DUUCA 2 - Wanaadi A'deddu

Jesuuquidiito wennu’jödö

¹ Yaawä acu’shänä Awuutu tameedä jata weichö wa’cä soto cömme’cu’täja’to, chäätöcoomo tömennä.

² Yää awa’deenato soto ime’cu’tädööcomo cönnöicho Sideeniyo cajiichaanaje yeichö Siidiya ña.

³ Tameedä soto cönääma’toicho yaawä töwennu’jocoomo döiña, iiña täätöcoomo imennäjoodö wetä.

⁴ José mmaja cöntännea yaawä Naasade ñanno, Caadideea nono de’wonno. Wedén ña cöntämä, Dawí jata’jödö ña, yää Judheea ñano jataaca, Dawí atö’jödööje töweijäcä.

⁵ Töjiiñamo Madía acä contämä, täätö imennäjo. Töwensu’de Madía cönä’jaacä.

⁶ Yaawä Wedén ña yeichöcoomo Madía nnedö wennutoojo cu’nädö aca cönä’döi.

⁷ Cönnennui yaawä iiñedö awa’deenato, dhanwa’cä. Madía cönaiñantäi yaawä camiisha que. Cunummichai yaawä jaaca uduucomo ewöötö aca, yeicho’como ’je’da yeijäcä soto wä’döto’como taca.

Oweeja edai’chännamo wwäiñe amoode wäänejo’jocoomo

⁸ Yäätä Wedén ñano tö’wä cönä’ja’to oweeja edhaamo. Täcöönöcoomo cöneedai’cha’to woi awä, coijai.

⁹ Jadheedä chäwwäiñe cönäänejoi yaawä Cajiichaana amoodedö. Ñanno oweeja edhaamo awoodhecääcäiñe tawaane cönä’döi jooje Cajiichaana niweijodö que. Jooje cönääcatoncaicho.

¹⁰ Yaawä ñäädä amoode cönä’döaacä chäwwäiñe: —Määcatoncatäi. Aashichaato wätunnä ecammajä’e dajaane weejä, tameedä soto ta’cwaiñe yeicho’como.

¹¹ Eduuwa Adheewanaacaneichomo nennui, Dawí jataacäi’jödö, ñäädä Quidiito, Cajiichaana.

¹² Edääje mene’ju’ato’de. Änwanno shiichu’cä medantaato’de camiisha que aiñantaajä, jaaca uduucomo ewöötö aca ummichaajä; quee cönä’döaacä amoode chäwwäiñe.

¹³ Jadheedä cönäänejoicho yaawä jooje amoode caju ñancomo; aashicha cöna’deuwa’to Wanaadi jäcä; cönä’döa’to:

¹⁴ Aashichaato ñäädä Wanaadi, caju ñano. Nono de’woncomo täncanoode’da weichojo neneeaato’de, ñanno chääjäcäiñe Wanaadi ta’cwaiñe naadö; quee cönä’döa’to.

¹⁵ Töjonnoiñe ñanno amoode wöta’comjäcä caju ña, oweeja edai’chännamo cönä’döa’to tönwannoje dea: —Wedén ña cöötätäiye. Queenetantäiye yää Cajiichaana cöwwäiñe necaademe’joichö; quee cönä’döa’to.

¹⁶ Yaawä dea mma tönwanno cönääma’toicho. Iiña töwä’döa’comjäcä Madía cöneedantoicho yäätä, José mmaja, shiichu’cä mmaja, jaaca uduucomo ewöötö aca ummichaajä.

¹⁷ Töwwäiñe eneea’jäcä cöneecammajäätöicho ñäädä mude’cä’cä jäcä töwwaiñe ecammajäätö’jödö.

¹⁸ Tameedä yää etannamo’jödö cönääcatoncaicho yaawä, oweeja edai’chännamo necammajäätödööcomo eta’jäcä töwwäiñe.

¹⁹ Madía mmaane tameedä yää töwwäädä cönnöaacä; chääjäcä tötö’tajä’e töweiye cönä’jaacä.

²⁰ Ñanno oweeja edai’chännamo cönennacaicho yaawä, aashicha töwa’deuwancädäiñe Wanaadi jäcä. Aashicha cöntö’tajä’a’to chääjäcä, töwwäiñe ecammajäätö’jödö nönge ene’jödö weijäcä, eta’jödö weijäcä mmaja.

Jesuuquidiito e’tä’jödö

²¹ Aaduwaawä amoojato anooto yennu’jödö weichö, siicunsidaadoje shiichu’cä cönnöicho. Jesuuquidiitoje cöne’toicho, yaamodeetadö owaajoodä Madía wwä amoode necamma’jödö nönge.

²² Töweeconeecato’como anootoi’chädö ncäcäädä, tamoichato’como Moisé waanontä’jödö nönge tödö’jeje, tönwanno mude’cä’cä cönaadoicho yaawä Jeduusadén ña, Cajiichaana Wanaadi wwä ecamma.

²³ Yää cönnöicho Cajiichaana waanontädö imennaajä nä’döaadö woije: “Tameedä dhanwa awa’deenato wennudu Cajiichaana wwonooje täcamma tödöötäcä’de;” quee imennaajä nä’döaadö woije cönnöicho.

²⁴ Saaquidiijiisiyo tödööe mmaja cöntonto dea, Cajiichaana waanontädö wä’dödö woije: “Aacä ädööwo jeiñe mma, aacä wadaamidi nnacoomo’cä jeiñe mma;” quee yä’dödö woije tödööe.

²⁵ Yäätä Jeduusadén ña cönä’jaacä dhanwa, Simeón täätö. Ñäädä cönä’jaacä chäänöngato, Wanaadi woije tödöönei. Töwö cönwomo’cacä iisadaaediitacoomo wääwanaacato’como. Epíiditu Santo ’je ñäädä Simeón cönä’jaacä.

²⁶ Chäwwä Epíiditu Santo necammadö cönä’jaacä ääma’da yeichojo töwwä Äwaanacaanei eneedö wa’cä, ñäädä Cajiichaana nanontädö.

²⁷ Yaawä Simeón cöntämä Wanaadi weichojo taca, Epíiditu Santo nanontädö woije. Yaawä Jesuuquidiito nnejeedö yeenö cönnejooto Wanaadi weichojo taca, waanontänä imennaajä necammadö nönge chääjäcä tödöödö wetä.

²⁸ Yaawä ñäädä Simeón shiichu’cä cönannäjöi tänaawä. Aashicha cönä’deuwacä Wanaadi jäcä; cönä’döaacä:

²⁹ Täncanoode’da äämajai wa eduuwa, Cajiichaana, öwö adhaanonö wwä aneecamma’jödö nönge tödö’jödö weijäcä äwwä.

³⁰ Eduuwa weneeanä Äwaanacaanei,

³¹ määdhä tameedä soto neneedöcoomoje änne’jodö naadö.

³² Töwö na’de Wanaadi dhowaanojöncomo weiyuuducoomoje. Aashicha yeicho’como nu’a’de ñanno osootoi iisadaaediitacoomo wwäiñe; quee cönä’döaacä Simeón.

³³ Yuumö, yeenö mmaja aashicha cöntö’tajä’a’to yääje Simeón wä’dö’jödö weijäcä tönnacontoncomo jäcä.

³⁴ Yaawä Simeón Wanaadi wwä cöna’deuwöi chääjäcäiñe. Cönä’döaacä yaawä yeenö Madía wwä: —Edääje wä’dö’se wa äwwä: Määdhä mude’cä’cä na’de jooje iisadaaediitacoomo wejuccato’comooje; dhantai mmaane yaadoncato’comooje na’de. Töwö ta’dumi ñönge na’de; töwä’quiiñeme’jo mma nä’quiiñeme’ja’de.

³⁵ Mädääje soto tö’tajäätödööcomo nääne’ju’a’de, chääwaadäiñe. Yää se’ne na’de äwwä, sauda que aweewäjoodö wa’cä; quee cönä’döaacä Simeón Madía wwä.

³⁶ Wodi mmaja yäätä cönä’ja’dea, Wanaadi wa’deuwödö ecammanei, Aanaje chäätö. Jaanuweeda nnedö cönä’jaacä, Aseede weichö. No’samje töwö cönä’jaacä jooje. Töwö mude’cäje töweichö dea töiñoque cönä’jaacä aacä amoojato wedu.

³⁷ Cönäätöiñocai yaawä. Yää jonnoto’jödöödä töiñoque’da conä’jaacä aacäichea sotooto de’wä aacäichea wedu. Wanaadi weichojo taca töweiye cönä’jaacä, aneiñaja täjäätö’da. Wanaadi wwä tönnöe töweiye cönä’jaacä, ano, coijai’jödöödä, wäänemaanä que, chäwwä wa’deunä que mmaja.

³⁸ Yaawä dea mma töwö Aana cönoomomöi yöiñaiñe; aashicha cöna’deuwöi Wanaadi wwä. Yää ’jeje soto wwäiñe cöna’deuwacä ñäädä mude’cä’cä jäcä, ñanno Jeduusadén ñancomo wääwanaacato’como yoomo’nnamo wwäiñe.

Naasade ña José wennaca’jocoomo

³⁹ Yaawä tameedä Cajiichaana waanontä’jödö tödöödö’jo José cönennacaicho yaawä Caadideea ña. Töjaatacäiñe cönä’döicho yaawä, Naasade ña.

⁴⁰ Jesuuquidiito nnejeedö cönaatö’nä’acä, cönsejjeta’dea. Wanaadi nutuudu aashichaato chäwwä cönä’jaacä.

Wanaadi weichojo taca Jesuuquidiito wo’nomjo’jödö Jeduusadén ña

⁴¹ Yuumö, yeenö mmaja, wedu waadäi töötä cönä’ja’to Jeduusadén ña, Weja’dätä’jä anootoi’chädö awä.

⁴² Amoojadooto de’wä aacä wedu Jesuuquidiito weichö tönwanno cöntonto Jeduusadén ña, töweichöcoomo nöngeedä.

⁴³ Yaawä comjedensiya wataamea’jäcä, yennacaadawäiñe, Jesuuquidiito nnejeedö cöno’nomjoi Jeduusadén ña, tumö wwaiñe tacaade’da.

⁴⁴ Ñanno yuumö töjimmä jadäiñe iichaatäi anencano’tä’da cöntonto tooni anooto. Yaawä jeene cunuujiya’to töjimmotoncomo döiñaiñe, töjaatawoncomo döiñaiñe mmaja.

⁴⁵ A’que ujiiya’jäcä cönennacaicho dea yaawä Jeduusadén ña mmaja, ujiiye.

⁴⁶ Aaduwaawä anoototo ai cöneedantoicho yaawä Wanaadi weichojo taca, owaanomannamo jadäiñe yaatajiimaajä, ñeecammajäätödööcomo etaajätöödöje, ecamma’jojäätödööcomooje mmaja.

⁴⁷ Tameedä dha’deddu etannamo’jödö cönääwammajoicho shejjedö eneea’jäcä töwwäiñe, ñeccujäätödö eta’jäcä mmaja.

⁴⁸ Töwwäiñe edanta’jäcä yuumö, yeenö mmaja, cönääcatoncaicho. Yeenö cönä’döaacä chäwwä: —¿Ane’que’nei mädääje ñaa mödööanä, dhanwa? A’que ñaa manuujiyaanä oomo acä. Jooje cone’da ñaa nä’jaanä; quee cönä’döaacä Madía.

⁴⁹ Yaawä Jesuuquidiito cönä’döaacä chäwwäiñe: —¿Ane’cotoojo cujiiyato? ¿Odhoowanääcäiñe’da ca’ nai Jaaja tadaawaajui tödööneije weichö? quee cönä’döaacä.

⁵⁰ Tönwanno dhowaanäcäiñe’da cönäätai ya’deuwödö.

⁵¹ Chääjadäiñe Jesuuquidiito cönennacai yaawä Naasade ña. Yoijeiñe töweiye cönä’jaacä. Yeenö chö’taqueejö’da cönä’jaacä tameedä yää jäcä.

⁵² Jesuuquidiito mmaane jooje’cä cönsejjetaacä; cönaatö’nä’a’dea. Wanaadi wacö’je töweiye cönä’jaacä, soto wacö’jeiñe mmaja.