi nanontä’jödööje töweiya’jäcä; quee cönä’döa’to.

³⁶ Suddaucoomo mmaja cönenno’jä’a’to dea. Chäwwadäädä cöntonto, tutuunato emjodö wetä chäwwä.

³⁷ Tönwanno cönä’döa’to chäwwä: —Judhío Cajiichaanaichomooje aweiya’jäcä, amäädä dea ääwanaacacä; quee cönä’döa’to.

³⁸ Iju’jä ejoodhe cönä’jaacä quidiiyeeco a’deucwe imennaajä, datiino a’deucwe mmaja, eewedeeo a’deucwe mmaja; “Määdhä ñäädä judhío Cajiichaanaichomo;” quee cönä’jaacä imennaajä.

³⁹ Yääje mma yaawä tooni conemjönö dönei’jödö, iiñäcä ajoijaajä cönä’ja’dö, Jesuuquidiito cöneetana’ta’dea; cönä’döaacä: —Äwaanacaaneije aweiya’jäcä, amäädä dea ääwanaacacä, ñaa mmaja ewaanacaacäde; quee cönä’döaacä.

⁴⁰ Yaawä yeichacoono, cuduusa jäcä ajoijaajä cönä’ja’dö mmaja, töweichacoono cömjiiyemeecöi; cönä’döaacä: —¿Wanaadi jadä’jödöödä onnontä’da ca manä, ocoone’nadiiyö jo’tädööje äwäntunaanö’taame?

⁴¹ Cöwö sa’donna cäntunaanö’a cöcoone’nadiiyö jo’tädööje; määdhä mmaane conemjönö iiñö’jödö ’je’da na; quee cönä’döaacä.

⁴² Yaawä töwö cönä’döaacä Jesuuquidiito wwä: —Jesuuquidiito, jääcä ätö’tacä’de cajiichaanaje äwääneja’jäcä; quee cönä’döaacä.

⁴³ Yaawä Jesuuquidiito cönä’döaacä chäwwä: —Chäänönge yääje wä’döa äwwä, eduuwa dea jaadä ma’de Aashichaato ña; quee cönä’döaacä Jesuuquidiito chäwwä.

Jesuuquidiito wääma’jödö

⁴⁴ Yaawä anunnaque yeichö tameedä nono weichö wa’cä cöntööjamöi i’ya’wä tödööene.

⁴⁵ Shii änweijo’da cönä’jaacä yaawä. Yaawä Wanaadi weichojo acä’jaajä a’dutu cöneeshiichai annai.

⁴⁶ Yääje mma yaawä Jesuuquidiito töcä’de cöna’deuwöi; cönä’döaacä: —Jaaja, äwwä tödööcä yeecato; quee cönä’döaacä. Yääje töwä’dödö’jo cönaatacoichai.

⁴⁷ Yää eneea’jäcä ñäädä suddau edhaajotoncomo wwä töwö aashicha cöna’deuwöi Wanaadi jäcä; cönä’döaacä: —Chäänöngato dämma määdhä nä’jaanä; quee cönä’döaacä.

⁴⁸ Tameedä ñanno jooja’como soto, ene ye’a’como’jödö, yää töwwäiñe eneea’jäcä, wentumjeiñe tömmaichomo taca cönennacaicho yaawä.

⁴⁹ Ñanno Jesuuquidiito jadoncomo’jödö mmaane tameedä yää cöneene’ma’to amoinchenno, ñanno wodiiñamo mmaja, Caadideea ñanno chääjadoncomo we’a’como’jödö.

Jesuuquidiito ewaaca’jödö

⁵⁰ Yäätä cönä’jaacä dhanwa, Joséje chäätö. Aadimaatea ñano töwö cönä’jaacä, yää Judheea ñano jata. Äcamma’jonnamo jimmä töwö cönä’jaacä. Dhanwa aashichaato cönä’jaacä töwö, chäänöngato mmaja.

⁵¹ Ñäädä cönä’jaacä Wanaadi cajiichaanaje yäänejootojo yoomo’nei. Jesuuquidiito emaadö a’de’tädö ani’wa’tä’da töwö cöneiyacä.

⁵² Ñäädä José cöntämä Pidaato döiña Jesuuquidiito equeejödö e’ca’e.

⁵³ Jesuuquidiito equeejödö enö’ta’jäcä camiisha tajääde’dato que cönaiñantäi yaawä. Cöneewaacai yaawä äwa ta’cu’täjöönö aca, täju töcaajä aca.

⁵⁴ Yää cönä’jaacä wecoonecaatojo anootoi’chädö co’momöödawä, wäädeetatoojo anootoi’chädö owaajo.

⁵⁵ Ñanno wodiiñamo, Caadideea ñanno Jesuuquidiito jadoncomo we’a’como’jödö, ewaacannamo ncäcäiñe cöntonto. Tönwanno äwa cöneenea’to, chääquejöödö ewaacadö mmaja.

⁵⁶ Tömmaichomo tacaiñe töwennaca’comjäcä tönwanno juu shimi’jotoojo cönsomaajä’a’to. Wäädeetatoojo anootoi’chädö awä cönäädeetaicho yaawä, waanontä’jä wä’dödö woije.