DUUCA 19 - Wanaadi A'deddu

Saqueeo wei’jödö

¹ Jeedicó ña töwä’döa’jäcä Jesuuquidiito cönäämannä’acä jata antai.

² Yäätä cönä’jaacä dhanwa tönsomaacato, acu’shänä jödaatai i’jummannamo edhaajotoncomo, Saqueeoje chäätö.

³ Töwö Saqueeo Jesuuquidiito ene’se cönä’jaacä; eneejai’chaane cönä’jaacä, nonoojoiyaasa töweijäcä, jooje soto weichomjäcä mmaja.

⁴ Töwö soto owaajoiñe cöneeca’tömöi, cönäncui yaawä meje joi, Jesuuquidiito weja’do’tojo dö’tä.

⁵ Yää ai töweeja’dätäädawä Jesuuquidiito cacäi cöneeneaacä; cönä’döaacä: —Ma’da’cä ädhä’täcä, Saqueeo, eduuwa ämmai chaca öötotoojo na; quee cönä’döaacä.

⁶ Yaawä Saqueeo cönä’täi tamjä’ne; ta’cwaiñe Jesuuquidiito cönaamonno’joi tömmai chaca.

⁷ Yää eneedö’jo tameedä soto cönenta’me’ca’to; cönä’döa’to: —Conemjönö tödöönei mmai chaca Jesuuquidiito nääwa’täi; quee.

⁸ Saqueeo cönammöi yaawä; cönä’döaacä Cädhaajotoncomo wwä: —Cajiichaana, eduuwa önsomaadö annai wu’jä’a’de wentumja’como wwä. Yää soto encu’täjä’ancädäiñe öncana’ca’jödö wiiñaca’de chäwwäiñe, aacäicheeade; quee cönä’döaacä Saqueeo.

⁹ Yaawä Jesuuquidiito cönä’döaacä chäwwä: —Eduuwa wääwanaacatoojo nä’döi edä maa taca, Aawadán atöödöje mmaja määdhä yeijäcä.

¹⁰ Soto nnedö cöneejä yännanö’a’como jäcäinchädäiñe, ewaanacaiñe mmaja; quee cönä’döaacä Jesuuquidiito.

Amoojadä sotooto jödaata dö’seeno

¹¹ Soto wwäiñe töneecammajäätödö etaadawä, Jesuuquidiito cöna’deuwöi chäwwäiñe yö’seenoje. Jeduusadén ñano jäcä amoinche’da Jesuuquidiito weijäcä yaawä dea mma Wanaadi cajiichaanaje yeichö yäänejaatäi ñanno soto cöneecanö’a’to.

¹² Edääje Jesuuquidiito cönä’döaacä: —Dhanwa täneejucaato cönä’jaacä amoinche töötäämö, anejja jataaca, cajiichaanaje ätä’täjo, yää ’jeje töwennacaadö wetä mmaja.

¹³ Töötääje töwö cöna’dejjaicho amoojadä tanoonö; chääwaadäiñe tooni soto jödaata cuntui. Töwö cönä’döaacä chäwwäiñe: “Ätäätöijatääcä’de mädä jödaata que, iiñano’jödö wennacaadö wa’cä;” quee cönä’döaacä.

¹⁴ Yaawä ñäädä täneejucaato jataawoncomo cönquiiñemeecöicho; tanoonöcoomo cönaanontäicho inchäcä: “Määdhä töcaajichaanaije ämjumma’da ñaa na;” quee ä’döe.

¹⁵ Yaawä ñäädä täneejucaato cönennacai cajiichaanaje ätä’täjonei’jödö. Tanoonö cöna’dejjaicho yaawä, ñanno jödaata chäwwäiñe tuntu’jödö, ecamma’jodööcomo wetä chääwaadäiñe yäätätöija’jocoomo jäcä.

¹⁶ Yaawä awa’deeto cöneejä; cönä’döaacä: “Cajiichaana, ajöödatai che wichaana’cane amoojadä soto jödaata;” quee.

¹⁷ Ñäädä cajiichaana cönä’döaacä chäwwä: “Chäänönge na, yaanonö aashichaato amäädä. She’coto’cä jäcä chäänönge awei’jödö weijäcä amäädä ma’de amoojadä jata edhaajäje;” quee cönä’döaacä.

¹⁸ Anejja dhanoonö daja cöneejä yaawä; cönä’döaacä: “Cajiichaana, ajöödatai che wichaana’cane ijaatoodea soto jödaata;” quee.

¹⁹ Ñäädä wwä mmaja ñäädä Cajiichaana cönä’döa’dea: “Amäädä ma’de ijaatoodea jata edhaajäje;” quee.

²⁰ Anejja dhanoonö daja cöneejä dea yaawä; cönä’döaacä: “Cajiichaana, edä yää ajöödatai. Camiisha aca önsomaadö cönä’jaacä.

²¹ Öwö monnontaaquene, tääde’cwade aweijäcä. Ännödööjönö töneiye amäädä, anaatödööjönö tömjä’e mmaja;” quee cönä’döaacä.

²² Yaawä chäädhajä cönä’döaacä: “Sootoi conemjönö amäädä. Amäädä awa’deuwö’jödö que dea äwäätä’maminchatoojo wecamma. Odhoowanääcä cönä’jaacä tääde’cwade weichö, önnödööjönö töneiye weichö, naatödööjönö tömjä’e weichö mmaja.

²³ Yääje yeijäcä ¿ane’que’nei jöödatai äntu’da meiyaqueene tönwacaamaamöje jödaata u’nnamo wwäiñe? Iiñano’jödö wä’döa’jäcä jöödatai eichö weiya yaawä, töwwäiñe jöödatai tödö’jödö eje’jödö jadä;” quee cönä’döaacä ñäädä chäädhajä tanoonö wwä.

²⁴ Edääje cönä’döa’dea yäätoncomo wwä: “Määdhä enwajiiñatääcä ijöödatai che. Mä’dä wwä u’täcä, amoojadä soto jödaata chäwwä naadö wwä;” quee cönä’döaacä.

²⁵ Ñanno cönä’döa’to chäwwä: “Cajiichaana, amoojadä soto jödaata mmaja chäwwä na deeade’;” quee cönä’döa’to.

²⁶ Yaawä ñäädä cajiichaana cönä’döaacä: “Chäänönge yääje wä’döa äwwäiñe: Ñäädä töweiyato wwä jooje’cä nä’tua’de. Ñäädä a’cato mmaane nätänwajiiñaja’de yää she’caasa töwwä naadö que.

²⁷ Ñanno tu’de’tännamo’jödö mmaja, tädhaajotoncomooje yöödö’semjöncomo’jödö, ene’täcä sadäädä; neenedööje emaatäcä;” quee cönä’döaacä ñäädä cajiichaana tösootoi wwäiñe; quee cönä’döaacä Jesuuquidiito.

Jeduusadén ña Jesuuquidiito wä’dö’jödö

²⁸ Yääje töwä’dö’jeje Jesuuquidiito cönääma’täi chea yaawä Jeduusadén ñadäädä.

²⁹ Yaawä Wetaajé ña, Wetaaniya ña mmaja ä’döjai töwä’döa’jäcä, Odiiwo ’jödö je’taca cönä’ja’to. Yaawä Jesuuquidiito cönannontoicho aacä tönoowanoomadö.

³⁰ Töwö cönä’döaacä chäwwäiñe: —Ojoncomo jataaca, mädä cöje’tacaiñe nääneaadö aca. Iiña äwä’döa’comjäcä cawaayu nnedö’cä i’wadö’taajä medantaato’de, ta’cu’täjöönö. I’wadööcatääcä’de, sadäädä mene’täiye.

³¹ Anejja wwä adheecamma’ja’comjäcä: “ ¿Ane’cotoojo mi’wadööcaato?” ca’jäcä, edääje eccujä’täcä’de: “Ñaa edhaajä nijumma;” quee caichäcä’de; quee cönä’döaacä Jesuuquidiito.

³² Ñanno enno’ja’como cöntonto yaawä; Jesuuquidiito necamma’jödö nönge cöneedantoicho.

³³ Chäwwäiñe cawaayu nnedö’ca i’wadööcadaawä chäädhaamo cönä’döa’to: —¿Ane’cotoojo cawaayu nnedö’cä mi’wadööcaato? quee.

³⁴ Tönwanno cönä’döa’to: —Ñaa edhaajä nijumma; quee cönä’döa’to.

³⁵ Cönaadoicho yaawä Jesuuquidiito döiña. Töwoomöcoomo cönnöicho cawaayu nnedö’cä de’wä. Ye’wä Jesuuquidiito cönannucuicho yaawä.

³⁶ Ääma tai töwö iichädaawä soto töwoomöcoomo cönaajujiiñäjäätöicho nono de’wä, yäätajaatojooje.

³⁷ Odiiwo ’jödö jonanno yä’tädaawäiñe, Jeduusadén ña ä’döjai yä’döa’comjäcä, ñanno jooja’como soto Jesuuquidiito ecaanö’nnamo, ta’cwaiñe cönä’ja’to. Tönwanno cönaajäntoicho yaawä aashicha töwa’deuwödööcomo Wanaadi jäcä, tameedä yää täneemö töwwäiñe ene’jödö weijäcä. Töcä’de cöna’deuwa’to;

³⁸ cönä’döa’to: —Aashichaato määdhä Cajiichaana, Cädhaajotoncomo eetö joiño we’ajä. Caju ñancomo wwäiñe täncanoode’da weichojo na. Aashichaato ñäädä Wanaadi; quee cönä’döa’to.

³⁹ Yaawä anejjacoomo jaadiseeo, ñanno soto jadoncomo, cönä’döa’to Jesuuquidiito wwä: —Owaanomaanei, onoowanoomadö eta’jöichajoocoto; quee.

⁴⁰ Jesuuquidiito cöneccujä’a’to: —Chäänönge yääje wä’döa äwwäiñe, canno weta’jöa’comjäcä, mädä täju mmädä töwa’deuwödö aajäntäjai ña yaawä; quee cönä’döaacä.

⁴¹ Jataaca ä’döjai töwä’döa’jäcä, töwwä eneea’jäcä Jesuuquidiito cönaamoi yaawä Jeduusadén ñancomo junnei.

⁴² Töwö cönä’döaacä: —Odhoowanääcäiñe yei’she waadö’je täncanoode’da aweicho’como; töwäädä äwwäiñe totoone’tä naane’, aneene’da aweichöcoomo wetä.

⁴³ Yeetunu cu’nädö ne’a’de, yää ätu’de’tännamo wwäiñe äwä’cudaadai’chäjooto’como. Ajaadäiñe newäänä’taato’de; ajaatawonnoiñe aja’canö’jotäiñe’da naato’de.

⁴⁴ Tönwanno aja’ato’de tameedäädä. Tameedä ämmaichomo nemajjato’de, tooni täju töweichacoono de’wä ännämä’da tödööene, adöiñaiñe Wanaadi weejö’jödö aneene’jutu’da awei’jocoomo weijäcä; quee cönä’döaacä Jesuuquidiito.

Wanaadi weichojo tacanno töwäätätöijaamo ija’canö’jo’jödö

⁴⁵ Yaawä Jesuuquidiito cönoomomöi Wanaadi weichojo taca. Cönaajäntäi yaawä töwäätätöijaamo ija’canö’jodööcomo.

⁴⁶ Töwö cönä’döaacä chäwwäiñe: —Wanaadi a’deddu imennaajä jäcä yääje nä’döa: “Ömmai ña Wanaadi wwä wa’deutojooje;” quee nä’döa imennaajä. Änwanno ’quene mödööato tämeena’como weicho’comooje; quee cönä’döaacä Jesuuquidiito.

⁴⁷ Töwö anooto waadäi Wanaadi weichojo taca tönoowanooma töweiye cönä’jaacä. Wanaadi wwä töwa’deuwaamo edhaajotoncomo, judhío owaanomannamo mmaja, acu’shänääja’como mmaja, ema’se töweiye cönä’ja’to.

⁴⁸ Yaawääne’ tödöötojo ’je’daane’ cönä’jaacä chäwwäiñe, tameedä soto jooje eta’se yeichomjäcä.