DUUCA 17 - Wanaadi A'deddu

Soto shaadijannä’cannamo

¹ Jesuuquidiito cönä’döaacä tönoowanoomadö wwäiñe: —Sadiijannä’catä weiñä ataamejai’cha na. Yaawääne’ jooje wentumje na’de ñäädä soto sadiijannä’caneichomo’jödö.

² Ñäädä mude’cä’cä yeecanö’nei shaadijannä’canei, täju ijöncäcä tö’wadö’tämje yei’jödö na, dama sö’jato ’cwaca emaadöje mma.

³ Odhoowoinchadäiñe’da eichäcä. “Äjääcä conemjönö todööa’jäcä aweichacoono wwä, yäätuujacä. Yää jonno tötö’tajäätödö sha’dumincha’jäcä chäwwä, choone’nadiiyö encwanno’jocä.

⁴ Yää anooto awä dea aacä amoojatoode conemjönö tödööa’jäcä äjääcä, aacä amoojatoode mmaja äwwadäädä ye’a’jäcä: “Yää ännö’da wa’de eduuwa;” quee ä’döe, choone’nadiiyö encwanno’jocä; quee cönä’döaacä Jesuuquidiito tönoowanoomadö wwäiñe.

Ecamjödö jäduuje yeichö

⁵ Yääje mma yaawä ñanno anonta’como cönä’döa’to Cädhaajotoncomo wwä: —Jooje’cä ñaa necamjödö ijäädu’täcä; quee.

⁶ Yaawä Jesuuquidiito cönä’döaacä: —Wishu adöödö ’cäwa’cä aneecamjödööcomo weichaame, edääje ä’döjai maato edä meje wwä: “Ätu’cacä määtonno; dama ’cwaca ä’natö’täta;” quee ä’döjai maato. Adha’deddu nönge ä’döjai ña yaawä.

Dhanoonö wwä tödööemö

⁷ “Ä’saca adhaanonö womonga’jäcä naadö naane’, nono saca’nänei’jödö, jaaca edai’chäneichomo’jödö jeiñe mma, ¿yääje ä’döjai manä chäwwä: “Ä’cäde, määtä ataajimaacä, määwashinchäiye;” quee ä’döjai manä?

⁸ Ng’jn, yääje ä’döjaichaane. ¿Edääjeene jönca ä’döjai manä: “Yeewanshiñö aneejodööcä; adheesomaajä’cäde amäädä, cädai’chäiye wääwashinchädö wadaadä. Woocödö enöödö wä’ca’jäcä jeene ääwashinchäjai ma amäädä;” queene jönca ä’döjai manä?

⁹ ¿Änääcö tanoonö änwa’demeecödööde’ tanontä’jödö tödö’jödö weijäcä mmädä chäwwä.

¹⁰ Mädääje mmaja änwanno, tameedä Wanaadi wwä adhaanonto’jocoomo tödööa’jäcä äwwäiñe, edääje mma ä’döjai maato: “Dhanoonö aashicha’comoojönö ñaa; ñaa wwä tödööemö mma ñaa cönnöi;” quee ä’döjai maato; quee cönä’döaacä Jesuuquidiito.

Amoojado’como woi ’ja’como wääjichö’to’jocoomo

¹¹ Jeduusadén ña Jesuuquidito wötäädawä töwö cöntaacä Samaadiya ñano acä Caadideea ñano amoinche’da yeichö antai.

¹² Jataaca yä’dödaawä amoojadä woi ’ja’como chäwwadäädä cöneejoto. Amoincheiche dea cöneedennaicho.

¹³ Tönwanno cöncä’tömöicho: —Amäädä Jesuuquidiito, Owaanomaanei, wentumje ñaa eneecä; quee cönä’döa’to.

¹⁴ Ñanno eneea’jäcä Jesuuquidiito wwä, töwö cönä’döaacä chäwwäiñe: —Ojoncomo; äänejootantäcä Wanaadi wwä töwa’deuwaamo wwäiñe; quee cönä’döaacä. Yaawä töötädaawäiñe töwääjichö’tä cönäädantoicho.

¹⁵ Yaawä tooni töwääjichö’tä töwäädanta’jäcä cönennacai Jesuuquidiito döiña, töcä’de aashicha töwa’deuwancädä Wanaadi jäcä.

¹⁶ Töwö tä’mudhe cönä’döi Jesuuquidiito o’wawä, cönääje’dui yaawä nono wwadäädä; täjiichö’tä’jödö cönwa’deme’cacä. Ñäädä dhanwa cönä’jaacä Samaadiya ñano.

¹⁷ Yaawä Jesuuquidiito cönä’döaacä: —¿Amoojadä’da ca mä’jaato änwanno yääjichö’ta’como? ¿Äsha naicho ajimmä, ñanno aacäichea amoojato’como?

¹⁸ ¿Anejja ennaca’da ca neiya aashicha a’deuwe Wanaadi jäcä, määdhä mma, aneiñajaano mma? quee cönä’döaacä.

¹⁹ Yaawä Jesuuquidiito cönä’döaacä ñäädä dhanwa wwä: —Aanöncä; äjääne; äwwä ecamjödö weijäcä maadoncai; quee.

Wanaadi töcaajichaanaije weiñä

²⁰ Jaadiseeo Jesuuquidiito cöneecamma’joicho Wanaadi cajiichaanaje yä’dötoojo cu’nädö jäcä. Yaawä Jesuuquidiito cöneccujä’a’to: —Täne’daane Wanaadi cajiichaanaje yä’dödö nai;

²¹ “Edä yää;” “Mänö yää;” quee wä’döto’me’da, ataacaiñeene yeijäcä; quee cönä’döaacä jaadiseeo wwäiñe.

²² Edääje cönä’döaacä yaawä tönoowanoomadö wwäiñe: —Aneedawä mma Soto nnedö ene’se meichantäi’che, eneejai’chaane.

²³ Yaawä edääje soto nä’döaato’de äwwäiñe: “Määdhä ñäädä;” quee, “Mäccö ñäädä;” quee jeiñe mma. Ene mma mötäätäi’che yaawä; dha’dedducoomo mma maneetatäi’chede.

²⁴ Tameedä täneemö jeene öwö, Soto nnedö, weejödö na’de, tameedä caju yäncucuudu tönaawanaanö’ca töweiye naichöje mmaja.

²⁵ Töwäätä’maminchajoomöje wa awa’de, töwä’tu’de’tojoomöje mmaja canno soto eduuwa naatoodö wwäiñe.

²⁶ Noé weichawä cönä’ja’döje mmaja na’dede yaawä Soto nnedö we’tojo anooto awä.

²⁷ Ñanno soto wääwashinchäjä’näje töweiye cönä’ja’todö naane’, wocö emjätöödöje mmaja. Jötaajä’näje töweiye cönä’ja’to dea, tönnacontoncomo iiñonoojätöödöje mmaja, jidaawa aca Noé womontojo anootoi’chädö aca tödööene. Tunaamä cöneejä yaawä; tameedä cönä’jajoicho dhawä.

²⁸ Mädääje mmaja cönä’ja’dea Doote weichawä. Tönwanno wääwashinchäjä’näje töweiye cönä’ja’to, wätäätöijanääje mmaja, audaajä aichödööje mmaja, maa amääjätöödöje mmaja.

²⁹ Yaawä Sodhooma ñanno Doote weja’ca’jäcä wa’to cönä’mei caju ñanno, acuudajadä dhatu’jödö joccato jadä, tameedä töja’to’comooje.

³⁰ Mädääje mmaja na’dede yaawä Soto nnedö wäänejoodawä.

³¹ “Yää anooto awä ñäädä tömmai ye’wono tönnöjäätödö wetä tä’saca omoomöi’che töwä’ta’jäcä. Yääje mmaja ñäädä audaajä acaano, jataaca mma ennacai’chede.

³² Ätö’tatääcä Doote jiñamo wei’jödö jäcä.

³³ Ñäädä töweichö ewontänei, töweichö nennanö’ca’de. Ñäädä töweichö u’nei mmaane, töweichö neneea’de.

³⁴ “Edääje wä’döa äwwäiñe, Soto nnedö we’tojo coijaichawä aacä naato’de äänawä. Tooni nataadäja’de; yeichacoono mmaane tadä’da na’de.

³⁵ Aacä wodiiñamo naato’de äätönnäcä, cödheede cödööje. Tooni nataadäja’de, yeichacoono mmaane tadä’da na’de.

³⁶ Aacä dhanwaacomo naato’de audaajä aca; tooni nataadäja’de; yeichacoono mmaane tadä’da na’de; quee cönä’döaacä Jesuuquidiito.

³⁷ Yää eta’jäcä Jesuuquidiito cöneecamma’joicho: —¿Äsha tameedä mädä neja’dä’aanä’de, Cajiichaana? quee cönä’döa’to. Töwö cönä’döaacä chäwwäiñe: —Tänäämö cätaajä dö’tä cuduumu we’jummadööcomo töweiye nai; quee cönä’döaacä Jesuuquidiito.