DUUCA 22 - Wanaadi A'deddu

Jesuuquidiito emaadö a’de’tä’jödö

¹ Yaawä amoinche’da cönä’jaacä uu ummannä’cajootojo ’jemjönö täu’tojo anootoi’chädö, yää Weja’dätä’jä anooto comjedensiyai’chädö tödöötojo.

² Yaawä Wanaadi wwä töwa’deuwaamo edhaajotoncomo, judhío owaanomannamo mmaja, a’que cunuujiya’to Jesuuquidiito emaatojo. Tönwanno soto cönnonta’to.

³ Yaawä Caajuushawa cönääwaacai Juudha aca, ñäädä Icaadiyooteje chäätö cönä’ja’dö, ñäädä amoojadooto de’wä aaco’como jimmä.

⁴ Ñäädä cöntämä Wanaadi wwä töwa’deuwaamo edhaajotoncomo jadäiñe a’deuwe, Wanaadi weichojo edhaamo jadäiñe a’deuwe mmaja, chäwwäiñe töwwä Jesuuquidiito u’tojo jäcä.

⁵ Tönwanno cöna’cwainchaicho yaawä; chäwwä cöneecammaicho jödaata utuudu.

⁶ Yaawä Juudha cöneecammai chäwwäiñe töwwä Jesuuquidiito u’tojo. Yää ’jeje töntö’tamme’que cönä’jaacä soto ’nawäiñe Jesuuquidiito u’tojo.

Awa’deene Santa Seena tödö’jödö

⁷ Uu ummannä’cajootoojo ’jemjönö täu’tojo cu’nädö aca cönä’döi yaawä, yää Weja’dätä’jä anooto comjedensiyai’chädö tödöötojo. Yää anooto awä oweeja nnedö’cä saaquidiijiisiyooje tönaamiñä’ca cönä’ja’to.

⁸ Yaawä Jesuuquidiito cönaanontoicho Peedhodo, Juan mmaja; cönä’döaacä chäwwäiñe: —Ojoncomo; Weja’dätä’jä anootoi’chädö awä cöwääwashinchoto’como choonecaatantäcä; quee cönä’döaacä.

⁹ Ñanno cönä’döa’to: —¿Äsha ñaa nichoonecaanä?

¹⁰ Jesuuquidiito cönä’döaacä chäwwäiñe: —Jataaca äwä’döa’comjäcä dhanwa mejoodöaato’de, tuna dha’me, tucuudi aca. Chääjadä ojoncomo’de. Yää maa chaaca nomonga’dedö taca mmaja odhoomontäcä’de änwanno.

¹¹ Edääje caichäcä’de yää maa edhaajä wwä: “Yääje Owaanomaanei äwwä nä’döaanä: ¿Äsha ä’sa nai noowanoomadö jadäiñe Weja’dätä’jä anooto awä wääwashinchotoojo?” quee caichäcä’de chäwwä.

¹² Yaawä töwö necamma’de äwwäiñe ä’sa adai’joto, taawa de’wä, töcoonecaajä’e. Yäätä cöwääwashinchoto’como choonecaatäcä’de; quee cönä’döaacä Jesuuquidiito.

¹³ Ñanno cöntonto yaawä. Tameedä cöneedantoicho Jesuuquidiito necamma’jödö nönge. Yäätä Weja’dätä’jä anootoi’chädö awoono wääwashinchotoojo cönconeecaicho.

¹⁴ Chu’nädö aca yä’döa’jäcä Jesuuquidiito cönaatajiimai meesa dö’tä, ñanno amoojadooto de’wä aaco’como anonta’como jadäiñe.

¹⁵ Yaawä töwö cönä’döaacä chäwwäiñe: —Jooje tötö’tajä’e wä’jaaquene edä Weja’dätä’jä anootoi’chädö awä ajaadäiñe wääwashinchotoojo jäcä, wäämadö owaajo.

¹⁶ Öwö yääje wä’döa äwwäiñe, ajaadäiñe Weja’dätä’jä anooto awoono amiiñä’caajä änäänä’da wa’de eduuwa, yää Weja’dätä’jä anooto cu’tädö yä’dödö wa’cä, Wanaadi cajiichaanaje yäänejoodö wa’cä; quee cönä’döaacä Jesuuquidiito.

¹⁷ Yaawä töwö wocö cönannäjöi; chääjäcä cöna’deuwöi; cönä’döaacä: —Edä; entäcä tameedä änwanno; awaadäiñe ecaamotääcä.

¹⁸ Yääje wä’döa äwwäiñe, chääjedöödö eccudu aneenö’da wa’de eduuwa Wanaadi cajiichaanaje yäänejoodö wa’cä; quee cönä’döaacä.

¹⁹ Uu daja cönannäjöi chea yaawä. Chääjäcä töwa’deuwö’jeje, cöni’yajäätöi. Chäwwäiñe cuntui yaawä; cönä’döaacä: —Edä yää yeejö, äjääcäinchädäiñe tu’emö. Edääje tödöötäcä’de jääcä ätö’tato’comooje; quee.

²⁰ Yääje mmaja, töwääwashinchädööcomo’jo, wocö cönannäjöi chea; cönä’döaacä: —Edä wocö yää yaaquiyö, chäänönge Wanaadi necamma’jödö yeichö ene’ju’tojo, äjääcäinchädäiñe töja’emö.

²¹ “Eneetäcä’ma eduuwa, yu’nei amäädö meesa de’wä naadö, yaamädö dö’tä.

²² Soto nnedö nä’döja’de töwä’döjootojo nönge dea. Yaawääne’ wentumje na’de ñäädä Soto nnedö u’nei’jödö; quee cönä’döaacä Jesuuquidiito.

²³ Yaawä ñoowanoomadö cönaajäntoicho töwwäädäiñe töwäätäcamma’jodööcomo: —¿Änääcö cantawäiñe mädä tödöötai? quee cönä’döa’to.

¿Änääcö o’jodhe’cä nai?

²⁴ Tönwanno cönaajäntoicho yaawä töwäätäccujäätödööcomo; ¿Änääcö cantawäiñe o’jodhe’cä nai? queeto jäcä cönäätäccujä’a’to.

²⁵ Yaawä Jesuuquidiito cönä’döaacä chäwwäiñe: —Edä nono de’woncomo acu’shänääcomo tösootoi jäduuje tönaanontäiñe weneeneto. Ñanno chäädhajootoncomo aashicha tödönnamooje töwäätä’täjo weneeneto dea.

²⁶ Änwanno mmaane yääje eijai’cha maato. Ñäädä adhantawäiñe cajiichaanajaato, odho’noncomo nönge eijai ña; ñäädä adhaanontäneichomo, anooje mmaja eijai ña dea.

²⁷ ¿Äshono ca cajiichaanaje jeene töweiye nai, äwanshi ejoodönei ’ja, meesa de’wono wääwashinchädööne? ¿Meesa de’wono wääwashinchädö jönca? Öwö mmaane wa ajaadäiñe äwwäiñe tödöönei nönge.

²⁸ “Änwanno jaadä dea töweiye mä’ja’quene wäntunamjödö jona’da.

²⁹ Yääje yeijäcä cajiichaanaje aweicho’como wu’a’de äwwäiñe, Jaaja öwwä cajiichaanaje weichojo cuntuichöje mmaja.

³⁰ Jaadä määwashinchaato’de yaawä cajiichaanaje weichö; mude de’wä mmaja mataajimaato’dede ñanno Iisadaaeeda weichö cajiichaanaichomooje, ñanno amoojadooto de’wä aaco’como iju’jä naatoodö; quee cönä’döaacä Jesuuquidiito.

Peedhodo wwä töjoome’dotoojo Jesuuquidiito necamma’jödö

³¹ Yaawä Cädhaajotoncomo cönä’döa’dea: —Amäädä Simón, Caajuushawa adhe’ca’täne ayuunacaadöcoomo wetä, tönö’nä momjödö töweiye naichöje.

³² Yääje yeijäcä Wanaadi wwä we’ca’ne ecamjödööje dea aweichojo. Yaawä aweeconeeca’jäcä ajimmä ijäädu’täcooto’de; quee cönä’döaacä Jesuuquidiito.

³³ Simón cönä’döaacä chäwwä: —Cajiichaana, ajaadä täjai wa jedeesoje wä’dödö jonaane, wäämadö jonaane mmaja; quee cönä’döaacä.

³⁴ Yaawä Jesuuquidiito cönä’döaacä chäwwä: —Edääje wä’dö’se wa äwwä, Peedhodo. Edä coijaichawä dea wameedi wetöömödö owaajodä amäädä aaduwaawäde cöjoome’da’de; quee cönä’döaacä Jesuuquidiito.

Tucu’nädö amoinche’da yeichö Jesuuquidiito necamma’jödö

³⁵ Yääje mma yaawä Jesuuquidiito cönä’döaacä tönoowanoomadö wwäiñe: —Yaawä töcanwaiche’da manaanontätäänedaawä, ajöödataichomo ewöötö ’je’da mmaja, asaajatuichomo ’je’da mmaja, ¿äwwäiñe tujunnato ’je’da jönca cönä’jaacä? quee cöneecamma’joicho. —Ng’jn; quee cöneccujä’a’to ñanno.

³⁶ Yaawä Jesuuquidiito cönä’döaacä chäwwäiñe: —Eduuwaane ñäädä töcanwaichato töcanwai nado’ñojo, jödaata ewöötö mmaja. Ñäädä tösaudaichemjönö töwoomo nejeemajo’ñojo, chääje’jödö que sauda aneejemaiye.

³⁷ Edääje wä’döa äwwäiñe, Wanaadi a’deddu imennaajä naadöje töwä’döeemöje wa, yää edääje yä’dödö naichö: “Conemjöncomo jimmäje cöne’toicho;” quee. Tameedä yää Wanaadi a’deddu öwö jääcä tömennä naadö eja’dätä’da eijai’cha na; quee cönä’döaacä Jesuuquidiito.

³⁸ Yaawä ñoowanoomadö cönä’döa’to: —Cajiichaana, edä na aacä sauda; quee. Töwö cönä’döaacä chäwwäiñe: —Na’ñojo eduuwa; quee.

Jeseemaní ña Jesuuquidiito Wanaadi wwä ya’deuwö’jödö

³⁹ Yaawä Jesuuquidiito cöneeja’cai. Odiiwo ’jödö ña cöntämä, töweichö nöngeedä. Ñoowanoomadö inchäcä cöntonto.

⁴⁰ Iiña töwä’döa’comjäcä Jesuuquidiito cönä’döaacä chäwwäiñe: —Wanaadi wwä adha’deutäcä, mä’yunaacajooto’no; quee.

⁴¹ Choojonnoiñe cöntämä yaawä amoinche’cä, täju emaadö ’cäwa’cä. Yäätä tä’mudhe cönä’döi; Wanaadi wwä cöna’deuwacä;

⁴² cönä’döaacä: —Jaaja, mädä jääcä töweeja’dä’emö naadö öwwä yeetuncajo’se’da aweiya’jäcä mäiñetuncajoi’che. Yaawääne’ amäädä owoije tödööcä, öwö umjummadö woije’daane; quee cönä’döaacä.

⁴³ Yaawä Wanaadi amoodedö caju ñano cönäänejoi chäwwä, ijäädu’täneije.

⁴⁴ Jooje wentumje töweijäcä jooje’cä cöna’deuwöi yaawä. Yäädamu’jätöödö nono jo cöneeca’tai yaawä munuuje.

⁴⁵ Töwa’deuwödö jonno töwaanönga’jäcä töwö cöntämä yaawä tönoowanoomadö döiñaiñe. Wönö’näje cöneedantäicho wentumje töweichomjäcä.

⁴⁶ Töwö cönä’döaacä chäwwäiñe: —¿Aaquene mädä wa’cä ännö’cato dea? Ä’jätääcä; Wanaadi wwä adha’deutäcä, mä’yunaacajooto’no; quee Jesuuquidiito cönä’döaacä chäwwäiñe.

Jesuuquidiito ajäi’jödö

⁴⁷ Yääje Jesuuquidiito ya’deutaame dea jooje soto cöneejoto. Ñäädä Juudha täätö, ñanno amoojadooto de’wä aaco’como jimmä, awa’de cöne’acä. Töwö Jesuuquidiito wwadäädä cöneejä shuumadö wetä.

⁴⁸ Yaawä Jesuuquidiito cönä’döaacä chäwwä: —¿Shuumadö que Soto nnedö mu’anä, Juudha?

⁴⁹ Ñanno Jesuuquidiito jadoncomo yää eneea’jäcä cönä’döa’to chäwwä: —¿Quewäänä’taato ca, Cajiichaana? quee.

⁵⁰ Yaawä tooni Jesuuquidiito jadoono Wanaadi wwä töwa’deuwaamo edhaajotoncomo anoonö cöneetunui’chäi; cömjanaacätäi ämu’demjönö dö’se.

⁵¹ Jesuuquidiito cönä’döaacä: —Na’ñojo. Chääwa’cä na; quee. Yaawä töwö ñäädä janaadö ajoojodö que cöneejichö’täi.

⁵² Yaawä Jesuuquidiito cönä’döaacä Wanaadi wwä töwa’deuwaamo edhaajotoncomo wwäiñe, Wanaadi weichojo edhaamo wwäiñe mmaja, inchoncomo wwäiñe mmaja, ñanno tajäiñenaamo we’a’como wwäiñe: —¿Aaquene tämeenato wwadäädä’da mmädä töwaichaqueiñe öwwadäädä me’ato?

⁵³ Anooto waadäi Wanaadi weichojo taca ajaadäiñe wei’jödö weichaame yaajojo’da töweiye mä’ja’quene. Chäänönge na, äcu’nädööcomo mädä eduuwa naadö, tööjano’tacaano jäduuje yeichojo mmaja; quee cönä’döaacä Jesuuquidiito.

Peedhodo wwä Jesuuquidiito jome’dä’jödö

⁵⁴ Jesuuquidiito ajäichö’jo tönwanno cönaadoicho yaawä Wanaadi wwä töwa’deuwaamo edhaajotoncomo mmai chaca. Inchäcäiñe Peedhodo cöntaacä, amoinche.

⁵⁵ Jödoodo awä wa’to tönemjannädööcomo dö’tä yaatajiima’comjäcä, Peedhodo mmaja chääjadäiñe cönaatajiimai chea.

⁵⁶ Yaawä dhanoonöcoomo Peedhodo cöneedantäi, wa’to o’wawä yaatajiimaajä. Ñäädä wodi yäätäädä Peedhodo cöneene’maacä; cönä’döaacä: —Määdhä mmaja Jesuuquidiito jadä cönä’ja’dea; quee cönä’döaacä.

⁵⁷ Töwö Peedhodo cöneejome’däi yaawä; cönä’döaacä: —Yoowanoojönö ñäädä mecammaadö; quee.

⁵⁸ Äcuude’cä anejja daja Peedhodo cöneenea’dea; cönä’döaacä: —Chääjadoncomo dajaane amäädä; quee. Peedhodo cönä’döaacä: —Ng’jn, ijimmotoncomoojönö öwö.

⁵⁹ Tooni shii wääseca’jödö yää ’jeje anejja cöna’deuwöi chea; cönä’döaacä: —Chääjadoncomo dajaane määdhä, Caadideea ñanooje naadö naane’.

⁶⁰ Yaawä Peedhodo cönä’döaacä: —Yoowanääcä’da na mädä mecammaadö; quee cönä’döaacä. Yaawä dea mma wameedi cöneetömöi, yääje Peedhodo wa’deutaame dea.

⁶¹ Yaawä Cädhaajotoncomo cönä’jedennacai Peedhodo wwadäädä; yäätäädä cöneene’maacä. Peedhodo cöntö’tai yaawä töwwä Jesuuquidiito wa’deuwö’jödö jäcä: “Edä coijaichawä dea amäädä aaduwaawäde cöjoome’da’de, wameedi wetöömödö owaajodä;” quee yä’dö’jödö jäcä.

⁶² Jödo’na Peedhodo cöneeja’cai yaawä; wentumje cönaamoaacä.

Jesuuquidiito enno’jätö’jödö

⁶³ Ñanno Jesuuquidiito edai’chännamo cönenno’jä’a’to; cönaiju’jä’a’to dea.

⁶⁴ Ije’dudu’jo cömjojeeta’mojä’a’to, edääje töwä’döancädäiñe: —Ene’ju’cä adhaiju’nei’jödö; quee töwä’döancädäiñe.

⁶⁵ Jooje anejjejaato töwa’deuwödööcomo que mmaja cöneetana’ta’to dea.

Äcamma’jonnamo je’tacaiñe Jesuuquidiito wei’jödö

⁶⁶ Yaawaana’jäcä inchoncomo cöne’jummaicho, ñanno judhío edhaajotoncomo; Wanaadi wwä töwa’deuwaamo edhaajotoncomo cöne’jummaicho dea, judhío owaanomannamo mmaja. Ecamma’jotoojo taca Jesuuquidiito cönaadoicho. Ñanno äcamma’jonnamo cönä’döa’to chäwwä:

⁶⁷ —¿Äwaanacaanei cha amäädä? Ääcammacä; quee cönä’döa’to. Töwö cönä’döaacä chäwwäiñe: —Sa’donna wääcamma’jäcä yeecamjö’da eijai maato.

⁶⁸ Öwwä adheecamma’ja’comjäcä yeccujäätö’da eijai maato dea, saaca’da mmaja.

⁶⁹ Edääje mmaane wä’döa äwwäiñe, eduuwaiche mma Soto nnedö Wanaadi jäduujato nnäcä nataajima’de, ämu’demjönö dö’se; quee cönä’döaacä Jesuuquidiito.

⁷⁰ Tameedä tönwanno cöneecamma’joicho yaawä: —Yääje yeiya’jäcä ¿Wanaadi nnedö ca amäädä? quee cönä’döa’to. Töwö cönä’döaacä: —Ee, ñäädä öwö, mecammaatoodö; quee.

⁷¹ Yaawä tönwanno cönä’döa’to: —¿Ane’cäämö mma määtonno wa’deunä cämjummatäädö deeade’ ? Töwö dea dajaane nääcammai cöneetadööcomooje; quee cönä’döa’to.