DUUCA 21 - Wanaadi A'deddu

Iiñö wääma’jödö wwä jödaata utu’jödö

¹ Yaawä Wanaadi weichojo taca Jesuuquidiito weichö, töwö cöneene’ma’to töjöödataicha’como wwä jödaata utuudu. Jödaata ewöötö aca cönnöa’to.

² Töwö cöneenea’dea iiño wääma’jödö wentumjato wwä aacä jödaata’cä tödöödö yää jödaata ewöötö aca.

³ Yaawä Jesuuquidiito cönä’döaacä: —Chäänönge yääje wä’döa äwwäiñe, määdhä iiño wääma’jödö’cä nutui tameedä cho’jodheiñe’cä.

⁴ Tameedä canno nutuicho yä’cä mmajöönö. Määdha wentumjato’cä mmaane tameedä töwwä nä’jannö nutui, täwanshiñö ejeematoojojaato’jödö jadäädä; quee cönä’döaacä Jesuuquidiito.

Wanaadi weichojo emajjotoojo jäcä Jesuuquidiito necammajäätö’jöödö

⁵ Yaawä anejjacoomo soto cöna’deuwa’to iiñataaje Wanaadi weichojo jäcä, täju adai’joto iiñataaje yeichö jäcä mmaja. Yää Wanaadi weichojo tönnataama cönä’jaacä Wanaadi wwono soto nutuuducoomo que. Yaawä töwö Jesuuquidiito cönä’döaacä chäwwäiñe:

⁶ —Tameedä edä mene’maatoodö jäcä yääje wä’döa äwwäiñe, edä emajjotoojo cu’nädö ne’a’de. Yaawä tooni täju töweichacoono de’wäädä o’somjo’da na’de; quee cönä’döaacä Jesuuquidiito.

Anooto wataamedö cu’nädö ene’ju’tojo

⁷ Yaawä tönwanno Jesuuquidiito cöneecamma’joicho: —Owaanomaanei, ¿ächännauwä’cä yää nai’che? ¿Ane’cäämö nai’che yää weja’do’tojo ene’ju’tojooje? quee cönä’döa’to.

⁸ Jesuuquidiito cönä’döaacä chäwwäiñe: —Odhoowoinchadäiñe’da eichäcä, mätäncu’tojooto’no. Jooje soto naato’de öwö yeetö joi töwäätä’tancädäiñe, “Äwaanacaanei öwö;” quee töwä’döancädäiñe; “Chu’nädö aca nä’döi eduuwa;” quee töwä’döancädäiñe mmaja. Dha’dedducoomo mma maneetatäi’che.

⁹ Yaawä wänä ecaadö eta’jäcä äwwäiñe, wewoodoichanä jäcä mmaja, määcatoncatäi’che. Mädääje awa’de yeeja’do’tojo na, yaatameedöjöönö mma yeichaame; quee cönä’döaacä Jesuuquidiito.

¹⁰ Edääje mmaja töwö cönä’döa’dea chäwwäiñe: —Sotoocomo newääna’taato’de, acu’shänääcomo mmaja.

¹¹ Nono wätu’medö joojato na’de aneetaja’cäcäiñene’jödöödä, ämi mmaja, cädäi mmaja. Täneemö tönoiñato caju ña näänea’de.

¹² “Tameedä mädä owaajo soto adhaajäiyato’de amaaminchadööcomo wetä. Töwe’jummato’como taca adhaadäaato’de, adheecamma’jojäätödööcomo wetä. Tönwanno jedeesoje ayöödöaato’de. Cajiichaanacoomo wwadäädä adhaadäaato’de, acu’shänä wwadäädä mmaja, sootoije aweichöcoomo jo’tädööje.

¹³ Yää na’de äwwäiñe ya’deddu ecammajo’tojo ñeetadööcomooje.

¹⁴ Täncanoode’da eichäcä’de yaawä. Äwwäiñe eccujo’tojo mma mäntö’tamme’jä’täi’che.

¹⁵ Öwööne wu’a’de äwwäiñe awa’deuto’como, asejjedööcomo mmaja, tameedä ätu’de’tännamo wwäiñe ä’cana’cajo’da aweicho’como. Tönwanno eccujo’tojo ’je’da naato’de yaawä.

¹⁶ Oomotoncomo jadä’jödöödä ayu’ato’de, aduichoncomo mmaja, adhaacontomo mmaja, ajimmotoncomo mmaja, ajaatawoncomo mmaja. Dhantai aja’ato’de.

¹⁷ Änwanno mä’quiiñeme’cajaato’de tameedä soto wwäiñe sootoije aweichöcoomo jo’tädööje.

¹⁸ Yääje yeichaame tooni aju’jädööcomo jadä’jödöödä ännamjö’da na’de.

¹⁹ Yää shinchädö que aweichöcoomo michaana’caato’de.

²⁰ “Yaawä suddau we’jumma’como Jeduusadén ñano awoodhecääcä eneea’jäcäiñe äwwäiñe, chö’tamme’täcä’de yaatameetojo amoinche’da yeichö.

²¹ Yaawä Judheea ñancomo nääneje’ña’to’de jöö de’cäi. Ñanno Jeduusadén ñancomo neja’ca’ña’to’de; audaajä acancomo jataaca mma ennacaicho’de.

²² Yää na’de wätä’maminchatoojo anootoi’chädö, tameedä imennaajä nonge yä’dödö wetä.

²³ Wentumje naato’de yaawä ñanno töwensu’da’como, tänwasa’como mmaja. Jooje yeetunu na’de yaawä edä nono de’wä; wätä’maminchanä na’de canno judhío jäcäiñe

²⁴ Dhantai wänä canaadöje nä’ja’aato’de; dhantai tameedä nono weichö wa’cä jedeesoje nataadäjaato’de. Judhíojöncomo Jeduusadén ñano jataawä naademaato’de tucu’nädööcomo wataamedö wa’cä.

Soto nnedö we’tojo

²⁵ “Yaawä shii, nuunä, shidiichä mmaja chu’tädööje naato’de. Sotoocomo edä nono de’woncomo natansu’daato’de. Dama wätu’medö weijäcä, madaataca wäätadö weijäcä mmaja, tönwanno nääcatoncaato’de.

²⁶ Soto nääcatoncaato’de towaadäädäiñe’da tödööene, nono de’wä yeeja’do’tojo nontädööje. Caju ña naadö jadä’jödöödä nätu’mea’de.

²⁷ Yaawä Soto nnedö neneeaato’de ca’dutu de’wä yeejödö, jäduuje, tawaanato töjääcä.

²⁸ Mädoocomo weja’dätäädö waajänta’jäcä, adha’cwainchatääcä’de. Yaawä caju ñadäädä ene’matääcä’de, äwääwanaacato’como cu’nädö amoinche’da yeijäcä; quee cönä’döaacä Jesuuquidiito.

²⁹ Edääje mmaja töwö cönä’döa’dea chäwwäiñe yö’seeno joi: —Waju’nä töweiye naadö naane’, tameedä chuuta mmaja;

³⁰ yaade’jutaadö eneea’jäcä, odhoowanääcäiñe yaawä wedu amoinche’da yeichö.

³¹ Mädääje mmaja tameedä mädä töweeja’dä’emö eneea’jäcä äwwäiñe chö’tamme’täcä’de yaawä Wanaadi cajiichaanaje yäänejootojo amoinche’da yeichö.

³² “Chäänönge yääje wä’döa äwwäiñe, tameedä mädä neja’dä’a’de canno soto eduuwa naatoodö ä’jajo’dadä.

³³ Caju maja, nono maja nataamea’de, öwö ya’deddu mmaane ataamejai’cha na.

³⁴ “Odhoowoinchadäiñe’da eichäcä änwanno, wääwashinchänä jäcä tö’tajä’nä que moowoinchatäi’che, wä’dau’nä que mmaja, edä nono de’wono jäcä tö’tajä’nä que mmaja, äwwäiñe tacaade’da mma yää anootoi’chädö aca ä’dö’no.

³⁵ Cadancwani wätämjayuucadö töweiye naichöje yää anooto na’de tameedä edä nono de’woncomo wwäiñe.

³⁶ Yaaje yeijäcä äädai’chätääcä yeichöje; Wanaadi wwä adha’deutäcä weiñäje, tameedä mädä töweeja’dä’emö jonno määwanaacatäiye’de, Soto nnedö je’taca mä’dötäiye’de; quee cönä’döaacä Jesuuquidiito chäwwäiñe.

³⁷ Ano Jesuuquidiito soto tönoowanoomaiñe töweiye cönä’jaacä Wanaadi weichojo taca. Coijai mmaane Odiiwo ’jödö de’wä tönnö’que cönä’jaacä.

³⁸ Tameedä soto tööjanaacadä töötä töweiye cönä’ja’to Wanaadi weichojo taca, ñeecammajäätödö eta.