DUUCA 16 - Wanaadi A'deddu

Jödaata edhaajä chäänöngemjönö’jödö

¹ Edääje mmaja Jesuuquidiito cönä’döa’dea tönoowanoomadö wwäiñe: —Dhanwa cönä’jaacä töjöödataichato. Töwö shootoi töweiye cönä’jaacä, iiñödö edhaajä. Anejjacoomo cöneecammaicho yaawä ñäädä töjöödataichato wwä dhanoonö chäänönge’da ijöödatai acoichadööje yeichö.

² Yääje mma yaawä ñäädä dhanwa tanoonö cönä’dejjai; cönä’döaacä: “ ¿Aaqueneeto mädä äjääcä näätaadö? Sa’donna ecammacä tameedä ataadawaajui’jödö. Önnödö edhaajäje eijai’cha ma eduuwa;” quee cönä’döaacä.

³ Yaawä ñäädä iiñöjäätödö edhaajä töwwäädä cöntö’tajä’acä: “Ane’cäämö wödööanä eduuwä? Yeedhajä yu’ca’se na mädä taadawaajuije yeichö jonno. Jäduuje’da tö’ta, nono töcaaneije etaadawa’cajoojai’cha. Aateme’jai’cha wa dea, töjöiye.

⁴ Yoowanääcä na öwwä tödöötojo, tötaadawaajuiche’da wä’döa’jäcä tömmai chacaiñe soto yöödöiyeto’de yaawä;” quee cöntö’tajä’acä.

⁵ Yaawä tooni nshai töwö cöna’dejjaicho tameedä tädhaajä ejeeque’nä’nnamo. Töwö cönä’döaacä awa’deenato weejödö wwä: “Ä’waasa’cä yeedhajä mejeeque’nä’anä?” quee cönä’döaacä.

⁶ Ñäädä cönä’döaacä yaawä: “Ijaatoodea soto daata chaatö wejeeque’nä’a;” quee cönä’döaacä. Yaawä ñäädä jödaata edhaajä jajeeda cuntui chäwwä, ñejeque näjöödö imennaajä a’täi; cönä’döaacä chäwwä: “Ma’da’cä ataajimaacä. Anejjeque’näjöödö imennaajä chamjiyaacacä; aacä sotooto de’wä amoojadä mma aneejeque’näjöödö imennäcä;” quee cönä’döaacä ñäädä jödaata edhaajä.

⁷ Anejja daja töwö cöneecamma’joi chea: “ ¿Amäädä ’na, ä’waasa’cä mejeeque’nä’anä amäädä?” quee. Ñäädä cönä’döaacä: “Ijaatoodea soto saacu äiña wejeeque’nä’a;” quee cönä’döaacä. Ñäädä jödaata edhaajä jajeeda cuntui chäwwä, ñeejeque’näjöödö imennaajä a’täi. “Edä ajaajedai”; quee cönä’döaacä, “aneejeque’näjöödö imennaajä chamjiyaacacä; aacäichea soto mma aneejeque’näjöödö imennäcä;” quee cönä’döaacä.

⁸ Yaawä chäädhajä aashicha cöna’deuwöi ñäädä tanoonö chäänöngemjönö jäcä, tösejjeque tödööjätö’jödö weijäcä chäwwä. Edä nono de’woncomo tösejjeque jeene naato töjimmotoncomo tödöödö jäcä, tawaanato awoncomo e’jodheiñe’cä.

⁹ “Yääje wä’döa äwwäiñe, edä nono conemjönö de’wono mösooma que aashichaato tödöötäcä’de ajimmotoncomo jäcä; yää mösooma wataamea’jäcä adha’dejjannamo töweiye yeichö wetä, weichojo töwaatamemjönö ña äwä’döa’comjäcä.

¹⁰ “Ñäädä mänö’cä mmädä chäänönge tödöönei, joojato mmaja chäänönge tödööjai ña dea. Ñäädä ’quene mänö’cä mmädä chäänönge ännöjöönö, joojato mmaja chäänönge ännö’da eijai ña.

¹¹ Edä nono de’wono mösooma chäänönge ännö’da aweiya’comjäcä, ¿aaquene mmaja aashichaato jaiñoone äwwäiñe ä’tuduude’ ?

¹² Ännödööcomoojönö chäänönge ännö’da aweiya’comjäcä, ¿aaquene mmaja ännödööcomo neene äwwäiñe ä’tuduude’ ?

¹³ “Aacä tädhaajä tödööjai’che weiñä nai. Yääje tödööa’jäcä tooni mma ijummajai ña ñäädä yaawä, yeichacoono ämjumma’da mma. Yeichacoono jadä aashicha etaadawa’cajoojai ña, yeichacoono ’quene chiiñeme’jai. Mädääje mmaja änwanno, a’nädäncädä ijummajai’cha maato, Wanaadi mmaja, mösooma mmaja; que cönä’döaacä Jesuuquidiito soto wwäiñe.

¹⁴ Ñanno jaadiseeo, jödaata jummannamo, yääje yä’dödö cöneetajä’a’to; Jesuuquidiito cönenno’jä’a’to yaawä.

¹⁵ Yaawä Jesuuquidiito cönä’döaacä chäwwäiñe: —Änwanno soto neneedöcoomoje mmädä aashicha äwäänejo’seiñe määnetääne. Wanaadi mmaane ätö’tajäätödööcomo jaiñoone dhowaanäcä na. Yaa aashichaato wa’cä soto wwäiñe yäänedö naadö, Wanaadi wwä mmaane cone’da na.

Waanontänä jäcä, Wanaadi töcaajichaanaije weiñä jäcä mmaja, Jesuuquidiito wa’deuwö’jödö

¹⁶ “Juan Wautiita jona tödööene waanontänä Moisé nimennä’jödö cönä’jaacä, Wanaadi wa’deuwödö ecammannamo nimenno’jocoomo mmaja. Juan jonno mmaane Wanaadi töcaajichaanaije tödöödö jäcä aashichaato wätunnä nätääcammajä’a. Tameedä soto Wanaadi sotoije nä’döaato töjääduduucomo que.

¹⁷ “Caju, nono wataametaame, tooni waanontä’jä imennä’jödö’cä täma’da dea eijai ña.

Töjiiñamo e’nomjadö jäcä Jesuuquidiito nowaanoma’jödö

¹⁸ “Ñäädä töjiiñamo e’nomjanei, anejja wodi yö’tä yä’döa’jäcä yaawä, conemjönö nödööa. Ñäädä e’nomjaajä dö’tono wä’dödö mmaja conemjönö nödööa dea.

Tönsomaacato wei’jödö, Dáasado wei’jödö mmaja

¹⁹ “Dhanwa töweiye cönä’jaacä, tönsomaacato. Töwö töweewontä cönä’jaacä aashichaato que, camiisha täjeeto awä mmaja. Anooto waadäi jooje töwääwashinchä cönä’jaacä töjimmä jadäiñe.

²⁰ Yäätä cönä’ja’dea töwaateme’cato wentumjato, Dáasadooje chäätö. Ñäädä tönsomaacato nata’tajo töwaatajiimä töwö cönä’jaacä, tucuunujä’e jooje.

²¹ Tönsomaacato meesai ye’wono wä’medö täcu’se töweiye cönä’jaacä. Sö’na töwe’e cönä’ja’to chuunujäätö’jödö ame.

²² Yääje mma yaawä ñäädä wentumjato cönäämai. Amoode caju ñancomo cönaadoicho yaawä Awadán döiña, Aashichaato ña. Yaawä ñäädä tönsomaacato cönäämai chea. Cöneewaacaicho yaawä.

²³ Yä’ja’a’como weicho’como ña ñäädä tönsomaacato’jödö cönäädantäi yaawä, wäntunaanö’näje. Amoinche Aawadán cöneeneaacä, Dáasado chääjadä.

²⁴ Yaawä töwö cöncä’tömöi: “Jaaja Aawadán, wentumje cäneecä. Dáasado anontäcä tamäädö dhadaadö eccudäiye tuna que, nuudu eccudä eejöiye. Jooje wäntunaanö’a sadä wa’to nwaca;” quee cönä’döaacä.

²⁵ Aawadán cönä’döaacä chäwwä: “Ätö’tacä önnedö, nudä aweichö aashicha awei’jödö jäcä, Dáasado wäntunaanö’taame. Eduuwa töwö täncanoode’da na, amäädä äwäntunaanö’taame.

²⁶ Dhanwadö mmaja cantawäiñe na dea. Eetonno adöiña töötä’sato täjai’cha na; chäänönge mmaja mänsenno ñaa döiña töweejö’sato e’jai’cha;” quee cönä’döaacä Aawadán.

²⁷ Yaawä ñäädä tönsomaacato’jödö cönä’döaacä: “Jaaje Aawadán, yääje yeiya’jäcä jaaja döiña Dáasado anontäcä’de,

²⁸ ijaatoodea’como yaacontomo döiñaiñe mmaja, chäwwäiñe ecammaiye, sadä mma eejö’notoode, wäntunaanö’tojo aca mmaja;” quee cönä’döaacä.

²⁹ Aawadán cönä’döaacä chäwwä: “Moisé nimennä’jödö töweiye na chäwwäiñe, Wanaadi wa’deuwödö ecammannamo nimenno’jocoomo mmaja. Yääne neta’ña’to;” quee Aawádan cönä’döaacä chäwwä.

³⁰ Yaawä ñäädä tönsomaacato’jödö cönä’döaacä: “Ng’jn, Jaaja Aawadán, yäämaajä’jödö yöiñaiñe iicha’jäcääne, yaawääne tötö’tajäätödööcomo sha’duminchajai ñaato;” quee cönä’döaacä.

³¹ Yaawä Aawadán cönä’döaaca chäwwä: “Moisé nimennä’jödö aneeta’da yeiya’comjäcä, Wanaadi wa’deuwödö ecammannamo nimenno’jocoomo mmaja, töwäämaajo jonnoto yaadoncaajä eneetaame töwwäiñe tötö’tajäätödööcomo änsa’dumincha’da dea eijai ñaato;” quee cönä’döaacä Aawadán ñäädä tönsomaacato’jödö wwä; quee cönä’döaacä Jesuuquidiito.